Iloilo Lou Aoaoina 7

Alema 53–3 Nifae 7

O le manatunatu i ai ma le iloiloina o lou aoaoina faaleagaga e mafai ona fesoasoani ia te oe e faalatalata atili atu ai i le Faaola. O lenei lesona e mafai ona fesoasoani ia te oe e manatua ai ma iloilo pe na faapefea ona fesoasoani ou aafiaga i le Alema 53–3 Nifae 7 e te tuputupu ae ai faaleagaga.

Valaaulia tagata aoga e iloilo e lē aunoa a latou aoaoga. E ala i le tomanatu soo i lo latou aoaoina ma le alualu i luma, e mafai ai e tagata aoga ona iloilo lelei pe o faapefea ona latou faaaogaina mataupu faavae o le talalelei i o latou olaga. Fatu ni avanoa mo tagata aoga e malamalama ai ma lagona le taua o suiga e mafai ona faia e le talalelei a Iesu Keriso i o latou olaga.

Sauniuniga a le tagata aoga: Valaaulia tagata aoga e toe iloilo mea na latou aoaoina i vaiaso talu ai nei ma o mai saunia e faasoa mai se auala se tasi atonu latou te faaumaina ai le faamatalaga lenei: “O le lesona e tasi mai le Alema 53–3 Nifae 7 ou te manatu e taua ona ou manatua o le … ona …”

Gaoioiga e Ono Mafai Ona Aoao Ai

I lenei lesona, o le a maua ai e tagata aoga ni avanoa e faamalamalama ai le matafaioi a perofeta, iloilo o latou uiga faaalia ma manaoga, ma mafaufau i fuafuaga na latou faia e faaaoga ai aoaoga o le talalelei. O le suesuega a lau vasega o le Alema 53–3 Nifae 7 atonu na faamamafaina ai upumoni e ese mai i upumoni o loo i gaoioiga nei. Afai o lea, e mafai ona e fetuunaia gaoioiga e faaaofia ai na upumoni.

O le taua o le manatuaina

O lenei vaega o le lesona ua faamoemoe e fesoasoani i tagata aoga ia malamalama i le taua o le manatuaina o lesona taua na latou aoaoina a o suesueina le Alema 53–3 Nifae 7. Atonu o se taimi lelei lea e valaaulia ai tagata aoga e faasoa mai o latou tali mai le gaoioiga sauniuni.

Na aoao mai Peresitene Spencer W. Kimball e faapea o le upu aupito sili ona taua i le lolomifefiloi atonu o le manatua. (Tagai “Circles of Exaltation” [address to Church Educational System religious educators, June 28, 1968], 5.)

• Aisea e te manatu na saunoa ai Peresitene Kimball i le mea sa ia fai mai ai e uiga i le upu manatua?

• O a nisi o lesona na e aoaoina mai le Alema 53–3 Nifae 7 o le a taua mo oe e manatua? Aisea?

Atonu e te manatua na uunaia e Helamana ona atalii o Nifae ma Liae ia manatua lesona taua ma tagata (tagai Helamana 5:4–14). E faapena foi, o lenei lesona ua faamoemoe e fesoasoani ia te oe e manatua ai upumoni ua e aoaoina ma tautinoga na e faia i vaiaso talu ai nei.

Faamatala le matafaioi a perofeta

I le vaega lenei o le lesona, o le a e valaaulia ai tagata aoga e faamalamalama mai le matafaioi a perofeta e faaaoga ai tala ia Nifaē (Helamana 7–11) po o Samuelu le sa Lamanā (Helamana 13–16). E mafai ona e mafaufau e tuu tagata aoga i ni paga ma tuu atu i soa taitasi e filifili se perofeta ese e faatino le ata faataitai o loo i lalo po o se isi ata e te filifilia.

Mafaufau faapea ua musuia oe e valaaulia se uo lua te matamata faatasi i le konafesi aoao. A o e sauniuni ma le agaga tatalo e faatino lenei uunaiga, ua e filifili e faamalamalama atu i lau uo po o le a le perofeta ma pe aisea ua e fiafia ai e faalogo atu ia te ia. Ua e manatua na e aoao e uiga i nisi o perofeta maoae i le Tusi a Mamona e mafai ona fesoasoani ia te oe e faamatala ai le matafaioi a se perofeta i lau uo.

E mafai e tagata aoga ona faasino i tusiga o api talaaga i lalo o “Upumoni e uiga i perofeta a le Alii” mai le lesona “Helamana 7–10”.

Filifili le tala a Nifae (Helamana 7–11) po o Samuelu le sa Lamanā (Helamana 13–15). Toe iloilo a laua tala i mataupu e faatatau i ai e ala i le siakiina o fuaiupu ma vaavaai i ulutala o mataupu po o faamatalaga atonu na e faia i lau api talaaga mo suesuega.

• E mafai faapefea ona e faaaogaina le tala lenei e faamalamalama ai le matafaioi a perofeta i lau uo?

• O a ni fuaiupu mai tusitusiga paia e mafai ona e faaaofia ai o se vaega o lau faamalamalamaga?

  Afai e manaomia e tagata aoga se fesoasoani i le faailoaina o mau, e mafai ona e faasino atu i latou i fuaitau e pei o le Helamana 7:29; 8:22–23; 10:4–7; 11:23; 13:5; ma le 14:11–12.

• O a nisi o upumoni faaopoopo po o aafiaga patino e mafai ona e faasoa atu e fesoasoani ai i lau uo ia malamalama i le taua o perofeta?

A uma ona iloilo e tagata aoga a latou iloiloga o perofeta, mafaufau e valaaulia i latou e faatino le ata faataitai o loo i luga e faaaoga ai mea sa latou aoaoina.

Iloilo ou uiga faaalia ma manaoga

E mafai ona fesoasoani lenei gaoioiga i tagata aoga e iloilo ai o latou uiga faaalia ma naunau ai e ola ma le lotomaualalo i le talalelei a Iesu Keriso. Mafaufau e fai atu i se volenitia e tusi le taamilosaga o le faamaualuga i luga o le laupapa mai lona manatuaga. E mafai ona e uunaia tagata o le vasega e fesoasoani pe a manaomia.

A o e vaai atu i lenei ata, e mafai ona e manatua faamaoniga o le taamilosaga o le faamaualuga i le Helamana 1–16 ma le 3 Nifae 1–7. Atonu foi e te iloaina faataitaiga ua e vaaia i lou lava olaga po o le lalolagi o siomia ai oe.

Faaaoga soo se fetuunaiga atonu na e faia i le vaega o le faavasegaga faaletagata lava ia o le “lesona i le Helamana 11–12” e faamaea ai le gaoioiga lenei.

Ina ua e suesueina le Helamana 11–12, atonu na e iloiloina au taumafaiga ina ia lotomaualalo. Atonu foi na e tusi faamaumauina se tautinoga i lau api faamaumau mo suesuega ina ia faateleina le lotomaualalo ma faatoilalo le faamaualuga. Toe iloilo mea na e tusia ma manatunatu i ai pe o a mai lou faia o lena tautinoga. Mafaufau loloto i fesili nei, ma tusi au tali i lau api faamaumau mo suesuega.

Ona o le natura patino o lenei gaoioiga, e tatau i tagata aoga ona iloa o le a latou lē faasoa maia a latou tali.

• O a ni mea na e faia i vaiaso talu ai nei e manatua ai le Alii ma mea uma ua Ia faia mo oe? O le a sou lagona i le manatuaina o le Alii na fesoasoani ia te oe e tumau ai i le lotomaualalo?

• Pe o i ai ni suiga e te manao e fai e fesoasoani ia te oe e manatua ai le Alii i aso uma ma faateleina ai le lotomaualalo?

Mafaufau i ni fuafuaga e atinae ai lou faavae ia Iesu Keriso

O le vaega lenei o le lesona e mafai ona fesoasoani i tagata aoga e toe manatunatu ai i fuafuaga na latou faia e atinae ai o latou faavae ia Iesu Keriso ma tetee atu ai i faaosoosoga a le tiapolo.

I lesona talu ai nei, sa e suesue ai i le tele o tala o tagata taitoatasi o e na faatoilaloina osofaiga i o latou olaga, tapuaiga, ma molimau ia Iesu Keriso. A o e suesue, atonu na e faia ni tautinoga e fesoasoani ia te oe e atinae ai se faavae malosi atu ia Iesu Keriso e tetee atu ai i osofaiga a Satani.

Valaaulia tagata aoga e mafaufau ma faasoa mai ni tala sa latou suesueina na fesoasoani e faamalosia ai lo latou faavae ia Iesu Keriso ma faatoilalo ai osofaiga a Satani. Afai latou te manaomia le fesoasoani i le faailoaina o faataitaiga, mafaufau e faaali atu ata nei faatasi ai ma mau faasino o loo avatu faatasi ai. E mafai ona e vaevaeina le vasega i ni vaega se tolu ma valaaulia vaega taitasi e toe iloilo se isi tala ma faasoa mai i le vasega mea sa latou aoaoina.

Leoneti ma Amalekia (Alema 47:10–18)

Kapeteni Moronae o loo fausia olo (Alema 50:1–6)

Fautuaga a Helamana i ona atalii (Helamana 5:12)

• O a nisi o lesona e mafai ona tatou aoao mai nei tala e mafai ona fesoasoani ia i tatou e tetee atu ai i faaosoosoga?

Faamatala i tagata aoga o le a valaaulia i latou e vaavaai ma iloilo ia sini sa latou faia e atinae ai o latou faavae i luga o Iesu Keriso. Ona latou talanoaina lea o nisi o o latou aafiaga ma mātauga o se vasega.

E mafai ona e aumaia ni poloka faufale, ipu palasitika, po o nisi aitema i le vasega e mafai ona faaaoga e tagata aoga e fausia ai se faavae. Tuu atu i tagata aoga taitasi se tasi o aitema faufale, ma valaaulia i latou e mafaufau loloto i fesili o loo i lalo ma iloilo lo latou alualu i luma. A uma ua lava se taimi, valaaulia tagata aoga taitasi e faasoa mai soo se tali latou te fiafia e faasoa mai. A o latou faasoa mai, e mafai ona latou faaopoopo a latou aitema i se faatulagaga faalevasega, ma iu ai ina fausia se faavae malosi. Afai e le o maua ni mea faitino faufale, e mafai ona e valaaulia tagata aoga taitasi e tusi se piliki i luga o le laupapa a o latou faasoa mai, ma faaopoopo atu i ata o isi tagata aoga e fatu ai se faavae malosi. Fesoasoani i tagata aoga ia malamalama e mafai ona latou lagolagoina le tasi ma le isi a o latou taumafai e atiina ae o latou faavae i luga o Iesu Keriso.

Mafaufau i sini na e faia talu ai nei e atiina ae ai lou faavae i luga o Iesu Keriso.

• O a faamanuiaga ua e mauaina e ala i le faia o taumafaiga e atiina ae lou faavae i luga o Iesu Keriso?

• O a ni mea faalavefau ua e vaaia i le fausiaina o se faavae malosi? Na faapefea ona e taumafai e faatoilalo na mea?

• Ua faapefea ona faamanuiaina oe i le taumafai e atiina ae lou faavae i luga o Iesu Keriso? O le a le eseesega ua faia ai mo oe?

Toe faitau le Helamana 5:12 ma mafaufau ma le agaga tatalo pe i ai se mea e tatau ona e amata, taofi, pe faaauau pea ona faia e atiina ae ai se faavae malosi atu ia Iesu Keriso. Afai e te lagona e tatau ona e fetuunaia soo se sini na e faia, e mafai ona e tusia i lau api faamaumau mo suesuega po o se isi nofoaga e mafai ona e manatunatu soo i ai.