Alma 37

“Nëpërmjet Gjërave të Vogla dhe të Thjeshta”

Ndonjëherë problemet tona duken shumë të mëdha dhe të ndërlikuara, saqë ne supozojmë se edhe zgjidhet duhet të jenë të mëdha dhe të ndërlikuara. Megjithatë, Alma i dha mësim djalit të tij, Helamanit, se Zoti shpesh përdor gjëra të vogla dhe të thjeshta për të bërë gjëra të mëdha, siç është t’i lejojë shkrimet e shenjta të na tregojnë “udhën nga duhe[t] të shko[jmë]” në jetën tonë (Alma 37:40). Ky mësim ka për qëllim të të ndihmojë ta ushtrosh besimin tënd te Jezu Krishti ndërsa e studion fjalën e Tij në shkrimet e shenjta.

Nxitni studimin e përditshëm të shkrimeve të shenjta. Studimi i përditshëm vetjak i shkrimeve të shenjta siguron një mundësi të qëndrueshme për nxënësit që të mësojnë ungjillin, të zhvillojnë dëshmi dhe të dëgjojnë zërin e Zotit. Hera-herës nxënësit mund të ndihen të shkurajuar ose mund t’iu nevojitet shtysë për të studiuar më rregullisht. Kërkoni mundësi për të dëshmuar për fjalët e Zotit dhe për t’i nxitur nxënësit t’i studiojnë shkrimet e shenjta çdo ditë.

Përgatitja e nxënësve: Nxitini nxënësit që, ndërsa bëjnë studimin e përditshëm të shkrimeve të shenjta, të reflektojnë mbi bekimet që ai sjell në jetën e tyre, sidomos mbi mënyrën se si ai i ndihmon ata të vijnë te Krishti.

Veprimtari të Mundshme të të Mësuarit

Madhësia e gjërave të vogla dhe të thjeshta

Shkruajini në tabelë fjalët i/e vogël dhe i/e thjeshtë.

• Cilat janë disa gjëra të vogla dhe të thjeshta që bëjnë një ndryshim të madh në jetën tënde?

Merreni parasysh të tregoni fotografitë ose të diskutoni për shembuj, të tillë si një furçë dhëmbësh, një mesazh në celular, një ushtrim ose një vepër e thjeshtë shërbimi.

Përndryshe, mund t’i pyesni nxënësit a kanë ndonjë gjë të vogël me vete që ka një ndikim të madh në jetën e tyre, të tillë si një fotografi të familjes, një telefon ose një kuletë. Ftojini ata ta tregojnë se çfarë është dhe të flasin për ndikimin e madh që ka ajo gjë.

Siç shënohet tek Alma 37, Alma i besoi Helamanit një përgjegjësi të rëndësishme që Zoti e përdori për të ndikuar shumë te fëmijët e Perëndisë. Lexo tek Alma 37:1–2, 5–7 për të parë se çfarë ishte dhe përse ishte kaq e rëndësishme.

Nëse do të doje të shihje një material filmik që i portretizon këto vargje, shikoje [“Alma Këshillon Bijtë e Tij” nga kodi kohor 3:15 deri në 5:05, në dispozicion në kishaejezukrishtit.org]. Ndiqe rrëfimin në shkrimet e tua të shenjta.

Një e vërtetë që mund të mësojmë tek Alma 37 është se Zoti i përdor shkrimet e shenjta për t’u sjellë shpëtim shumë njerëzve.

• Si mendon, pse Zoti i përdor shkrimet e shenjta për t’i ndihmuar njerëzit ta ndërtojnë besimin te Jezu Krishti dhe të vijnë tek Ai për shpëtim?

Ndërsa e vazhdon studimin tënd, përsiati këto pyetje: Si ndihmojnë shkrimet e shenjta për t’i sjellë njerëzit te Jezu Krishti dhe shpëtimi i Tij? Si duhet të studioj në mënyrë që t’i marr këto bekime të mëdha?

Nëse nuk e ndien se po i merr këto bekime të mëdha nëpërmjet studimit të shkrimeve të shenjta, kërko udhërrëfimin e Frymës së Shenjtë për të ditur se çfarë mund të të duhet të dallosh ose ndryshosh.

Merreni parasysh t’i ndani nxënësit në grupe ose në dyshe dhe t’u caktoni atyre njërën nga veprimtaritë vijuese. Pasi t’i përfundojnë, ftojini nxënësit ta tregojnë atë që mësuan. Në varësi të kohës dhe nevojave të orës mësimore, merreni parasysh t’i kryeni të dyja veprimtaritë si klasë.

Veprimtaria A: Fuqia e madhe e shkrimeve të shenjta

Alma i kujtoi Helamanit mënyrat se si shkrimet e shenjta ndikuan shumë te nefitët dhe lamanitët. Lexo tek Alma 37:8–10, 14, duke kërkuar bekimet e mrekullueshme që Zoti i solli nëpërmjet shkrimeve të shenjta. Merre parasysh t’i shenjosh këto bekime ose t’i renditësh ato në ditarin tënd të studimit.

• Cilat nga këto bekime të bënë përshtypje? Përse?

Merreni parasysh tʼi shkruani në tabelë bekimet që përmendin nxënësit.

Alma dha mësim se shkrimet e shenjta e “kanë zgjeruar kujtesën e këtij populli” (Alma 37:8). Plaku D. Tod Kristoferson, i Kuorumit të Dymbëdhjetë Apostujve, e shpjegoi këtë bekim:

“Kujtesën tonë shkrimet e shenjta e zgjerojnë duke na ndihmuar që përherë të kujtojmë Zotin dhe marrëdhënien tonë me Të dhe me Atin. Na rikujtojnë për ato që dinim në jetën paratokësore. Dhe kujtesën tonë ato e zgjerojnë në një kuptim tjetër, duke na mësuar në lidhje me epoka, njerëz dhe ngjarje që nuk i përjetuam vetë.” (D. Tod Kristoferson, “Bekimi prej Shkrimeve të Shenjta”, Liahona, maj 2010, f. 33)

• Kur e ke përjetuar ti ose të tjerë që ti njeh një nga këto bekime të studimit të shkrimeve të shenjta?

• Si mendon se shkrimet e shenjta na sjellin “në njohurinë e Zotit … dhe të gëzohe[mi] në Jezu Krishtin”? (Alma 37:9)

Merreni parasysh të tregoni një përvojë vetjake ose një material filmik të dikujt, që e ilustron këtë.

Veprimtaria B: Liahona dhe fjalët e Krishtit

Pasi i dha Helamanit këshillë shtesë, Alma i krahasoi fjalët e Krishtit me një gjë të veçantë të vogël e të thjeshtë që e përdorën Lehi dhe familja e tij: Liahona. Reflekto mbi atë që ti di rreth Liahonës.

Paraqiteni një figurë të Liahonës, si figura vijuese. Merreni parasysh t’i ftoni nxënësit ta tregojnë atë që dinë rreth Liahonës.

Lexo tek Alma 37:38–46 duke kërkuar gjërat e vogla dhe të thjeshta që familjes së Lehit iu desh t’i bënte në mënyrë që Liahona t’i udhërrëfente ata.

Për të të ndihmuar të mendosh se si mësimet e Almës rreth Liahonës gjejnë zbatim në studimin e shkrimeve të shenjta, gjeje një çast për ta përshkruar sa vijon:

1. Studimi i shkrimeve të shenjta me besim te Perëndia (shih tek Alma 37:40). Çfarë e bën këtë studim të ndryshëm nga llojet e tjera të studimit?

2. Të bëhesh “përtac” dhe të harrosh ta “ushtrosh besimin dhe zellin” nëpërmjet studimit të shkrimeve të shenjta (Alma 37:41).

Merreni parasysh t’i ftoni nxënësit t’i tregojnë përvojat që i kanë ndihmuar ata të shohin se si Zoti mund t’i përdorë shkrimet e shenjta si një “tregues” për të na “treg[uar] udhën nga duhe[t] të shkoj[më]” në jetën tonë (Alma 37:38, 40).

Studimi vetjak i shkrimeve të shenjta

Reflekto mbi synimet e tanishme të studimit vetjak të shkrimeve të shenjta, zakonet, si dhe përvojat. Mbaji shënim në ditarin tënd se çfarë rregullimesh të vogla mund të bësh për t’i lejuar Zotit të të bekojë në mënyra madhështore. Sa vijojnë janë disa sugjerime:

Studioji shkrimet e shenjta duke e kërkuar më shumë “njohurinë e Zotit” ose të “gëzohe[sh] në Jezu Krishtin” (Alma 37:9).

• Kjo mund të përfshijë kërkimin për përmendje të Jezu Krishtit, roleve të Tij dhe misionit të Tij. Ndërsa i përcakton këto përmendje, mund të mendosh rreth asaj se si Jezu Krishti kryen role të ngjashme në jetën tënde. Mund t’i mbash shënim shprehjet e mirënjohjes në ditarin tënd ose në një program Gospel Library [Biblioteka e Ungjillit] ndërsa i gjen ato.

Trego besim te Perëndia ndërsa studion (shih tek Alma 37:40).

• Kjo mund të përfshijë kërkimin e mënyrave se si të veprosh sipas asaj që po studion dhe të vish te Krishti. Ti mund të përpiqesh rregullisht t’i përgjigjesh pyetjes “Si mund të më ndihmojë ajo që po studioj të vij te Krishti për t’i marrë bekimet e Tij dhe ta ndjek shembullin e Tij?”. Mund t’i mbash shënim përgjigjet e tua në një ditar.

Përcaktoje në studimin tënd se si mund ta shmangësh të qenit “përtac” dhe harresën që ta “ushtrosh besimin dhe zellin” (Alma 37:41).

• Kjo mund të përfshijë përzgjedhjen e një kohe të rregullt çdo ditë për t’i studiuar shkrimet e tua të shenjta. Mund të ftosh gjithashtu një pjesëtar të familjes ose shok që ta ndjekë rregullisht ecurinë e përpjekjeve tuaja për studimin e shkrimeve të shenjta. Nëse është në dispozicion, mund të caktosh çdo ditë një kujtues kalendarik në telefon ose në pajisje të tjera digjitale.

Përmbylleni orën mësimore duke treguar mënyrat se si Zoti ka sjellë gjëra madhështore në jetën tuaj nëpërmjet studimit nga ana juaj të shkrimeve të shenjta.

Komente dhe Informacion për Rrethanat

Përse është e rëndësishme t’i studiojmë shkrimet e shenjta çdo ditë?

Presidenti Rasëll M. Nelson dha mësim sa vijon:

“Nëse nuk po e kërkoni gjithashtu Zotin nëpërmjet lutjes dhe studimit të përditshëm të ungjillit, ju e lini veten të cenueshëm nga filozofitë që mund të ngjallin kureshtje, por që nuk janë të vërteta. Edhe shenjtorët që përndryshe janë besnikë, mund të dalin nga udha prej ritmit të vazhdueshëm të bandës së Babilonisë.

Vëllezërit dhe motrat e mia, ju përgjërohem që të gjeni kohë për Zotin! Bëjeni themelin tuaj vetjak shpirtëror të fortë dhe të aftë për t’i qëndruar provës së kohës duke bërë ato gjëra që e lejojnë Frymën e Shenjtë të jetë me ju gjithmonë.” (Rasëll M. Nelson, “Gjeni Kohë për Zotin”, Liahona, nëntor 2021, f. 120)

“Zhytja e përditshme në fjalën e Perëndisë është jetike për mbijetesën tonë shpirtërore, veçanërisht në këto ditë të rrëmujës në rritje. Teksa ushqehemi me bollëk përditë me fjalët e Krishtit, fjalët e Krishtit do të na thonë se si të reagojmë ndaj vështirësive me të cilat kurrë nuk menduam se do të përballeshim.” (Rasëll M. Nelson, “Dëgjojeni Atë”, Liahona, maj 2020, f. 90)

Si mund të gjej kohë për studimin e shkrimeve të shenjta në jetën time të ngarkuar?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

“Mos iu dorëzoni gënjeshtrës së Satanit se ju nuk keni kohë për t’i studiuar shkrimet e shenjta. Zgjidhni që ta gjeni kohën për t’i studiuar ato. Ushqyerja me bollëk me fjalën e Perëndisë çdo ditë është më e rëndësishme sesa gjumi, shkolla, puna, shfaqjet televizive, videolojërat apo mediat shoqërore. Mund t’ju duhet të riorganizoni përparësitë tuaja për të siguruar kohë për studimin e fjalës së Perëndisë. Nëse ju duhet, bëjeni atë!” (Riçard G. Skot, “Bëjeni Ushtrimin e Besimit Përparësinë Tuaj Parësore”, Liahona, nëntor 2014, f. 93)

Veprimtari Plotësuese të të Mësuarit

Fillim alternativ

Si një fillim alternativ i mësimit, merreni parasysh t’u shpërndani një copë letër të vogël dhe t’i ftoni nxënësit të shkruajnë në mënyrë anonime çdo pengesë me të cilën përballen gjatë studimit të tyre të shkrimeve të shenjta. Pasi t’i mblidhni letrat, ftojini disa nxënës t’i shkruajnë pengesat në tabelë ndërsa i lexoni ato me zë të lartë. Ftojini nxënësit të kërkojnë gjëra në mësimin sot që mund ta ndihmojnë dikë t’i kapërcejë këto pengesa.

Alma 37:21–32. Parime të ndryshme rreth mëkatit dhe pendimit

Meqë ka shumë parime që mund të gjenden tek Alma 37:21–32, merreni parasysh t’i ftoni nxënësit t’i lexojnë këto vargje dhe të gjejnë një parim që mund të na ndihmojë sot. Disa prej këtyre parimeve mund të përfshijnë sa vijon: Satani punon në fshehtësi; nuk mund t’ia fshehim mëkatet tona Perëndisë dhe mëkati çon në vuajtje dhe shkatërrim shpirtëror. Nëse përqendroheni te këto parime, mund të jetë e dobishme ta theksoni dashurinë dhe dëshirën e Perëndisë për pendimin tonë.