Helaman 3; 6

“Sa Gayon Nakikita Natin”

Kunwari ay sumusulat ka ng isang liham para tulungan ang mga taong mabubuhay nang daan-daang taon sa hinaharap. Iyan mismo ang ginawa ng propetang si Mormon. Nang paikliin niya ang kasaysayan ng mga Nephita at iniukit ito sa mga laminang ginto, paminsan-minsan ay binibigyang-diin niya ang mahahalagang katotohanan gamit ang mga pahayag na tulad ng “sa gayon nakikita natin.” Ang mga katotohanang binigyang-diin niya ay makatutulong sa atin sa mga hamong kinakaharap natin ngayon. Ang lesson na ito ay makatutulong sa iyo na matukoy ang mga katotohanan mula sa mga banal na kasulatan at masuri kung paano makakaimpluwensya ang mga katotohanang iyon sa iyong buhay.

Tulungan ang mga estudyante na matuto mula sa mahahalagang salita at parirala. Ang ilang salita o parirala sa mga banal na kasulatan ay makapagbibigay ng mga pahiwatig batay sa konteksto para sa mga mambabasa. Tulungan ang mga estudyante na makilala ang mga salitang tumutukoy sa mahahalagang doktrina at alituntunin na nauugnay sa panahon ngayon.

Paghahanda ng estudyante: Sabihin sa mga estudyante na maghanap ng isa o dalawang mahahalagang katotohanan sa kanilang personal na pag-aaral ng mga banal na kasulatan o pag-aaral ng mga banal na kasulatan kasama ang pamilya. Sabihin sa kanila na maghandang ipaliwanag kung paano sila nakahanap ng makabuluhang katotohanan sa mga banal na kasulatan.

Mga Posibleng Aktibidad sa Pag-aaral

Isang gabay sa kaligtasan

Simulan ang lesson sa isang aktibidad na makatutulong sa mga estudyante na pag-isipan kung paano naging kapaki-pakinabang ang mga banal na kasulatan sa kanilang buhay. Makatutulong ito sa kanila na hangaring mas masigasig na saliksikin ang doktrina at mga alituntunin sa mga banal na kasulatan. Ang sumusunod ay isang paraan upang magawa ito.

• Kung ikaw ay nahilingan magsulat ng isang gabay sa kaligtasan para sa paaralan para sa mga 12 at 13 taong gulang, ano ang isasama mo?

Basahin ang sinabi ni Pangulong Russell M. Nelson tungkol sa isang gabay sa kaligtasan para sa iyong buhay:

Binigyang-inspirasyon ng Panginoon ang mga propeta [sa Aklat ni Mormon] upang makita nila ang ating panahon at pumili sila ng mga doktrina at katotohanan na lubos na makatutulong sa atin. Ang Aklat ni Mormon ay ang ating gabay sa mga huling araw para manatiling ligtas. (Russell M. Nelson, “Yakapin ang Bukas nang may Pananampalataya,” Liahona, Nob. 2020, 75)

• Paano nakatutulong sa iyo ang doktrina at mga katotohanang nakikita mo sa mga banal na kasulatan na espirituwal na makaligtas? May naiisip ka bang anumang bagong halimbawa?

Sa pag-aaral mo ng Helaman 3 at Helaman 6, magkakaroon ka ng pagkakataong magsanay na tumukoy ng doktrina at mga alituntunin mula sa mga banal na kasulatan. Makatutulong ito sa iyo na magkaroon ng mas makabuluhang pag-aaral ng mga banal na kasulatan at mas mailalapit ka nito at ang iyong pamilya kay Cristo.

“Sa gayon, nakikita natin …”

Sa gitna ng lahat ng alitan na nakatala sa Helaman 1–6, may mga pansamantalang sandali ng kapayapaan. Sa Helaman 3, libu-libo ang nabinyagan sa Simbahan, at umunlad ang Simbahan. Sa Helaman 6, kasunod ng pagbabalik-loob ng maraming Lamanita, ang mga Nephita at Lamanita ay namuhay nang may pagkakaisa nang kapwa bumaling ang dalawang pangkat sa Panginoon. Sa dalawang kabanatang ito, tumigil si Mormon sa kanyang pagsasalaysay ng tungkol sa kasaysayan ng mga Nephita upang bigyang-diin ang mahahalagang doktrina at alituntunin ng katotohanan. Ginawa niya ito sa pamamagitan ng paggamit ng pahayag na “sa gayon nakikita natin.”

Ang sumusunod na aktibidad ay naglalayong sanayin ang mga estudyante na hanapin ang mga salita o parirala na tutulong sa kanila na matukoy ang doktrina o mga alituntunin at makita kung paano makakaimpluwensya ang mga katotohanang iyon sa kanilang buhay.

Maaari mong ilagay ang mga estudyante sa maliliit na grupo o pagpartner-partnerin sila at ipakita ang mga tagubilin para masunod nila.

Basahin ang Helaman 3:27–30; 6:34–36 upang matukoy ang mga pahayag ng katotohanan na “sa gayon nakikita natin.” Maaari mong markahan ang mga katotohanang iyon sa iyong mga banal na kasulatan at isulat ang mga ito gamit ang sarili mong mga salita sa iyong study journal.

Magkakaiba man ang mga gagamiting salita ng mga estudyante, maaaring makatukoy sila ng mga alituntunin na tulad ng sumusunod:

• Ang Panginoon ay maawain sa lahat ng taong nananawagan sa Kanya nang taos-puso (tingnan sa Helaman 3:27).

• Ang pintuan ng langit ay bukas sa lahat ng maniniwala kay Jesucristo (tingnan sa Helaman 3:28).

• Sinumang nagnanais ay mapag-aaralan ang salita ng Diyos, na aakay sa kanila patungo sa kaharian ng Diyos (tingnan sa Helaman 3:29–30).

• Kapag mas kilala natin ang Diyos, mas malamang na sundin natin ang Kanyang mga kautusan (tingnan sa Helaman 6:34).

• Kung tayo ay masasama at patitigasin ang ating puso, ang Espiritu ng Panginoon ay lalayo sa atin (tingnan sa Helaman 6:35).

• Kung pipiliin nating kusang maniwala sa mga salita ng Panginoon, ibubuhos Niya ang Kanyang Espiritu sa atin (tingnan sa Helaman 6:36).

Kung makikinabang ang mga estudyante sa mas malalim na pag-aaral ng isa o mahigit pa sa mga alituntuning ito, sumangguni sa mga bahaging “Komentaryo at Impormasyon ng Konteksto” at “Mga Karagdagang Aktibidad sa Pag-aaral” para sa mga ideyang matatagpuan sa Gospel Library App o sa Gospel Library Online.

Ang isa pang opsiyon ay bigyan ang mga estudyante ng mas maraming oras na magsanay na tumukoy ng mga katotohanan. Maaari mong hilingin sa kanila na isulat ang iba pang mga pahayag na “sa gayon nakikita natin” mula sa isang doctrinal mastery verse, na pinag-aralan nila kamakailan sa tahanan, o iba pang paboritong talata na kanilang napili.

Pagkatapos, pumili ng isa sa mga katotohanang nahanap mo, at ilista ang ilan sa mga espirituwal na panganib, hamon, o pagtuligsa sa pananampalataya kung saan matutulungan ka ng katotohanang ito na makaligtas. Halimbawa, kung gagamitin mo ang katotohanang kung pipiliin nating kusang maniwala sa mga salita ng Panginoon, ibubuhos Niya ang Kanyang Espiritu sa atin (tingnan sa Helaman 6:36), maaari mong ilista ang mga panganib na tulad ng kailangan munang may pagpapatunay ang siyensya bago maniwala sa mga banal na kasulatan, naniniwala sa mga eksperto sa mundo kaysa sa mga propeta, o nagtitiwala sa lohika kaysa sa mga espirituwal na impresyon.

Alalahanin ang pahayag ni Pangulong Nelson mula sa simula ng lesson na ito tungkol sa Aklat ni Mormon na ating gabay sa kaligtasan sa mga huling araw.

Kung mayroon, magbigay ng mga krayola, colored pencil, o marker para makagawa ang mga estudyante ng isang pahinang “gabay sa kaligtasan.” Magagawa nila ang sumusunod nang mag-isa o bilang mga grupo.

Isulat sa isang piraso ng papel ang “Paano makaliligtas …” at tapusin ang pahayag gamit ang isa sa mga panganib, hamon, o pagtuligsa na inilista mo. Halimbawa, kung ginamit mo ang naunang natukoy na katotohanan, maaari mong isulat ang, “Paano makaliligtas sa pagtuligsa sa espirituwal na impresyon.” Gamitin ang katotohanang pinili mo para makagawa ng isang pahinang gabay sa kaligtasan. Ipaliwanag sa mga drowing o salita kung paano makatutulong ang katotohanang ito sa isang teenager na espirituwal na makaligtas. Isama ang kahit dalawa sa mga sumusunod na ideya sa iyong gabay sa kaligtasan:

• Bakit makatutulong ang katotohanang ito sa isang tao na espirituwal na makaligtas sa paghihirap na inilista mo

• Iba pang mga banal na kasulatan na may kaugnayan sa katotohanang ito o tulong sa paghihirap na inilista mo

• Kung paano nagagawa ng katotohanang ito na ilapit ka o ang iba kay Jesucristo o kung paano ito nakatutulong sa iyo na matanggap ang Kanyang lakas

• Ano ang maaaring mangyari sa mga tao kung ang katotohanang ito ay hindi alam o hindi sinusunod

• Paano magbabago ang mundo kung pipiliin ng lahat na ipamuhay ang katotohanang ito

Sabihin sa mga estudyante na ibahagi ang kanilang gabay sa kaligtasan sa iba pang mga grupo o sa buong klase. Habang ginagawa nila iyon, maaari mo silang anyayahang magbahagi ng mga personal na karanasan nila na may kaugnayan sa mga katotohanang binigyang-diin nila. Halimbawa, kung ginamit ng mga estudyante ang katotohanang kung pipiliin nating kusang maniwala sa mga salita ng Panginoon, ibubuhos Niya ang Kanyang Espiritu sa atin (tingnan sa Helaman 6:36), maaari mong itanong kung paano nila nadama ang Kanyang Espiritu habang pinag-aaralan at ipinamumuhay ang Kanyang mga salita mula sa Aklat ni Mormon.

Hikayatin ang mga estudyante na alamin ang mahahalagang doktrina at katotohanan habang pinag-aaralan nila ang mga banal na kasulatan. Magpatotoo sa kapangyarihan ng salita ng Diyos.

Komentaryo at Impormasyon ng Konteksto

Helaman 3:27–28. Labis akong nahihirapan. Talaga bang bukas ang pintuan ng langit sa akin?

Itinuro ni Elder J. Devn Cornish ng Pitumpu:

Madalas na nagtatanong ang ating mga miyembro, “Sapat ba ang kabutihan ko?” o “Makakapunta ba talaga ako sa kahariang selestiyal?” Siyempre, wala naman talagang “magiging sapat na karapat-dapat.” Wala ni isa sa atin ang “magtatamo” o “magiging karapat-dapat” sa ating kaligtasan, ngunit natural lang na magtanong kung katanggap-tanggap tayo sa harapan ng Panginoon, na siyang pagkaunawa ko sa mga tanong na ito. …

… Ang Diyos ng langit ay hindi isang walang-pusong referee na naghahanap ng anumang dahilan para matanggal tayo sa laro. Siya ang ating lubos na mapagmahal na Ama, na ang higit na inaasam ay ang makabalik sa Kanyang piling ang lahat ng Kanyang mga anak at makasama Niya bilang mga walang-hanggang pamilya. Tunay ngang ibinigay Niya ang Kanyang Bugtong na Anak, upang huwag tayong mapahamak kundi magkaroon ng buhay na walang hanggan! [tingnan sa Juan 3:16]. Nawa’y maniwala kayo, at nawa’y umasa at mapanatag kayo sa walang hanggang katotohanang iyan. Nais ng Ama sa Langit na makamit natin ito! Iyan ang Kanyang gawain at Kanyang kaluwalhatian [tingnan sa Moises 1:39].

… Wala ni isa sa atin ang may “sapat na magagawa,” kung wala ang kabutihan at awa ni Jesucristo [tingnan sa 2 Nephi 2:6–8], ngunit dahil iginagalang ng Diyos ang ating kalayaang pumili, hindi rin tayo maliligtas kung hindi tayo magsisikap. (J. Devn Cornish, “Sapat na ba ang Kabutihan Ko? Magiging Karapat-dapat ba Ako?,” Liahona, Nob. 2016, 32–33, 34)

Helaman 6:35–36. Ano ang ibig sabihin ng nagsimulang lumayo ang Espiritu ng Panginoon?

Itinuro ni Elder David A. Bednar ng Korum ng Labindalawang Apostol na ang ating mga pinipili at ikinikilos ay maaaring maging sanhi ng paglayo natin sa Banal na Espiritu:

Kaya nga ang pangakong pagpapala [ng binyag at ng sacrament] ay nang sa tuwina ay mapasaatin ang Kanyang Espiritu, dapat tayong makinig at matuto sa mga pagpili at impluwensyang naglalayo sa atin sa Espiritu Santo.

Malinaw ang pamantayan. Kung may iniisip, nakikita, naririnig, o ginagawa tayong naglalayo sa atin sa Espiritu Santo, dapat tayong tumigil sa pag-iisip, pagtingin, pakikinig, o paggawa sa bagay na iyon. Kung ang layon ng isang bagay ay makalibang, halimbawa, naglalayo sa atin sa Espiritu Santo, walang dudang hindi para sa atin ang libangang iyon. Dahil hindi nananatili ang Espiritu sa bagay na malaswa, lapastangan, o mahalay, malinaw na hindi para sa atin ang mga bagay na yaon. Dahil itinataboy natin ang Espiritu ng Panginoon kapag ginagawa natin ang mga aktibidad na alam nating dapat iwasan, at dahil dito’y talagang hindi para sa atin ang mga bagay na iyon. (David A. Bednar, “Nang sa Tuwina ay Mapasaatin ang Kanyang Espiritu,” Liahona, Mayo 2006, 30)

Mga Karagdagang Aktibidad sa Pag-aaral

Helaman 3:27–28. “Ang Panginoon ay maawain sa lahat ng yaon na …”

Maaari mong markahan ang awa ng Panginoon sa pagtanggap sa lahat ng “nananawagan sa kanyang banal na pangalan” o “maniniwala sa pangalan ni Jesucristo” (Helaman 3:27–28).

Maaaring basahin ng mga estudyante ang Helaman 3:24–26, at alamin kung paano tinanggap ng Simbahan ang mga nagsisisi at ang mga pagpapalang natanggap nila mula sa Diyos. Isiping talakayin kung bakit nais ng Diyos na maging bahagi ng Kanyang Simbahan ang lahat ng tao at kung paano natin maipadarama sa lahat na sila ay tinatanggap at minamahal.

Helaman 3:28. Ang pintuan ng langit ay bukas sa lahat ng maniniwala kay Jesucristo

Maaari mong sabihin sa mga estudyante na i-cross reference ang Helaman 3:28 sa 2 Nephi 31:17–20. Talakayin kung paano natin binubuksan ang pintuan ng langit sa pamamagitan ng mga ordenansa ng binyag at kumpirmasyon. Maaari mo ring talakayin ang “landas na patungo sa buhay na walang hanggan” (2 Nephi 31:18) at kung paano natin ito matatahak nang may pananampalataya kay Jesucristo. Maaaring idrowing ng mga estudyante ang ilan sa mahahalagang simbolo sa mga talatang ito at ipaliwanag kung ano ang kinakatawan ng mga ito.

Helaman 6:34. Kapag mas kilala natin ang Diyos, mas malamang na sundin natin ang Kanyang mga kautusan

Maaari mong anyayahan ang mga estudyante na i-cross reference ang Helaman 6:34 sa Mosias 5:13; Juan 14:15; o Juan 15:13–15. Talakayin kung ano ang matututuhan natin mula sa halimbawa ng mga Lamanita at sa mga scripture passage na ito.

Helaman 6:35–36. “Ang Espiritu ng Panginoon ay nagsimulang lumayo”

Iguhit sa pisara ang sumusunod na diagram:

Maaaring basahin ng mga estudyante ang Helaman 6:34–36, at alamin ang mga gawain o pag-uugali na maaaring magbunga ng paglaki o pagliit ng impluwensya ng Espiritu Santo. Maaari nilang isulat ang mga ideyang ito sa itaas o sa ibaba ng diagram, depende kung inilalapit o inilalayo tayo sa Diyos ng mga gawain o pag-uugaling iyon.

Maaari mong banggitin ang pahayag ni Elder David A. Bednar sa bahaging “Komentaryo at Impormasyon ng Konteksto.”

Anyayahan ang mga boluntaryo na ibahagi kung paano nakatulong sa kanila ang mga gawain sa itaas na bahagi ng pisara para mas madaling makahiwatig sa impluwensya ng Espiritu Santo. Talakayin kung ano pa ang matututuhan natin mula sa halimbawa ng mabubuting Nephita at Lamanita sa Helaman 6:1–3, 34–36.