« នីហ្វៃទី ៣ ១៨: ១–១៤ ៖ ‹ ក្នុងការចងចាំដល់យើង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ៣ ១៨: ១–១៤ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ៣ ១៨:១–១៤
« ក្នុងការចងចាំដល់យើង »
យើងមានឱកាសដើម្បីទទួលទានសាក្រាម៉ង់ជាប្រចាំ ។ នៅក្នុង នីហ្វៃទី ៣ ១៨ ព្រះយេស៊ូវបានបង្រៀនអំពីរបៀបដែលសាក្រាម៉ង់អាចផ្ដល់ពរដល់ជីវិតរបស់យើង ហើយបានណែនាំអំពីរបៀបដើម្បីអនុវត្តពិធីបរិសុទ្ធនេះផងដែរ ។ មេរៀននេះអាចជួយឲ្យអ្នកទទួលបានបទពិសោធន៍ដ៏មានអត្ថន័យ ដោយការចងចាំព្រះអង្គសង្គ្រោះ នៅពេលដែលអ្នកទទួលទានសាក្រាម៉ង់ ។
ការជួយឲ្យអ្នកសិក្សាស្វែងរកការជាប់ ទាក់ទងនៅក្នុងសេចក្តីពិតនៃដំណឹងល្អ ។ សិស្សមួយចំនួនអាចពិបាកមើលឃើញពីរបៀបដែលដំណឹងល្អទាក់ទងនឹងជីវិតប្រចាំថ្ងៃរបស់ពួកគេ ។ សូមស្វែងរកវិធីដើម្បីជួយសិស្សទទួលអារម្មណ៍ថា អ្វីដែលពួកគេកំពុងរៀនមានអត្ថន័យ និងមានប្រយោជន៍ចំពោះស្ថានភាពផ្ទាល់ខ្លួន សំណួរ និងតម្រូវការរបស់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យសញ្ជឹងគិតថាតើបទពិសោធន៍នៃការទទួលទានសាក្រាម៉ង់របស់ពួកគេមានន័យយ៉ាងណា ។ សូមលើកទឹកចិត្តសិស្សឲ្យសញ្ជឹងគិតអំពីអ្វីដែលពួកគេអាចធ្វើ ដើម្បីកែលម្អសាក្រាម៉ង់ឲ្យបានល្អប្រសើរឡើង ។
សកម្មភាពរៀនសូត្រដែលអាចមាន
ទំនាក់ទំនងដ៏រឹងមាំ
គំនិតខាងក្រោមនេះអាចជួយដល់សិស្សគិតអំពីទំនាក់ទំនងដ៏រឹងមាំអ្វីខ្លះដែលត្រូវបានបង្កើតឡើង ។ ដំណើរការនៃការគិតនេះអាចជួយដល់សិស្សឲ្យសញ្ជឹងគិតអំពីទំនាក់ទំនងរបស់ពួកគេជាមួយនឹងព្រះអង្គសង្គ្រោះ ហើយស្វែងរកវិធីដើម្បីខិតចូលទៅកាន់តែជិតទ្រង់ ។ មានរបៀបមួយដើម្បីធ្វើការណ៍នេះបាន គឺតាមរយៈសាក្រាម៉ង់ ។
សូមគិតអំពីមនុស្សមួយចំនួនដែលអ្នកមានអារម្មណ៍ថា ពិតជាមានភាពស្និទ្ធស្នាល និងមានទំនាក់ទំនងរឹងមាំជាមួយនឹងបុគ្គលទាំងនោះ ។
-
តើអ្នក ឬពួកគេបានធ្វើអ្វីខ្លះ ដើម្បីពង្រឹងទំនាក់ទំនងទាំងនោះ ?
ឥឡូវនេះ សូមគិតអំពីរបៀបដែលអ្នកមានអារម្មណ៍ថាជិតស្និទ្ធទៅនឹងព្រះអង្គសង្គ្រោះ ។
-
តើអ្នកគិតថា មានអ្វីខ្លះដែលអាចជួយដល់អ្នកនៅក្នុងការពង្រឹងទំនាក់ទំនងរបស់អ្នកជាមួយនឹងព្រះអង្គសង្គ្រោះ ?
នៅពេលដែលអ្នកកំពុងសិក្សានៅថ្ងៃនេះ សូមយាងអញ្ជើញព្រះវិញ្ញាណបរិសុទ្ធឲ្យបង្រៀនអ្នកអំពីរបៀបខិតចូលទៅជិតព្រះអង្គសង្គ្រោះ និងពង្រឹងទំនាក់ទំនងរបស់អ្នកជាមួយនឹងទ្រង់ ។
ព្រះយេស៊ូវគ្រីស្ទបានតាំងពិធីសាក្រាម៉ង់នេះឡើង
ព្រះអង្គសង្គ្រោះបានពោរពេញដោយសេចក្តីអាណិតអាសូរចំពោះប្រជាជន នៅពេលដែលទ្រង់ញាណដឹងអំពីបំណងប្រាថ្នារបស់ពួកគេចំពោះទ្រង់ ដើម្បីឲ្យទ្រង់គង់នៅជាមួយនឹងពួកគេយូរជាងនេះ ( សូមមើល នីហ្វៃទី ៣ ១៧:១–៦ ) ។ បន្ទាប់ពីទ្រង់បានប្រសិទ្ធពរដល់កុមារ និងអ្នកជំងឺ និងអ្នកដែលបានរងទុក្ខវេទនាហើយ ព្រះអង្គសង្គ្រោះបានប្រទានមធ្យោបាយមួយសម្រាប់ប្រជាជន គឺទ្រង់ប្រទានព្រះវិញ្ញាណរបស់ទ្រង់ឲ្យគង់នៅជាមួយនឹងពួកគេជានិច្ច ។
សូមអាន នីហ្វៃទី ៣ ១៨:១–១១ ហើយរកមើលអ្វីខ្លះដែលព្រះអង្គសង្គ្រោះបានធ្វើ ។
អ្នកអាចពិចារណាបំបែកសិស្សមួយក្រុមឲ្យអាន នីហ្វៃទី ៣ ១៨:១–៧ ហើយមួយក្រុមទៀតឲ្យអាន នីហ្វៃទី ៣ ១៨:៨–១១ ។ សូមអញ្ជើញសិស្សឲ្យគិតអំពីសំណួរ ដែលពួកគេមានអំពីអត្ថន័យនៃខគម្ពីរ ដែលពួកគេបានអាន ឬពិធីបរិសុទ្ធនៃសាក្រាម៉ង់ ។ ប្រសិនបើចាំបាច់ អ្នកអាចស្វែងរកព័ត៌មានដែលមានប្រយោជន៍នៅក្នុង ប្រធានបទដំណឹងល្អ « សាក្រាម៉ង់ » ដែលមាននៅលើគេហទំព័រ topics.ChurchofJesusChrist.org ។
សូមពិចារណាចាក់វីដេអូ « esus Christ Introduces the Sacrament to the People » ដែលមាននៅលើគេហទំព័រ ChurchofJesusChrist.orgចាប់ពីនាទីទី ០:១២ ដល់នាទីទី ៦:១២ បន្ទាប់ពីសិស្សអានខគម្ពីរ ឬពេលពួកគេផ្ទៀងផ្ទាត់តាម°។ សំណួរខាងក្រោមនេះអាចជួយនៅក្នុងការពិភាក្សាបន្ទាប់ពីមើលវីដេអូរួច ៖ តើអ្នកចាប់អារម្មណ៍អ្វីខ្លះ ? តើអ្នកគិតថា ប្រជាជនមានអារម្មណ៍បែបណាដែរនៅពេលដែលពួកគេទទួលទាន ? ហេតុអ្វី ? ប្រសិនបើព្រះអង្គសង្គ្រោះជាអ្នកប្រសិទ្ធពរសាក្រាម៉ង់ឲ្យអ្នក តើអ្នកគិតថា អ្នកនឹងទទួលបានបទពិសោធន៍ខុសគ្នាដោយរបៀបណា ?
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1b%2Fbb%2F1bbb8de7cf546c2e30356efc89dd5256accab5fc%2F1bbb8de7cf546c2e30356efc89dd5256accab5fc.jpeg/full/!250,/0/default)
-
តើអ្នកបានស្វែងយល់អ្វីខ្លះអំពីសាក្រាម៉ង់ ចេញពីការបង្រៀនរបស់ព្រះអង្គសង្គ្រោះ ?
-
តើព្រះអង្គសង្គ្រោះសន្យាអ្វីខ្លះនៅក្នុងការអធិស្ឋានប្រសិទ្ធពរសាក្រាម៉ង់ ប្រសិនបើយើងចងចាំដល់ទ្រង់ជានិច្ច ?
អ្នកអាចពិចារណាគូសចំណាំនៅលើគោលការណ៍នេះនៅក្នុង នីហ្វៃទី ៣ ១៨:៧, ១១ ថា នៅពេលយើងទទួលទានសាក្រាម៉ង់ ហើយចងចាំអំពីព្រះអង្គសង្គ្រោះជានិច្ច នោះយើងនឹងមានព្រះវិញ្ញាណរបស់ទ្រង់គង់ជាមួយនឹងយើង ។
នៅពេលដែលព្រះយេស៊ូវគ្រីស្ទសំដៅលើពួកយើងថា ឲ្យមាន ព្រះវិញ្ញាណរបស់ទ្រង់ គង់នៅជាមួយនឹងពួកយើង ទ្រង់កំពុងមានបន្ទូលសំដៅទៅលើអំណោយទាននៃព្រះវិញ្ញាណបរិសុទ្ធ ។
-
តើមានរបៀបអ្វីខ្លះ ដែលយើងអាចចងចាំព្រះអង្គសង្គ្រោះជានិច្ចនៅក្នុងជីវិតរស់នៅប្រចាំថ្ងៃរបស់យើង ? តើការចងចាំព្រះអង្គសង្គ្រោះជានិច្ចអាចជួយដល់យើងឲ្យមានព្រះវិញ្ញាណបរិសុទ្ធគង់នៅជាមួយនឹងយើងដោយរបៀបណា ?
-
តើការមានព្រះវិញ្ញាណបរិសុទ្ធគង់នៅជាមួយនឹងអ្នកអាចផ្ដល់ពរជ័យដល់ជីវិតរបស់អ្នក នៅពេលបច្ចុប្បន្ននេះបានដោយរបៀបណា ?
បទពិសោធន៍របស់យើងជាមួយសាក្រាម៉ង់
សូមពិចារណាសរសេរអំពីចំណុចនៃការស្ទង់មតិទាំងនេះនៅលើក្ដារខៀន ឬនៅលើក្រដាសផ្សេងមួយទៀត ។ សិស្សអាចឆ្លើយទៅនឹងការស្ទង់មតិនៅក្នុងសៀវភៅកំណត់ហេតុការសិក្សារបស់ពួកគេបាន ចម្លើយរបស់ពួកគេនឹងមិនត្រូវបានចែកចាយនោះទេ ។
សូមគិតអំពីរបៀបដែលទំនាក់ទំនងរបស់អ្នកជាមួយព្រះអង្គសង្គ្រោះអាចត្រូវបានពង្រឹង ប្រសិនបើអ្នកមានបទពិសោធន៍ដ៏មានអត្ថន័យជ្រាលជ្រៅកាន់តែច្រើនអំពីការទទួលទានសាក្រាម៉ង់ ។ សូមឆ្លើយទៅនឹងឃ្លានីមួយៗដោយពាក្យ « ជានិច្ចកាល» « ពេលខ្លះ » « កម្រ » ឬ « មិនធ្លាប់ » ។
-
ខ្ញុំចំណាយពេលខ្លះមុនព្រះវិហារចាប់ផ្តើមដើម្បីរៀបចំខ្លួនសម្រាប់សាក្រាម៉ង់ ។
-
នៅក្នុងអំឡុងពេលកំពុងសាក្រាម៉ង់ ខ្ញុំព្យាយាមចងចាំអំពីព្រះយេស៊ូវគ្រីស្ទ ។
-
បទពិសោធន៍របស់ខ្ញុំចំពោះសាក្រាម៉ង់មានឥទ្ធិពលនៅលើសកម្មភាពរបស់ខ្ញុំនៅក្នុងអំឡុងពេលនៃសប្តាហ៍នេះ ។
សកម្មភាពខាងក្រោមអាចជួយដល់យុវជនបង្កើតនូវវិធីដ៏មានអត្ថន័យបំផុតនៅក្នុងការចងចាំអំពីព្រះគ្រីស្ទនៅអំឡុងពេលពិធីសាក្រាម៉ង់ ។ ចូរពិចារណាបង្កើតតារាងនេះនៅលើក្តារខៀន ហើយអញ្ជើញឲ្យសិស្សសរសេរចម្លើយចូលទៅក្នុងនោះ ។ សិស្សមួយចំនួនប្រហែលជាមានគំនិតរួចហើយសម្រាប់អ្វី ដែលជួយឲ្យពួកគេចងចាំអំពីព្រះអង្គសង្គ្រោះ ។ សូមស្នើសុំឲ្យសិស្សចែកចាយនូវអ្វីដែលពួកគេកំពុងធ្វើ ដើម្បីជួយជាគំនិត ។
សិស្សក៏អាចបំពេញតារាងផ្ទាល់ខ្លួនបន្ថែមទៀតនៅក្នុងសៀវភៅកំណត់ហេតុការសិក្សារបស់ពួកគេផងដែរ ។ ពួកគេអាចថតរូបតារាងរបស់ពួកគេ បន្ទាប់មកទុកសម្រាប់ជាការរំឭកសម្រាប់ពេលដែលពួកគេទទួលទានសាក្រាម៉ង់នៅលើកក្រោយ ។
បទពិសោធន៍សាក្រាម៉ង់ដ៏មានអត្ថន័យជ្រាលជ្រៅ
-
តើខ្ញុំចង់ចងចាំអ្វីខ្លះអំពីព្រះយេស៊ូវគ្រីស្ទ ?
សូមពិចារណាដូចខាងក្រោម ៖
-
អ្វីដែលទ្រង់បានទទួលរងទុក្ខវេទនា
-
អ្វីដែលទ្រង់បានធ្វើសម្រាប់ខ្ញុំ ឬអ្នកដទៃដែលខ្ញុំស្គាល់
-
-
តើខ្ញុំអាចរៀបចំខ្លួនដើម្បីទទួលទានសាក្រាម៉ង់ដោយរបៀបណា ?
-
តើខ្ញុំអាចធ្វើអ្វីខ្លះបាននៅក្នុងអំឡុងពេលពិធីសាក្រាម៉ង់ ដើម្បីចងចាំអំពីព្រះយេស៊ូវគ្រីស្ទ ?
សេចក្តីសន្យាអំពីការទទួលទានសាក្រាម៉ង់
សូមអាន នីហ្វៃទី ៣ ១៨:១២–១៤ និងរកមើលពីអ្វីដែលព្រះអង្គសង្គ្រោះបានសន្យាចំពោះអស់អ្នកដែលចងចាំអំពីទ្រង់ និងទទួលទានសាក្រាម៉ង់ ។
-
តើអ្នកគិតថា ពាក្យសង់នៅលើថ្មរបស់ព្រះអង្គសង្គ្រោះមានន័យដូចម្តេច ?
ប្រសិនបើសិស្សត្រូវការជំនួយដើម្បីពន្យល់អំពីអត្ថន័យនៃពាក្យ សង់នៅលើថ្មរបស់ព្រះអង្គសង្គ្រោះ នោះអ្នកអាចពន្យល់ថា ឃ្លានេះមានន័យថា យើងធ្វើ និងកាន់តាមសេចក្តីសញ្ញារបស់ទ្រង់ ខិតខំព្យាយាមធ្វើតាមគំរូរបស់ទ្រង់ ហើយជាលទ្ធផលនឹងរីករាយជាមួយការទទួលបានពរជ័យនៃសេចក្តីមេត្តាករុណា និងកម្លាំងរបស់ទ្រង់ ។
-
តើការទទួលទានសាក្រាម៉ង់អាចជួយដល់យើងឲ្យសង់នៅលើថ្មរបស់ព្រះអង្គសង្គ្រោះដោយរបៀបណា ?
-
តើអ្នកអាចធ្វើអ្វីបានខ្លះ ដើម្បីធ្វើឲ្យការទទួលទានសាក្រាម៉ង់កាន់តែមានអត្ថន័យយ៉ាងជ្រាលជ្រៅជារៀងរាល់សប្តាហ៍ ?
សូមថ្លែងទីបន្ទាល់អំពីរបៀបដែលសាក្រាម៉ង់អាចជួយដល់ពួកយើងនៅក្នុងការកសាងជីវិតរបស់យើងនៅលើថ្មរបស់ព្រះអង្គសង្គ្រោះ ។ សូមគិតអំពីការចែកចាយអ្វីមួយ ដែលអ្នកធ្វើដើម្បីធ្វើឲ្យសាក្រាម៉ង់មានអត្ថន័យជ្រាលជ្រៅចំពោះអ្នក ។ សូមឲ្យសិស្សសញ្ជឹងគិត ហើយចែកចាយអំពីពរជ័យអ្វីខ្លះ ដែលពួកគេអាចនឹងទទួលបានប្រសិនបើពួកគេចងចាំអំពីព្រះអង្គសង្គ្រោះនៅពេលដែលកំពុងធ្វើការរៀបចំខ្លួន និងការទទួលទានសាក្រាម៉ង់នេះ ។