3 Nefi 17

“Kam Dhembshuri për Ju”

Krishti duke shëruar një grua

Kishte qenë një ditë e gjatë për turmën e nefitëve kur Shpëtimtari lajmëroi se ishte koha që Ai të largohej. Megjithatë, lotët dhe dëshirimi i turmës që Ai të qëndronte edhe pak më gjatë e prekën zemrën e Tij. Duke shfaqur dhembshuri në mënyrë të mrekullueshme, Ai i shëroi, u lut me ta dhe i bekoi fëmijët e tyre me radhë. Ky mësim mund të të ndihmojë ta ndiesh dhembshurinë që ka Jezu Krishti për ty.

Përdorimi i materialeve filmike për Librin e Mormonit. Materialet filmike për Librin e Mormonit kanë për qëllim t’i ndihmojnë nxënësit të kenë përvoja kuptimplota me tekstin. Këto materiale filmike nuk kanë për qëllim ta zëvendësojnë leximin e shkrimit të shenjtë. Përcaktojeni me urtësi se kur dhe se si t’i përdorni materialet filmike për t’i përmirësuar përvojat e nxënësve me shkrimet e shenjta.

Përgatitja e nxënësve: Ftojini nxënësit të mendojnë për rastet kur kanë ndier mëshirë, dhembshuri ose dashuri nga Perëndia. Nxënësit mund të përgatiten të tregojnë se si këto përvoja ndikuan në marrëdhëniet e tyre me Të.

Veprimtari të Mundshme të të Mësuarit

Perceptimi i Shpëtimtarit

Imagjino sikur sapo ke kaluar një ditë me Shpëtimtarin dhe Ai ka lajmëruar se është koha që të largohet.

Për t’i ndihmuar nxënësit ta përfytyrojnë këtë ngjarje, mund ta shfaqni materialin filmik “Jezu Krishti dhe Engjëjt Japin Shërbesë me Dhembshuri” (11:59), në dispozicion në ChurchofJesusChrist.org, nga kodi kohor 0:12 deri në 1:30.

• Si mund të ndihesh në këtë situatë?

Ndihmojini nxënësit ta kujtojnë atë që mësuan rreth Shpëtimtarit nga 3 Nefi 11–16. Ata mund ta shqyrtojnë atë që shkruan në ditarët e tyre të studimit nën kreun “Të mësuarit rreth Jezu Krishtit te 3 Nefi”.

Para se t’i përgjigjen pyetjes vijuese, mund të jetë e dobishme t’u kërkoni nxënësve t’i renditin në tabelë foljet që e përshkruajnë atë që bëri Shpëtimtari.

• Si e treguan veprimet e Shpëtimtarit dashurinë e Tij për nefitët?

Sot ti do të lexosh më shumë rreth mënyrës se si e tregoi Shpëtimtari dhembshurinë e Tij të përzemërt midis nefitëve. Ndërsa studion, mendo se si veprimet e Tij japin mësim rreth karakterit të Tij. Kushtoji vëmendje mënyrës se si ndihesh rreth Tij.

Mund të jetë e dobishme të dish se të gjitha ngjarjet e shënuara tek 3 Nefi 11–17 ndodhën në një ditë.

Lexoji vargjet tek 3 Nefi 17:1–6, duke kërkuar se çfarë mund të mësosh rreth Jezu Krishtit nga fjalët dhe veprimet e Tij.

• Çfarë gjete në këto vargje?

Nxënësit mund të zbulojnë një parim të ngjashëm me atë në vijim: Duke përsiatur dhe iu lutur Atit, ne i përgatitim mendjet tona për të marrë kuptueshmëri më të madhe.

Nëse do të donit të bënit më shumë me këtë parim, shihni pjesën “Veprimtari Plotësuese të të Mësuarit”.

Ti mund të kesh përcaktuar një të vërtetë të ngjashme me atë në vijim: Jezu Krishti është i mbushur me dhembshuri ndaj meje. Merre parasysh ta shënosh këtë të vërtetë afër vargut 6.

Plaku Ulises Soares, i Kuorumit të Dymbëdhjetë Apostujve, dha mësim:

Plaku Ulises Soares

“Është domethënëse të vërejmë se veprimet plot dhembshuri të Jezusit nuk ishin shfaqje rastësore ose të detyruara, nisur nga një listë detyrash për t’u kryer, por shprehje të përditshme të realitetit të dashurisë së Tij të kulluar për Perëndinë dhe fëmijët e Tij dhe të dëshirës së Tij jetëgjatë për t’i ndihmuar ata.” (Ulises Soares, “Dhembshuria Jetëgjatë e Shpëtimarit”, Liahona, nëntor 2021, f. 14)

• Me fjalët e tua, çfarë po na mëson Plaku Soares lidhur me dhembshurinë e Shpëtimtarit?

Dhembshuria e Shpëtimtarit

Pjesa tjetër e kapitullit tek 3 Nefi 17 tregon natyrën e dhembshur të Shpëtimtarit. Kujtohu se ajo që bëri Jezu Krishti tek 3 Nefi 17 ndodhi për shkak se Ai i perceptoi dëshirat e drejta të nefitëve dhe dëshiroi me sinqeritet të rrinte me ta dhe t’i bekonte.

Qëllimi i veprimtarisë vijuese është t’i ndihmojë nxënësit të zhvillojnë dashuri më të madhe për Shpëtimtarin nëpërmjet përfytyrimit të natyrës së Tij të dhembshur. Nxënësit mund ta kenë ushtruar këtë aftësi ndërkohë që studiuan kapitullin tek 3 Nefi 11. Përsëritja e kësaj aftësie mund t’i ndihmojë nxënësit ta rritin kapacitetin e tyre për ta përdorur atë.

Paraqitini pyetjet dhe fragmentet vijuese. Ftojini nxënësit të përzgjedhin se cilin fragment do të donin ta studionin dhe më pas kërkojuni atyre të reflektojnë mbi pyetjet ndërsa studiojnë. Nxënësit mund t’u përgjigjen këtyre pyetjeve në ditarët e tyre të studimit nën kreun “Të mësuarit rreth Jezu Krishtit tek 3 Nefi”.

Merreni parasysh t’i lejoni nxënësit të zgjedhin të studiojnë vetëm ose në heshtje me një partner.

• Cili çast do të kishte qenë më i veçantë për ty? Përse?

• Çfarë të bëri përshtypje rreth mënyrës se si Jezusi dha shërbesë?

• Si ndikojnë fjalët dhe veprimet e Tij në mënyrën se si ndihesh për Të?

• 3 Nefi 17:7–10: Shërimi i të sëmurëve dhe të vuajturve të tyre

• 3 Nefi 17:13–20: Lutja me dhe për ta

• 3 Nefi 17:11–12, 21–25: Bekimi i fëmijëve

Merreni parasysh t’i shfaqni pyetjet e mëposhtme dhe t’u jepni nxënësve kohë për të menduar rreth tyre para se të përgjigjen.

• Po të kishe qenë atje, si do të ndikonte kjo përvojë në marrëdhënien tënde me Shpëtimtarin Jezu Krisht?

• Si mendon se tregon Jezu Krishti dhembshuri për ne sot?

• Çfarë ndien shtysën të bësh për ta shprehur dashurinë tënde për Jezu Krishtin?

Nëse koha e lejon, merreni parasysh të këndoni një himn për dashurinë dhe dhembshurinë e Shpëtimtarit. Disa shembuj përfshijnë “Jezus, Vet’ Mendimi për Ty” (Himne, nr. 79), “Shpëtimtar i Shtrenjt’, i Dashur” (Himne, nr. 54) dhe “Dashuria e Shpëtimtarit Tonë” (Himne, nr. 59).

Sipas rastit, ftojini nxënësit ta tregojnë atë që ndien gjatë mësimit të sotëm. Nxitini ata të vazhdojnë të kërkojnë prova të dashurisë së Shpëtimtarit në jetën e tyre.

Komente dhe Informacion për Rrethanat

Nga çfarë lloj vuajtjesh i shëroi Shpëtimtari njerëzit?

Presidenti Dallin H. Ouks, i Presidencës së Parë, dha mësim:

Presidenti Dallin H. Ouks

“Kur Shpëtimtari iu shfaq të drejtëve në Botën e Re, Ai thirri që të dilnin përpara njerëzit që ishin të çalë ose të verbër ose që kishin ndonjë sëmundje fizike. Ai ua bëri të njëjtën ftesë atyre ‘që janë të prekur në ndonjë mënyrë’ (3 Nefi 17:7). ‘I sillni këtu’, tha Ai, ‘dhe unë do t’i shëroj ata’ (v. 7). Libri i Mormonit tregon se si turma i solli përpara ‘të gjithë ata që ishin të prekur në ndonjë mënyrë’ (v. 9). Kjo mund të ketë përfshirë persona me çdo lloj vuajtjeje fizike, emocionale ose mendore dhe shkrimi i shenjtë dëshmon se Jezusi ‘e shëroi secilin’ (v. 9).” (Dallin H. Oaks, “He Heals the Heavy Laden”, Ensign ose Liahona, nëntor 2006, f. 6; Konferenca e Përgjithshme, tetor 2006, f. 6–9)

Motra Boni H. Kordën, Presidente e Përgjithshme e Të Rejave, dha mësim gjithashtu në materialin filmik vijues rreth aftësisë së Shpëtimtarit dhe gatishmërisë për të shëruar.

Si mund të rritem në dhembshuri si ajo e Krishtit?

Plaku Ulises Soares, i Kuorumit të Dymbëdhjetë Apostujve, tregoi:

Plaku Ulises Soares

“Sjellja plot dhembshuri e Jezusit është e rrënjosur në dashurinë hyjnore, domethënë, në dashurinë e Tij të pastër dhe të përsosur, që është thelbi i flijimit të Tij shlyes. Dhembshuria është një karakteristikë themeltare e atyre që përpiqen fort për shenjtërimin dhe kjo cilësi hyjnore ndërthuret me tipare të tjera të krishtera, të tilla si vajtimi me ata që vajtojnë dhe pasja e dashamirësisë, mëshirës e mirësisë. Shprehja e dhembshurisë për të tjerët është, në fakt, thelbi i ungjillit të Jezu Krishtit dhe një provë dalluese e afërsisë sonë shpirtërore dhe emocionale me Shpëtimtarin. Për më tepër, ajo tregon nivelin e ndikimit që Ai ka mbi mënyrën tonë të jetesës, dhe paraqet madhështinë e shpirtrave tanë.” (Ulises Soares, “Dhembshuria Jetëgjatë e Shpëtimtarit”, Liahona, nëntor 2021, f. 13–14)

Veprimtari Plotësuese të të Mësuarit

3 Nefi 17:1–3. “Meditoni mbi gjërat që kam thënë”

Sa vijon mund t’i ndihmojë nxënësit të përgatiten për të medituar për shkrimet e shenjta.

Presidenti Henri B. Ajring, i Presidencës së Parë, dha mësimin se “leximi, studimi dhe përsiatja nuk janë e njëjta gjë. Ne lexojmë fjalë dhe mund të marrim ide. Ne studiojmë dhe mund të zbulojmë modele ose lidhje në shkrimin e shenjtë. Por kur përsiatemi, ne ftojmë zbulesë nga Shpirti. Përsiatja, për mua, është mendimi dhe lutja që bëj, pasi i lexoj e i studioj me kujdes shkrimet e shenjta” (Henri B. Ajring, “Shërbeni me Shpirtin”, Ensign ose Liahona, nëntor 2010, f. 60).

Mund t’i ftoni nxënësit të studiojnë tek 3 Nefi 17:1–3, duke kërkuar udhëzimet që Zoti ua dha nefitëve në mënyrë që të “përgatitnin mendjen [e tyre] për nesër”. Ata mund të përcaktojnë më pas një të vërtetë si: Duke përsiatur dhe duke iu lutur Atit, ne e përgatitim mendjen tonë për të marrë kuptueshmëri më të madhe.

Tregojeni thënien e Presidentit Ajring dhe ftojini nxënësit të diskutojnë se si studimi, lutja dhe përsiatja mund të bashkëpunojnë për ta përgatitur mendjen tonë për të marrë kuptueshmëri më të madhe. Nxënësit mund ta zbatojnë më pas atë që mësuan rreth përsiatjes ndërsa e studiojnë pjesën tjetër të kapitullit tek 3 Nefi 17. Për shembull, ata mund t’i përfytyrojnë ngjarjet në shkrimet e shenjta ose të mendojnë se si do t’i trajtonte Shpëtimtari. Më pas, diskutojeni se si përsiatja e tyre ua thelloi kuptueshmërinë e shkrimeve të shenjta dhe dashurinë për Zotin.

3 Nefi 17:5. “Ai hodhi prapë sytë rreth e përqark”

Një nga cilësitë hyjnore të Shpëtimtarit është aftësia e Tij për t’i dalluar ose perceptuar nevojat e të tjerëve dhe më pas për t’u kujdesur për ato nevoja me dashuri dhe mirësi.

Ftojini nxënësit të studiojnë tek 3 Nefi 17:5, duke kërkuar se si e tregoi Jezu Krishti aftësinë e Tij për t’i perceptuar nevojat e të tjerëve. Merreni parasysh ta shfaqni materialin filmik të Presidentes Boni H. Kordën në pjesën “Komente dhe Informacion për Rrethanat”. Ndërsa nxënësit e shohin, ftojini ata të mendojnë se si mund ta përmirësojnë aftësinë e tyre për t’i perceptuar nevojat e të tjerëve dhe për t’u kujdesur për to siç do të bënte Shpëtimtari.

Merreni parasysh t’i këndoni ose t’i lexoni fjalët e këngës “Përpiqem t’Jem si Jezusi” (Libri i Këngëve të Fëmijëve, f. 40–41).

Diskutoni se si ne mund ta ndjekim shembullin e Shpëtimtarit duke i vënë re nevojat e të tjerëve dhe duke i ndihmuar ata më pas.

3 Nefi 17:12. “Jezusi qëndroi në mes”

Për t’i ndihmuar nxënësit ta ndiejnë se Shpëtimtari është pranë tyre, ftojini ata të studiojnë tek 3 Nefi 11:8; 3 Nefi 20:22; 3 Nefi 27:2; Doktrina e Besëlidhje 38:7; 88:13; dhe Abrahami 3:22–23, duke kërkuar se si ato vargje ngjasojnë me vargun te 3 Nefi 17:12. Nxënësit mund t’i lidhin këto vargje. Më pas diskutojeni atë që zbuluan nxënësit rreth Shpëtimtarit dhe marrëdhënies së Tij me ne.