3 Nifae 6–7

O Le Faamaualuga e Taitai Atu ai i le Fevaevaeai ma le Faafanoga

Pe ua e matauina ea e ui lava i le mavae ai o aafiaga ofoofogia ma le Atua, o nisi tagata e iu lava ina liliuese mai ia te Ia? Ina ua uma ona puipuia e le Atua sa Nifaē mai le au faomea a Katianetona, sa latou toe foi atu i o latou fale ma amata ona toe fausia o latou olaga. E ala i le faamaualuga ma le fevaevaeai, na taitai atu ai e Satani tagata ia fouvale i le Atua. Sa matuā ogaoga ia taunuuga ma sa solofa i lalo le malo, ma sa vaevaeina tagata i ituaiga. O lenei lesona e mafai ona fesoasoani e te malamalama atili ai i le aafiaga o le faamaualuga ma le auala e faatoilalo ai e ala i le mulimuli i le Faaola.

Fesoasoani i tagata aoao ia malamalama i le talaaga ma le anotusi. O le malamalama i le talaaga ma anotusi o mau, e saunia ai tagata aoga e iloa sāvali musuia a tusitala. O le talaaga ma le anotusi ua faamanino ma faapupula mai ai aoaoga faavae ma mataupu faavae ua tusi faamaumauina i aafiaga. Ia filimaoti po o le a le tele e faamamafa atu ai le talaaga ma le anotusi e fesoasoani ai i tagata aoga ia malamalama atoatoa atili i upumoni o loo aoao mai e tusitusiga paia.

Sauniuniga a le tagata aoga: Valaaulia tagata aoga e tatalo ma ole atu i le Tama Faalelagi e fesoasoani ia latou iloa uunaiga faaleagaga a o latou suesueina a latou tusitusiga paia.

Gaoioiga e Ono Mafai Ona Aoao Ai

O se tasi o auala e amata ai le vasega o le aumai lea o ni fatu sana, o nisi fatu pāpā (e lei faapataina, aua o le pata e tetee atu i le vai), ma se pesini vai. Valaaulia tagata aoga e valoia le mea o le a tupu pe a e tuuina fatu sana ma fatu sana pāpā i totonu o le vai. Faatoulu ni fatu sana ma fatu sana pāpā i totonu o le vai (o le a tumau pea le lē suia o le fatu sana ae o le a amata ona vaivai fatu sana ua pāpā). Ta’u i tagata aoga o le vai e faatusa i le leaga, ma o fatu sana ma fatu sana pāpā e mafai ona faatusa ia i tatou taitoatasi. A o latou suesue, e mafai ona latou vaavaai mo lesona e fesootai i le lesona faatino ma i latou lava. Mafaufau e tuu atu i tagata aoga taitasi se fatu sana e tilotilo i ai a o latou suesue.

Valaaulia tagata aoga e faamalamalama mai a latou tali i fesili nei:

• Faamata e mafai e se tasi ona:

• Mauoa ma lotomaualalo?

• Mativa ma faamaualuga?

• Aoaoina ma lotomaualalo?

• Lē aoaoina ma faamaualuga?

Mafaufau po o le a le mea e taitai atu ai nisi tagata ia faamaualuga i o tatou aso. E faapefea e le faamaualuga ona aafia ai oe, isi, ma le lalolagi? A o e suesue, mafaufau loloto pe faapefea ona faatatau lenei lesona i lou olaga ma tulaga.

O faaosoosoga faifai pea a Satani

Ina ua uma ona faatoilaloina Kitianae ma le au faomea a Katianetona faatasi ai ma le fesoasoani a le Alii, sa “faia [ai se sa Nifaē] se faaumaga o ia faapotopotoga uma amioleaga, ma faalilolilo, ma inosia” (3 Nifae 5:6). Sa latou toe foi atu i o latou fale ma amata ona toe fausia o latou olaga. Ae sa faaauau pea ona galue Satani e faasesē tagata ia mulimuli atu ia te ia. I se taimi puupuu lava, na suia ai sa Nifaē. I le 3 Nifae 6–7, na fesoasoani Mamona ia i tatou ia malamalama i mea na faia e tagata na iu ai ina maliliu le toatele o i latou i faafanoga na muamua mai i le afio mai o le Faaola i Amerika (tagai 3 Nifae 8). O nei aoaoga o loo faamalamalama mai ai foi le mafuaaga na saunia ai isi mo le faaali mai o Keriso i le malumalu i le laueleele o Nuumau (tagai 3 Nifae 11).

O le siata lenei e mafai ona fesoasoani i tagata aoga e vaai ai i suiga i sa Nifaē i se taimi puupuu lava. O se isi auala e faatumu ai le siata e mo tagata aoga e tusi ai se ata faigofie e faapupula ai le tulaga o tagata i seti taitasi o fuaiupu.

Fatu se siata e talitutusa ma lenei. Faitau fuaitau ma faatumu mea ua e aoaoina e uiga i tulaga o tagata.

O le tausaga lona 26 (3 Nifae 6:4–9)	O le tausaga lona 29 (3 Nifae 6:10–18)
O le tausaga lona 26 (3 Nifae 6:4–9)	O le tausaga lona 29 (3 Nifae 6:10–18)

• O le a le mea na mafua ai le suiga i se taimi puupuu lava?

• O a ni upumoni e mafai ona tatou aoao mai i nei faataitaiga?

O se tasi o upumoni atonu na e faailoa maia o le taimi tatou te faamaualuga ai, ua tatou tuuina atu ia Satani le mana sili atu e faaosooso ai i tatou ma taitai i tatou i le amioletonu.

Mafaufau i le uiga o le faamaualuga. Saili mo malamalamaaga i le saunoaga lenei mai ia Peresitene Ezra Taft Benson (1899–1994).

O le ute o le faamaualuga o le ita—ita i le Atua ma le ita i o tatou uso a tagata. O le ita o lona uiga o le “le fiafia, inoino, po o se tulaga o le tetee.” O le mana lea e manao Satani e pule ai ia i tatou. (Ezra Taft Benson, “Beware of Pride,” Ensign, Me 1989, 4)

• Aisea e te manatu ai o le faamaualuga e mafai ai e Satani ona maua se faatosinaga sili atu ia i tatou?

• E faapefea ona ese lenei mea mai le ala e faamalosiau ai i tatou e le Tama Faalelagi ma Iesu Keriso?

Aafiaga o le faamaualuga i aso la ma aso nei

Ona o le faamaualuga o tagata, na amata ai ona aafia vaega uma o tagata. Faitau a le o le 3 Nifae 6:20–30 po o le 7:1–14, ma vaavaai mo faataitaiga o auala na aafia ai tagata taitoatasi ma nuu i le faamaualuga.

Mafaufau e faitau e le afa o le vasega le 3 Nifae 6:20–30 ae faitau e le isi afa le 3 Nifae 7:1–14 i ni vaega toalaiti. Pe valaaulia tagata aoga e filifili se tasi o fuaitau, faitau i ai, ma saunia e lipoti mai mea na latou maua.

Valaaulia tagata aoga e lisi tali i luga o le laupapa i le fesili e sosoo ai. Atonu e maua e tagata aoga ni mea e pei o fevaevaeaiga, galuega faalilolilo e amioleaga, taupulepule faasaga i e amiotonu, ma le feita e faasaga i mea lelei.

• O a faataitaiga o le aafiaga o le faamaualuga na e maua i nei fuaiupu?

• O a ni auala e faaaoga ai e Satani le faamaualuga e taitai atu ai tagata i le amioletonu i o tatou aso?

Faatoilaloina o le faamaualuga

Mafaufau pe faapefea e lou faamaualuga po o le faamaualuga o isi ona aafia ai oe ma pe faapefea ona e faatoilaloina le faamaualuga ma ona aafiaga.

E ui o le faamaualuga na afua ai le tele o le faatafunaga, ae sa uai atu nisi i upu a le perofeta ma faaauau pea ona mulimuli i le Faaola.

Faitau le 3 Nifae 7:15–26, ma vaavaai mo mea na aoao atu e Nifae i tagata ma pe na faapefea ona aafia ai i latou. Atonu e aoga le faailoga o taimi taitasi e ta’ua ai le Faaola.

E mafai e tagata aoga ona tusi tali i fesili nei i luga o le laupapa. A o latou tusia a latou tali, e mafai ona latou kolosi ese mai le laupapa ia aafiaga o le faamaualuga lea e mafai ona faatoilaloina i tali o loo latou lisiina.

E mafai foi e tagata aoga ona sue fuaitau o mau o le atamai i aoaoga faavae o faaalia ai auala faaopoopo e faatoilalo ai le faamaualuga.

• O a faataitaiga na e maua i nei fuaiupu i le ala na fesoasoani ai le Faaola ma Lana talalelei i nisi o tagata e faatoilalo le faamaualuga ma le amioleaga?

O le ata faataitai ma fesili o loo mulimuli mai ua faamoemoe e tuuina atu ai se avanoa mo tagata aoga e faaalia ai ua latou iloa auala eseese e mafai ai e le faamaualuga ona aafia ai i latou, ae faapea foi le ala e mafai ai e le mulimuli ia Iesu Keriso ona fesoasoani ia i latou e faatoilalo le faamaualuga. E mafai ona e filifili e fetuunai le ata faataitai i ni auala e mafai ona atili anoa ai mo tagata aoga.

O Simi lea. Na te lei iloaina i le taimi lea, ae e i ai sona faafitauli i le faamaualuga.

• O le a se faamaoniga e te ono faamoemoe e vaaia i le olaga o Simi e iloa ai e i ai sona faafitauli i le faamaualuga?

Atonu e maua mai e tagata aoga ni mea e faatatau i le 3 Nifae 6–7. Mo se faataitaiga, na te faavasegaina tagata i ni vaega i lona mafaufau—vaega lelei ma vaega leaga. Na te faia foi nisi o mea na te iloa e sesē ma nānā faalilolilo. Na te tali atu ma le lē fiafia i tagata e faamalosiauina o ia e sui. E masani ona ia faitioina ona mātua ma lona epikopo mo mea latou te talosagaina o ia e fai.

I le mavae ai o le iloaina o lona faafitauli ma le iloaina o le tele nauā o lona lē fiafia i lona olaga o le taunuuga lea o lona faamaualuga, ua manao o ia i tali i auala e aveese ai le faamaualuga.

• O a ni fofo o le a e fautuaina atu e fesoasoani ia Simi e faatoilalo ai le faamaualuga?

Mafaufau e valaaulia tagata aoga e aapa atu i se tasi latou te iloa e fesili atu e uiga i a latou fautuaga i le auala e faatoilalo ai le faamaualuga. Faasoa atu lau molimau e uiga i le mana o le Faaola e fesoasoani ia i tatou e faatoilalo le faamaualuga ma le amioleaga.

Manatu ma Talaaga o Faamatalaga

E faapefea ona tatou vaaia le faamaualuga ma fevaevaeaiga i o tatou aso?

Na faamalamalama mai e Elder Quentin L. Cook o le Korama a Aposetolo e Toasefululua:

I o tatou taimi, o le poloaiga faatusipaia o le lotogatasi ua matuā lē amanaiaina lava, ma o le toatele o tagata o le faamamafa ua tuu faaituaiga, ua tele ina faavae i tulaga, itupa, lanu, ma le tamaoaiga. I le tele o atunuu, pe afai e le o le toatele, ua matuā fetōtōai lava tagata e uiga i le ala e ola ai. I le Ekalesia a le Alii, na pau le aganuu tatou te mulimuli ai ma aoao atu o le aganuu o le talalelei a Iesu Keriso. O le lotogatasi tatou te sailia o le autasi lea ma le Faaola ma Ana aoaoga. …

… Ua faamanino mai e le Tusi a Mamona e faapea e lē tatau ona i ai ni vaevaega i ituaiga, po o ni faavasegaga. E tatau ona tatou lotogatasi ma tutusa i luma o le Atua. (Quentin L. Cook, “Saunia e Feiloai ma le Atua,” Liahona, Me 2018, 116)

O a nisi o faailo o le faamaualuga?

Na saunoa Elder Gary E. Stevenson o le Korama a Aposetolo e Toasefululua:

A faamaualuga, tatou te mananao ia faaee le mamalu ia i tatou lava nai lo le tuuina atu i isi, e aofia ai le Alii. O le faamaualuga e masani lava o le faatautavā; o le lilifa atu e saili ia sili atu mea e maua ma mafaufau ai ua tatou sili atu nai lo isi. O le faamaualuga e masani ona iu i lagona o le ita ma le inoino; e mafua ai le ita faamoemoe po o le taofia ai o le faamagalo atu. (Gary E. Stevenson, “Gasetoto Faaleagaga,” Liahona, Nov. 2017, 47)

E faapefea ona faatatau mea na tutupu i le Tusi a Mamona i o tatou aso?

Sa faatusatusa e Peresitene Ezra Taft Benson (1899–1994) mea na tutupu i le Tusi a Mamona i o tatou aso i le faapea mai:

I le Tusi a Mamona tatou te maua ai se mamanu mo le sauniuni mo le Afio Mai Faalua. O se vaega tele o le tusi ua faaogatotonu i ni nai fia sefulu tausaga a o lumanai le afio atu o Keriso i Amerika. E ala i le suesueina ma le totoa o lena vaitau, e mafai ai ona tatou filimaoti ai le mafuaaga na faaumatiaina ai nisi i faafanoga matautia na muamua atu i Lona afio ifo, ma po o le a foi le mea na mafai ai ona o atu isi ma tutū i le malumalu i le laueleele o Nuumau ma pa’i atu o latou lima i manu’a o Ona lima ma Ona vae. (Ezra Taft Benson, “The Book of Mormon—Keystone of Our Religion,” Ensign, Nov. 1986, 6–7)

Gaoioiga Faaopoopo e Aoao Ai

O le manatuaina o le Tama Faalelagi ma Iesu Keriso e fesoasoani e faatoilalo ai le faamaualuga

Ina ua amioleaga sa Nifaē, sa musuia tamalii mai le lagi e molimau atu i le Togiola ma le Toetu o le Faaola (tagai i le 3 Nifae 6:20). Mafaufau e valaaulia tagata aoga e mafaufau e uiga i mea ua faia e le Faaola mo i latou ma pe faapefea e lena mea ona faateleina lo latou lotofaafetai ma le lotomaualalo. E mafai ona latou faailoa mai auala e mafai ona latou manatua soo ai le Togiola ma le Toetu o le Faaola i o latou aso.

Taulimaina o isi i le ala o le a taulimaina ai i latou e le Faaola

I le faaiuga o le lesona, e mafai ona valaaulia tagata aoga e fai se fuafuaga e aloese ai mai le faamaualuga. Ina ia fesoasoani ia i latou e ausia lenei mea, e mafai ona valaaulia i latou e fai se lisi o tagata latou te fegalegaleai i aso taitasi ma mafaufau pe faapefea ona latou taulimaina i latou. E mafai e tagata aoga ona fua pe faapefea ona latou taulimaina tagata taitoatasi e faaaoga ai se fuafaatatau mai le tasi (leaga) i le lima (e pei ona faia e le Faaola ia i latou). Ona mafai lea ona latou faia se fuafuaga patino e faavae i le tagata latou te lagona e mafai ona latou taulimaina lelei atili.

Faataitaiga a Keriso o le lotomaualalo

O Iesu Keriso, o le faataitaiga sili mo i tatou uma, na faaauau pea ona filifili le lotomaualalo i le faamaualuga. Valaaulia tagata aoga e lisi ni nai faataitaiga mai Lona soifuaga lea atonu e mafai ona Ia faamaualuga ai ae na [Ia] faaalia Lona lotomaualalo atoatoa. O faataitaiga e aofia ai Lana fetaiaiga ma Satani i le Mataio 4:1–11 ma le vavega i le Taelega i Petesa i le Ioane 5:1–9, 19. Atonu e fesoasoani le toe iloilo o nisi o vitiō o le Tusi Paia e maua ai ni faataitaiga.