3 Nefi 18:1–14

“Në Kujtimin Tim”

kupa e sakramentit me ujë dhe korja e bukës

Ne kemi rregullisht mundësi për ta marrë sakramentin. Tek 3 Nefi 18, Jezusi dha mësim se si sakramenti mund ta bekojë jetën tonë dhe na udhëzoi se si ta kryejmë këtë ordinancë. Ky mësim mund të të ndihmojë të kesh përvoja kuptimplota duke e kujtuar Shpëtimtarin ndërsa e merr sakramentin.

Ndihma ndaj nxënësve që të gjejnë veten tek të vërtetat e ungjillit. Disa nxënës mund ta kenë të vështirë ta kuptojnë se si ungjilli lidhet me jetën e tyre të përditshme. Kërkoni me lutje mënyra për t’i ndihmuar nxënësit të ndiejnë se ajo që po mësojnë është kuptimplotë dhe e dobishme për rrethanat, pyetjet dhe nevojat e tyre vetjake.

Përgatitja e nxënësve: Ftojini nxënësit të përsiatin se sa kuptimplota janë përvojat e tyre të sakramentit. Nxitini nxënësit të përsiatin se çfarë mund të bëjnë për t’i përmirësuar ato.

Veprimtari të Mundshme të të Mësuarit

Një marrëdhënie e fortë

Ideja vijuese mund t’i ndihmojë nxënësit të mendojnë se mbi ç’baza ndërtohen marrëdhëniet e forta. Ky proces mendimesh mund t’i ndihmojë nxënësit të reflektojnë mbi marrëdhënien e tyre me Shpëtimtarin dhe të zbulojnë mënyrat për t’u afruar më pranë Tij. Një mënyrë për ta bërë këtë është nëpërmjet sakramentit.

Mendo për disa njerëz me të cilët ndihesh shumë pranë dhe ke një marrëdhënie të fortë.

• Çfarë ke bërë ti ose ata për t’i forcuar ato marrëdhënie?

Tani mendo se sa pranë Shpëtimtarit ndihesh.

• Çfarë mendon se mund të të ndihmojë ta forcosh marrëdhënien tënde me Shpëtimtarin?

Ndërsa studion sot, ftoje Frymën e Shenjtë të të mësojë se si të afrohesh më pranë Shpëtimtarit dhe ta forcosh marrëdhënien tënde me Të.

Jezu Krishti themelon sakramentin

Shpëtimtari u mbush me dhembshuri për njerëzit kur e perceptoi dëshirën e tyre që Ai të qëndronte më gjatë me ta (shih te 3 Nefi 17:1–6). Pasi i bekoi fëmijët, të sëmurët e të vuajturit, Shpëtimtari siguroi një mënyrë që njerëzit ta kishin gjithmonë Shpirtin e Tij me ta.

Lexo tek 3 Nefi 18:1–11 dhe kërkoje atë që bëri Shpëtimtari.

Mund të merrni parasysh ta vini një grup nxënësish të lexojë tek 3 Nefi 18:1–7 dhe tjetrin të lexojë tek 3 Nefi 18:8–11. Ftojini nxënësit të mendojnë për pyetjet që kanë rreth kuptimit të vargjeve që lexojnë ose ordinancës së sakramentit.

Merreni parasysh ta shfaqni materialin filmik “Jezu Krishti i Paraqet Sakramentin Popullit”, në dispozicion në ChurchofJesusChrist.org, nga kodi kohor 0:12 deri në 6:12 pasi nxënësit t’i lexojnë vargjet ose ndërsa i ndjekin ato. Pyetjet vijuese mund të ndihmojnë për një diskutim pas materialit filmik: Çfarë ju bën përshtypje? Si mendoni se u ndien njerëzit ndërsa e morën sakramentin? Përse? Si mendoni se përvoja juaj do të ishte e ndryshme nëse Shpëtimtari do t’jua administronte sakramentin?

• Çfarë zbulove rreth sakramentit nga mësimet e Shpëtimtarit?

• Çfarë premton Shpëtimtari në lutjet e sakramentit nëse ne e kujtojmë gjithmonë Atë?

Mund të marrësh parasysh ta shenjosh parimin tek 3 Nefi 18:7, 11 që, ndërsa e marrim sakramentin dhe e kujtojmë gjithmonë Shpëtimtarin, ne do ta kemi Shpirtin e Tij me ne.

Kur Jezu Krishti përmend që ne kemi Shpirtin e Tij me ne, Ai po i referohet dhuratës së Frymës së Shenjtë.

• Në çfarë mënyrash mund ta kujtojmë gjithnjë Shpëtimtarin në jetën tonë të përditshme? Si mund të na ndihmojë të kujtuarit e përhershëm të Shpëtimtarit ta kemi Frymën e Shenjtë me ne?

• Si mund të të bekojë pasja e Frymës së Shenjtë me vete në jetën tënde tani?

Përvoja jonë me sakramentin

Merreni parasysh t’i shkruani këto pika ankete në tabelë ose në fletë letre të veçanta. Nxënësit mund t’i përgjigjen anketës në ditarët e tyre të studimit; përgjigjet e tyre nuk do të tregohen.

Mendo se si mund të forcohet marrëdhënia jote me Shpëtimtarin po të kishe përvoja më kuptimplota me marrjen e sakramentit. Përgjigjju secilës thënie me “gjithmonë”, “ndonjëherë”, “rrallëherë”, ose “kurrë”.

1. Unë shpenzoj kohë përpara kishës për t’u përgatitur për sakramentin.

2. Gjatë sakramentit, unë përpiqem ta kujtoj Jezu Krishtin.

3. Përvoja ime me sakramentin ndikon në mënyrën se si sillem gjatë javës.

Veprimtaria vijuese mund t’i ndihmojë të rinjtë të krijojnë mënyra kuptimplota për ta kujtuar Krishtin gjatë sakramentit. Merreni parasysh ta krijoni këtë tabelë në dërrasë dhe t’i ftoni nxënësit ta plotësojnë me përgjigje. Disa nxënës mund të kenë tashmë ide për atë që i ndihmon ta kujtojnë Shpëtimtarin. Kërkojuni nxënësve ta tregojnë atë që po bëjnë tashmë për t’i ndihmuar të prodhojnë ide.

Nxënësit mund të plotësojnë gjithashtu një tabelë më vetjake në ditarët e tyre të studimit. Më pas ata mund të bëjnë fotografi të tabelave të tyre si kujtues për herën tjetër që do ta marrin sakramentin.

Një përvojë më kuptimplotë sakramenti

• Çfarë dua të kujtoj rreth Jezu Krishtit?

  Merreni parasysh sa vijon:

  • Çfarë vuajti Ai

  • Çfarë ka bërë Ai për mua ose për të tjerë që i njoh

• Si mund të përgatitem për sakramentin?

• Çfarë mund të bëj gjatë sakramentit për ta kujtuar Jezu Krishtin?

Premtimet e marrjes së sakramentit

Lexo tek 3 Nefi 18:12–14 dhe kërkoje atë që Shpëtimtari ua premtoi atyre që e kujtojnë Atë dhe e marrin sakramentin.

• Çfarë mendon se do të thotë të ndërtosh mbi shkëmbin e Shpëtimtarit?

  Nëse nxënësve u duhet ndihmë për ta kuptuar se çfarë do të thotë të ndërtosh mbi shkëmbin e Shpëtimtarit, ju mund t’ua shpjegoni se do të thotë që ne bëjmë dhe mbajmë besëlidhje me Të, përpiqemi ta ndjekim shembullin e Tij dhe, për rrjedhojë, i shijojmë bekimet e mëshirës dhe forcës së Tij.

• Si mund të na ndihmojë marrja e sakramentit të ndërtojmë mbi shkëmbin e Shpëtimtarit?

• Çfarë mund të bësh për ta bërë marrjen e sakramentit më kuptimplotë çdo javë?

Dëshmoni rreth mënyrës se si sakramenti mund të na ndihmojë ta ndërtojmë jetën tonë mbi shkëmbin e Shpëtimtarit. Merreni parasysh të tregoni diçka që e bëni për ta bërë sakramentin kuptimplotë për ju. Kërkojuni nxënësve të përsiatin dhe të tregojnë çfarë bekimesh mund të marrin nëse e kujtojnë Shpëtimtarin ndërsa përgatiten për sakramentin dhe e marrin atë.

Komente dhe Informacion për Rrethanat

3 Nefi 18:7, 11. Çfarë mund ta bëjë më kuptimplotë përvojën time të sakramentit?

Plaku Piter F. Mërs, i Të Shtatëdhjetëve, dha mësim:

Plaku Piter F. Mërs

“Unë i ftoj të gjithë që të mbajmë parasysh pesë mënyra për të rritur ndikimin dhe fuqinë e pjesëmarrjes sonë të rregullt në ordinancën e shenjtë të sakramentit, një ordinancë që mund të na ndihmojë të bëhemi të shenjtë.

1. Përgatituni që më Parë. …

2. Mbërrini Para Orarit. …

3. Këndoni dhe Mësoni nga Fjalët e Himnit të Sakramentit. …

4. Merrni Pjesë në Lutjet e Sakramentit. …

5. Përsiatni dhe Kujtojeni Atë ndërsa Shpërndahen Simbolet e Sakramentit. …

Unë dëshmoj për morinë e bekimeve të disponueshme për ne ndërsa rritim përgatitjen tonë dhe pjesëmarrjen shpirtërore në ordinancën e sakramentit.” (Piter F. Mërs, “Sakramenti Mund të Na Ndihmojë të Bëhemi të Shenjtë”, Ensign ose Liahona, nëntor 2016, f. 85–87)

Për të mësuar se si këto pesë mënyra mund ta bëjnë përvojën tënde të sakramentit më kuptimplotë, lexo ose shiko “The Sacrament Can Help Us Become Holy” [“Sakramenti Mund të Na Ndihmojë të Bëhemi të Shenjtë”], në dispozicion në ChurchofJesusChrist.org.

3 Nefi 18:28–29. Çfarë mund të bëj nëse ndihem i padenjë për ta marrë sakramentin?

“Është e rëndësishme që të mbajmë mend se ‘ju nuk duhet të jeni i përkryer që të merrni sakramentin, por duhet të keni një shpirt përulësie dhe pendimi në zemrën tuaj’ (Të Vërtetë Ndaj Besimit [2005], f. 152). Në shumicën e rasteve që nuk përfshijnë mëkate të rënda, nëse keni reflektuar për sjelljen tuaj dhe dëshironi përulësisht dhe sinqerisht të pendoheni dhe ta ndiqni Shpëtimtarin, ju duhet ta merrni sakramentin. Mund ta përjetoni më pas efektin pastrues të kësaj ordinance dhe ta ripërtërini besëlidhjen për të marrë mbi vete emrin e Jezu Krishtit dhe zbatuar urdhërimet e Tij. Nëse keni ndonjë pyetje, flisni me peshkopin tuaj” (“When Should I Not Partake of the Sacrament?”, New Era, nëntor 2017, f. 48).

Plaku Xhon H. Groberg, i Të Shtatëdhjetëve, dha mësim:

Plaku Xhon H. Groberg

“Çfarë do të thotë ta marrësh sakramentin denjësisht? Ose nga e dimë nëse jemi të padenjë?

Nëse dëshirojmë të përmirësohemi (që është të pendohemi) dhe nuk kemi ndonjë kufizim nga priftëria, atëherë, sipas mendimit tim, jemi të denjë. Megjithatë, nëse nuk kemi asnjë dëshirë të përmirësohemi, nëse nuk kemi asnjë synim për ta ndjekur udhërrëfimin e Shpirtit, ne duhet të pyesim: A jemi të denjë ta marrim apo po e kthejmë në një tallje qëllimin e vërtetë të sakramentit, që është të veprojë si një katalizator për pendimin dhe përmirësimin vetjak?” (John H. Groberg, “The Beauty and Importance of the Sacrament”, Ensign, maj 1989, f. 38)

Veprimtari Plotësuese të të Mësuarit

3 Nefi 18:1–2. Përgatituni për ta marrë sakramentin

Sa vijon mund t’i ndihmojë nxënësit të përgatiten për ta marrë sakramentin.

Tek 3 Nefi 18:1–2, ne shohim që Shpëtimtari bëri një përpjekje për t’i përgatitur njerëzit për ta marrë sakramentin. Në fillim ai e ftoi turmën të ulej. Nëse dëshironi ta diskutoni më tej këtë ide, mund të jetë e dobishme t’ua kujtoni nxënësve se ata mund të përgatiten për sakramentin të dielën duke bërë gjëra të shtunën. Bëjuni nxënësve pyetje si ato në vijim:

“Cilat janë disa përgatitje që mund t’i bëni të shtunën në mënyrë që e diela të jetë më e përqendruar te Krishti?”

“Çfarë ndryshimesh mund t’i bëni rutinës suaj para kishe për t’ju ndihmuar të jeni gati për ta kujtuar Shpëtimtarin gjatë sakramentit?”

Himnet e sakramentit

Për t’i ndihmuar nxënësit ta kuptojnë se si himnet e sakramentit mund t’i ndihmojnë ata ta kujtojnë Shpëtimtarin, ftojini nxënësit ta gjejnë një himn sakramenti që është kuptimplotë për ta. Diskutojeni rëndësinë e himnit të sakramentit dhe se si ai mund të na ndihmojë ta kujtojmë Shpëtimtarin. Nxitini nxënësit t’i këndojnë himnet e sakramentit në kishë.

Kujtojeni gjithmonë Atë

Sa vijon mund t’i ndihmojë nxënësit të prodhojnë ide se çfarë duhet të mbajnë mend rreth Shpëtimtarit.

Diskutojeni se çfarë përpiqen të kujtojnë nxënësit rreth Shpëtimtarit kur e marrin sakramentin. Mund të diskutoni edhe se si nxënësit mund të mbajnë mend se çfarë ka bërë Shpëtimtari për ta personalisht.

Gjithashtu, mund të lexoni dhe diskutoni pjesë nga “This Do in Remembrance of Me” [“Bëni Këtë në Përkujtimin Tim”], një bisedë nga Plaku Xhefri R. Holland, i Kuorumit të Dymbëdhjetë Apostujve (Ensign, nëntor 1995, f. 67–69), ose shikojeni materialin filmik nga kodi kohor 10:35 deri në 17:12.

3 Nefi 18:12–14. Ndërtoni mbi shkëmbin

Merreni parasysh t’i lidhni vargjet te 3 Nefi 18:12–14 me vargun te Helamani 5:12. Ftojeni një nxënës ta lexojë vargun te Helamani 5:12 me zë të lartë dhe diskutojini ngjashmëritë ndërmjet dy vargjeve. Diskutojeni se si marrja e sakramentit çdo javë ndihmon për ta bërë Shpëtimtarin themelin e jetës së nxënësve.