Almà 36

“Tsy nety nahatsiaro intsony ny fanaintainako [aho]”

Ny fizarana zavatra niainana ara-panahy mahafinaritra amin’ireo olona akaiky antsika dia afaka ny ho loharanon-kery ho azy ireo sy ho antsika. Rehefa niresaka tamin’i Helamàna zanany lahy i Almà, dia nitantara ny zavatra niainany momba ny fahitana anjely, ny fahatsapana ilay fampijalian’ny fahotany azy, ary ny fahitana fanafahana tamin’ny alalan’i Jesoa Kristy. Ity lesona ity dia natao hanampiana anao hitodika amin’i Jesoa Kristy amim-pinoana sy hahatsapa ny fifalian’ny fanafahany.

Fahaiza-manao eo amin’ny fandalinana—fanisiana marika ny andinin-tsoratra masina. Ny fanisiana marika ny soratra masina dia afaka manampy ny mpianatra hanao fampifandraisana manan-danja sy hitadidy ny zavatra ianaran’izy ireo. Azon’izy ireo atao ny manipika, mandoko amin’ny endrika miavaka, na manoritra ny teny na andian-teny manan-danja. Ny soratra masina amin’ny endrika elektrônika dia ahitana fitaovana manampy amin’ny fanisiana marika ny soratra masina.

Fanomanana ny mpianatra: Asao ny mpianatra ho tonga ao am-pianarana efa vonona hizara ohatra iray momba ny olona iray izay nahita fiadanana tao amin’i Kristy taorian’ny fotoana nijaliana. Inona no nanampy an’io olona io hahita fiadanana?

Ireo sahanasa fianarana azo atao

Zavatra mifanohitra

Hanombohana ity lesona ity, dia ampio hieritreritra fiovana ara-panahy sy ny zavatra manamora ny fitrangan’izany ny mpianatra. Fomba iray hanaovana izany ny fanoratana ireto teny manaraka ireto eny amin’ny solaitrabe sy ny fanasana ny mpianatra hanoratra ny mifanohitra amin’ny tsirairay amin’izy ireo.

• Fanaintainana →

• Nenina →

• Alahelo →

Saintsaino ny fotoana mety ho nanotanao sy niainanao fahatsapana iray eo amin’ny ankavia. Efa lasa ilay zavatra nolazainao teo amin’ny ankavanana ve izany fahatsapana izany? Inona no niseho ka nahatonga izany fiovana izany ho azo notanterahina?

Aorian’ny fifanakalozana hevitra momba ilay zavatra eo ambony, dia azonao hamafisina fa rehefa misy fahatsapana zavatra ratsy vokatry ny fahotana, dia ny Tompo ihany no afaka manampy antsika hanova ireo fahatsapana ireo ho lasa fahatsapana tsara izay mifanohitra amin’izy ireo.

Omeo fahafahana ny mpianatra hisaintsainany mangina ny fomba nanampian’ny Tompo azy ireo hiova rehefa nanota izy ireo. Asehoy ity fanombanan-tena manaraka ity ary angataho ny mpianatra mba hirakitra an-tsoratra ao amin’ny diary fandalinan’izy ireo ny fahatsapana rehetra ananan’izy ireo eo am-pisaintsainana. Izany dia mety ho fanontaniana, na fahatsapana, na bitsika mba handray andraikitra.

Saintsaino hoe hatraiza ny fahamarinan’ireto teny nambara manaraka ireto aminao:

• Rehefa nanota aho, dia fantatro ny fomba fitodihana amin’ny Tompo mba handraisana famelan-keloka sy fiadanana ary fanantenana.

• Manana fahatokiana aho fa afaka miova amin’ny alalan’ny fanampian’ny Tompo aho.

• Mitodika amin’ny Tompo tsy tapaka aho mba hahazoako io fanampiana io.

Anio ianao dia handalina ny fomba niovan’ny fahatsapana fanaintainana lalina nananan’i Almà Zanany noho ny fahotany ho lasa fahatsapana fifaliana sy fiadanana rehefa nitalaho tamin’ny Mpamonjy izy. Eo am-pandalinanao, dia tadiavo ny fomba ahafahanao mikatsaka ny fanampian’ny Tompo handresena ny fahotana sy ny vokany ary hiainana fifaliana amin’ny alalan’i Jesoa Kristy.

Ny fiovana mahery vaikan’i Almà

Taorian’ny nandavan’izy ireo ny filazantsara izay nampianarina azy ireo, ny Zôramita dia niaraka tamin’ny Lamanita mba hamokisana fahatezerana amin’ny Nefita ny fon’izy ireo. Avy eo dia nanafika ny Nefita ny Zôramita sy Lamanita, ka niteraka ady lehibe izany. Fon’ny Nefita maro ihany koa no “nanomboka nihamafy” teo anatrehan’ny tenin’ Andriamanitra (Almà 35:15). Ho setrin’ny fihemorana ara-panahin’ny Nefita, i Almà dia namory ireo zanany lahy mba “hahazoany manome ny tsirairay avy ny andraikiny manokana avy, momba ny zavatra mikasika ny fahamarinana” (Almà 35:16). Niresaka tamin’i Helamàna zanany lahy izy aloha ary nitantara ny fiovam-pony.

Asehoy ity sary manaraka ity. Asao hiasa miaraka amina mpiara-mianatra aminy ny mpianatra mba hamaliana ity fanontaniana manaraka ity.

Safidy iray hafa azo atao ny manoratra teny mitovitovy amin’ireto manaraka ireto eny amin’ny solaitrabe: Almà, zanakalahin’i Môzià, mamotika fiangonana, anjely, telo andro. Avy eo dia angataho hamerina hitantara ilay tantara amin’ny alalan’ny fampiasana ny tsirairay amin’ireo teny na andian-teny ireo ny mpianatra miara-miasa.

• Inona no tsaroanao momba an’i Almà Zanany sy ny zavatra aseho eo amin’io sary io?

Vakio ny Almà 36:6–11 ary tadiavo ireo antsipirian-javatra izay mety tsy hitanao.

• Nahoana araka ny eritreritrao no nisy fiantraikany mahery vaika teo amin’i Almà ny tenin’ilay anjely?

• Ankoatra ny fahitana anjely, inona no mety hitarika ny olona iray hahatsapa fa mila miova izy?

Azonao atao ny manampy ny mpianatra hahatakatra ny lanjan’ny fanisiana marika ny soratra masina sy mamporisika azy ireo hampihatra io fahaiza-manao io mandritra ity lesona ity. Raha misy ilay safidy, dia hevero ny hampiseho soratra masina amin’ny endrika elektrônika na vita printy sy haneho fomba fanisiana marika andinin-tsoratra masina.

Amin’ity sahanasa manaraka ity, hevero ny hanasa ny mpianatra hanisy marika ny teny sy andian-teny amin’ny fomba samihafa. Hevero ny hamita ny andian’andininy voalohany miaraka amin’ny iray kilasy, ka haneho ohatra ny fomba fanaovana ilay sahanasa ho azy ireo. Avy eo dia azon’ny mpianatra atao ny mamita samirery ny andian’andininy faharoa sy fahatelo. Rehefa vitan’izy ireo izany, dia azon’izy ireo atao ny mizara amin’ny namana miara-miasa amin’izy ireo na amin’ny iray kilasy ny zavatra hitan’izy ireo sy ny fomba nanisian’izy ireo marika izany.

Vakio ny famaritan’i Almà ny zavatra niainany sy tsapany nandritra ny telo andro tsy nahafahany nihetsika ato amin’ireto andian’andininy manaraka ireto. Hevero ny hanisy marika ny zavatra aroso.

• Almà 36:12–16: teny na andian-teny izay milazalaza ny fahatsapan’i Almà momba ny fahotany

• Almà 36:17–18: teny na andian-teny izay milaza ny zavatra tsaroan’i Almà sy nataony ka nitarika tamin’ny fiovany

• Almà 36:19–21: teny na andian-teny izay milazalaza momba an’i Almà izay nahatsapa zavatra mifanohitra amin’ny zavatra niainany tamin’ny voalohany

Omeo fahafahana hizara ny zavatra tsikaritr’izy ireo na nianaran’izy ireo rehefa nandalina ny andininy 12–21 ny mpianatra. Raha ilaina, hevero ny hametraka fanontaniana toy ny hoe “Inona no tsikaritrao tamin’ny alalan’ny fampitahana ny fihetseham-pon’i Almà talohan’ny fiovany sy taorian’ny fiovany?” Azonao atao ihany koa ny mametraka ny sasany amin’ireto fanontaniana manaraka ireto.

• Inona no manaitra anao momba ny zavatra nitarika ny fiovan’i Almà?

• Inona no fahamarinana azontsika ianarana avy amin’ny zavatra niainany?

Fahamarinana iray azontsika ianarana ny hoe Manana hery hanafahana antsika amin’ny fanaintainan’ny fahotantsika sy hamenoana antsika amin’ny fifaliana i Jesoa Kristy.

• Ahoana no nanasan’i Almà ny herin’ny fanafahan’ny Mpamonjy?

Ireto teny nambara manaraka ireto dia afaka manampy ny mpianatra hahatakatra misimisy kokoa ilay fahamarinana natao sora-matevina. Azonao atao ny manasa ny mpianatra handalina ny andininy 24–26, hitadiavana ny fomba nampiharan’i Almà finoana an’i Jesoa Kristy.

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nanazava hoe:

Tsy voatery mahafantatra ny zava-drehetra aloha ianao izay vao hiasa ho anao ny herin’ny Sorompanavotana. Manàna finoana an’i Kristy fa hanomboka hiasa amin’ny andro angatahanao azy izany! (Boyd K. Packer, “Washed Clean,” Ensign, mey 1997, 10)

Nampianatra toy izao ny Loholona Neil L. Andersen ao amin’ny Kôlejin’ny Apôstôly Roambinifolo:

Rehefa mibaboka marina tokoa amin’ny fahotantsika isika, ka manonitra izay vitantsika amin’ireo izay nanaovantsika ny tsy mety, ary mahafoy ny fahotantsika amin’ny alalan’ny fitandremana ny didy, dia eo an-dalam-pahazoana ny famelan-keloka izay isika. Rehefa mandeha ny fotoana dia ho tsapantsika fa mihena ny fijaliantsika noho ny alahelo, ka “manaisotra ny heloka hiala ny fontsika” ary mitondra “fiadanan-tsaina.” (Neil L. Andersen, “Repent … That I May Heal You,” Liahona, nôv. 2009, 42)

• Inona avy no fahatakarana hafa azonao tamin’ireo teny nambara ireo?

Mety hanampy raha marihana fa ny fanampiana avy amin’i Jesoa Kristy dia afaka manomboka amin’ny fotoana angatahantsika izany, saingy ny dingan’ny fibebahana sy ny fahatsapana ho voavela heloka dia mety handeha miandalana kokoa.

Hevero ny hanasa ny mpianatra hifanakalo hevitra anatina vondrona kely na tsiroaroa amin’ny fihetsika mety hasetrin’izy ireo an’ireto toe-javatra manaraka ireto.

Inona no holazainao amin’ny tanora iray izay:

• Mahatsapa nenina sy fanaintainana lehibe vokatry ny fahotany.

• Mahatsapa fa tsy mahatsiravina ny fahotany ary hivaha ho azy eny izany ka tsy mila fibebahana rehefa mandeha ny fotoana.

Makà fotoana hisaintsainana ny toe-javatra misy anao manokana sy ny fomba ahafahan’ny lesona androany mihatra amin’ny fiainanao. Eritrereto ny zavatra iray mety azonao atao anio mba hitodihana amin’ny Mpamonjy sy hanasana ny herin’ny fanafahany ho eo amin’ny fiainanao.

Hevero ny hizara ny fijoroana ho vavolombelona anananao momba ny fomba nitahiana anao tamin’ny alalan’ny hery manasitran’ny Mpamonjy sy ny fahatokianao ny faniriany hitondra fiadanana sy fifaliana eo amin’ny fiainan’ny mpianatrao.

Fanazavana sy fampahalalana avy amin’ny zava-miseho

Almà 36:12–16. Inona no dikan’ireo teny sasany nampiasain’i Almà?

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra izao:

Midika hoe “nampahoriana” ny hoe nampijaliana. Fitaovana fampijaliana iray ny chevalet tamin’ny andro fahiny, izay nampatoriana ilay voaheloka ka nafatotra tamin’ny kofehy mifandray amin’ny hazo boribory ny kihon-tanana sy kihon-tongony, izay azo nahodina avy eo mba hiteraka fanaintainana tsy hay zakaina.

Fitaovana misy vy maranitra ny fihogon-tany. Rehefa atosika amin’ny tany izany dia mandrovitra sy mamaky ny tany. Matetika ny soratra masina no miresaka momba ny fanahy sy ny saina “[rotidrotiky]” ny fahamelohana.

Ny hoe mampahory dia midika hoe “manolana,” fomba fampahoriana iray izay manaintaina loatra ka na dia ny tsy manan-tsiny aza dia mibaboka. (Boyd K. Packer, “The Touch of the Master’s Hand,” Ensign, May 2001, 23)

Almà 36:19. Raha mibebaka ve aho dia hadinoko ny fahotako?

Rehefa niresaka momba ny fahatsiarovana ny fahotantsika ny Loholona Dieter F. Uchtdorf ao amin’ny Kôlejin’ny Apôstôly Roambinifolo, dia nanazava izao:

Miezaka mampino antsika i Satana fa tsy voavela ny helotsika satria afaka mahatsiaro azy ireny isika. Mpandainga i Satana; miezaka ny mampanjavozavo ny fahitantsika sy mitondra antsika lavitra ny lalan’ny fibebahana sy ny famelan-keloka izy. Tsy nampanantena Andriamanitra fa tsy hahatsiaro ny fahotantsika intsony isika. Hanampy antsika hiala amin’ny famerenana indray ilay fahadisoana ny fahatsiarovana. Kanefa halefahana eny an-dalana eny ny fahatsiarovana ny fahotantsika raha toa ka mijanona ho marina sy mahatoky isika. Ho ampahan’ny fanasitranana ilaina sy ny dingan’ny fanadiovana izany. Nijoro ho vavolombelona i Almà fa taorian’ny nihiakany tamin’i Jesoa mba hahazoany famindram-po, dia mbola afaka nahatsiaro ny fahotany izy, kanefa ny fahatsiarovana ny fahotany dia tsy nankarary na nampijaly azy intsony, satria fantany fa voavela ny helony (jereo ny Almà 36:17–19). (Dieter F. Uchtdorf, “Point of Safe Return,” Liahona, May 2007, 101)

Manao ahoana ny fijaliana ao anatin’ny fibebahana raha mitaha amin’ny fijaliana hiainantsika raha tsy mibebaka isika?

Nampianatra izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Tsy hisy dikany ny fanaintainana nateraky ny fibebahana raha oharina amin’ny zavatra takana mba hanefana ny fitakian’ny fahamarinana amin’ireo fandikan-dalàna tsy nohitsina. Tsy dia niresaka firy mikasika ny zavatra niaretany ny Mpamonjy mba hanefana ny fitakian’ny fahamarinana sy hanonerana ny otantsika, kanefa nanao ity fanambarana ity Izy:

“Fa indro, Izaho Andriamanitra dia efa nijaly tamin’ireo zavatra rehetra ireo ho an’ny rehetra, mba tsy hahatonga azy ireo hijaly raha mibebaka;

“Nefa raha tsy mety mibebaka izy ireo dia tsy maintsy mijaly tahaka Ahy;

“Fijaliana izay nahatonga ny Tenako, Ilay Andriamanitra, Ilay lehibe indrindra noho ny rehetra, hangovitra noho ny fangirifiriana sy hivoa-dra amin’ ny mason-koditra rehetra, ary hijaly na vatana na fanahy—ary niriko ny mba tsy hisotroako ilay kapoaka mangidy” (F&F 19:16–18). (D. Todd Christofferson, “Ilay fanomezana masin’ ny fibebahana,” Liahona, nôv. 2011, 40)

Sahanasa fianarana fanampiny

Kiasima (vadi-drafi-pehezan-teny mifanaraka)

Hevero ny hanampy ny mpianatra hahatakatra fa ny Almà 36 dia ohatra iray amin’ny endrika literatiora Hebreo fantatra amin’ny hoe kiasima. Ny teny na ny hevitra ao anatin’ny kiasima dia alamina amin’ny filaharana iray ary avy eo dia averina lazaina amin’ny filaharana mivadika. Io famerenana io dia manasongadina hevitra na teny manan-danja, ary matetika ny hevi-dehiben’ny mpanoratra dia eo anivon’ilay kiasima.

Eo amin’ilay tabilao etsy ambany, mariho fa ny hafatra fototr’ilay kiasima dia hita ao amin’ny Almà 36:17–18, rehefa nitodika tamin’i Jesoa Kristy mba hahazo fanamaivanana i Almà.

Raha misafidy ny hampiditra io fampahalalana io ao amin’ny lesona ianao, dia tandremo mba tsy hanolo ny votoaty fototry ny Almà 36 izany.

Almà 36:2–3, 27–29. Raha mankatò an’ Andriamanitra isika dia hanohana antsika ao anatin’ny fitsapana lalovantsika Izy.

Raha hitan’ny mpianatra io fahamarinana io, dia ampio hampitombo ny fahatakaran’izy ireo izany izy ireo amin’ny alalan’ny fangatahana azy ireo mba hitady tantara hafa ao amin’ny soratra masina hanampiana ireo izay noresahin’i Almà ka manamafy io fahamarinana io. Avy eo dia hevero ny hanasa ny mpianatra hampihatra ny fampiasana ny iray na mihoatra amin’ireo tantara ireo mba hanazavana amin’ny olona iray hafa ny fomba ahafahan’ Andriamanitra manampy azy amin’ny fitsapana lalovany. Mety azonao atao ny manome ny mpianatra rafi-tantara iray momba ny olona iray izay mahatsapa ho kivy noho ny fizahan-toetra atrehiny.

Fifaliana lehibe fatratra tokoa

Hevero ny hanasa ny mpianatra hamaky ny Almà 36:25–26 hitadiavana ny fiantraikan’ny ezaka nataon’i Almà tamin’ny fampianarana ny filazantsara teo aminy sy ny hafa. Azon’ny mpianatra atao ny mizara ny zavatra hitan’izy ireo. Ampio hahatakatra ny mpianatra fa afaka mahazo fifaliana lehibe isika rehefa mikatsaka ny hitondra ny hafa ho eo amin’i Kristy.