Almà 39

“Lavo amin’ny tenanao kosa ireny zavatra rehetra ireny”

Ankehitriny eto amin’izao tontolo izao dia tarihin’i Satana hino ny olona maro fa azo ekena ny firaisana ara-nofo ivelan’ny fanambadiana. Ny Ray any An-danitra sy i Jesoa Kristy dia nanome antsika ny lalàn’ny fahadiovam-pitondrantena mba hahazoantsika fiarovana, fiadanana ary fahasambarana. Nanoro hevitra am-pitiavana ny zanany lahy Kôriantôna i Almà mpaminany mba hamoy ny fahotany sy hibebaka amin’ny fahotany, tafiditra ao anatin’izany ny fandikana ny lalàn’ny fahadiovam-pitondrantena. Ity lesona ity dia afaka manampy anao hahatakatra ny maha-zava-doza ny fahalotoam-pitondrantena sy ny fomba hanoherana ny fakam-panahy handika ny lalàn’ny fahadiovam-pitondrantena.

Ampio hahatakatra sy hikatsaka fiovam-po ny mpianatra. Ny fiovam-po dia dingam-piovana mitohy ary fandrosoana ara-panahy izay asehontsika amin’ny alalana ezaka marina mandritra ny fiainantsika. Mitadiava fahafahana hanome zavatra iainana izay ahafahan’ny mpianatra mahalala sy mitia ary manaraka an’i Jesoa Kristy sy ny filazantsarany naverina tamin’ny laoniny.

Fanomanana ny mpianatra: Asao ny mpianatra mba hieritreritra izay zavatra fantatr’izy ireo momba ny lalàn’ny fahadiovam-pitondrantena, ny fahatsapan’izy ireo momba izany ary ny fanontaniana mety hananan’izy ireo.

Ireo sahanasa fianarana azo atao

Ny lalàn’ny fahadiovam-pitondrantena

Hevero ny hanoratra eny amin’ny solaitrabe ireto teny nambara manaraka ireto. Manovà na mampidira teny nambara izay mety hanomana tsara kokoa ny mpianatrao hianatra momba ny lalàn’ny fahadiovam-pitondrantena.

Vakio ireto teny nambara manaraka ireto ary fantaro hoe iza amin’ireto manaraka ireto no tena maneho ny zavatra tsapanao:

• Tsy ekeko

• Tsy ekeko amin’ny ankapobeny

• Ekeko amin’ny ankapobeny

• Ekeko

1. Ny zatovo ao amin’Ny Fiangonan’i Jesoa Kristy ho an’ny Olomasin’ny Andro Farany dia mahatakatra mazava ny lalàn’ny fahadiovam-pitondrantena, na ny lalàn’ny Tompo momba ny fahadiovam-pitondrantena.

2. Takatr’izy ireo ny antony mahatonga azy io ho manan-danja sy ny antony hitiavan’ny Tompo antsika hiaina azy io.

3. Mety ho sarotra ny hitandrina ny lalàn’ny fahadiovam-pitondrantena eo amin’izao tontolo izao ankehitriny.

4. Ny zatovo ao amin’ny Fiangonana dia mahafantatra ny fomba fanoherana fakam-panahy sy ny fomba fihazonana ny tenan’izy ireo ho madio ara-nofo.

Asao hilaza na manaiky na tsia an’ireo teny nambara etsy ambony ny mpianatra sy hilaza ny anton’izany.

Ny lalàn’ny fahadiovam-pitondrantena no lalàn’ny Tompo momba ny fahadiovana ara-nofo. Ny fankatoavana ny lalàn’ny fahadiovam-pitondrantena dia midika hoe fihazonana ny tenanao hadio amin’ny eritreritra sy teny ary zavatra atao, ao anatin’izany ny fanalavirana izay zavatra pôrnôgrafika rehetra. Midika hoe fisorohana izay mety ho firaisana ara-nofo alohan’ny fanambadiana ihany koa izany ary fahatokiana tanteraka amin’ny vadinao mandritra ny fanambadiana. “Fahotana lehibe ny fanaovana firaisana ara-nofo eo amin’ny samy lehilahy na eo amin’ny samy vehivavy, toy ireo karazana fandikana hafa ny lalàn’ny fahadiovam-pitondrantena. Mifanohitra amin’ireo tanjon’ny fananahana eo amin’ny olombelona izany” (Sujets de l’Évangile, “Chasteté,” topics.ChurchofJesusChrist.org). (

Makà fotoana hisaintsainana ny fahatakaranao sy ny fahatsapanao momba ny lalàn’ny fahadiovam-pitondrantena. Inona avy ireo fanontaniana anananao? Nahoana no manan-danja aminao izany? Inona no fakam-panahy mahakasika ny fahadiovam-pitondrantena atrehinao? Rehefa mandalina ity lesona ity ianao, dia mikaroha valiny momba ireo fanontanianao sy fanampiana handresena ny fakam-panahy atrehinao.

Nanoro hevitra an’i Kôriantôna zanany lahy i Almà

Ny Almà 39 dia voalohany amin’ireo toko efatra ahitana torohevitra, didy, ary fampianarana avy amin’i Almà ho an’i Kôriantôna zanany lahy. I Kôriantôna dia niaraka tamin’ny rainy sy i Siblôna rahalahiny nitory ny filazantsara tamin’ny Zôramita. Nandritra io iraka io anefa dia nanao fahotana lehibe i Kôriantôna.

Vakio ny Almà 39:1–5 hitadiavana ny fahadisoana nataon’i Kôriantôna sy ny fahatsapan’i Almà sy ny Tompo momba izany. (Ny teny hoe vehivavy janga ao amin’ny andininy 3 dia ilazana vehivavy ratsy fitondrantena na mpivarotena.)

Asao ny mpianatra mba hizara teny na andian-teny ao amin’ny soratra masina izay milaza ny zavatra nataon’i Kôriantôna sy ny fahatsapan’i Almà sy ny Tompo momba izany.

Mba hanampiana anao hisaintsaina ny antony maha-“mampalahelo” ny ray sy ny mpaminany (Almà 39:3) sy maha-“fahavetavetana eo imason’ny Tompo” (Alma 39:5) ny fandikana ny lalàn’ny fahadiovam-pitondrantena, dia mety hilaina ny fahatakarana ireo fitahiana avy amin’ny fitandremana izany. Mamakia momba ireo fitahiana sy hery ao amin’ny “Fanajana ny lalàn’ny fahadiovam-pitondrantena” ao amin’ny pejy 26 ao amin’ny Ho zatovo mahery!: Torolalana amin’ny fanaovana safidy (boky kely, 2022).

Avelao hizara ny zavatra hitan’izy ireo ny mpianatra.

• Ahoana no anomanan’ny fitandremana ny lalàn’ny fahadiovam-pitondrantena anstika handray fitahiana lehibe avy amin’ny Tompo eto amin’ity fiainana ity sy any amin’ny fiainana ho avy?

Hevero ny hanoratra ireto fanontaniana roa manaraka ireto eny amin’ny solaitrabe sy hanasa ny mpianatra hiasa tsiroaroa na ao anatina vondrona kely hitady valiny ao amin’ny soratra masina. Avy eo dia ifanakalozy hevitra amin’ny iray kilasy ny fanontaniana roa manaraka.

• Inona no hiseho raha tsy mibebaka noho ny fahalotoam-pitondrantena ny olona iray? (Almà 39:7–9)

• Inona no vokany izay matetika tsinontsinoavina amin’ny fandikana ny lalàn’ny fahadiovam-pitondrantena? (Almà 39:11–13)

• Miainga amin’ny zavatra nianaranao, nahoana no mahatsapa zavatra mahery vaika toy izany mikasika ny fahadiovam-pitondrantena ny ray na reny iray, sy ny mpaminany, ary ny Tompo?

• Ahoana no anehoan’ny lalàn’ny fahadiovam-pitondrantena ny fitiavan’ Andriamanitra ny zanany?

“Tsy handehananao intsony araka ny fitsiriritan’ny masonao”

Ankoatra ny fampianarana ny zanany lahy momba ny maha-goavana ny fahalotoam-pitondrantena, i Almà dia nampianatra an’i Kôriantôna ihany koa ny fomba fisorohana ny fanaovana hadisoana toy izany any aoriana.

Avereno jerena ny Almà 39:9 sy ny Almà 39:13 hitadiavana teny na andian-teny izay afaka manampy anao hanohitra fakam-panahy sy hitandrina ny lalàn’ny fahadiovam-pitondrantena. (Ny andian-teny hoe “lavo amin’ny tenanao” ao amin’ny andininy 9 dia midika hoe fampiharana fifehezan-tena.)

Ny Almà 39:9 dia andinin-tsoratra masina fifehezana fotopampianarana. Hevero ny hanisy marika ireo andinin-tsoratra masina fifehezana fotopampianarana amina fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hanao fanazaran-tena eo amin’ny fampiharana ny fotopampianarana nampianarina tao amin’io andininy io amina fanontaniana na toe-javatra misy iray.

Asao hizara ny zavatra hitan’izy ireo ny mpianatra.

• Inona no fitsipika nampianarin’i Almà an’i Kôriantôna ao amin’ireo andininy ireo?

Fitsipika iray mety ho hita avy amin’ireo andininy ireo ny hoe rehefa mampihatra fifehezan-tena sy mitodika amin’ny Tompo isika, dia afaka mandresy ny fakam-panahy handika ny lalàn’ny fahadiovam-pitondrantenan’ Andriamanitra.

Indraindray dia mety ho sarotra ny mampihatra fifehezan-tena sy ny mitodika amin’ny Tompo handresena ny fakam-panahy. Mety hanampy ny fieritreretana fomba isan-karazany hanaovana izany ary avy eo manaraka ny bitsika avy amin’ny Fanahy momba ny zavatra tena hahasoa anao.

Alohan’ny hanaovana ity sahanasa manaraka ity, hevero ny hanasa zatovo hikaon-doha mikasika ireo fomba ahafahan’izy ireo mitodika amin’ny Tompo sy mandresy ny fakam-panahy handika ny lalàn’ny fahadiovam-pitondrantena. Avy eo dia azon’izy ireo atao ny roa amin’ireto manaraka ireto mba hanamafisana na hampidirana ny hevitr’izy ireo.

Hevero ny hanoratra izao manaraka izao eny amin’ny solaitrabe. Hevero ny hanala ilay horonan-tsary hiala ao amin’ny lisitra sy hanontany ny mpianatra aorian’ny fandalinan’izy ireo raha toa ka te hijery izany izy ireo.

1. Vakio ny ambin’ilay torohevitra momba ny fahadiovana ara-pitondrantena ao amin’ny Ho zatovo mahery!: Torolalana amin’ny fanaovana safidy (jereo ao amin’ny fizarana hoe “Ahoana ny amin’ny … ?” ny hoe “fahadiovana ara-pitondrantena”). Mba hahitana torohevitra fanampiny avy amina mpikambana ao amin’ny Kôlejin’ny Apôstôly Roambinifolo, dia hevero ny hamaky ny “Mino Isika fa tokony ho Madio Fitondrantena” (David A Bednar, Liahona, mey 2013, 41–44).

2. Mitadiava soratra masina tsapanao fa afaka mampatanjaka anao eo anatrehan’ny fakam-panahy handika ny lalàn’ny fahadiovam-pitondrantena. Afaka mitanisa hira ao amin’ny fihirana ihany koa ianao, na hiran’ny Kilonga mety hitodihanao hahazoana tanjaka rehefa alaim-panahy.

3. Mitanisà fomba ahafahanao miezaka “mitodika amin’ny Tompo” amin’ny “sainao sy ny herinao ary ny tanjakao rehetra” (Almà 39:13). Ampidiro ny zavatra nataonao tany amin’ny lasa ka tsapanao fa nampatanjaka anao.

4. Soraty ny torohevitra noraisinao tamin’ny ray aman-dreny sy mpitarika ao amin’ny Fiangonana izay afaka manampy anao hanohitra fakam-panahy.

5.   ChurchofJesusChrist.org.

Rehefa afaka minitra maromaro, hevero ny hanasa mpianatra maro hizara ny hevitr’izy ireo sy ny fomba mety hanampian’ireo hevitra ireo azy ireo handresy fakam-panahy. Raha tsapanao fa mety ho sahirana hifanakalo hevitra malalaka momba io resaka io ny kilasinao, dia asao hizara tsy an-kitonona anarana ny eritreritr’izy ireo eo amina taratasy ny mpianatra. Angony ireo taratasy ary vakio amin’ny iray kilasy.

Fandinihana ataon’ny tena manokana

Makà fotoana hisaintsainana ny antony anirianao hijanona ho madio ara-nofo. Avy eo dia raketo an-tsoratra ny dingana hataonao mba hanajana tsy tapaka ny lalàn’ny fahadiovam-pitondrantenan’ny Tompo. Diniho ny zavatra mety ho namporisihan’ny Fanahy Masina anao mba hatao, ary raketo an-tsoratra ao amin’ny diary fandalinanao ireo eritreritra hafa rehetra. Raha nandika ny lalàn’ny fahadiovam-pitondrantena ianao na ny olona iray fantatrao, dia tsarovy fa i Jesoa Kristy dia “tonga hanaisotra ny fahotan’izao tontolo izao” (Almà 39:15) ary hamela ireo rehetra mibebaka amin-kitsimpo sy mahafoy ny fahotany (jereo ny Môzià 26:30, Almà 39:9).

Hevero ny hijoro ho vavolombelona.

Fanazavana sy fampahalalana avy amin’ny zava-miseho

Almà 39:5. Nahoana no mifanakaiky amin’ny famonoana olona ny fahalotoam-pitondrantena raha ny maha-goavana azy no jerena?

Fony izy mpikambana tao amin’ny Fitopololahy dia nampianatra izao ny Loholona Bruce C. Hafen:

Angamba misy singa iraisana amin’ireo zavatra roa ireo—ny tsy fahadiovam-pitondrantena sy ny famonoana olona. Izy roa ireo dia misy ifandraisany amin’ny aina, izay mahakasika ilay herin’ Andriamanitra ambony indrindra. Ny famonoana olona dia ahitana fanesorana aina tsy ara-dalàna; ny fandikan-dalàna ara-nofo dia mety hahitana fanomezana aina tsy ara-dalàna, na ny fanovana tsy ara-dalàna ny loharano masin’ny hery manome aina. (Bruce C. Hafen, “The Gospel and Romantic Love,” New Era, Feb. 2002, 10)

Almà 39:6. Inona no dikan’ny hoe mandà ny Fanahy Masina?

Nampianatra izao ny Mpaminany Joseph Smith (1805–44):

Inona no tsy maintsy ataon’ny olona mba hanaovana ilay fahotana tsy hahazoana famelana? Tsy maintsy mandray ny Fanahy Masina izy, nisokatra taminy ny lanitra ary mahafantatra an’ Andriamanitra izy, ary avy eo dia nanota Taminy taty aoriana. Tsy misy fibebahana ho an’ny olona iray rehefa avy nanota tamin’ny Fanahy Masina izy. Mila milaza izy fa tsy mamiratra ny masoandro kanefa mahita izany izy, mila mandà an’i Jesoa Kristy izy rehefa avy nosokafana taminy ny lanitra ary mandà ny drafitry ny famonjena kanefa mahita ny fahamarinan’izany ny masony. (Joseph Smith, ao amin’ny History, 1838–1856 [Manuscript History of the Church], boky E-1, 1976, josephsmithpapers.org, mari-potoana sy fanaovana sora-baventy nohavaozina; jereo ihany koa ny “Accounts of the ‘King Follett Sermon,’” josephsmithpapers.org).

Almà 39:13. Ahoana no ahafahako mifehy tsara kokoa ny eritreritro sy misoroka faniriana feno filan-dratsy?

Ny Loholona Ulisses Soares avy ao amin’ny Kôlejin’ny Apôstôly Roambinifolo dia nampianatra hoe:

Mijoro ho vavolombelona aho fa rehefa miantehitra amin’ny vatolampin’ny famonjena, dia ilay Mpamonjy ny fanahintsika isika, … dia hitombo be ny fahafahantsika mifehy ny eritreritsika. … Avy eo dia hihena ny herin’ny fakam-panahin’ilay fahavalo eo amintsika, ka izany dia hiteraka fiainana sambatra sy madio ary masina kokoa. (Ulisses Soares, “Mikatsaka an’i Kristy amin’ny eritreritra rehetra,” Liahona, nôv. 2020, 84)

Sahanasa fianarana fanampiny

Fanombohana hafa

Hevero ny hanao lisitra eny amin’ny solaitrabe ny lainga momba ny lalàn’ny fahadiovam-pitondrantena toy ireto manaraka ireto:

1. Tsy afaka ny ho zava-dehibe toy izany ny lalàn’ny fahadiovam-pitondrantena raha olona be dia be eo amin’izao tontolo izao no tsy miaina izany.

2. Tsy goavana izany ny fanaovana fahotana ara-nofo.

3. Afaka manao fahotana ara-nofo tsy misy fiantraikany amin’olon-kafa na iza na iza aho.

Anontanio ny mpianatra hoe inona amin’ireo na inona amin’ireo lainga hafa momba ny fahadiovam-pitondrantena no efa henon’izy ireo ary nahoana no mety hino izany ny olona sasany. Asao hikatsaka fahatakarana misimisy kokoa ny mpianatra ary hanitsy ireo teny nambara ireo rehefa mandalina ny Almà 39 izy ireo.

Horonan-tsary

Raha tianao kokoa ny handefa fanehoana amina horonan-tsary ny Almà 39, dia hevero ny hijery ny “Alma avertit son fils, Corianton, qu’il doit se repentir” manomboka eo amin’ny mari-potoana 0:23 hatramin’ny 2:40.

Mozika masina

Rehefa mifanakalo hevitra momba ny fomba ahafahan’izy ireo manohitra sy mandresy fakam-panahy ny mpianatra, dia hevero ny hihira sy hihaino hira toy ny “Mila Anao aho” (Fihirana sy hiran’ny ankizy, no. 23) na ny “O Jésus, quand je pense à toi” (Cantiques, no. 76). Asao ny mpianatra hisaintsaina sy hifanakalo hevitra momba ny fomba ahafahan’ny mozika masina manampy azy ireo hihazona ny eritreritr’izy ireo ho madio.