Zotërimi Doktrinor: Alma 39:9

“Mos shko më pas epsheve të syve të tua”

Izabela duke kaluar përbri Koriantonit

Në studimin tënd të kapitullit tek Alma 39, ti mësove rreth rëndësisë së të jetuarit të ligjit të dëlirësisë dhe se si t’i bësh ballë tundimit duke u mbështetur te Jezu Krishti. Ky mësim mund të të ndihmojë të mësosh përmendsh fragmentin e zotërimit doktrinor dhe frazën kyç të shkrimit të shenjtë për vargjet tek Alma 39:9, ta shpjegosh doktrinën që jepet mësim në këtë fragment dhe t’i zbatosh në situata nga jeta reale parimet e marrjes së njohurisë shpirtërore.

Nxitini nxënësit të përpiqen me vetëdije për t’u bërë si Jezu Krishti. Ndërsa nxënësit përpiqen të bëhen më shumë si Jezu Krishti, ndihmojini ata t’i dallojnë nxitjet nga Fryma e Shenjtë që të përcaktojnë mënyrat se si ata mund të përmirësohen. Nxitini nxënësit t’i marrin parasysh me lutje hapat specifikë që mund të ndërmarrin në përpjekjet e tyre për t’u bërë më shumë si Shpëtimtari.

Përgatitja e nxënësve: Ftojini nxënësit të nisin ta mësojnë përmendsh frazën kyç të shkrimit të shenjtë për vargun tek Alma 39:9. Mund t’i nxitni gjithashtu të përpiqen ta mësojnë përmendsh të gjithë vargun.

Veprimtari të Mundshme të të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “Alma 39”, që është mësimi kontekstual për fragmentin e zotërimit doktrinor tek Alma 39:9. Nëse ky mësim për fragmentin e zotërimit doktrinor duhet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Shpjego dhe mëso përmendsh

Fraza kyç e shkrimit të shenjtë për zotërimin doktrinor për vargun tek Alma 39:9 është “Mos shko më pas epsheve të syve të tua”. Përdore metodën vijuese ose një tjetër që e zgjedh ti, për të të ndihmuar ta mësosh përmendsh referencën dhe frazën kyç të shkrimit të shenjtë.

dy sy brenda një rrethi me një vizë të hequr

Merreni parasysh ta shkruani në tabelë vargun tek Alma 39:9 dhe të vizatoni dy sy në një rreth me një vizë të hequr. Jepuni nxënësve disa minuta për ta studiuar frazën kyç të shkrimit të shenjtë, më pas ftojini disa nxënës të vijnë në tabelë dhe ta shkruajnë frazën rreth vizatimit. Thuajeni fragmentin e shkrimit të shenjtë dhe frazën kyç me zë të lartë së bashku si klasë disa herë derisa nxënësit ta kenë mësuar përmendsh atë.

Më pas, merreni parasysh t’i ftoni disa nxënës të vijnë përpara klasës për ta interpretuar me role skenarin vijues.

Imagjino sikur je një misionar/e që po i mëson dikujt për ligjin e dëlirësisë për herë të parë. Përshkruaj shkurtimisht se çfarë është ligji i dëlirësisë dhe përdor vargun tek Alma 39:9 për të shpjeguar se si zbatohet ai.

Ushtroje vënien në zbatim

Jepuni nxënësve një mundësi që t’i rishikojnë parimet e marrjes së njohurisë shpirtërore te paragrafët 5–12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2022). Pasi t’i rishikojnë, ftojini ata të zgjedhin një fjalë të rëndësishme nga secili parim që ata e ndiejnë se e përshkruan më mirë atë. Nxënësit mund ta tregojnë më pas fjalën që ata zgjodhën dhe arsyen.

Përdoreni skenarin vijues ose merreni parasysh ta përshtatni atë për t’i plotësuar më mirë nevojat e nxënësve, për t’i ndihmuar ata t’i zbatojnë parimet e marrjes së njohurisë shpirtërore.

Ilirit i pëlqen të kalojë kohë në mediat shoqërore. Ai është krijues dhe përdor platforma të ndryshme të mediave shoqërore për të dhënë mesazhe pozitive. Megjithatë, ai sheh gjithashtu shumë përmbajtje që është e papërshtatshme dhe hera-herës edhe pornografike. Në fillim e bezdisnin, por me kalimin e kohës ai po ndihet gjithnjë e më mirë me to. Madje, kohët e fundit, ai kërkon më shumë nga kjo lloj përmbajtjeje. Aktualisht ai nuk është më i shqetësuar për zgjedhjet që po bën.

Mblidh ide se si kuptueshmëria dhe zbatimi i parimeve të marrjes së njohurisë shpirtërore mund ta ndihmojnë Ilirin t’i shohë shqetësimet për veprimet e tij të tanishme. Pyetjet dhe burimet vijuese mund të ndihmojnë.

Merreni parasysh ta shkruani pyetjen e parë të secilës pjesë më poshtë në tabelë dhe t’i ftoni nxënësit t’i diskutojnë përgjigjet e tyre në dyshe ose në grupe të vogla. Ndërsa nxënësit punojnë në grupe, ecni nëpër dhomë dhe dëgjojeni se çfarë diskutojnë. Shtoni pyetje të tjera dhe burimet e renditura më poshtë sipas nevojës për t’i ndihmuar nxënësit t’i përdorin më tej parimet e marrjes së njohurisë shpirtërore.

Shqyrtoji konceptet dhe pyetjet me një këndvështrim të përjetshëm

• Si mund ta shqyrtojë Iliri situatën e tij me një këndvështrim të përjetshëm?

• Si mund të bëjnë ndryshim përpjekjet e tij për t’i mbajtur mendimet e tij të pastra gjatë gjithë jetës së tij në tokë dhe në jetën e ardhshme?

• Si mund të ndikojnë përpjekjet e tij në marrëdhënien e tij me Atin Qiellor?

Kërko kuptueshmëri të mëtejshme nëpërmjet burimeve të caktuara në mënyrë hyjnore

• Cilët janë disa shembuj të burimeve të caktuara në mënyrë hyjnore që mund ta ndihmojnë Ilirin? Si mund të ndihmojë vargu tek Alma 39:9?

Nëse nxënësve u nevojitet ndihmë për t’i gjetur burimet e caktuara në mënyrë hyjnore, merreni parasysh të jepni burimet vijuese.

• Për Forcën e Rinisë: Një Udhëzues për Bërjen e Zgjedhjeve (broshurë, 2022), “Çfarë të bëni tani për tani”

• Mosia 4:30; 3 Nefi 12:28–30; Doktrina e Besëlidhje 42:23; 121:45

• Biseda të konferencave të përgjithshme rreth pastërtisë seksuale, pornografisë ose medias shoqërore që i gjen në programin Gospel Library [Biblioteka e Ungjillit] ose faqen ChurchofJesusChrist.org

Vepro me besim 

• Çfarë mund të bëjë Iliri që të veprojë me besim dhe “të mos shko[jë] më pas epsheve të syve [të tij]”? (Alma 39:9.)

• Si mund t’i ndihmojë përpjekjet e tij orvatja për t’u kthyer te Krishti?

• Cila doktrinë nga plani i Atit Qiellor mund ta ndihmojë Ilirin dhe pse?

• Si mendon se parimet e marrjes së njohurisë shpirtërore mund ta ndihmojnë Ilirin ta dallojë rrezikun e veprimeve të tij të tanishme?

• Çfarë mund të bënte ai për të bërë ndryshime të përhershme?

Kur grupet ta mbarojnë diskutimin e tyre, ftojini ata t’ia tregojnë klasës atë që mësuan. Ndërsa nxënësit shprehen, pohojeni vlerën e komenteve të tyre. Gjithashtu, merreni parasysh t’u bëni nxënësve pyetje që i ndihmojnë të ndërveprojnë si klasë, si “Pse mendoni se është e rëndësishme ajo që shokët tuaj të klasës treguan?” ose “Si mund të jetë i dobishëm zbatimi i asaj që shoku juaj i klasës i tregoi Ilirit?”

Përsëritja e zotërimit doktrinor

Gjatë një mësimi të ardhshëm, tregojuni nxënësve një figurë të dy syve brenda një rrethi me një vizë të hequr dhe ftojini ata të kujtojnë se cili fragment i zotërimit doktrinor shkon me të. Thuajeni frazën kyç të shkrimit të shenjtë së bashku disa herë për ta përsëritur.