3 Nephi 19

“Sila ay Napuspos ng Espiritu Santo”

mga disipulong nananalangin sa paligid ni Cristo

Wala nang ninanais pa ang labindalawang Nephitang disipulo kundi ang makasama nila ang Espiritu Santo. Ito ang paksa ng kanilang mga panalangin sa Ama sa Langit nang tapusin ng Tagapagligtas ang unang araw ng Kanyang pagmiministeryo sa kanila. Ano ang kailangan nating gawin para mapasaatin ang Espiritu Santo? Paano natin matatamasa ang Kanyang patnubay sa ating buhay? Ang layunin ng lesson na ito ay tulungan kang mas maunawaan kung paano matatanggap ang mga pagpapala ng Espiritu Santo.

Tulungan ang mga mag-aaral na maturuan ng Espiritu Santo. Para maturuan ng Espiritu Santo ang mga mag-aaral, kailangang may angkop na kapaligiran para sa pag-aaral. Ang pagkakaayos ng upuan sa silid-aralan at ang mga positibong pakikipag-ugnayan mo sa mga estudyante ay makatutulong sa pag-aambag sa kapaligirang nag-aanyaya sa presensya ng Espiritu Santo.

Paghahanda ng estudyante: Maaari mong anyayahan ang mga estudyante na pag-aralan ang “Disciples of Jesus Christ seek the gift of the Holy Ghost [Hinahangad ng mga disipulo ni Jesucristo ang kaloob na Espiritu Santo]” sa outline para sa ng 3 Nephi 17–19 sa Come, Follow Me—For Home and Church: Book of Mormon 2024 at pumasok sa klase na handang ibahagi ang natutuhan at nadama nila nang gawin nila ito.

Mga Posibleng Aktibidad sa Pag-aaral

Mabubuting hangarin ng tinedyer

Sa halip na itanong lamang ang sumusunod at ipasagot ito sa mga estudyante, maaari mong bigyan ang bawat estudyante ng isang pirasong papel para maisulat ang kanilang mga sagot. Pagkatapos ay maaari mong tipunin ang kanilang mga sagot at ibahagi sa klase ang ilan sa mga ito. Maaaring sagutin ng mga estudyante ang tanong na ito sa maraming paraan.

• Kung magpapasagot ka ng survey sa 100 tinedyer mula sa iyong lugar, ano sa palagay mo ang magiging isa sa kanilang pinakakaraniwang mabubuting hangarin?

Pag-isipan kung alin sa mga hangaring ito ang maaaring makaugnay sa iyo. Habang pinag-aaralan mo ang 3 Nephi 19, alamin ang mga katotohanan na makatutulong sa iyong makamit ang iyong mabubuting hangarin.

Matapos paglingkuran, turuan, pagalingin, at basbasan ng Tagapagligtas ang mga tao, Siya ay “lumisan mula sa kanila, at umakyat sa langit” (3 Nephi 18:39) nang nangangako na babalik Siya kinabukasan. Umuwi ang mga tao, at “sa buong magdamag ay maingay na kumalat ang hinggil kay Jesus,” at “lubhang napakalaki ng bilang … ang nagpagal nang labis sa buong magdamag na yaon, upang sa kinabukasan sila ay naroroon sa pook kung saan ipinakita ni Jesus ang sarili sa maraming tao” (3 Nephi 19:3). Kinabukasan, tinipon ng labindalawang disipulo na pinili ni Jesus ang mga tao at itinuro nila sa kanila ang “mga salitang winika ni Jesus.” Pagkatapos ay lumuhod at “nanalangin sa Ama sa pangalan ni Jesus” ang mga disipulo (3 Nephi 19:8).

Basahin ang 3 Nephi 19:9 para malaman kung ano ang pinakaninanais nila habang nagdarasal sila.

Maaari mong i-display ang mga sumusunod na tanong. Matapos magkaroon ang mga estudyante ng ilang minuto para isulat ang kanilang mga sagot sa kanilang study journal, maaari mong ilagay ang mga estudyante sa maliliit na grupo para talakayin ang mga sagot na nalaman nila.

• Sa palagay mo, bakit nila lubos na ninanais ang Espiritu Santo?

• Ano ang ilang sitwasyon na maaari mong maranasan sa hinaharap kung saan gugustuhin mong matukoy at maunawaan ang mga pahiwatig ng Espiritu Santo?

Pag-isipan kung talagang ninanais mo ang Espiritu Santo sa iyong buhay at kung paano maaaring mag-iba ang iyong buhay kung mas regular mong ninanais na hangarin ang Kanyang impluwensya.

Paghangad sa Espiritu Santo

Basahin ang 3 Nephi 19:10–23, at alamin ang mga paraan na makukumpleto mo ang sumusunod na pahayag:

• Mapupuspos tayo ng Espiritu Santo kapag …

Maaari mong sabihin sa mga estudyante na isulat sa pisara ang mga ideya nila para makumpleto ang pahayag. Ang sumusunod ay dalawang posibleng ideya para makumpleto ang pahayag.

• … taimtim na hinahangad at ipinagdarasal na patnubayan Niya tayo.

• … nakikilahok tayo sa mga ordenansa ng ebanghelyo.

Ang mga aktibidad A at B ay makatutulong sa mga estudyante na maunawaan kung ano ang magagawa nila para mapuspos ng Espiritu Santo. Maaaring gawin ang aktibidad na ito bilang klase. Maaari ding kumpletuhin ng mga estudyante ang isa o lahat ng aktibidad sa maliliit na grupo at ibahagi ang natutuhan nila.

Sabihin sa mga estudyante na magbahagi ng mga partikular na ideya o banal na kasulatan na mahahanap nila. Sabihin sa mga estudyante na magbahagi ng mga personal na karanasan tungkol sa pagnanais at pagdarasal na mapasakanila ang Espiritu Santo o pakikibahagi sa mga ordenansa.

Dagdag pa sa mga aktibidad A at B, maaari mo ring talakayin kung paano tayo napupuspos ng Espiritu Santo dahil sa paniniwala kay Jesucristo at sa mga salita ng Kanyang mga tagapaglingkod.

Aktibidad A: Mapupuspos tayo ng Espiritu Santo kapag taimtim nating hinahangad at ipinagdarasal na patnubayan Niya tayo.

• Paano makatutulong sa atin ang ating mga hangarin at panalangin na mapuspos ng Espiritu Santo?

Ipinaliwanag ni Elder David A. Bednar ng Korum ng Labindalawang Apostol kung paano makatutulong sa atin na hangarin at ipanalangin na mapasaatin ang Espiritu.

Elder David A. Bednar

Naaalala … ba nating taimtim at palagiang ipagdasal ang bagay na dapat nating pakahangarin, maging ang Espiritu Santo? O nagagambala tayo ng mga alalahanin ng sanlibutan at ng mga karaniwang gawain sa araw-araw at binabalewala o kinaliligtaan natin itong pinakamahalaga sa lahat ng kaloob? Ang pagtanggap sa Espiritu Santo ay nagsisimula sa ating taimtim at tapat na hangarin sa patnubay Niya sa ating buhay. (David A. Bednar, “Tanggapin ang Espiritu Santo,” Liahona, Nob. 2010, 96)

Maaari mong panoorin ang “Having the Holy Ghost” (2:56), na matatagpuan sa ChurchofJesusChrist.org.

• Kailan nakatulong ang iyong mabubuting hangarin at panalangin upang madama mo ang impluwensya ng Espiritu?

Aktibidad B: Maaari tayong mapuspos ng Espiritu Santo kapag nakibahagi tayo sa mga ordenansa ng ebanghelyo.

Basahin ang 3 Nephi 18:7, 11; 27:20, at alamin kung paano makatutulong sa atin ang mga ordenansa upang mapuspos tayo ng Espiritu Santo.

Itinuro ni Propetang Joseph Smith (1805–44):

si Propetang Joseph Smith

Ang binyag ay banal na ordenansang naghahanda para matanggap ang Espiritu Santo; ito ang daluyan at susi sa pagkakaloob ng Espiritu Santo. Ang Kaloob na Espiritu Santo sa pamamagitan ng pagpapatong ng mga kamay ay hindi matatanggap sa pamamagitan ng anumang iba pang alituntunin maliban sa alituntunin ng kabutihan. (Mga Turo ng mga Pangulo ng Simbahan: Joseph Smith [2007], 112.)

• Ano ang natutuhan mo tungkol sa papel na ginagampanan ng mga ordenansa (tulad ng binyag at sakramento) sa pagtulong sa atin na mapuspos ng Espiritu Santo?

• Kailan ka napuspos ng Espiritu Santo nang makibahagi ka sa mga ordenansa ng ebanghelyo?

Personal na pagsasabuhay

Maaari kang magbahagi ng personal na karanasan tungkol sa nagawa mo para hangarin ang Espiritu Santo.

Isipin ang sarili mong pangangailangan para sa Espiritu Santo at kung bakit mo hangad ang Kanyang impluwensya sa iyong buhay. Tukuyin ang isang bagay na nahihikayat kang gawin para mapanatili ang Espiritu Santo sa iyo. Sikaping sundin ang impresyong iyon.

Komentaryo at Impormasyon ng Konteksto

Paano natin makakasama sa tuwina ang Espiritu Santo?

Itinuro ni Elder David A. Bednar ng Korum ng Labindalawang Apostol:

Elder David A. Bednar

Kung sinisikap nating maging mabuti—ngunit hindi pa perpekto sa ngayon, ngunit paunti-unti ay nagiging mas mabuti—kung tinutupad natin ang ating mga tipan, hinahangad ang patnubay ng Espiritu Santo, tumatanggap ng sakramento nang karapat-dapat at pinananatili ang kapatawaran ng ating mga kasalanan, at sumusulong, tunay ngang makakasama natin palagi ang Espiritu Santo. Hindi tayo “naghahandang tumanggap ng paghahayag”; tayo ay “nabubuhay sa paghahayag.” (David A. Bednar, The Spirit of Revelation [2021], 7)

Itinuro din sa Doktrina at mga Tipan 121:45–46 kung paano natin makakasama palagi ang Espiritu Santo.

3 Nephi 19:23. Paano tayo matutulungan ng Espiritu Santo na maging isa sa Ama at sa Anak?

Ipinaliwanag ni Elder D. Todd Christofferson ng Korum ng Labindalawang Apostol:

Elder D. Todd Christofferson

Tiyak kong hindi tayo magiging kaisa ng Diyos at ni Cristo hangga’t hindi natin maging pinakahangarin ang Kanilang kalooban at hangarin. Ang gayong pagpapakumbaba ay hindi matatamo sa isang araw, ngunit sa pamamagitan ng Banal na Espiritu, tuturuan tayo ng Panginoon kung nais natin hanggang, sa pagdaan ng panahon, angkop na sabihing Siya ay sa atin tulad ng ang Ama ay nasa Kanya. Kung minsa’y takot akong isipin ang mga kakailanganin, ngunit alam kong tanging sa ganap na pagkakaisang ito lang masusumpungan ang lubos na kagalakan. (D. Todd Christofferson, “That They May Be One in Us,” Liahona, Nob. 2002, 73)

Mga Karagdagang Aktibidad sa Pag-aaral

3 Nephi 19:1–15. Sasamahan tayo ng Tagapagligtas kapag naglingkod tayo at ibinahagi natin ang Kanyang mga salita sa iba

Ang mga estudyante ay mapagpapala kapag naunawaan at nadama nila na mapapasaatin ang Tagapagligtas kapag naglingkod tayo sa iba at ibinahagi natin ang Kanyang mga salita sa kanila. Makatutulong ang mga sumusunod na aktibidad para magawa ito.

Sabihin sa mga estudyante na magbahagi ng tungkol sa isang taong kilala nila na naging halimbawa sa kanila ng pagiging katulad ni Cristo. Sabihin sa kanila na ipaliwanag kung paano sila naimpluwensyahan ng taong ito para maging mas mabuti. Sabihin sa kanila na pag-aralan ang 3 Nephi 19:1–15, at alamin ang ginawa ng mga disipulo para matularan ang halimbawa ng Tagapagligtas at kung ano ang naging resulta nito. Anyayahan silang magsikap na maglingkod at ibahagi ang mga salita ni Cristo sa iba tulad ng gagawin Niya.

3 Nephi 19:19–23, 27–30. Ang nagpapadalisay na impluwensya ng Espiritu Santo

Kung makikinabang ang mga estudyante sa pag-unawa pa sa nagpapadalisay na impluwensya ng Espiritu Santo sa kanila, maaari mong gawin ang mga sumusunod:

Ipaliwanag sa mga estudyante na ang ibig sabihin ng dalisayin ang isang bagay ay gawing dalisay o alisin ang mga di-kanais-nais na mga elemento rito (tingnan sa Merriam-Webster.com Dictionary, “purify”). Sabihin sa mga estudyante na magbahagi ng mga bagay na gusto nilang dalisayin o linisin (tulad ng mga pinggan, bahay, damit, o katawan). Ano ang gagamitin nila para magawa ito?

Sabihin sa mga estudyante na alamin sa 3 Nephi 19:19–23, 27–30 kung ano ang inilaan ng Panginoon para tulungan tayong maging mas dalisay. Kung kinakailangan, maaari din nilang basahin ang Mosias 3:19; 4:1–3.

Anyayahan silang talakayin ang mga gawaing maaari nating gawin para matanggap ang pagpapalang ito. Hikayatin sila na kumilos ayon sa anumang impresyong matatanggap nila.

3 Nephi 19:23. Pagiging isa sa Ama sa Langit at kay Jesucristo

Ang mga sumusunod ay makatutulong sa mga estudyante para mapatibay nila ang kanilang ugnayan sa Ama sa Langit at kay Jesucristo.

Sabihin sa mga estudyante na pag-aralan ang 3 Nephi 19:23 at ang pahayag ni Elder Christofferson sa bahaging “Komentaryo at Impormasyon ng Konteksto.” Ipabahagi sa mga estudyante ang natutuhan nila. Ang panalangin ng Tagapagligtas para sa Kanyang mga disipulo at sa iba pa sa Juan 17:11–23 ay maaari ding makatulong sa mga estudyante na maunawaan ang mahalagang doktrinang ito.

Pagkatapos nilang mag-aral, sabihin sa mga estudyante na talakayin kung paano nakakaimpluwensya ang pag-unawa sa pagkakaisa o pagiging isa ng Panguluhang Diyos sa nadarama ng mga estudyante tungkol sa Espiritu Santo. Maaari mo ring talakayin kung paano maiimpluwensyahan ng pag-unawang ito ang ating mga ginagawa.