3 Nephi 17

“Ako ay Nahahabag sa Inyo”

pinagagaling ni Cristo ang isang babae

Mahaba na ang naging araw para sa maraming Nephita nang ibalita ng Tagapagligtas na panahon na para umalis Siya. Gayunpaman, ang mga luha at pananabik ng maraming tao na mananatili Siya nang mas matagal ay umantig sa Kanyang puso. Sa kagila-gilalas na pagpapakita ng habag, pinagaling Niya sila, nanalangin Siya kasama nila, at isa-isa Niyang binasbasan ang kanilang mga anak. Ang lesson na ito ay makatutulong sa iyo na madama ang pagkahabag ni Jesucristo para sa iyo.

Paggamit ng mga video ng Aklat ni Mormon. Layunin ng mga video ng Aklat ni Mormon na tulungan ang mga estudyante na magkaroon ng makabuluhang mga karanasan sa pagbabasa ng teksto. Hindi layunin ng mga video na ito na palitan ang pagbabasa ng mga banal na kasulatan. Mahusay na pagpasiyahan kung kailan at paano gagamitin ang mga video para mapaganda ang mga karanasan ng mga estudyante sa pagbabasa ng mga banal na kasulatan.

Paghahanda ng estudyante: Sabihin sa mga estudyante na isipin ang mga pagkakataon na nakadama sila ng awa, habag, o pagmamahal mula sa Diyos. Maaaring maghanda ang mga estudyante na ibahagi kung paano nakaapekto ang mga karanasang ito sa kanilang ugnayan sa Kanya.

Mga Posibleng Aktibidad sa Pag-aaral

Ang pananaw ng Tagapagligtas

Ipagpalagay na nakasama mo ang Tagapagligtas nang buong araw at sinabi Niya na oras na para umalis Siya.

Upang matulungan ang mga estudyante na mailarawan sa isipan ang pangyayaring ito, maaari mong ipapanood ang video na “Naglingkod si Jesucristo at ang mga Anghel nang may Habag” (11:59), matatagpuan sa ChurchofJesusChrist.org, mula sa time code na 0:12 hanggang 1:30.

• Ano kaya ang mararamdaman mo sa sitwasyong ito?

Tulungan ang mga estudyante na maalala ang natutuhan nila tungkol sa Tagapagligtas mula sa 3 Nephi 11–16. Maaari nilang rebyuhin ang isinulat nila sa kanilang journal sa ilalim ng “Pag-aaral ng tungkol kay Jesucristo sa 3 Nephi.”

Bago nila sagutin ang sumusunod na tanong, makatutulong na sabihin sa mga estudyante na ilista sa pisara ang mga pandiwang naglalarawan sa ginawa ng Tagapagligtas.

• Paano ipinakita ng mga ginawa ng Tagapagligtas ang Kanyang pagmamahal sa mga Nephita?

Ngayon ay mas marami ka pang mababasa tungkol sa kung paano ipinakita ng Tagapagligtas ang Kanyang pagkahabag na puno ng pagmamahal sa mga Nephita. Habang nag-aaral ka, isipin kung ano ang itinuturo ng Kanyang mga ginawa tungkol sa Kanyang pagkatao. Bigyang-pansin ang nadarama mo tungkol sa Kanya.

Maaaring makatulong na malaman na lahat ng pangyayaring nakatala sa 3 Nephi 11–17 ay nangyari sa isang araw.

Basahin ang 3 Nephi 17:1–6, at alamin kung ano ang matututuhan mo tungkol kay Jesucristo mula sa Kanyang mga salita at ginawa.

• Ano ang nalaman mo sa mga talatang ito?

Maaaring matuklasan ng mga estudyante ang isang alituntunin na tulad ng sumusunod: Sa pamamagitan ng pagninilay at pagdarasal sa Ama, inihahanda natin ang ating isipan na makatanggap ng higit na pag-unawa.

Kung gusto mong malaman pa ang tungkol sa alituntuning ito, tingnan ang bahaging “Mga Karagdagang Aktibidad sa Pag-aaral.”

Maaaring may natukoy kang katotohanan na tulad ng sumusunod: Si Jesucristo ay puspos ng pagkahabag sa akin. Maaari mong isulat ang katotohanang ito malapit sa talata 6.

Itinuro ni Elder Ulisses Soares ng Korum ng Labindalawang Apostol:

Elder Ulisses Soares

Mahalagang pansinin na ang pagpapakita ni Jesus ng habag ay hindi paminsan-minsan o kinailangang ipakita batay sa listahan ng mga gawaing dapat tapusin kundi mga araw-araw na pagpapakita ng Kanyang dalisay na pagmamahal sa Diyos at sa Kanyang mga anak at ng Kanyang walang-maliw na hangaring tulungan sila. (Ulisses Soares, “Ang Walang-Maliw na Pagkahabag ng Tagapagligtas,” Liahona, Nob. 2021, 14)

• Sa sarili mong mga salita, ano ang itinuturo ni Elder Soares tungkol sa pagkahabag ng Tagapagligtas?

Ang pagkahabag ng Tagapagligtas

Ipinapakita ng natitirang bahagi ng 3 Nephi 17 ang mahabaging katangian ng Tagapagligtas. Alalahanin na ang ginawa ni Jesucristo sa 3 Nephi 17 ay nangyari dahil nahiwatigan Niya ang mabubuting hangarin ng mga Nephita at talagang gusto Niyang makasama sila at pagpalain sila.

Ang layunin ng sumusunod na aktibidad ay tulungan ang mga estudyante na magkaroon ng higit na pagmamahal sa Tagapagligtas sa pamamagitan ng paglalarawan sa isipan ng Kanyang mahabaging katangian. Maaaring nagawa na ng mga estudyante ang kasanayang ito habang pinag-aaralan nila ang 3 Nephi 11. Ang pag-uulit ng kasanayan ay makatutulong sa mga estudyante na mas mapahusay ang kanilang kakayahang gamitin ito.

Ipakita ang mga sumusunod na tanong at scripture passage. Sabihin sa mga estudyante na pumili ng passage na gusto nilang pag-aralan, at sabihin sa kanila na pag-isipan ang mga tanong habang nag-aaral sila. Maaaring sagutin ng mga estudyante ang mga tanong na ito sa kanilang study journal sa ilalim ng “Pag-aaral ng tungkol kay Jesucristo sa 3 Nephi.”

Maaari mong hayaan ang mga estudyante na piliing mag-aral nang mag-isa o nang tahimik kasama ang isang kapartner.

• Aling sandali ang magiging pinaka-espesyal para sa iyo? Bakit?

• Ano ang hinangaan mo sa paraan ng pagmiministeryo ni Jesus?

• Paano naimpluwensyahan ng Kanyang mga salita at ginawa ang nadarama mo tungkol sa Kanya?

• 3 Nephi 17:7–10: Pagpapagaling sa kanilang mga maysakit at nahihirapan

• 3 Nephi 17:13–20: Pagdarasal nang kasama sila at pagdarasal para sa kanila

• 3 Nephi 17:11–12, 21–25: Pagbabasbas sa mga bata

Maaari mong i-display ang mga sumusunod na tanong at bigyan ng oras ang mga estudyante na pag-isipan ang mga ito bago sumagot.

• Kung naroon ka, paano maiimpluwensyahan ng karanasang ito ang iyong ugnayan sa iyong Tagapagligtas na si Jesucristo?

• Sa iyong palagay, paano nagpapakita ng pagkahabag si Jesucristo sa atin ngayon?

• Ano ang nahihikayat kang gawin upang maipahayag ang iyong pagmamahal kay Jesucristo?

Kung may oras pa, maaari kang kumanta ng isang himno tungkol sa pagmamahal at pagkahabag ng Tagapagligtas. Kabilang sa ilang halimbawa ang “Jesus, ang Inyong Alaala” (Mga Himno, blg. 83), “Tagapagligtas na Tunay” (Mga Himno, blg. 57), at “Ang Pag-ibig ng Ating Tagapagligtas” (Mga Himno, blg. 64).

Kung naaangkop, sabihin sa mga estudyante na ibahagi ang nadama nila sa lesson ngayon. Hikayatin sila na patuloy na maghanap ng katibayan ng pagkahabag ng Tagapagligtas sa kanilang buhay.

Komentaryo at Impormasyon ng Konteksto

Mula sa anong mga uri ng mga paghihirap pinagaling ng Tagapagligtas ang mga tao?

Itinuro ni Pangulong Dallin H. Oaks ng Unang Panguluhan:

Pangulong Dallin H. Oaks

Nang magpakita ang Tagapagligtas sa mabubuting tao sa lupain ng Amerika, pinalapit Niya ang mga taong lumpo o bulag o may iba pang mga karamdaman. Inanyayahan Niya ang “mga nahihirapan sa anumang dahilan” (3 Nephi 17:7). “Dalhin sila rito,” wika Niya, “at akin silang pagagalingin,” (talata 7). Ikinuwento sa Aklat ni Mormon kung paano dinala ng mga tao “ang lahat sa kanila na nahihirapan sa anumang dahilan” (talata 9). Maaaring kasama rito ang mga taong may iba’t ibang uri ng pisikal o emosyonal o mental na paghihirap, at nagpapatotoo ang mga banal na kasulatan na “pinagaling [ni Jesus] ang bawat isa sa kanila” (talata 9). (Dallin H. Oaks, “Pinagpapahinga Niya ang Nangabibigatang Lubha,” Liahona, Nob. 2006, 6)

Itinuro rin ni Sister Bonnie H. Cordon, Young Women General President, sa sumusunod na video ang tungkol sa kakayahan at kahandaan ng Tagapagligtas na magpagaling.

Paano ako mas magkakaroon ng pagkahabag na tulad ng kay Cristo?

Ibinahagi ni Elder Ulisses Soares ng Korum ng Labindalawang Apostol:

Elder Ulisses Soares

Ang mahabaging pag-uugali ni Jesus ay nagmumula sa pag-ibig sa kapwa-tao, sa Kanyang dalisay at ganap na pagmamahal, na siyang diwa ng Kanyang nagbabayad-salang sakripisyo. Ang pagiging mahabagin ay pangunahing katangian ng mga taong naghahangad ng kabanalan at ang banal na katangiang ito ay kasama ng iba pang katangiang Kristiyano tulad ng pakikidalamhati sa mga nagdadalamhati at pagkakaroon ng habag, awa, at kabaitan. Ang pagpapakita ng habag sa iba ay, sa katunayan, ang diwa ng ebanghelyo ni Jesucristo at tanda ng ating espirituwal at emosyonal na pagiging malapit sa Tagapagligtas. Dagdag pa rito, ipinapakita nito ang antas ng impluwensya Niya sa paraan ng ating pamumuhay at ipinapakita ang kadakilaan ng ating mga espiritu. (Ulisses Soares, “Ang Walang-Maliw na Pagkahabag ng Tagapagligtas,” Liahona, Nob. 2021, 13–14)

Mga Karagdagang Aktibidad sa Pag-aaral

3 Nephi 17:1–3. “Bulay-bulayin ang mga bagay na aking sinabi”

Ang sumusunod ay makatutulong na maihanda ang mga estudyante na bulay-bulayin ang mga banal na kasulatan.

Itinuro ni Pangulong Henry B. Eyring ng Unang Panguluhan na “ang pagbabasa, pag-aaral, at pagbubulay ay hindi magkakapareho. Nababasa natin ang mga salita at maaari tayong makakuha ng mga ideya. Nag-aaral tayo at maaari nating matuklasan ang mga huwaran at pagkakaugnay-ugnay ng mga ideya sa banal na kasulatan. Ngunit kapag nagbulay-bulay tayo, nag-aanyaya tayo ng paghahayag sa pamamagitan ng Espiritu. Ang pagbubulay, para sa akin, ay ang pag-iisip at pagdarasal na ginagawa ko matapos basahin at pag-aralang mabuti ang mga banal na kasulatan” (Henry B. Eyring, “Maglingkod nang May Espiritu,” Liahona, Nob. 2010, 60).

Maaari mong sabihin sa mga estudyante na pag-aralan ang 3 Nephi 17:1–3, at alamin ang mga tagubilin na ibinigay ng Panginoon sa mga Nephita upang “ihanda ang [kanilang] mga isip para sa kinabukasan.” Pagkatapos ay maaari silang tumukoy ng katotohanan na tulad ng sa pamamagitan ng pagbubulay-bulay at pagdarasal sa Ama, inihahanda natin ang ating isipan na makatanggap ng higit na pag-unawa.

Ibahagi ang pahayag ni Pangulong Eyring, at sabihin sa mga estudyante na talakayin kung paano maaaring makatulong ang pag-aaral, pagdarasal, at pagbubulay-bulay upang maihanda ang ating isipan na makatanggap ng higit na pag-unawa. Pagkatapos ay maaaring gamitin ng mga estudyante ang natutuhan nila tungkol sa pagbubulay-bulay habang pinag-aaralan nila ang natitirang bahagi ng 3 Nephi 17. Halimbawa, maaari nilang ilarawan sa kanilang isipan ang mga pangyayari sa mga banal na kasulatan o isipin kung paano sila pakikitunguhan ng Tagapagligtas. Pagkatapos, talakayin kung paano napalalim ng pagbubulay-bulay nila ang kanilang pag-unawa sa mga banal na kasulatan at pagmamahal sa Panginoon.

3 Nephi 17:5. “Muli niyang iginala ang kanyang mga paningin”

Isa sa mga banal na katangian ng Tagapagligtas ay ang Kanyang kakayahang matukoy o mahiwatigan ang mga pangangailangan ng iba at pagkatapos ay tugunan ang mga pangangailangang iyon nang may pagmamahal at kabaitan.

Sabihin sa mga estudyante na pag-aralan ang 3 Nephi 17:5, at alamin kung paano ipinakita ni Jesucristo ang Kanyang kakayahang mahiwatigan ang mga pangangailangan ng iba. Maaari mong ipapanood ang video ni Pangulong Bonnie H. Cordon sa bahaging “Komentaryo at Impormasyon ng Konteksto.” Habang nanonood ang mga estudyante, sabihin sa kanila na isipin kung paano nila mas mapagbubuti ang kanilang kakayahang mahiwatigan at matugunan ang mga pangangailangan ng iba tulad ng gagawin ng Tagapagligtas.

Maaari mong kantahin o basahin ang mga titik ng “Sinisikap Kong Tularan si Jesus” (Aklat ng mga Awiting Pambata, 40–41).

Talakayin kung paano natin matutularan ang halimbawa ng Tagapagligtas sa pamamagitan ng pagpansin sa mga pangangailangan ng iba at pagkatapos ay pagtulong sa kanila.

3 Nephi 17:12. “Si Jesus ay tumayo sa gitna”

Upang matulungan ang mga estudyante na madama na malapit sa kanila ang Tagapagligtas, sabihin sa kanila na pag-aralan ang 3 Nephi 11:8; 3 Nephi 20:22; 3 Nephi 27:2; Doktrina at mga Tipan 38:7; 88:13; at Abraham 3:22–23, at alamin kung paano natutulad ang mga talatang iyon sa 3 Nephi 17:12. Maaaring iugnay ng mga estudyante ang mga talatang ito. Pagkatapos ay talakayin ang natuklasan ng mga estudyante tungkol sa Tagapagligtas at sa Kanyang kaugnayan sa atin.