Helaman 5:14–52

“Ang Ulap ng Kadiliman ay Maaalis”

Kapag nasa madilim na silid tayo, maaari tayong magbukas ng ilaw. Ngunit ano ang magagawa natin kapag tayo ay espirituwal na nasa dilim? Nang maliliman ng kadiliman ang isang grupo ng masasamang Lamanita, tinuruan silang magsisi at manampalataya kay Jesucristo. Ang lesson na ito ay makatutulong sa iyo na umasa kay Jesucristo na aalisin Niya ang takot at kadiliman at papalitan ang mga ito ng Kanyang kagalakan, kapayapaan, at liwanag.

Hikayatin ang mga estudyante na mag-isip. Kapag may oras ang mga estudyante na pag-isipan nang malalim ang kanilang buhay at ang natututuhan nila, maihahayag ng Espiritu Santo ang personal at nauugnay na mga katotohanan sa kanila. Sabihin sa mga estudyante na pag-isipan kung paano nila inaanyayahan ang liwanag at kapangyarihan ni Jesucristo sa kanilang buhay.

Paghahanda ng estudyante: Sabihin sa mga estudyante na pag-isipan kung paanong si Jesucristo ay katulad ng ilaw (tingnan sa Juan 8:12).

Mga Posibleng Aktibidad sa Pag-aaral

Kadiliman at liwanag

Tulungan ang mga estudyante na magsimulang mag-isip ng tungkol sa liwanag at kadiliman. Maaari kang gumamit ng mga flashlight o cell phone para ipakita kung paano maaalis ng pagkakaroon ng liwanag ang kadiliman sa isang silid. Maaari mong isulat sa pisara ang mga obserbasyon ng mga estudyante at subukang iugnay ang kanilang mga ideya kalaunan sa lesson kapag natukoy nila ang mga alituntunin tungkol kay Jesucristo.

Isipin ang isang pagkakataon na ikaw ay nasa isang madilim na lugar na may kaunti o walang liwanag. Naaalala mo ba kung ano ang mahirap kapag hindi ka makakita nang mabuti?

• Maliban sa naranasan mong makapasok sa isang madilim na silid, ano ang ilan pang paraan na maaari tayong makaranas ng kadiliman sa ating buhay? Ano ang ilang damdamin na maaari mong iugnay sa kadiliman?

Sa buong lesson, dapat maunawaan ng mga estudyante na hindi lahat ng kadiliman ay bunga ng mga maling pagpili, kundi ang kadiliman ay maaalis sa pamamagitan ng pagsampalataya kay Jesucristo.

Isipin ang iyong buhay at anumang kadiliman na maaaring nararanasan mo. Sa iyong pag-aaral ngayon, alamin kung ano ang magagawa mo para mapuno ng liwanag ang iyong buhay na makatutulong sa pag-aalis ng kadiliman.

Ang paglilingkod nina Nephi at Lehi

Ipinangaral ng mga anak ni Helaman, na sina Nephi at Lehi, ang ebanghelyo ni Jesucristo. Tinuruan nila ang maraming Nephita na tumiwalag at sumapi sa mga Lamanita. Ang mga Nephitang ito ay nagsisi at nagsikap na ayusin ang anumang pinsalang nagawa nila. Sina Nephi at Lehi ay nangaral nang may malakas na kapangyarihan, at 8,000 Lamanita ang nagpasiyang magsisi at magpabinyag (tingnan sa Helaman 4:4; 5:14–19).

Basahin ang Helaman 5:20–22, at alamin kung paano nahadlangan ang kanilang tagumpay.

Tuwing nahaharap tayo sa oposisyon o nakararanas tayo ng mga pagsubok, maaari nating ituring ang mga ito bilang madilim na panahon sa ating buhay. Maaari pa ngang itanong natin kung bakit hinahayaan ng Diyos na mangyari ang mga ganitong bagay. Gayunpaman, kung pag-iisipan natin nang mabuti, mapapansin natin na palaging kumikilos ang Diyos sa ating buhay at nais Niya tayong pagpalain.

Upang matulungan ang mga estudyante na aktibong makibahagi sa pag-aaral, maaari mong pagpartner-partnerin ang mga estudyante para basahin ang mga sumusunod na talata. Maaaring maghanap ang isang estudyante ng katibayan ng kapangyarihan ng Diyos sa buhay nina Nephi at Lehi (tingnan sa Helaman 5:23–26). Maaari namang basahin ng isa pang estudyante ang tungkol sa pagtulong ng Diyos sa mga Lamanita (tingnan sa Helaman 5:28–33).

Basahin ang Helaman 5:23–33, at alamin ang ginawa at sinabi ng Diyos. Kung may audio ng Helaman 5, maaari kayong makinig at sumabay na magbasa. Siguraduhing tumigil sandali at mag-rewind kung kinakailangan.

• Ano ang natutuhan mo tungkol sa Diyos mula sa mga talatang ito? Ano ang nadarama mo sa Kanya dahil sa natutuhan mo?

  Maaari mong sabihin sa mga estudyante na ilista sa pisara ang nahanap nila. Talakayin ang mga paraan kung paano tayo aktibong tinutulungan at pinagpapala ng Diyos.

• Paano makatutulong sa iyo ang paanyaya ng Diyos sa talata 29 at 32 na makita ang Kanyang pagmamahal para sa lahat?

Maaari mong salungguhitan ang mga salita sa Helaman 5:29, 32 na kinabibilangan ng paanyaya ng Diyos.

Ang mga nasa bilangguan ay nililiman ng kadiliman. Hindi nila alam kung ano ang gagawin, at dahil sa takot, hindi sila makakilos (tingnan sa Helaman 5:34, 40).

Basahin ang Helaman 5:35–41 para malaman kung paano nakatulong sa kanila ang isang lalaking nagngangalang Aminadab para maunawaan nila kung paano maaalis ang kadiliman.

• Anong mga katotohanan ang matututuhan natin mula sa sinabi ni Aminadab sa talata 41?

Ang isang alituntunin na matututuhan natin ay maaalis ni Jesucristo ang kadiliman sa ating buhay kapag nanampalataya tayo sa Kanya at nagsisi.

Ang sinabi ni Aminadab sa talata 41 ay sulit talakayin nang mas detalyado. Maaaring makinabang ang mga estudyante sa pagtalakay kung bakit sinabi ni Aminadab na “kayo ay kinakailangang magsisi” at kung bakit niya sila tinagubilinan na manalangin sa Diyos hanggang sa magkaroon sila ng pananampalataya kay Jesucristo.

Maaari mong tulungan ang mga estudyante na ikumpara ang pagbubukas ng flashlight o pagsindi ng ilaw sa pagsampalataya kay Jesucristo at pagsisisi.

• Sa inyong palagay, paano makatutulong ang pagkakaroon ng pananampalataya kay Jesucristo at pagsisisi para maalis ang kadiliman?

Nagbahagi si Elder Robert D. Hales (1932–2017) ng Korum ng Labindalawang Apostol ng mga partikular na paraan na maaanyayahan natin ang liwanag ng Panginoon sa ating buhay.

Ang liwanag [ni Jesucristo] ay isang kalasag na nagpoprotekta sa pagitan ninyo at ng kadiliman ng kaaway kapag namuhay kayo nang karapat-dapat dito. Kailangan ninyo ang liwanag na iyon. Kailangan natin ang liwanag na iyon. Pag-aralan nang mabuti ang mga banal na kasulatan at ang Para sa Lakas ng mga Kabataan [buklet] at makinig sa mga turo ng inyong mga magulang at mga lider. Pagkatapos, sa pamamagitan ng pagsunod sa mabubuting payo, matutong taglayin ang nagpoprotektang liwanag ng ebanghelyo sa inyong sarili.

Maaaring iniisip ninyo, “Paano ko magagawa iyan?” May isang paraan lamang: kailangan ninyong matutuhang paliwanagin ang liwanag na iyon araw-araw sa pamamagitan ng paniniwala kay Jesucristo at pagsunod sa Kanyang mga kautusan. (Robert D. Hales, “Out of Darkness into His Marvelous Light,” Liahona, Mayo 2002, 70)

• Ano ang nalalaman mo tungkol kay Jesucristo na tumutulong sa iyo na maunawaan na mapoprotektahan Niya tayo mula sa kadiliman o maaalis ito sa ating buhay?

Maaaring anyayahan ang mga estudyante na pag-isipan ang titulo ni Jesucristo na Ilaw ng Sanlibutan at kung paano makadaragdag ang titulong ito sa kanilang nauunawaan. (Tingnan sa Jesus Christ, Light of the World, Topical Guide; Doktrina at mga Tipan 88:6–13.)

Pagkatapos ay isulat ang sumusunod na parirala sa pisara.

• Mga pagpapala na dulot ng pagsampalataya kay Jesucristo at pagsisisi

Basahin ang Helaman 5:42–49 at ilista ang mga pagpapalang naranasan ng mga tao nang magsisi sila at manampalataya kay Jesucristo. Markahan ang mga pagpapala na sa palagay mo ay kailangang-kailangan ng mga tao ngayon.

Maaari mong sabihin sa mga estudyante na bumuo ng maliliit na grupo at talakayin ang mga pagpapalang natukoy nila. Maaari din silang magtulungan sa bawat isa sa mga prompt sa ibaba.

Pumili ng isang pagpapala na sa palagay mo ay mahalaga at gamitin ito para maipaliwanag nang maikli kung bakit mo hihikayatin ang isang tao na manampalataya kay Jesucristo.

Pumili ng isang pagpapala na nadama mo na dumating sa iyo dahil sa pagsampalataya kay Jesucristo. Maikling ipaliwanag kung bakit makabuluhan ito sa iyo.

Mula sa natutuhan at nadama mo ngayon, pag-isipan kung ano ang maaari mong gawin para makaasa kay Jesucristo at matanggap ang Kanyang mga pagpapala. Mangako at pag-isipang magtakda o mag-adjust ng isang mithiin na tutulong sa iyo na maisakatuparan ito.

Hikayatin ang mga estudyante na kumilos nang may pananampalataya ayon sa natutuhan nila ngayon. Patotohanan ang kakayahan at hangarin ng Panginoon na pagpalain sila ng Kanyang liwanag.

Komentaryo at Impormasyon ng Konteksto

Paano kung ang kadilimang nadarama ko ay karamdaman sa pag-iisip o damdamin?

Itinuro ni Sister Reyna I. Aburto, na dating miyembro ng Relief Society General Presidency:

Maaari ding magkaroon ng madilim na mga ulap sa ating buhay, na maaaring bumulag sa atin at hindi makita ang liwanag ng Diyos at maging dahilan para magduda tayo kung nariyan ba talaga ang liwanag na iyon para sa atin. Ang ilan sa mga ulap na ito ay ang depresyon, pagkabalisa, at iba pang uri ng karamdaman sa isip at emosyon. Maaaring mapinsala ng mga ito ang tingin natin sa ating sarili, sa iba, at maging sa Diyos. Nakakaapekto ang mga ito sa kababaihan at kalalakihan sa lahat ng edad sa lahat ng sulok ng mundo. …

Kung kayo ay palaging napapalibutan ng “abu-abo ng kadiliman” [1 Nephi 8:23], bumaling sa Ama sa Langit. Wala kayong anumang naranasan na makakapagpabago sa walang-hanggang katotohanan na kayo ay Kanyang anak at mahal Niya kayo. Tandaan na si Cristo ang inyong Tagapagligtas at Manunubos, at ang Diyos ang inyong Ama. Nakauunawa Sila. Isipin ninyo na malapit Sila sa inyo, nakikinig at nagbibigay ng suporta. (Reyna I. Aburto, “Sa Dilim at Liwanag, Aking Panginoon, Manatili!,” Liahona, Nob. 2019, 57, 58)

Ipinayo ni Elder Jeffrey R. Holland ng Korum ng Labindalawang Apostol:

Huwag na huwag ninyong pagdudahan [ang pagmamahal ng Diyos sa inyo], at huwag ninyong tigasan ang puso ninyo. Tapat na ipagpatuloy ang mabubuting gawain na naghahatid ng Espiritu ng Panginoon sa inyong buhay. Humingi ng payo sa mga mayhawak ng mga susi para sa inyong espirituwal na kapakanan. Humingi ng mga basbas ng priesthood at pahalagahan ito. Makibahagi sa sakramento linggu-linggo, at kumapit nang mahigpit sa nakasasakdal na mga pangako ng Pagbabayad-sala ni Jesucristo. Maniwala sa mga himala. Nakita ko nang dumating ang napakarami sa mga ito nang lahat ay nagpapahiwatig na wala nang pag-asa. Ang pag-asa ay hindi kailanman mawawala. Kung hindi man dumating kaagad o nang lubusan o hindi na talaga dumating ang mga himalang iyon, alalahanin ang sariling halimbawa ng pagdurusa ng Tagapagligtas: kung hindi lumampas ang mapait na saro, inumin ito at maging matatag, na nagtitiwalang darating ang mas masasayang araw. (Jeffrey R. Holland, “Parang Basag na Sisidlan,” Liahona, Nob. 2013, 40–41)

Mga Karagdagang Aktibidad sa Pag-aaral

Mga halimbawa sa banal na kasulatan tungkol sa liwanag at proteksyon ng Panginoon

Pagkatapos basahin ang tungkol kina Nephi at Lehi na napaliligiran ng apoy at nalaman na “[iyon] ang Diyos” (Helaman 5:26), pag-isipang gumamit ng iba pang mga halimbawa ng liwanag at proteksyon ng Panginoon sa mga banal na kasulatan. Sabihin sa mga estudyante na gumawa ng listahan ng mga halimbawa ng mga banal na kasulatan na may mga pagkakatulad sa Helaman 5. Maaari kang magpakita ng mga larawan o reperensya, at maaari mong sabihin sa mga estudyante na gumamit ng anumang kasangkapan sa pag-aaral ng banal na kasulatan. Kabilang sa ilang halimbawa na maaaring talakayin at ihambing ng mga estudyante ang mga sumusunod:

• Ang haliging apoy sa pagitan ng mga anak ni Israel at ng hukbo ni Faraon sa Dagat na Pula (tingnan sa Exodo 14:24)

• Sina Shadrac, Meshac, at Abednego sa nagniningas na hurno (tingnan sa Daniel 3:25–27)

• Si Abinadi ay pinrotektahan para maipahayag ang kanyang mensahe kay Haring Noe (tingnan sa Mosias 13:1–5)

• Ang Tatlong Nephitang disipulo (tingnan sa 3 Nephi 28:18–23)

Ang nagpoprotektang liwanag ni Jesucristo

Maaari mong anyayahan ang mga estudyante na basahin ang pahayag ni Elder Hales sa lesson at magdrowing ng larawan batay sa natutuhan nila. Ang aktibidad na ito ay maaaring magpasimula ng talakayan tungkol sa mga paraan para maanyayahan ang nagpoprotektang liwanag ng Tagapagligtas sa kanilang buhay. Habang nagbabahagi ng mga ideya ang mga estudyante, magbigay ng mga follow-up na tanong tulad ng “Paano mo napansin ang dagdag na liwanag sa iyong buhay?”

Paghahambing ng Helaman 5 sa Joseph Smith—Kasaysayan 1

Maaaring makinabang ang mga estudyante sa pagkukumpara ng mga bahagi ng Helaman 5 sa mga bahagi ng karanasan ni Joseph Smith bilang isang teenager na naghahanap ng katotohanan. Ikumpara ang ulap ng kadiliman na naranasan ng mga tao sa bilangguan sa “kadiliman at kaguluhan” na naranasan ni Joseph Smith at ng iba pa sa kanyang panahon (Joseph Smith—Kasaysayan 1:13). Maaari mong ikumpara ang Helaman 5:28 sa Joseph Smith—Kasaysayan 1:15. Pagkatapos ay tulungan ang mga estudyante na matuklasan kung paano nadaig ng mga tao sa dalawang halimbawa ang kadiliman sa pamamagitan ng pagtawag sa Diyos (tingnan sa Helaman 5:42; Joseph Smith–Kasaysayan 1:16).