Helaman 5:1–13

“Ang Bato na Ating Manunubos”

ang Tagapagligtas na nakaupo sa isang bato, habang nagtuturo

Nadama mo na ba na napaligiran ka ng mga negatibong impluwensya o ng mga tukso ng diyablo? Inihalintulad ng propetang si Helaman ang pag-atake ni Satanas sa isang bagyo na may malalakas na hangin na humahampas sa atin at ulang yelo na bumabagsak sa atin. Ipinahayag din niya na ang mga nagtatayo ng saligan ng kanilang buhay “sa bato na ating Manunubos” (Helaman 5:12) ay magkakaroon ng kapangyarihang labanan ang kasamaan at manatiling tapat. Ang lesson na ito ay makatutulong sa iyo na mapaglabanan ang diyablo at maitayo ang iyong saligan kay Jesucristo.

Tulungan ang mga mag-aaral na palalimin ang kanilang pagpapahalaga at pagmamahal kay Jesucristo. Habang natututo ang mga estudyante tungkol sa Tagapagligtas, tulungan sila na hindi lamang matuto ng tungkol sa sinabi at ginawa Niya, kundi makilala rin kung sino Siya. Ang isang paraan upang magawa ito ay pagtuunan ang Kanyang mga katangian. Hikayatin ang mga estudyante na pag-isipan kung paano ginagamit ng Tagapagligtas ang Kanyang kapangyarihan sa kanilang buhay.

Paghahanda ng estudyante: Sabihin sa mga estudyante na basahin ang Helaman 5:12 at markahan ang mga salita o parirala na makabuluhan sa kanila. Maaari mo ring sabihin sa mga estudyante na simulang isaulo ang buong passage.

Mga Posibleng Aktibidad sa Pag-aaral

Ang iyong espirituwal na saligan

Sa pisara, ilista ang mga sagot ng mga estudyante sa sumusunod na tanong.

• Ano ang ilang hamon o problema na maaaring magpahina sa pananampalataya o espirituwal na saligan ng isang tao? Pag-isipang ilista ang mga ito sa iyong study journal.

Maaari kang magpakita ng isang larawan ng Salt Lake Temple.

ang Salt Lake Temple

Sa pangkalahatang kumperensya noong Oktubre 2021, tinalakay ni Pangulong Russell M. Nelson ang pangangailangang pagtibayin ang orihinal na pundasyon ng Salt Lake Temple. Pagkatapos ay inanyayahan niya ang mga miyembro ng Simbahan na isaalang-alang ang sarili nilang mga espirituwal na saligan o pundasyon. Basahin ang sumusunod na pahayag at pansinin kung paano ikinumpara ni Pangulong Nelson ang pagpapatibay ng templo sa ating personal na buhay.

Pangulong Russell M. Nelson

Sa gayon ding paraan, panahon na upang ang bawat isa sa atin ay magsagawa ng napakahusay na mga pamamaraan—marahil mga pamamaraang hindi pa natin nagawa noon—upang patibayin ang ating sariling espirituwal na pundasyon. Ang mga panahong hindi pa kailanman naranasan ay nangangailangan ng mga pamamaraan na hindi pa kailanman nagawa.

Mahal kong mga kapatid, ito ang mga huling araw. Kung nais nating makayanan ang mga darating na panganib at hirap, kinakailangang may matibay na espirituwal na pundasyon ang bawat isa sa atin na itinayo sa bato na ating Manunubos na si Jesucristo.

Kaya, itinatanong ko sa bawat isa sa inyo, gaano katibay ang inyong pundasyon? At ano ang kailangan ninyong gawin upang tumibay pa ang inyong patotoo at pag-unawa sa ebanghelyo? (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 93)

• Ano ang pinakanapansin mo mula sa pahayag ni Pangulong Nelson?

Maaari mong ipakita o isulat sa pisara ang mga tanong ni Pangulong Nelson habang nag-iisip at nagsusulat ang mga estudyante.

Pag-isipang mabuti kung paano mo sasagutin ang mga tanong ni Pangulong Nelson hinggil sa iyong espirituwal na pundasyon. Hingin ang impluwensya ng Espiritu Santo, at isulat ang iyong mga sagot.

Hinikayat ni Helaman ang kanyang mga anak na makaalala

Sa ika-54 na taon ng panunungkulan ng mga hukom, marami sa mga Nephita ang naging masasama at pinili ang kasamaan kaysa sa kabutihan. Dahil dito, nagbitiw si Nephi bilang punong hukom at sumama siya sa kanyang kapatid na si Lehi sa pangangaral ng salita ng Diyos sa mga tao (tingnan sa Helaman 5:1–4), tulad ng ginawa ng kanyang lolo-sa-tuhod, ang Nakababatang Alma, mga 60 taon na ang nakararaan (Alma 4:15–20). Isa sa mga dahilan kung bakit nanatiling tapat sina Lehi at Nephi ay dahil natandaan nila ang mga turo ng kanilang amang si Helaman.

Maaari mong isulat ang mga salitang Pakatandaan, Pakatandaan sa pisara bilang heading. Sabihin sa mga estudyante na basahin ang Helaman 5:5–11 at pagkatapos ay pumunta sa pisara at sumulat ng isang bagay na sinabi kina Nephi at Lehi na dapat nilang pakatandaan. Kung nasa pisara na ang isang bagay na gustong isulat ng estudyante, maaaring maglagay ang estudyante ng tsek sa tabi nito. Kung hindi nakasulat sa pisara ang mga estudyante, maaari silang pumili ng isang bagay mula sa listahan at maaari nilang ibahagi kung paano nakatutulong sa kanila na tandaan ang bagay na iyon sa paglakas ng kanilang mga espirituwal na saligan o pundasyon.

Ang ating tunay na saligan

Basahin ang Helaman 5:12, at alamin ang mga karagdagang katotohanan na nais ni Helaman na tandaan ng kanyang mga anak.

Ang Helaman 5:12 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

Kung nakibahagi ang mga estudyante sa paghahanda ng estudyante, alamin ang kanilang progreso sa pagsasaulo ng Helaman 5:12. Maaari mo silang anyayahang magbahagi ng mga salita at parirala na makabuluhan sa kanila.

• Ano ang ilang katotohanan na natagpuan mo sa Helaman 5:12?

Ang dalawang mahahalagang katotohanan na nakapaloob sa Helaman 5:12 ay si Jesucristo ang ating tunay na saligan at kung itatayo natin ang ating saligan kay Jesucristo, ang diyablo ay hindi magkakaroon ng kapangyarihan sa atin.

• Paano naging katulad si Jesucristo ng isang bato at ng isang tunay na saligan sa ating buhay?

• Paano maaaring maging parang bagyo o buhawi ang mga pag-atake ng diyablo sa iyong pananampalataya?

Maaari mong talakayin ang iba’t ibang paraan ng pag-atake ng diyablo sa lipunan, mga pamilya, sa Simbahan, at mga indibiduwal. Maaari mong talakayin kung paano naging parang mga unos at buhawi ang mga hamon at isyu na nakalista sa pisara sa simula ng lesson. Sabihin sa mga estudyante na pag-isipan ang anumang personal na bagyo o buhawi na maaaring nararanasan nila.

Kung mayroon, panoorin ang video na “Mga Espirituwal na Buhawi” (2:24) sa ChurchofJesusChrist.org para matutuhan mula kay Elder Neil L. Andersen ng Korum ng Labindalawang Apostol kung paano daigin ang mga buhawi ng diyablo.

Maaari mong isulat sa pisara ang si Jesucristo ang ating tunay na saligan. Sabihin sa mga estudyante na isulat malapit sa pahayag ang kanilang mga sagot sa unang tanong sa ibaba. Maging handang magbahagi ng ilang paraan na maitatayo ng mga estudyante ang kanilang saligan kay Cristo at maghikayat ng maraming sagot. Maaaring kabilang sa ilang paraan ang pagsunod sa Kanyang halimbawa kung paano Siya nananalangin sa Kanyang Ama, kung paano Niya minamahal ang Kanyang mga kaaway, o kung paano Siya gumugugol ng oras sa pag-aaral ng mga banal na kasulatan upang maisulat ang mga ito sa Kanyang puso. Pagkatapos ilista ng mga estudyante ang kanilang mga sagot, sabihin sa kanila na pumili ng ilang susuriin. Talakayin ang mga partikular na gagawin nila sa aspetong iyon.

• Ano ang ilang paraan na maitatayo natin ang ating mga espirituwal na saligan sa “bato na ating Manunubos”?

• Ano ang ilang balakid sa pagtatayo ng ating saligan sa Tagapagligtas sa mga paraang ito?

• Paano nakahahadlang ang paggawa ng mga bagay na ito sa diyablo sa pagkakaroon niya ng kapangyarihan sa atin?

Personal na pagsasabuhay

Isipin ang ilan sa personal na mga unos o hamon na kinakaharap mo sa kasalukuyan o maaaring kaharapin sa hinaharap. Mapanalanging pag-isipan kung paano makatutulong sa iyo ang pagtatayo o pagpapalakas ng iyong saligan kay Jesucristo para mapaglabanan ang mga hamong ito.

Magdrowing ng isang larawan na kumakatawan sa iyo na nakatayo sa matibay na saligan o pundasyon. Lagyan ng label na “Jesucristo” ang saligan. Magdrowing ng ilang nag-aapoy na palaso (tulad ng magaang na sibat) o isang buhawi at lagyan ang mga sibat o buhawi ng label ng mga partikular na tukso o hamon na kinakaharap mo.

Sa mismong saligan o malapit sa saligan, isulat ang isang partikular na bagay na ginagawa mo o maaari mong simulang gawin para maitayo ang iyong saligan kay Jesucristo.

Halimbawa, maaaring ito ay personal na mithiin na mag-ukol ng oras sa paggawa ng family history o pagdalo sa templo. Maaaring ito ay pag-aaral ng ebanghelyo ng Tagapagligtas araw-araw sa mga banal na kasulatan o pagiging mas taimtim sa personal na panalangin. Ang pag-aaral ng doctrinal mastery ay makatutulong din para mapalakas mo ang iyong saligan.

Isipin ang anumang balakid na maaaring kailanganin mong daigin, at isulat kung ano ang gagawin mo para madaig ang mga ito.

Kung maaari, mag-set ng paalala sa iyong telepono para matulungan kang matupad ang mga pangakong ginawa mo sa lesson na ito. Maaari mong ibahagi ang iyong mga pangako sa isang pinagkakatiwalaang kapamilya, lider ng Simbahan, o kaibigan at hilingin sa kanila na tulungan kang tuparin ito.

Kung maaari, bigyan ng oras ang mga estudyante sa klase na simulan ang ipinangako nilang gawin. Hikayatin ang mga estudyante na patuloy itong gawin sa tahanan. Maaari mong patotohanan ang Tagapagligtas bilang ating tunay na saligan at anyayahan ang mga estudyante na gawin din iyon.

Komentaryo at Impormasyon ng Konteksto

Paano ko maitatayo ang aking espirituwal na saligan kay Jesucristo?

Itinuro ni Elder Quentin L. Cook ng Korum ng Labindalawang Apostol:

Elder Quentin L. Cook

Ang mga personal na pundasyon, tulad ng maraming makabuluhang adhikain, ay karaniwang dahan-dahang naitatatag—paisa-isang patong, paisa-isang karanasan, paisa-isang hamon, paisa-isang hadlang, at paisa-isang tagumpay. …

Kung paanong ang pag-uulit at patuloy na pagsisikap ay kailangan upang magkaroon ng kakayahan ang katawan at isipan, gayundin sa mga espirituwal na bagay. …

Sa huli, ang ating pananampalataya kay Jesucristo ang pundasyong kailangan para sa ating walang hanggang kaligtasan at kadakilaan. (Quentin L. Cook, “Mga Pundasyon ng Pananampalataya,” Liahona, Mayo 2017, 127–31)

Itinuro ni Elder Donald L. Hallstrom ng Pitumpu:

Elder Donald L. Hallstrom

Lahat ng kasangkapang kailangan ninyo upang itayo, ayusin, o palakasin ang inyong pundasyon ay makukuha ninyo. Ito rin ang mga kasangkapang ginagamit upang mapanatili ang itinayong pundasyon. Alam ninyo ang mga ito. Kabilang dito ang palagian at taimtim na panalangin; araw-araw na pag-aaral ng ebanghelyo gamit ang mga banal na kasulatan; aktibong pakikibahagi sa mga pulong ng Simbahan, lalo na sa pagtanggap ng sakramento nang may tunay na layunin; patuloy na di-makasariling paglilingkod; at masigasig na pagtupad sa mga tipan.

Ang isa pang mahalagang kasangkapan ay ang payo ng mga buhay na propeta. (Donald L. Hallstrom, “Jesus Christ: Our Firm Foundation,” Ensign, Abril 2016, 61)

Paano ko mahaharap ang aking mga personal na unos at hamon nang may kumpiyansa?

Itinuro ni Pangulong Russell M. Nelson:

Pangulong Russell M. Nelson

Mangyaring paniwalaan ako na kapag matibay na nakatayo ang inyong espirituwal na pundasyon kay Jesucristo, hindi kayo kailangang matakot. Kapag tapat kayo sa inyong mga tipan … , mapalalakas kayo ng Kanyang kapangyarihan. Pagkatapos, kapag nagkaroon ng mga espirituwal na lindol, makatatayo kayo nang matatag dahil ang inyong espirituwal na pundasyon ay matibay at hindi natitinag. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 96)

Mga Karagdagang Aktibidad sa Pag-aaral

Simulan ang lesson gamit ang isang video

Pagkatapos talakayin ang mga hamon sa ating pananampalataya at mga espirituwal na saligan o pundasyon, maaari mong ipanood ang “Ang Templo at ang Inyong Espirituwal na Pundasyon” mula sa time code na 1:01 hanggang 2:55 mula sa pangkalahatang kumperensya noong Oktubre 2021 sa halip na basahin ang pahayag ni Pangulong Nelson.

Helaman 5:6–7. “Gawin ninyo ang yaong mabuti”

Kapag natukoy ng mga estudyante ang mga ideya at mga taong nais ni Helaman na pakatandaan ng kanyang mga anak, maaari mo silang anyayahang i-cross reference ang Helaman 5:6–7 sa Mga Gawa 10:38. Sabihin sa kanila na ibahagi kung paano nila pinagsisikapang tularan ang halimbawa ng Tagapagligtas sa paggawa ng mabuti. Talakayin din kung paano mapapalakas ng paggawa ng kabutihan sa ating pamilya, sa ating komunidad, at sa mundo ang ating personal na saligan kay Jesucristo.

Helaman 5:10–11. Pagtubos mula sa ating mga kasalanan, hindi sa ating mga kasalanan

Kung makikinabang ang mga estudyante para lalong maunawaan ang doktrinang itinuro sa Helaman 5:10–11 (tingnan din sa Alma 11:34–37), sabihin sa kanila na ipaliwanag ang mga talata gamit ang sarili nilang mga salita. Para sa karagdagang tulong at pag-unawa, ituon ang pansin ng mga estudyante sa doktrinang itinuro sa “Ang Pagsisisi ay Kaloob ng Diyos sa Atin” (D. Todd Christofferson, sa “Notebook ng Kumperensya ng Oktubre 2016,” Liahona, Ene. 2017, 8). Ang mensahe ni Elder D. Todd Christofferson na “Magsipanahan sa Aking Pag-ibig” (Liahona, Nob. 2016, 48–51) ay mahalaga ring resource upang matulungan ang mga estudyante na maunawaan kung paano tayo inililigtas ng Tagapagligtas ayon sa mga hinihingi ng pagsisisi.