3 Nifae 1

Sa Amata Ona Faataunuuina Valoaga a Perofeta”

Faamata e faape’ī le faatali ma vaai i le fetu lea na faasilasila mai ai le soifua mai o Iesu Keriso? Sa vaavaai atu le au talitonu a sa Nifaē mo faailoga na valoia e Samuelu le sa Lamanā o le a oo mai (tagai Helamana 14), ae sa faamata’uina e le au lē talitonu e fasioti i latou pe afai e lē faaalia maia faailoga. O lenei lesona ua faamoemoe e fesoasoani ia te oe e lagona ai le mautinoa sili atu o le a faataunuuina e le Alii upu uma e fetalai mai ai o Ia e ala mai i Ana perofeta.

Molimau atu e uiga ia Iesu Keriso. E mafai ona faamalosia tagata aoga pe a e faasoa atu lau molimau ia Iesu Keriso. Vaavaai mo avanoa e faasoa atu ai i tagata aoga ou lagona e uiga i le Faaola ma pe aisea e te taumafai ai e mulimuli ia te Ia.

Sauniuniga a le tagata aoga: E mafai e tagata aoga ona saunia e faasoa mai se faataitaiga pe faapefea pe aisea foi e mafai ai e le i ai o le faatuatua ia Iesu Keriso ona faamalosia se tasi i taimi lē mautonu po o faigata.

Gaoioiga e Ono Mafai Ona Aoao Ai

Faamalosia e ala i le faatuatua

O le fesili lenei ua faamoemoe e fesoasoani i tagata aoga e iloilo ai i latou lava. E lē tatau ona faamoemoeina tagata aoga e faasoa mai a latou tali.

• I se fuafaatatau o le tasi i le lima, o le lima e sili ona malosi, e faapefea ona e fuaina le maualuga o lou talitonu po o le talitonuga e faataunuu e le Atua upu a Ana perofeta? Aisea?

Ina ua sau Samuelu le sa Lamanā i sa Nifaē, sa ia valoia e faapea “toe lima ni tausaga, ma faauta, ona afio mai ai lea le Alo o le Atua” (Helamana 14:2). Na valoia e perofeta le afio mai o Iesu Keriso mo le faitau afe o tausaga, ma na oo mai le taimi faamoemoeina mo Lona soifua mai. O le tusi o le 3 Nifae o loo amata i le faaiuga o na tausaga e lima.

• Afai o oe o se tasi o i latou na talitonu ia Samuelu, o le a sou manatu o le a sou lagona i lenei taimi?

A o e suesue, vaavaai mo mea e tutusa ai tulaga i le 3 Nifae 1 ma tulaga i o tatou aso. Atonu e te manao e faailoga upu ma fasifuaitau anoa e faamalosia ai lou faalagolago i le Atua ma upu a Ana perofeta.

O tagata talitonu sa Nifaē

I le amataga o le 3 Nifae 1, ua tatou aoao ai o Nifae, le atalii o Helamana, ua alu ese atu mai le laueleele ma o lona atalii o Nifae ua avea nei ma perofeta i totonu o sa Nifaē.

Faitau le 3 Nifae 1:4–9, ma vaavaai mo luitau na feagai ma tagata talitonu sa Nifaē i lenei taimi.

• O le a sou manatu o le a le mea na mafai ai e nisi ona “vaavaai ma le mausali” (fuaiupu 8) e ui i le taufaamatau o le oti?

Mafaufau e valaaulia tagata aoga e faitau ma talanoaina fesili nei i ni vaega toalaiti. Ona mafai lea e se tagata aoga mai vaega taitasi ona tusi i luga o le laupapa le tali a le latou vaega i le fesili mulimuli.

Faitau le 3 Nifae 1:10–14 e iloa ai po o le a le mea na sosoo ai.

• O le a sou manatu i lagona o Nifae ina ua ia faalogo i le siufofoga o le Alii?

• O le a sou manatu i le mea na finagalo le Alii ia malamalama i ai Nifae ma tagata?

• O a ni upumoni e mafai ona tatou faailoa mai i nei fuaiupu?

O le a faataunuuina upu a perofeta

Faatasi ai ma le tele o upumoni o loo maua i nei fuaiupu, ua tatou aoao ai o le a faataunuuina e le Alii upu uma na Ia fetalaia e ala mai i Ana perofeta. Atonu e te manao e faailoga le upumoni lea i le fuaiupu 13.

O upumoni faaopoopo e mafai ona faailoa mai e tagata aoga e aofia ai le o le a faafofogaina e le Alii a tatou tatalo mo isi po o le na afio mai Iesu Keriso i le lalolagi e fai le finagalo o le Tama.

Mafaufau e tuu atu i tagata aoga e faitau fuaiupu nei i ni paga.

Faitau le 3 Nifae 1:15–22, ma vaavaai pe na faapefea ona tali atu tagata ina ua faataunuuina le valoaga.

E mafai ona outou talanoaina fesili nei (po o isi foi e te mafaufau i ai) e fesoasoani ai i tagata aoga e faatatau mau i o latou lava olaga.

• Aisea e te manatu na eseese ai le tali atu a tagata?

• Na faapefea ona faamalosia tagata talitonu i le taimi o lenei aafiaga?

• O a ni auala e mafai ai e lenei aafiaga ona faateleina lou talitonuga i le fuafuaga a le Alii mo lou olaga?

O lou aafiaga

E pei o sa Nifaē i le 3 Nifae 1, ua tatou ola i taimi e mafai ona foliga mai ua faatumulia i le lē mautonu e uiga i le lumanai. E mafai faapefea ona tatou maua le talitonuga i le Alii ma Ana afioga e tuuina mai e ala mai i Ana perofeta?

Na aoao mai Elder David A. Bednar o le Korama o Aposetolo e Toasefululua:

O le faatuatua e lē o le faavalevalea po o le soona fai. Ae, o le faalagolago ma le tuuina o lo tatou talitonuga maumaututū ia Iesu Keriso o lo tatou Faaola, i Lona suafa, ma i Ana folafolaga. A o tatou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” [2 Nifae 31:20], e faamanuiaina i tatou i se vaaiga e faavavau ma se vaaiga mamao e sili mamao atu i lo tatou gafatia utiuti faaletino. O le a mafai ona tatou “faapotopoto faatasi, ma tutulai i nofoaga paia” [Mataupu Faavae ma Feagaiga 101:22] ma “aua le masi’i ese, seia oo mai le aso o le Alii” [Mataupu Faavae ma Feagaiga 87:8]. (David A. Bednar, “O Le A Tatou Tofotofoina i Latou,” Liahona, Nov. 2020, 11)

Tuu atu i tagata aoga ia lava se taimi e mafaufau loloto ai i le mea lenei. Pe a manaomia, faasoa atu nisi o tulaga o loo lisi atu. Atonu e aoga mo tagata aoga le faamaumauina o o latou manatu i a latou api talaaga mo suesuega. Ia nofouta ma mataala o nisi o tagata aoga e ono lagonaina le ootia a o latou mafaufau i o latou luitau patino. Mulimuli i uunaiga a le Agaga a o e saili e faasino atu i latou i le Faaola.

Mafaufau pe aisea e te ono tauivi ai i le va o le i ai o le faatuatua i le Atua ma le lagonaina o le lē mautonu po o le fefe e uiga i lou olaga. O nei mafuaaga e patino i tagata taitoatasi ae e mafai ona aofia ai mea nei:

• O le tauemuina po o le osofaia mo ou talitonuga ia Iesu Keriso

• O le faaletonu o sootaga faaleaiga, e aofia ai mātua ua tetea e ala i le tatalaina o faaipoipoga

• Lagonaina o le popolevale po o le atuatuvale

• Popole mo e pele ia i latou o e aafia i le tosina atu i le itupa e tasi

• Puapuagatia mai vaisu po o le tauivi e faatoilalo mausa faataumaoi

• O le fefe nei lē mafai ona maua faamanuiaga o le talalelei

• Lagonaina o le lē agavaa po o le lē faamagaloina

I le Ioane 16:33, na fetalai ai Iesu, “E maua foi outou e le puapuaga i le lalolagi a ia outou lototetele ua ou manumalo i le lalolagi.”

• O a ni mea ua faaalia mai e perofeta e uiga ia Iesu Keriso e mafai ona musuia ai oe ia tumau le faatuatua ia te Ia? (Atonu e te manao e faitau le Alema 7:11–13; Eteru 12:27; Isaia 25:8–9.) O le a sou manatu e mafai faapefea ona fesoasoani o Ia ia te oe i ou tulaga?

• O anafea na faamalosia ai oe po o se tasi e te iloa i le faatuatuaina o le Alii po o upu a Ana perofeta i se taimi o le lē mautonu po o le fefe? E mafai faapefea e le manatuaina o lenei aafiaga ona fesoasoani ia te oe e iloa ai Lana fesoasoani i lou olaga?

Pe a uunaia ai e le Agaga, atonu e te manao e fai atu i tagata aoga e faasoa mai mea ua tulaga ese ia i latou i le asō. Mafaufau e faasoa atu lau molimau ia Iesu Keriso ma lou talitonuga i upu faaperofeta ma valoaga e uiga ia te Ia.

Atonu e te manao e tusifaamaumau ou lagona e uiga i mea ua e aoaoina i le asō. E mafai ona e faaaofia ai faatinoga na uunaia oe e fai po o le auala o faamalosia ai oe e ala i le malamalama e faataunuu e le Atua ia upu e fetalai mai ai o Ia e ala mai i Ana perofeta.

Manatu ma Talaaga o Faamatalaga

O le a se mea e mafai ona ou faia e tumau malosi ai pe a luitauina o’u talitonuga e uiga ia Iesu Keriso?

Sa a’oa’o mai e Epikopo Richard C. Edgley, lea sa fai ma fesoasoani i le Au Epikopo Pulefaamalumalu e faapea:

Ona o feteenaiga ma luitau o loo tatou feagai i le lalolagi i aso nei, ou te fia fautuaina atu ai se filifiliga se tasi—o se filifiliga o le filemu ma le puipuiga, o se filifiliga e talafeagai mo tagata uma. O lena filifiliga o le faatuatua. … Filifili le faatuatua i loo le masalosalo, filifili le faatuatua i loo le fefe, filifili le faatuatua i loo le lē mailoa ma le lē vaaia, ma filifili le faatuatua i loo le lē mautonu. …

Pe a feteenai manatu, mafuaaga, po o le atamai faaletagata ma aoaoga ma mataupu faavae paia, pe osofaia foi e sāvali feteenai ou talitonuga … , filifili ia aua nei lafoina i fafo e le lē talitonu le fatu mai lou loto [tagai i le Alema 32:28]. Manatua, tatou te lē maua se molimau seia uma le tofotofoina o lo tatou faatuatua (tagai Eteru 12:6). (Richard C. Edgley, “Faatuatua—o le Filifiliga e A Oe Lea,” Liahona, Nov. 2010, 31, 32–33)

3 Nfiae 1:14. E mafai faapefea e Iesu Keriso ona faia uma le finagalo o le Tama ma le Alo?

Na aoao mai e Elder Bruce R. McConkie [1915–85] o le Korama a Aposetolo e Toasefululua:

Ua manino lava o [Iesu Keriso] o le Alo ona o le tino, o lona uiga na fanau mai o ia i le lalolagi e pei ona i ai isi tagata ola. Sa i ai sona tino sa fanauina ma faafaileleina i le manava o se tamaitai faaletino. E sili atu ona faigata ona vaai i le auala na avea ai o ia ma Tama ona o ia lava. E na o le pau le ala e mafai ai ona faauigaina o ia [o le Faaola] o le Tama ona sa ia te ia le mana o le Tama; ma sa tofatumoanaina lona finagalo i le finagalo o le Tamā; ina ia mafai ona ia faia o mea uma ona o lona tofi mai lena Tagata Silisili. …

O Keriso o le Atua ma e afio mai o ia e togiola lona nuu. O Ia o le Alo auā ua fanau mai o ia i le olaga nei. O Ia o le Tama auā ua ia mautofi mai lona Tama i le malosi uma o le mamana aoao, ma o mea ua ia tautala ai ma ia faia e avea lava o upu foi ma galuega a Ia o lē o lona suafa o loo ia tauaveina. (Bruce R. McConkie, The Promised Messiah: The First Coming of Christ [1978], 371–73)

3 Nifae 1:22. E mafai faapefea ona ou aloese mai le paū atu i pepelo ua faasalalau e Satani i aso nei?

Sa aoao mai Peresitene Dieter F. Uchtdorf, a o avea ma uso o le Au Peresitene Sili:

O Satani, lo tatou fili e manao ia tatou toilalo. Na te faasalalauina pepelo o se vaega o ana taumafaiga e faaumatia lo tatou talitonuga. Na te fautua mai ma le poto e faapea o le tagata masalosalo, lē talitonu, ma lē mautonu e sili ma atamai, a o latou e faatuatua i le Atua ma Ana vavega e vālea, tauaso, ma faasesēina. O le a ia fautua mai e lelei le masalosalo i meaalofa faaleagaga ma aoaoga a perofeta moni.

Maimau pe ana mafai ona ou fesoasoani i tagata uma ia malamalama i lenei mea moni faigofie: Tatou te talitonu i le Atua ona o mea ua tatou iloa i o tatou loto ma mafaufau, ae lē ona o mea tatou te lē iloaina. O o tatou aafiaga faaleagaga o nisi taimi e paia tele mai le faamatalaina i faaupuga faalelalolagi, ae e lē faapea ai e lē moni. (Dieter F. Uchtdorf, “Aua le Matatau, Na o le Talitonu,” Liahona, Nov. 2015, 78)

Gaoioiga Faaopoopo e Aoao Ai

3 Nifae 1:22–26. Pe a tatou feagai ma pepelo a Satani, e mafai ona tatou filifili e talitonu ia Iesu Keriso ma ia liuaina

Atonu e te manao e fesoasoani i tagata aoga ia iloa le taua o mea na tutupu i le 3 Nifae 1 ma o tatou olaga i aso nei a o lei oo i le Afio Mai Faalua o Iesu Keriso. Valaaulia tagata aoga e mafaufau po o a luitau o le faatuatua o loo feagai ma i latou ma pe faapefea ona tali i ai tagata talavou. Faitau le 3 Nifae 1:22–26, ma vaavaai pe na faapefea ona tali atu sa Nifaē talitonu. E mafai e tagata aoga ona faailoa mai se mataupu faavae e talitutusa ma lenei: Pe a tatou feagai ma pepelo a Satani, e mafai ona tatou filifili e talitonu ia Iesu Keriso ma ia liuaina.

Atonu e te manao e talanoaina fesili e pei o nei:

• O a nisi o pepelo a Satani o loo feagai ma le autalavou i aso nei?

• Na faapefea ona fesoasoani lou faatuatua ia Iesu Keriso e aloese pe faateaese ai pepelo a Satani?

• Na faapefea e le filifili e talitonu ma mulimuli ia Iesu Keriso ona fesoasoani ia te oe e liua atili ai?

Faalagolago i upu a perofeta o aso e gata ai

I le vaega o le lesona o “Lou aafiaga”, e mafai ona e valaaulia tagata aoga e suesue i upu lata mai nei a le perofeta ma aposetolo o i ai nei. E mafai ona e faasoa atu se vaaiga puupuu e uiga i se talavou, o ona talitonuga i le Tama Faalelagi ma Iesu Keriso o loo tauemuina pe ulagia e a latou uo ma fai atu fesili nei.

• E faapefea ona lagolagoina ma faamalosia oe i le iloaina e faataunuu e le Alii ia upu e fetalai mai ai o Ia e ala mai i Ana perofeta?

• O a ni upu talu ai nei mai perofeta sa faapitoa le anoa a o e taumafai e ola i ou talitonuga i taimi faigata?