« នីហ្វៃទី ៣ ១៨: ១៥–៣៩; ១៩: ១៩–២៩ ៖ ‹ ‘ចូរអធិស្ឋានជានិច្ច › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ៣ ១៨: ១៥–៣៩; ១៩: ១៩–២៩» ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ៣ ១៨:១៥-៣៩; ១៩:១៩–២៩
« ចូរអធិស្ឋានជានិច្ច »
មានមនុស្សជាច្រើនអធិស្ឋានជារៀងរាល់ថ្ងៃ ការអធិស្ឋានមួយចំនួនអាចមានអត្ថន័យច្រើនជាងការអធិស្ឋានផ្សេងទៀត ។ ព្រះយេស៊ូវគ្រីស្ទមិនមែនគ្រាន់តែបង្រៀនដល់អ្នកដើរតាមទ្រង់ឲ្យ « អធិស្ឋានទៅដល់ព្រះវរបិតាជានិច្ច » នោះទេ ( នីហ្វៃទី ៣ ១៨:១៩ ) ប៉ុន្តែទ្រង់ក៏បានបង្ហាញពួកគេអំពីរបៀបអធិស្ឋានផងដែរ ។ មេរៀននេះអាចជួយអ្នកឲ្យធ្វើតាមការបង្រៀន និងគំរូរបស់ព្រះយេស៊ូវគ្រីស្ទ ដើម្បីអធិស្ឋានជានិច្ច ហើយធ្វើឲ្យការអធិស្ឋានកាន់តែមានអត្ថន័យជ្រាលជ្រៅបន្ថែមទៀតបាន ។
សូមអធិស្ឋានសម្រាប់សិស្សរបស់អ្នកឲ្យបានទៀងទាត់ ។ ព្រះវរបិតាសួគ៌ស្គាល់សិស្សម្នាក់ៗរបស់អ្នក ។ នៅពេលដែលអ្នកអធិស្ឋានទៅកាន់ទ្រង់អំពីសិស្សរបស់អ្នក នោះទ្រង់អាចជួយដល់អ្នកដឹងអំពីតម្រូវការរបស់ពួកគេ និងបំផុសគំនិតអ្នកនូវវិធីនានា ដើម្បីបំពេញតម្រូវការទាំងនោះ ។ សូមស្តាប់ការបំផុសគំនិតដែលអាចទទួលបាន នៅពេលដែលអ្នករៀបចំខ្លួនដើម្បីបង្រៀន ឬនៅក្នុងអំឡុងពេលកំពុងបង្រៀន ។
ការរៀបចំសិស្ស ៖ សូមអញ្ជើញសិស្សឲ្យអាន ឬមើលសុន្ទរកថារបស់ប្រធាន អិម រ័សុល បាឡឺដ « Watch Ye Therefore, and Pray Always » ( Liahona ខែ វិច្ឆិកា ឆ្នាំ ២០២០ ទំព័រ ៧៧–៧៩ ) ដោយស្វែងរកសេចក្តីពិតដែលអាចជួយដល់ពួកគេជាមួយនឹងការអធិស្ឋានផ្ទាល់ខ្លួនរបស់ពួកគេ ។
សកម្មភាពរៀនសូត្រដែលអាចមាន
គំរូ
សូមសរសេរប្រយោគខាងក្រោមនៅលើក្ដារខៀនដោយទុកចន្លោះ ហើយអនុញ្ញាតឲ្យសិស្សជាច្រើននាក់ចែកចាយអំពីរបៀបដែលពួកគេនឹងបំពេញនៅក្នុងចន្លោះនោះ ។
សូមគិតអំពីទេពកោសល្យ ជំនាញ ឬគុណសម្បត្តិ ដែលអ្នកចង់អភិវឌ្ឍ ។ សូមកំណត់អត្តសញ្ញាណមនុស្សដែលអ្នកស្គាល់ដែលមានទេពកោសល្យ ជំនាញ ឬគុណសម្បត្តិនោះ ។ ដោយប្រើប្រាស់គំនិតទាំងនេះ សូមបំពេញចន្លោះខាងក្រោមតាមវិធីផ្សេងគ្នាពីរបីទៀត ៖
-
ប្រសិនបើខ្ញុំចង់រៀនអំពី ខ្ញុំនឹងធ្វើតាមគំរូរបស់ ដោយសារ ។
សូមធ្វើលំហាត់នេះម្តងទៀតដោយបំពេញនៅត្រង់ចន្លោះប្រយោគទទេទីមួយខាងក្រោមនេះ ដោយសរសេរអំពីអ្វីមួយដែលអ្នកចង់រៀនអំពីព្រះអង្គសង្គ្រោះ ហើយឆ្លើយអំពីមូលហេតុ នៅក្នុងចន្លោះទទេនៅចុងក្រោយ ។
-
ប្រសិនបើខ្ញុំចង់រៀនអំពី ខ្ញុំនឹងធ្វើតាមគំរូរបស់ព្រះយេស៊ូវគ្រីស្ទ ដោយសារ ។
នៅក្នុងអំឡុងពេលការងារបម្រើរបស់ទ្រង់នៅទ្វីបអាមេរិក ព្រះអង្គសង្គ្រោះបានបង្រៀនដល់ប្រជាជនតាមរយៈព្រះបន្ទូល និងគំរូ ។
សូមអាន នីហ្វៃទី ៣ ១៨:១៦, ២៤ ដោយរកមើលអំពីគំរូមួយដែលព្រះយេស៊ូវបានធ្វើ ។
-
តើព្រះអង្គសង្គ្រោះចង់ឲ្យប្រជាជនរៀនអំពីអ្វីខ្លះចេញពីគំរូរបស់ទ្រង់ ?
សិស្សអាចធ្វើស្វ័យវាយតម្លៃទៅលើការអធិស្ឋាននៅក្នុងពេលបច្ចុប្បន្នរបស់ពួកគេ ដោយប្រើប្រាស់រង្វាស់ខាងក្រោមនេះ ។ ការធ្វើដូច្នេះ អាចយាងព្រះវិញ្ញាណបរិសុទ្ធឲ្យជួយដល់ពួកគេដឹងអំពីរបៀបនៃការបង្រៀន និងគំរូរបស់ព្រះអង្គសង្គ្រោះអាចជួយដល់ពួកគេឲ្យកែលម្អការអធិស្ឋានផ្ទាល់ខ្លួនរបស់ពួកគេបានប្រសើរឡើង ។
សូមវាយតម្លៃដោយដាក់ពិន្ទុទៅលើចំណុចខាងក្រោមចាប់ពីលេខ ១ ទៅដល់ ៥ ដោយលេខ ៥ គឺជាកម្រិតពិន្ទុខ្ពស់បំផុត ៖
-
ខ្ញុំអធិស្ឋានជារៀងរាល់ថ្ងៃ ។
-
ខ្ញុំប្រាស្រ័យទាក់ទង និងទទួលបាននូវអារម្មណ៍ស្និទ្ធស្នាលជាមួយនឹងព្រះវរបិតាសួគ៌នៅពេលខ្ញុំអធិស្ឋាន ។
-
ខ្ញុំមានអារម្មណ៍ថា ចង់កែលម្អការអធិស្ឋានផ្ទាល់ខ្លួនរបស់ខ្ញុំឲ្យបានប្រសើរឡើង ។
សូមអញ្ជើញសិស្សឲ្យពិភាក្សាអំពីបញ្ហាប្រឈមមុខទូទៅ ដើម្បីមានការអធិស្ឋានដ៏មានអត្ថន័យ—ឧទាហរណ៍ ការរៀបចំពេលដើម្បីអធិស្ឋាន ការដឹងអំពីពាក្យអ្វីខ្លះដែលត្រូវនិយាយ ការទទួលបានចម្លើយ ឬបញ្ហាប្រឈមមុខនានាផ្សេងៗទៀត ។ បន្ទាប់មក សិស្សអាចស្វែងរកដំណោះស្រាយនៅពេលដែលពួកគេសិក្សាបទគម្ពីរនេះ ។
នៅពេលដែលអ្នកបន្តសិក្សា នីហ្វៃទី ៣ ១៨ សូមស្វែងរកការបំផុសគំនិតមកពីព្រះវិញ្ញាណបរិសុទ្ធ ដើម្បីជួយអ្នកឲ្យដឹងអំពីអ្វី ដែលអ្នកអាចធ្វើបានដើម្បីកែលម្អការអធិស្ឋានផ្ទាល់ខ្លួនរបស់អ្នកឲ្យបានប្រសើរឡើង ។ សូមធ្វើតាមការបង្រៀន និងគំរូរបស់ព្រះយេស៊ូវគ្រីស្ទ នៅពេលដែលអ្នកស្វែងរកការកែលម្អ ។
ការបង្រៀនរបស់ព្រះអង្គសង្គ្រោះអំពីការអធិស្ឋាន
សូមអាន នីហ្វៃទី ៣ ១៨: ១៥, ១៨–២៣ រកមើលអ្វីដែលព្រះអង្គសង្គ្រោះបានបង្រៀនអំពីការអធិស្ឋាន ។ អ្នកក៏អាចអានការណែនាំរបស់ព្រះអង្គសង្គ្រោះអំពីការអធិស្ឋាន ចេញពីទេសនកថារបស់ទ្រង់នៅឯព្រះវិហារបរិសុទ្ធនៅក្នុង នីហ្វៃទី ៣ ១៣:៥–១៣ ផងដែរ ។
សិស្សអាចបំពេញប្រយោគខាងក្រោមនៅលើក្ដារខៀន ៖
-
ខ្ញុំអាចធ្វើតាមការបង្រៀនរបស់ព្រះអង្គសង្គ្រោះអំពីការអធិស្ឋានបាន ដោយ …
សូមចំណាយពេលឲ្យបានគ្រប់គ្រាន់ដើម្បីពិភាក្សាអំពីការបង្រៀនរបស់ព្រះអង្គសង្គ្រោះ ។ សូមឲ្យមានការពិភាក្សាដោយការស្ម័គ្រចិត្តចំពោះអ្វីដែលសិស្សមានអារម្មណ៍ថា ពួកគេត្រូវការ ។ ឧទាហរណ៍ សិស្សនៅក្នុងថ្នាក់ប្រហែលជាចំណាយពេលនិយាយ អំពីរបៀបដែលការអធិស្ឋានជួយដល់យើងទប់ទល់ទៅនឹងការល្បួង របៀបដែលការអធិស្ឋានផ្ដល់ពរដល់ក្រុមគ្រួសារ ឬរបៀបដែលយើងអាចសុំពរជ័យតាមរយៈការអធិស្ឋាន ។ អ្នកអាចសិក្សាបន្ថែមទៀតអំពីការបង្រៀនរបស់ព្រះអង្គសង្គ្រោះ អំពីការអធិស្ឋាននៅក្នុង លូកា ១១:១–១៣ បាន ។
អ្នកក៏អាចប្រើប្រាស់ឃ្លាមួយចំនួននៅក្នុងផ្នែក « វិចារណកថា និង ព័ត៌មានសាច់រឿង » ធ្វើជាផ្នែកនៃការពិភាក្សាបានផងដែរ ។
-
តើការបង្រៀនរបស់ព្រះយេស៊ូវអំពីការអធិស្ឋានមួយណា ដែលអ្នកគិតថាអាចជួយដល់អ្នកបានច្រើនបំផុត ? ហេតុអ្វី ?
គំរូនៃការអធិស្ឋានរបស់ព្រះអង្គសង្គ្រោះ
សូមគិតស្រមៃមើលថា តើវានឹងមានលក្ខណៈបែបណា នៅពេលដែលឮព្រះយេស៊ូវគ្រីស្ទអធិស្ឋានឲ្យអ្នកនោះ ។ តើអ្នកគិតថា ទ្រង់នឹងអធិស្ឋានអំពីអ្វីខ្លះជំនួសអ្នក ? សូមគិតអំពីអារម្មណ៍ទាំងឡាយដែលអ្នកអាចមាន និងរបៀបដែលអារម្មណ៍ទាំងនោះអាចមានឥទ្ធិពលទៅលើការអធិស្ឋានរបស់អ្នកដោយផ្ទាល់ ។
អ្នកអាចបែងចែកសិស្សនៅក្នុងថ្នាក់ទៅជាក្រុមតូចៗ ហើយដាក់ខគម្ពីរខាងក្រោមនេះទៅឲ្យក្រុមនីមួយៗដើម្បីអាន ហើយរាយការណ៍អំពីចម្លើយនោះមកវិញ ។
សូមជួយដល់សិស្សឲ្យមើលឃើញថា តើព្រះយេស៊ូវបានអធិស្ឋានទៅដល់នរណា តើទ្រង់បានអធិស្ឋានសម្រាប់នរណា ហេតុអ្វីបានជាទ្រង់អធិស្ឋាន អាកប្បកិរិយារបស់ទ្រង់នៅក្នុងពេលអធិស្ឋាន និងមានច្រើនទៀត ។ មានវិធីមួយនៅក្នុងការធ្វើបែបនេះបាន គឺឲ្យសិស្សឆ្លើយទៅនឹងសំណួរ ថា « នរណា ? » « អ្វី ? » « ហេតុអី ? » និង « ដោយរបៀបណា ? »
នៅពេលដែលធ្វើការពិភាក្សាអំពីមូលហេតុ ដែលព្រះយេស៊ូវបានអធិស្ឋាន អ្នកអាចជួយសិស្សឲ្យមើលឃើញថា មានមូលហេតុមួយដែលព្រះយេស៊ូវបានអធិស្ឋាន គឺដើម្បីទាក់ទងជាមួយនឹងព្រះវរបិតារបស់ទ្រង់ ដែលទ្រង់ស្រឡាញ់ ។
អ្នកអាចបង្ហាញវីដេអូ « The Disciples Minister and Jesus Christ Prays for the People » ចាប់ពីនាទី ទី ៣:០៥ ដល់នាទីទី ៧:១៨ ដែលមាននៅលើគេហទំព័រ ChurchofJesusChrist.orgហើយអញ្ជើញសិស្សឲ្យធ្វើតាមគំរូបែបនេះនៅក្នុងខគម្ពីរ នីហ្វៃទី ៣ ១៩ ។
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F73%2Fe1%2F73e1c60cf9201be5b71a505e616cfe261f24f5de%2F73e1c60cf9201be5b71a505e616cfe261f24f5de.jpeg/full/!250,/0/default)
សូមសិស្សឲ្យបំពេញប្រយោគខាងក្រោមនៅលើក្ដារខៀន ៖
-
ខ្ញុំអាចធ្វើតាមគំរូរបស់ព្រះអង្គសង្គ្រោះអំពីការអធិស្ឋានបាន ដោយ …
-
តើអ្នកបានរៀនសូត្រអ្វីខ្លះ អំពីរបៀបដែលព្រះទ័យរបស់ព្រះអង្គសង្រ្គោះមានអំពីអ្នក ?
-
តើអ្នកគិតថា ការធ្វើតាមគំរូរបស់ទ្រង់អាចធ្វើឲ្យមានភាពខុសគ្នានៅក្នុងការអធិស្ឋានរបស់អ្នកដោយរបៀបណា ?
ការអធិស្ឋានផ្ទាល់ខ្លួនរបស់យើង
សូមជួយដល់សិស្សឲ្យគិតអំពីបទពិសោធន៍ដ៏មានអត្ថន័យ ដែលពួកគេបានប្រើនៅក្នុងការអធិស្ឋាន ។ សិស្សអាចគិតអំពីពេលដែលពួកគេប្រហែលជាបានអធិស្ឋានដើម្បីទប់ទល់ទៅនឹងការល្បួង ឬបានអធិស្ឋានទូលសុំជំនួយទៅលើបញ្ហាមួយ ។ ពួកគេអាចគិតអំពីពេលដែលគ្រួសាររបស់ពួកគេបានទទួលពរជ័យតាមរយៈការអធិស្ឋាន នៅពេលដែលពួកគេបានអធិស្ឋានឲ្យនរណាម្នាក់ផ្សេងទៀត ឬនៅពេលដែលពួកគេបានសុំពរជ័យ ។ សូមអញ្ជើញសិស្សឲ្យចែកចាយអំពីរបៀប ដែលការអធិស្ឋានបានផ្ដល់ពរជ័យដល់ពួកគេ ។ សូមរំឭកដល់សិស្សកុំឲ្យចែកចាយបទពិសោធន៍ណាដែលពិសិដ្ឋ ឬឯកជនខ្លាំងពេក ។
សូមចែកចាយជាមួយសិស្សអំពីរបៀប ដែលអ្នកបានទទួលពរជ័យ នៅពេលដែលអ្នកបានធ្វើតាមគំរូរបស់ព្រះអង្គសង្គ្រោះ និងការបង្រៀនរបស់ទ្រង់អំពីការអធិស្ឋាន ។ សូមយោងទៅលើសេចក្ដីថ្លែងការណ៍ ដែលបានសរសេររួចហើយនៅលើក្ដារខៀន និងពិភាក្សាអំពីរបៀបដែលការបង្រៀន និងគំរូរបស់ព្រះអង្គសង្គ្រោះអាចជួយដោះស្រាយបញ្ហានានាដែលទាក់ទងទៅនឹងការអធិស្ឋានដែលបានរៀបរាប់ខាងដើមមក ។
សូមជ្រើសរើសយ៉ាងហោចណាស់ការបង្រៀនមួយរបស់ព្រះអង្គសង្គ្រោះ ឬអ្វីមួយដែលទ្រង់ធ្វើជាគំរូនៅក្នុងការអធិស្ឋាន ដែលអ្នកអាចដាក់បញ្ចូលទៅក្នុងការអធិស្ឋានផ្ទាល់ខ្លួនរបស់អ្នកបាន ។ សូមបង្កើតការរំឭកមួយ ហើយចាប់ផ្តើមធ្វើការអនុវត្តនៅថ្ងៃនេះ ។ នៅពេលដែលអ្នកធ្វើ សូមកត់សម្គាល់អំពីរបៀប ដែលការអនុវត្តនោះជួយដល់ការអធិស្ឋានរបស់អ្នកឲ្យកាន់តែមានអត្ថន័យ និងរបៀបដែលការអនុវត្តនោះមានឥទ្ធិពលទៅលើទំនាក់ទំនងរបស់អ្នកជាមួយព្រះវរបិតាសួគ៌ ។
អ្នកប្រហែលជាចង់ដាក់បញ្ចូលអ្វីខ្លះបន្ថែមទៀត ដែលអ្នកបានរៀននៅថ្ងៃនេះទៅក្នុងសៀវភៅកំណត់ហេតុការសិក្សារបស់អ្នក « ការសិក្សាអំពីព្រះយេស៊ូវគ្រីស្ទនៅក្នុងនីហ្វៃទី ៣ » ។
អ្នកប្រហែលជាចង់អញ្ជើញសិស្សឲ្យដាក់បញ្ចូលបន្ថែមទៀតទៅក្នុងសៀវភៅកំណត់ហេតុការសិក្សារបស់ពួកគេ « ការសិក្សាអំពីព្រះយេស៊ូវគ្រីស្ទនៅក្នុងនីហ្វៃទី ៣ » ។