3 Nifae 2–5

“Saunia … i le Malosi o le Alii”

Minerva Teichert (1888-1976), The Answer of Lachoneus, 1949-1951, suauu i luga o le ie lino e o faatasi ma le maa, 36 x 48 inisi. Falemataaga mo Faatufugaga a le Iunvesite a Polika Iaga.

E pei lava ona tatou feagai ma luitau e tau atu i le toe afio mai o le Faaola, sa feagai foi sa Nifaē ma luitau i tausaga a o lei afio atu o Ia ia i latou. Sa faamata’uina e le au faomea a Katianetona e faaumatia sa Nifaē. Peitai, o sa Nifa “sa saunia e faafetaiai i latou … i le malosi o le Alii” (3 Nifae 4:10). E pei o sa Nifaē, e mafai ona tatou faatoilaloina luitau e ala i le saunia. O lenei lesona e mafai ona fesoasoani ia te oe e maua ai le malosi o le Alii e ala i le saunia faaleagaga ma faaletino.

Valaauliaina o tagata aoga ia faia ni faatinoga mataalia amiotonu. A o suesue e tagata aoga ia mau, fesoasoani ia latou iloa taunuuga o filifiliga ma faatinoga o loo tusia i tala. Fautuaina tagata aoga e faamatala nei lesona i o latou lava olaga ma filimaoti pe mafai faapefea ona latou mulimuli ma le faamaoni i le Faaola.

Sauniuniga a le tagata aoga: Valaaulia tagataaoga e talanoa ma tagata o le aiga po o taitai o le Ekalesia ia faamanuiaga e oo mai i le saunia faaletino po o le faaleagaga.

Gaoioiga e Ono Mafai Ona Aoao Ai

Ia saunia

O le faamoemoega o lenei gaoioiga o le fesoasoani lea i tagata aoga ia iloa le taua o le saunia. Fesoasoani i tagata aoga e mafaufau i tulaga e manaomia ona latou saunia i ai. Mafaufau e faasoa atu e uiga i se taimi na faamanuiaina ai oe i le saunia po o le taimi na e tauivi ai ona sa e lei saunia.

Mafaufau i se taimi i lou olaga na e lagona ai lou saunia po o le lē saunia.

• O le a le tulaga, ma aisea na e lagona ai le saunia po o le lē saunia?

• Afai e te lagona le lē saunia, o le a se mea ua e faia e saunia lelei ai mo le lumanai?

• O le a se mea ua e faia e saunia ai faaleagaga mo luitau o loo feagai ma oe pe ono feagai ma oe i le lumanai?

A o e suesueina le 3 Nifae 2–5, saili le taitaiga a le Agaga ia iloa ai mea e mafai ona e faia e saunia ai oe lava faaletino ma faaleagaga mo le lumanai.

Sauniuniga a Lakoneu

Na valoia e le perofeta o Samuelu o le a i ai se po e aunoa ma le pogisa e fai ma faailoga o le soifua mai o Iesu Keriso. Ina ua faataunuuina lenei valoaga (tagai 3 Nifae 1:15–19), “sa talitonu le toatele o le nuu, ma faaliliuina i le Alii” (3 Nifae 1:22). Peitai, ina ua mavae ni nai tausaga, sa amata ona lē talitonu nisi.

Mo le gaoioiga lenei, e mafai ona e vaevaeina le vasega i le afa pe faipaga. E mafai e le afa o tagata aoga ona faitau se tasi o fuaitau nei ma lipoti mai mea na latou maua i le vasega po o a latou paga.

Faitau le 3 Nifae 1:27–30 ma le 3 Nifae 2:1–3, ma vaavaai mo mafuaaga na sē ese ai nisi o tagata mai le Alii.

• O a lesona e mafai ona tatou aoao mai nei fuaiupu e mafai ona fesoasoani ia i tatou e tumau faamaoni ai i le Alii i o tatou aso?

Sa faateleina le aofai o le au faomea a Katianetona ma tau faasaga ia sa Nifaē. I le tali atu i ai, “o sa Lamanā o ē na liua i le Alii sa galulue faatasi ma o latou uso, o sa Nifaē” (3 Nifae 2:12). O Kitianae, le taitai o le au faomea a Katianetona, na tusia se tusi ia Lakoneu, le faamasino sili o sa Nifaē. I lea tusi, sa ia faamata’uina ai e faaumatia sa Nifaē pe afai latou te lē lolo atu (tagai 3 Nifae 3:1–10).

Faitau le 3 Nifae 3:11–12, ma vaavaai pe na faapefea ona tali atu Lakoneu.

• O le a se faamaoniga o e vaaia i le faatuatua o Lakoneu i le Alii?

Tusi Sauniuniga a sa Nifaē i luga o le laupapa. Mafaufau e tofi atu fuaitau nei i tagata eseese o le vasega po o vaega. Valaaulia tagata aoga e lisi i luga o le laupapa mea na faia e tagata e saunia ai faaletino ma faaleagaga.

• 3 Nephi 3:13–16

• 3 Nephi 3:17–21

• 3 Nifae 3:22–26

• 3 Nifae 4:3–4

Ina ia fesoasoani i tamaiti aoga ia iloa sauniuniga faaletino, e mafai ona e faasino atu le ala na fausia ai e sa Nifaē ni olo, tuu ni leoleo, ma ao mai sapalai ma meaai. Mo sauniuniga faaleagaga, e mafai ona e faasino atu auala na latou salamo ai ma tatalo mo le laveaiga.

• O a sauniuniga e te manatu na sili ona fesoasoani? Aisea?

• O le a sou manatu na faapefea ona fesoasoani nei sauniuniga ia i latou e faalagolago ai i le Alii?

Faitau le 3 Nifae 4:7–12, ma vaavaai pe na faapefea ona faamanuiaina sa Nifaē ona o a latou sauniuniga faaleagaga ma faaletino.

• O a ni mataupu faavae e mafai ona tatou aoaoina mai i lenei tala? (Tagai i le 3 Nifae 4:10.)

O se tasi o mataupu faavae tatou te aoaoina mai lenei tala o le a o tatou saunia i tatou lava faaleagaga ma faaletino, o le a faamalosia i tatou e le Alii e faatoilalo pe onosaia luitau.

Sauniuniga i o tatou aso

Tusi Mea e Tutusa ai i Ona Po Nei i luga o le laupapa, ma fesoasoani i tagata aoga e fatu se lisi o sauniuniga e mafai ona tatou faia i o tatou aso. O nei sauniuniga e mafai ona talitutusa ma sauniuniga a sa Nifaē po o isi sauniuniga ua fautuaina i tatou e perofeta e fai. Talanoa i luitau patino tatou te feagai i o tatou aso ma pe mafai faapefea e nei sauniuniga ona fesoasoani ia i tatou e saunia ai i le malosi o le Alii. Ina ia fesoasoani i tagata aoga e mafaufau i ni manatu, mafaufau e faaali le vitiō “Temporal Preparedness Resources” (3:09), o loo maua i le ChurchofJesusChrist.org.

• Filifili se sauniuniga se tasi pe sili atu mai lau lisi. E mafai faapefea ona fesoasoani ia i tatou e faatoilalo ai luitau patino tatou te feagai i o tatou aso?

• O a ni auala e te manatu e mafai ai e a tatou sauniuniga ona faamalosia i tatou e le Alii?

Sa faatulaga e le au faomea a Katianetona se osofaiga na lē manuia ona sa i ai le fesoasoani faalelagi ia sa Nifaē ia latou sauniuniga. Na iu lava ina toe solomuli le au faomea a Katianetona. Sa vavaeeseina i latou e le au tau a sa Nifaē ma tuu atu i latou lava o ni pagota pe na fasiotia (tagai 3 Nifae 4:16–27).

Faitau le 3 Nifae 4:30–33; 5:1–4, ma vaavaai pe na faapefea ona tali atu tagata i le faamalosia ai e le Alii.

• Na faapefea ona faaalia e la latou tali lo latou faatuatua i le Atua?

Atonu e te manao e faaali atu le valaaulia lenei e manatunatu i ai faapea foi ma le saunoaga mai ia Peresitene Nelson mo tagata aoga e mafaufau loloto ma manatunatu i ai.

Mafaufau i se taimi atonu na e lagonaina ai le malosi o le Alii e ala i le saunia faaletino ma le faaleagaga.

Na molimau mai Peresitene Russell M. Nelsoni i faamanuiaga o le saunia:

E lē uma lava le osofai mai o le fili. O lea, e lē mafai ai lava ona tuua lo tatou sauniuni! O le faatelelina o lo tatou ola-tutoatasi—faaletino, faalelagona, ma faaleagaga—o le faateleina foi lena o lo tatou saunia e tetee atu i sauaga lē fo’i a Satani. …

Ou te le o fai atu o aso o i luma atu o le a faigofie, ae ou te folafola atu ia te outou o le a mamalu le lumanai mo i latou ua saunia ma ē e faaauau pea ona saunia ina ia avea ma meafaigaluega i aao o le Alii. (Russell M. Nelson, “Faasaga Atu ma le Faatuatua i le Lumanai,” Liahona, Nov. 2020, 75–76)

Pe a manaomia, faasoa mai ni faataitaiga o mea atonu e manaomia e tagata aoga ona saunia i ai—mo se faataitaiga, auaunaga faafaifeautalai, avanoa faaleaoaoga, se matātā, faalavelave faalenatura, po o le afio mai o le Faaola.

Mafaufau i se luitau, tulaga, po o se mea e tupu e tatau ona e saunia i ai. Toe manatunatu pe o faapefea ona lagona lou saunia i le asō. Saili le taitaiga a le Agaga a o e tali i fesili nei.

• O a ni faatinoga patino e mafai ona e faia e saunia ai?

• E mafai faapefea ona e faaaofia ai le Alii i au sauniuniga?

Molimau atu i faamanuiaga e oo mai i le saunia. Faamalosiau i tagata aoga e talanoa ma o latou aiga e uiga i luitau atonu o loo latou feagai ai ma le auala e saunia ai faaletino ma faaleagaga.

Manatu ma Talaaga o Faamatalaga

E mafai faapefea ona tatou saunia?

Na aoao mai Peresitene Russell M. Nelson:

Ua folafolaina mai ia i tatou “afai ua [tatou] saunia o le a [tatou] lē matatau lava” [Mataupu Faavae ma Feagaiga 38:30]. O lenei faamautinoaga ua i ai ni taunuuga loloto i aso nei. Ua tautino mai e le Alii e faapea e ui i luitau faigata tele o nei aso, ae o i latou o ē atiae o latou faavae i luga o Iesu Keriso, ma aoao i le auala e utuvai ai mai Lona mana, e lē manaomia ona lolo atu i lagona popolevale o lenei vaitau. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 94)

Sa folafola mai e Peresitene Dallin H. Oaks o le Au Peresitene Sili:

“E manaomia ona tatou faia o sauniuniga faaletino ma le faaleagaga mo mea na valoia i le taimi o le Afio Mai Faalua. Ma o le sauniuniga e foliga mai e lē amanaia, o le sauniuniga lea e tau lē iloa ma sili atu ona faigata—o le faaleagaga. (Dallin H. Oaks, “Sauniuniga mo le Afio Mai Faalua,” Liahona, Me 2004, 9)

Na faamalamalama mai e Elder David A. Bednar o le Korama a Aposetolo e Toasefululua:

O a tatou taumafaiga e sauniuni mo aafiaga e tofotofo ai i le olaga nei, e tatau ona mulimuli i le faataitaiga a le Faaola o lē na faatuputeleina le “tupu [i] le poto ma le tino, ma ua alofagia e le Atua atoa ma tagata” [Luka 2:52]—o se tuufaatasiga paleni lelei o le saunia faaleatamai, faaletino, faaleagaga, ma faaleagafesootai. (David A. Bednar, “O Le A Tofotofoina ai i Latou,” Liahona, Nov. 2020, 9)

Na aoao mai Elder Quentin L. Cook o le Korama a Aposetolo e Toasefululua:

O afā ma faaosoosoga o lenei olaga e tele lava ina lē mafaufauina. A e o le mea lenei ua tatou iloa: o le a oo mai! Ina ia faatoilaloina luitau ma faaosoosoga ua tofu feagai ma i tatou, o le a manaomia ai tapenaga amiotonu ma le faaaogaina o puipuiga ua saunia mai le lagi. E tatau ona tatou filimaoti ia agavaa mo le malumalu tusa lava po o a mea tatou te fetaiai. Afai tatou te saunia, o le a tatou lē matatau ai lava. (Quentin L. Cook, “To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga,” Liahona, Nov. 2015, 39)

3 Nifae 2:15. O le a le uiga o le “sa aveesea lo latou fetuu mai ia te i latou”?

I aso o Nifae o le fetuu o sa Lamanā o le “vavae ese lea o i latou mai luma [o le Alii] … ona o lo latou amioletonu” (2 Nifae 5:20–21). Sa na o le pau le taimi na tumau ai lenei fetuu o le taimi sa amioleaga ai tagata. Ina ua mulimuli ane talia e sa Lamanā le talalelei a Iesu Keriso, “sa le toe mulimuli ia i latou le fetuu a le Atua” (Alema 23:18). I le 3 Nifae 2, na aveesea ai le fetuu mai ia sa Lamanā o e na liua i le Alii (tagai 3 Nifae 2:12, 15).

Gaoioiga Faaopoopo e Aoao Ai

O le faataitaiga a le Faaola o le sauniuniga

Atonu e manuia tagata aoga mai le vaaia o le faataitaiga a le Faaola o sauniuniga. E mafai ona latou faitauina le Luka 2:52 ma le saunoaga a Elder David A Bednar i le vaega o “Faamatalaga ma Talaaga”. Talanoa i ni auala e mafai ai e tagata aoga ona saunia i nei vaega. E mafai foi ona e valaaulia tagata aoga e tagai i sini o le atinaega faaletagata lava ia o Tamaiti ma le Autalavou atonu sa latou faatutūina.

3 Nifae 2:1–3. Manatua ni aafiaga faaleagaga

Mafaufau e talanoaina le taua o le manatuaina o ō tatou aafiaga faaleagaga. A uma ona faitau le 3 Nifae 2:1–3, e mafai ona outou talanoaina le mea e tupu pe afai e galo ia i tatou aafiaga faaleagaga na tatou maua. Ona valaaulia lea o tagata aoga e faasoa mai po o ā taga latou te faia e manatua ai ma faafou ai a latou molimau i upumoni faaleagaga. E mafai foi ona latou faamaumauina aafiaga faaleagaga talu ai i a latou api talaaga mo suesuega.

Mo isi faamatalaga e uiga i lenei autu, tagai i mea nei:

• Henry B. Eyring, “E! Ia Manatua, Ia Manatua Lava,” Liahona, Nov. 2007, 66–69

• Ronald A. Rasband, “Ne’i Galo ia te Oe,” Liahona, Nov. 2016, 113–115

• Neil L. Andersen, “O Manatuaga Musuia Faaleagaga,” Liahona, Me 2020, 18–22

3 Nifae 3:2–12. Ua faaosooso e Kitianae ia Lakoneu

O lenei gaoioiga e mafai ona fesoasoani ai i tagata aoga ia iloa auala e masani ona faaaoga ai e Satani ma i latou e mulimuli ia te ia upu faaviivii, folafolaga pepelo, ma taufaamata’u e taitai ese ai tagata. Faitau le 3 Nifae 3:2–10, ma vaavaai mo upu po o fasifuaitau o loo faaalia ai togafiti na faaaogaina e Kitianae e taumafai ai e faavaivai le faatuatua a Lakoneu. Talanoa pe o faapefea ona faaaogaina ia auala talitutusa e faasaga i le autalavou i aso nei. Ona faitau lea o le 3 Nifae 3:11–12, ma vaavaai pe na faapefea ona tali atu Lakoneu. Talanoaina pe faapefea ona lē manaomia e alii ma tamaitai amiotonu ona fefefe i e amioleaga pe gauai atu i lo latou taufaafefe.

3 Nifae 5:23–26. O le faapotopotoina o Isaraelu

E mafai e tagata aoga ona faatatau le faapotopotoina o sa Nifaē i le 3 Nifae 3–4 i le faapotopotoina o Isaraelu. Faitau le 3 Nifae 5:23–26 ma talanoaina le faapotopotoina o Isaraelu. Fesoasoani i tagata aoga ia iloa ua faapotopotoina Isaraelu aoao tagata ia “iloa lo latou Togiola, o Iesu Keriso” (3 Nifae 5:26).

Tagai foi ia Russell M. Nelson ma Wendy Nelson, “Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), faaopoopoga i le New Era ma le Ensign, ChurchofJesusChrist.org. E ono fesoasoani le matamata o le vitiō o le faasalalauga mai le taimi 29:50 i le 33:36 ma le 38:18 i le 45:09.