3 Nephi 18:1–14

“Sa Paghandom Kanako”

Kanunay kitang adunay mga oportunidad sa pag-ambit sa sakramento. Sa 3 Nephi 18, si Jesus mitudlo kon sa unsang paagi ang sakramento makapanalangin sa atong mga kinabuhi ug mitudlo kon unsaon sa pagpahigayon niini nga ordinansa. Kini nga leksiyon makatabang kanimo nga makabaton og makahuluganon nga mga kasinatian sa paghinumdom sa Manluluwas samtang moambit ka sa sakramento.

Pagtabang sa mga estudyante nga makakita og kalabotan sa mga kamatuoran sa ebanghelyo. Ang ubang mga estudyante mahimong maglisod sa pagkakita kon sa unsang paagi ang ebanghelyo may kalabotan sa ilang matag adlaw nga kinabuhi. Mainampoong magtinguha og mga paagi aron matabangan ang mga estudyante nga mobati nga ang unsay ilang nakat-onan makahuloganon ug mapuslanon sa ilang personal nga mga kahimtang, mga pangutana, ug mga panginahanglan.

Pagpangandam sa estudyante: Dapita ang mga estudyante sa pagpamalandong kon unsa ka makahuloganon ang ilang mga kasinatian sa sakramento. Dasiga ang mga estudyante sa pagpamalandong kon unsay ilang mahimo aron sa pagpalambo niini.

Mga Posibleng Kalihokan sa Pagkat-on

Lig-on nga relasyon

Ang mosunod nga mga ideya makatabang sa mga estudyante sa paghunahuna kon sa unsa gitukod ang lig-on nga mga relasyon. Kini nga proseso sa paghunahuna makatabang sa mga estudyante sa pagpamalandong sa ilang relasyon ngadto sa Manluluwas ug sa pagsuhid og mga paagi nga mas mapaduol ngadto Kaniya. Usa ka paagi sa pagbuhat niini mao ang pinaagi sa sakramento.

Paghunahuna og pipila ka mga tawo nga paminaw nimo suod kaayo nimo ug adunay kay lig-on nga relasyon ngadto kanila.

• Unsa ang imong nahimo o ilang nahimo sa paglig-on niadto nga mga relasyon?

Karon hunahunaa kon unsa ka kasuod paminaw nimo ngadto sa Manluluwas.

• Unsa sa imong hunahuna ang makatabang kanimo sa paglig-on sa imong relasyon ngadto sa Manluluwas?

Samtang magtuon ka karon, dapita ang Espiritu Santo nga tudloan ka kon unsaon nga mas mapaduol ngadto sa Manluluwas ug mapalig-on ang imong relasyon ngadto Kaniya.

Si Jesukristo nagpasiugda sa sakramento

Ang Manluluwas napuno sa kaluoy alang sa mga katawhan sa dihang Siya nakasabot sa ilang tinguha nga Siya magpabilin uban kanila og taas-taas pa (tan-awa sa 3 Nephi 17:1–6). Human mapanalanginan ang mga bata ug ang mga masakiton ug ang mga may balatian, ang Manluluwas mihatag og paagi alang sa mga tawo nga kanunayng makabaton sa Iyang Espiritu uban kanila.

Basaha ang 3 Nephi 18:1–11, ug pangitaa unsay gibuhat sa Manluluwas.

Mahimo nimong ikonsiderar nga ipabasa sa usa ka grupo sa mga estudyante ang 3 Nephi 18:1–7 ug ang lain mobasa sa 3 Nephi 18:8–11. Dapita ang mga estudyante sa paghunahuna sa mga pangutana nga aduna sila mahitungod sa kahulogan sa mga bersikulo nga ilang gibasa o sa ordinansa sa sakramento.

Ikonsiderar ang pagpakita sa bidyo nga “Si Jesukristo Mipaila sa Sakramento ngadto sa Katawhan,” anaa sa ChurchofJesusChrist.org, gikan sa time code 0:12 hangtod sa 6:12 human mabasa sa mga estudyante ang mga bersikulo o samtang sila nagsunod. Ang mosunod nga mga pangutana makatabang sa paghisgot human sa bidyo: Unsay mipatigbabaw diha kanimo? Unsa sa imong hunahuna ang gibati sa mga tawo samtang sila miambit? Ngano man? Sa unsa nga paagi sa imong hunahuna ang imong kasinatian mahimong lahi kon ang Manluluwas ang nangalagad sa sakramento ngadto kanimo?

• Unsay imong nakat-onan mahitungod sa sakramento gikan sa mga pagtulon-an sa Manluluwas?

• Unsa ang gisaad sa Manluluwas diha sa mga pag-ampo sa sakramento kon kita kanunay nga mahinumdom Kaniya?

Mahimo nimong ikonsiderar ang pagmarka sa baroganan diha sa 3 Nephi 18:7, 11 nga samtang kita moambit sa sakramento ug kanunay mohinumdom sa Manluluwas, kita makabaton sa Iyang Espiritu uban kanato.

Sa diha nga si Jesukristo naghisgot kanato nga makabaton sa Iyang Espiritu uban kanato, Siya nagpasabot sa gasa sa Espiritu Santo.

• Unsa ang pipila ka mga paagi nga kita sa kanunay makahinumdom sa Manluluwas sa atong adlaw-adlaw nga kinabuhi? Sa unsang paagi nga ang kanunay nga paghinumdom sa Manluluwas makatabang kanato nga makabaton sa Espiritu Santo uban kanato?

• Sa unsang paagi nga ang pagbaton sa Espiritu Santo uban kanimo makapanalangin sa imong kinabuhi karon?

Ang atong kasinatian sa sakramento

Ikonsiderar ang pagsulat niini nga mga aytem sa survey diha sa pisara o sa lahi nga mga palid sa papel. Mahimong motubag ang mga estudyante sa survey diha sa ilang mga journal; ang ilang mga tubag dili ipakigbagin.

Hunahunaa kon sa unsang paagi ang imong relasyon sa Manluluwas mapalig-on kon aduna kay mas makahuloganon nga mga kasinatian sa pag-ambit sa sakramento. Tubaga ang matag pamahayag og “kanunay,” “usahay,” “talagsa ra,” o “wala gayod.”

1. Naggahin ako og panahon sa wala pa magsugod ang simba sa pagpangandam alang sa sakramento.

2. Atol sa sakramento, naningkamot ko sa paghinumdom ni Jesukristo.

3. Ang akong kasinatian sa sakramento nakaimpluwensiya kon giunsa ko paglihok sa semana.

Ang mosunod nga kalihokan makatabang sa mga batan-on sa pagmugna og makahuloganon nga mga paagi sa paghinumdom kang Kristo atol sa sakramento. Ikonsiderar ang paghimo niini nga tsart diha sa pisara ug sa pagdapit sa mga estudyante sa pagsulat diha niini sa mga tubag. Ang ubang mga estudyante tingali aduna nay mga ideya kon unsa ang makatabang kanila sa paghinumdom sa Manluluwas. Hangyoa ang mga estudyante sa pagpakigbahin kon unsay ilang gipangbuhat aron sa pagtabang sa pagmugna og mga ideya.

Ang mga estudyante mahimo usab nga mokompleto og usa ka mas personal nga tsart diha sa ilang mga journal sa pagtuon. Mahimo nilang kuhaan og mga litrato ang ilang mga tsart inig ka human ingon og usa ka pahinumdom kon kanus-a sila sunod nga moambit sa sakramento.

Mas makahuluganon nga kasinatian sa sakramento

• Unsa ang gusto nakong hinumdoman mahitungod ni Jesukristo?

  Ikonsiderar ang mosunod:

  • Unsa ang Iyang giantos

  • Unsa ang Iyang nahimo alang kanako o alang sa uban nga ako nasayod

• Unsaon nako pagpangandam alang sa sakramento?

• Unsa ang mahimo nakong buhaton atol sa sakramento aron sa paghinumdom ni Jesukristo?

Ang mga saad sa pag-ambit sa sakramento

Basaha ang 3 Nephi 18:12–14, ug pangitaa unsay gisaad sa Manluluwas niadtong kinsa naghinumdom Kaniya ug nag-ambit sa sakramento.

• Unsa kahay buot ipasabot sa pagtukod diha sa lig-on nga sukaranan sa Manluluwas?

  Kon ang mga estudyante nagkinahanglan og tabang sa pagsabot kon unsa ang gipasabot sa pagtukod diha sa lig-on nga sukaranan sa Manluluwas, mahimo nimong ipatin-aw nga kini nagpasabot nga kita mohimo ug motuman og mga pakigsaad ngadto Kaniya, magtinguha sa pagsunod sa Iyang ehemplo, ug isip resulta makatagamtam sa mga panalangin sa Iyang kaluoy ug kalig-on.

• Sa unsang paagi nga ang pag-ambit sa sakramento makatabang kanato sa pagtukod diha sa lig-on nga sukaranan sa Manluluwas?

• Unsay ang imong mabuhat aron mahimong mas makahuluganon ang pag-ambit sa sakramento matag semana?

Pagpamatuod mahitungod sa unsa nga paagi nga ang sakramento makatabang kanato sa pagtukod sa atong mga kinabuhi diha sa lig-on nga sukaranan sa Manluluwas. Ikonsiderar ang pagpakigbahin sa usa ka butang nga imong gibuhat aron mahimo ang sakramento nga makahuloganon alang kanimo. Hangyoa ang mga estudyante sa pagpamalandong ug sa pagpakigbahin kon unsa kaha nga mga panalangin ang ilang madawat kon sila mahinumdom sa Manluluwas samtang nangandam ug nag-ambit sa sakramento.

Komentaryo ug Background nga Impormasyon

3 Nephi 18:7, 11. Unsay makapahimo sa akong kasinatian sa sakramento nga mas makahuloganon?

Si Elder Peter F. Meurs sa Seventy mitudlo:

Gidapit ko kamo sa pagkonsiderar og lima ka mga paagi sa pagdugang sa epekto ug gahom sa atong regular nga pag-apil sa sagradong ordinansa sa sakramento, usa ka ordinansa nga makatabang kanato nga mahimong balaan.

1. Pangandam Daan. …

2. Sayo nga Moabot. …

3. Kanta ug Pagkat-on gikan sa mga Pulong sa Himno sa Sakrament. …

4. Espirituhanong Moapil sa mga Pag-ampo sa Sakramento. …

5. Mamalandong ug Mohinumdom Kaniya samtang Gipakigbahin ang mga Ilhanan sa Sakramento. …

Ako mopamatuod sa daghang mga panalangin nga maato samtang palamboon nato ang atong pagpangandam ug espirituhanong pag-apil diha sa ordinansa sa sakramento. (Peter F. Meurs, “Ang Sakrament Makatabang Kanato nga Mahimong Balaan,” Liahona, Nob. 2016, 85–87)

Aron mahibaloan kon sa unsang paagi kining lima ka mga paagi makahimo sa imong kasinatian sa sakramento nga mas gamhanan, basaha o tan-awa ang “Ang Sakramento Makatabang Kanato nga Mahimong Balaan,” anaa sa ChurchofJesusChrist.org.

3 Nephi 18:28–29. Unsa ang akong buhaton kon bation nako nga dili takos sa pag-ambit sa sakramento?

“Importante nga hinumduman nga ‘ikaw dili kinahanglan nga perpekto aron makaambit sa sakramento, apan ikaw kinahanglan nga anaay espiritu sa pagkamapainubsanon ug paghinulsol diha sa imong kasingkasing’ (Matinud-anon sa Tinuhoan [2004], 217). Sa kadaghanan sa mga kaso nga wala maglakip sa seryoso nga mga sala, kon kamo nakapamalandong sa inyong pamatasan ug mapainubsanon ug kinasingkasing nga nagtinguha sa paghinulsol ug sa pagsunod sa Manluluwas, kamo kinahanglan moambit sa sakramento. Dayon masinati ninyo ang makahinlo nga epekto niini nga ordinansa ug bag-ohon ang inyong pakigsaad nga dad-on diha kaninyo ang ngalan ni Jesukristo ug sundon ang Iyang mga sugo. Kon aduna pa kamoy mga pangutana, pakigsulti sa inyong bishop” (“When Should I Not Partake of the Sacrament?,” New Era, Nob. 2017, 48).

Si Elder John H. Groberg sa Seventy mitudlo:

Unsa man ang buot ipasabot sa pag-ambit sa sakramento nga takos? O unsaon man nato sa pagkahibalo nga kita dili takos?

Kon nagtinguha kita nga molambo (nga mao ang paghinulsol) ug dili ubos sa restriksiyon sa pagkapari, niana, sa akong hunahuna, kita takos. Hinoon, kon, kita walay tinguhang molambo, kon kita walay intensiyon nga mosunod sa giya sa Espiritu, kinahanglan nga mangutana kita: Takos ba kitang moambit, o giyama-yamaan ra ba nato ang importanteng katuyoan sa sakramento, nga mao ang buhat isip usa ka pagpasiugda sa personal nga paghinulsol ug kalamboan? (John H. Groberg, “The Beauty and Importance of the Sacrament,” Ensign, Mayo 1989, 38)

Dugang nga mga Kalihokan sa Pagkat-on

3 Nephi 18:1–2. Mangandam sa Pagdawat sa Sakramento

Ang mosunod makatabang sa mga estudyante sa pag-andam sa pag-ambit sa sakramento.

Diha sa 3 Nephi 18:1–2, atong makita nga ang Manluluwas mihimo og paningkamot sa pag-andam sa mga katawhan sa pagdawat sa sakramento. Iya una nga gidapit ang pundok sa mga katawhan sa paglingkod. Kon gusto nimong hisgotan pa kini nga ideya, mahimong makatabang ang pagpahinumdom sa mga estudyante nga makapangandam sila alang sa sakramento sa Dominggo pinaagi sa pagbuhat sa mga butang inig ka Sabado. Pangutan-a ang mga estudyante og sama sa mosunod:

“Unsa ang pipila ka mga pagpangandam nga mahimo nimong himoon inig ka Sabado aron ang Domingo mahimong mas nakasentro kang Kristo?”

“Unsa nga mga kausaban ang imong mahimo sa imong mga naandang buhaton una pa ang simba nga makatabang kanimo nga maandam sa paghinumdom sa Manluluwas atol sa sakramento?”

Mga himno sa sakramento

Aron matabangan ang mga estudyante nga makasabot kon sa unsang paagi ang mga himno sa sakramento makatabang kanila sa paghinumdom sa Manluluwas, dapita ang mga estudyante sa pagpangita og himno sa sakramento nga makahuloganon ngadto kanila. Hisgoti ang kamahinungdanon sa himno sa sakramento ug sa unsang paagi kini makatabang kanato sa paghinumdom sa Manluluwas. Dasiga ang mga estudyante sa pagkanta sa mga himno sa sakramento diha sa simbahan.

Hinumdomi Siya kanunay

Ang mosunod makatabang sa mga estudyante nga makamugna og mga ideya kon unsay hinumdoman mahitungod sa Manluluwas.

Hisgoti kon unsay paningkamotan sa mga estudyante nga hinumdoman mahitungod sa Manluluwas kon moambit sila sa sakramento. Mahimo usab nimong hisgotan kon unsaon usab sa mga estudyante paghinumdom kon unsa ang nabuhat sa Manluluwas alang sa ilang kaugalingon.

Mahimo usab nimong basahon ug hisgotan ang mga bahin sa “This Do in Remembrance of Me,” usa ka pakigpulong ni Elder Jeffrey R. Holland sa Korum sa Napulog Duha ka Apostoles (Ensign, Nob. 1995, 67–69).

3 Nephi 18:12–14. Pagtukod diha sa ibabaw sa lig-on nga sukaranan

Ikonsiderar ang pagkonektar sa 3 Nephi 18:12–14 ngadto sa Helaman 5:12. Pagdapit og usa ka estudyante sa pagbasa sa Helaman 5:12 og kusog, ug sa paghisgot sa mga pagkapareho tali sa duha ka mga bersikulo. Hisgoti kon sa unsang paagi ang pag-ambit sa sakramento matag semana makatabang sa paghimo sa Manluluwas nga tukuranan sa kinabuhi sa mga estudyante.