« នីហ្វៃទី ៣ ១៧ ៖ ‹ ដ្បិតយើងមានចិត្តអាណិតអាសូរដល់ពួកអ្នករាល់គ្នា › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ៣ ១៧ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ៣ ១៧
« ដ្បិតយើងមានចិត្តអាណិតអាសូរដល់ពួកអ្នករាល់គ្នា »
ទ្រង់បានចំណាយពេលពេញមួយថ្ងៃនៅជាមួយនឹងពួកសាសន៍នីហ្វៃ នៅពេលដែលព្រះអង្គសង្គ្រោះបានប្រកាសថា វាដល់ពេលដែលទ្រង់ត្រូវយាងចេញទៅហើយ ។ ប៉ុន្តែទឹកភ្នែក និងការចង់បានរបស់ប្រជាជនជាច្រើន ដែលចង់ឲ្យទ្រង់គង់នៅយូរបន្តិចទៀត បានធ្វើឲ្យជ្រោតជ្រាបដល់ព្រះហឫទ័យរបស់ទ្រង់ ។ ដោយការបង្ហាញព្រះទ័យអាណិតអាសូរដ៏អស្ចារ្យ ទ្រង់បានព្យាបាលពួកគេ អធិស្ឋានជាមួយនឹងពួកគេ ហើយបានប្រទានពរជ័យដល់កូនៗរបស់ពួកគេម្តងម្នាក់ៗ ។ មេរៀននេះអាចជួយអ្នកឲ្យទទួលអារម្មណ៍ពីចិត្តអាណិតអាសូរដែលព្រះយេស៊ូវគ្រីស្ទមានចំពោះអ្នក ។
ការប្រើប្រាស់វីដេអូអំពីព្រះគម្ពីរមរមន វីដេអូអំពីព្រះគម្ពីរមរមនមានគោលបំណងជួយដល់សិស្សឲ្យទទួលបានបទពិសោធន៍ដ៏មានអត្ថន័យជាមួយនឹងអត្ថបទសិក្សាព្រះគម្ពីរនេះ ។ វីដេអូទាំងនេះមិនមានបំណងមកជំនួសការអានព្រះគម្ពីរនោះទេ ។ សូមធ្វើការសម្រេចចិត្តដោយភាពឆ្លាតវៃនៅពេលប្រើប្រាស់វីដេអូនេះ ដើម្បីជួយបង្កើននូវបទពិសោធន៍នៃការសិក្សារៀនសូត្ររបស់សិស្សទៅលើបទគម្ពីរនេះ ។
ការរៀបចំសិស្ស ៖ សូមអញ្ជើញសិស្សឲ្យគិតអំពីគ្រាដែលពួកគេទទួលបាននូវសេចក្ដីមេត្តាករុណា សេចក្ដីអាណិតអាសូរ ឬសេចក្ដីស្រឡាញ់មកពីព្រះ ។ សិស្សអាចរៀបចំខ្លួនដើម្បីចែកចាយអំពីរបៀបដែលបទពិសោធន៍ទាំងនេះបានជះឥទ្ធិពលដល់ទំនាក់ទំនងរបស់ពួកគេជាមួយនឹងទ្រង់ ។
សកម្មភាពរៀនសូត្រដែលអាចមាន
ការយល់ឃើញរបស់ព្រះអង្គសង្គ្រោះ
សូមស្រមៃថាអ្នកទើបតែ បានចំណាយពេលមួយថ្ងៃជាមួយនឹងព្រះអង្គសង្គ្រោះ ហើយ ទ្រង់បានប្រកាសថា វាដល់ពេលសម្រាប់ទ្រង់ត្រូវយាងចេញទៅហើយ ។
ដើម្បី ជួយសិស្សឲ្យមើលឃើញអំពីព្រឹត្តិការណ៍នេះ អ្នកអាចបង្ហាញវីដេអូ « Jesus Christ and Angels Minister with Compassion » ( ១១:៥៩ ) ដែលមាននៅលើគេហទំព័រ ChurchofJesusChrist.org ចាប់ពីនាទី ទី ០:១២ ដល់នាទីទី ១:៣០ ។
-
តើអ្នកអាចនឹងមានអារម្មណ៍បែបណានៅក្នុងស្ថានភាពនេះ ?
សូមជួយសិស្សរំឭកពីអ្វីដែលពួកគេបានរៀនអំពីព្រះអង្គសង្គ្រោះចេញពី នីហ្វៃទី ៣ ១១–១៦ ។ ពួកគេអាចរំឭកឡើងវិញអំពីអ្វីដែលពួកគេបានសរសេរនៅក្នុងសៀវភៅកំណត់ហេតុការសិក្សារបស់ពួកគេ នៅក្រោម « ការសិក្សាអំពីព្រះយេស៊ូវគ្រីស្ទនៅក្នុង នីហ្វៃទី ៣ » ។
មុនពេលពួកគេឆ្លើយសំណួរខាងក្រោម វាអាចនឹងមានប្រយោជន៍នៅក្នុងការសុំសិស្សឲ្យសរសេររាយពាក្យនៅលើក្ដារខៀន ដែលពណ៌នាអំពីអ្វីដែលព្រះអង្គសង្គ្រោះបានធ្វើ ។
-
តើសកម្មភាពរបស់ព្រះអង្គសង្គ្រោះបង្ហាញពីសេចក្តីស្រឡាញ់របស់ទ្រង់ចំពោះពួកសាសន៍នីហ្វៃដោយរបៀបណា ?
នៅថ្ងៃនេះអ្នកនឹងអានបន្ថែមទៀតអំពីរបៀបដែលព្រះអង្គសង្គ្រោះ បានបង្ហាញអំពីសេចក្តីមេត្តាដោយសេក្តីស្រឡាញ់របស់ទ្រង់នៅក្នុងចំណោមពួកសាសន៍នីហ្វៃ ។ នៅពេលដែលអ្នកសិក្សា សូមគិតថាតើសកម្មភាពមួយណារបស់ទ្រង់ដែលបង្រៀនអំពីបុគ្គលិកលក្ខណៈរបស់ទ្រង់ ។ សូមយកចិត្តទុកដាក់ទៅលើអារម្មណ៍របស់អ្នកដែលមានចំពោះទ្រង់ ។
វាអាចជាប្រយោជន៍ដើម្បីដឹងថា ព្រឹត្តិការណ៍ទាំងអស់ដែលបានកត់ត្រានៅក្នុង នីហ្វៃទី ៣ ១១–១៧ បានកើតឡើងនៅក្នុងរយៈពេលមួយថ្ងៃ ។
សូមអាន នីហ្វៃទី ៣ ១៧:១–៦ ដោយរកមើលនូវអ្វីដែលអ្នកអាចសិក្សាអំពីព្រះយេស៊ូវគ្រីស្ទចេញពីព្រះបន្ទូល និងសកម្មភាពរបស់ទ្រង់ ។
-
តើអ្នកបានរកឃើញអ្វីខ្លះនៅក្នុងខគម្ពីរទាំងនេះ ?
សិស្សអាចនឹងរកឃើញនូវគោលការណ៍មួយស្រដៀងគ្នាទៅនឹងគោលការណ៍ខាងក្រោម ៖ តាមរយៈការសញ្ជឹងគិត និងការអធិស្ឋានទៅកាន់ព្រះវរបិតា នោះយើងរៀបចំចិត្តគំនិតរបស់យើង ដើម្បីទទួលបានការយល់ដឹងកាន់តែច្រើន ។
ប្រសិនបើអ្នកចង់អនុវត្តបន្ថែមទៀតទៅលើគោលការណ៍នេះ សូមមើលផ្នែក « សកម្មភាពរៀនសូត្របន្ថែម » ។
អ្នកប្រហែលជាបានរកឃើញសេចក្តីពិតមួយដែលស្រដៀងគ្នាទៅនឹងសេចក្ដីពិតខាងក្រោមនេះ ៖ ព្រះយេស៊ូវគ្រីស្ទពោរពេញដោយចិត្តអាណិតអាសូរចំពោះរូបខ្ញុំ ។ សូមពិចារណាកត់ត្រាសេចក្ដីពិតនេះនៅជិត ខទី ៦ ។
អែលឌើរ អូលីសេស សូរ៉េស ក្នុងកូរ៉ុមនៃពួកសាវកដប់ពីរនាក់បានបង្រៀន ៖
វាមានប្រយោជន៍ក្នុងការសង្កេតថា ការប្រព្រឹត្តដោយចិត្តអាណិតអាសូររបស់ព្រះយេស៊ូវ មិនមែនជាការបង្ហាញឡើងម្តងម្កាល ឬជាកាតព្វកិច្ចដែលត្រូវបំពេញដោយផ្អែកលើបញ្ជីនៃកិច្ចការដែលត្រូវតែធ្វើឲ្យចប់នោះទេ ប៉ុន្តែវាជាការបង្ហាញជារៀងរាល់ថ្ងៃ អំពីការពិតនៃសេចក្តីស្រឡាញ់ដ៏បរិសុទ្ធរបស់ទ្រង់ចំពោះព្រះ និងបុត្រាបុត្រីរបស់ទ្រង់ រួមទាំងព្រះរាជបំណងដ៏យូរអង្វែងរបស់ទ្រង់ក្នុងការជួយដល់ពួកគេ ។ ( អូលីសេស សូរ៉េស « The Savior’s Abiding Compassion » Liahona ខែ វិច្ឆិកា ឆ្នាំ ២០២១ ទំព័រ ១៤ )
-
តាមគំនិតយល់ឃើញរបស់អ្នក តើ អែលឌើរ សូរ៉េស បង្រៀន អ្វីខ្លះអំពីសេចក្តីអាណិតអាសូរដ៏អង្វែងរបស់ព្រះអង្គសង្គ្រោះ ?
សេចក្តីអាណិតអាសូររបស់ព្រះអង្គសង្គ្រោះ
ផ្នែកដែលនៅសេសសល់នៅក្នុងគម្ពីរ នីហ្វៃទី ៣ ១៧ បង្ហាញអំពីលក្ខណៈនៃសេចក្តីអាណិតអាសូររបស់ព្រះអង្គសង្គ្រោះ ។ សូមចងចាំអំពីអ្វីដែលព្រះយេស៊ូវគ្រីស្ទបានធ្វើនៅក្នុង នីហ្វៃទី ៣ ១៧ ដែលបានកើតឡើងដោយសារទ្រង់បានស្វែងយល់ឃើញអំពីសេចក្តីប្រាថ្នាដ៏សុចរិតរបស់ពួកសាសន៍នីហ្វៃ ហើយទ្រង់ពិតជាចង់គង់នៅជាមួយពួកគេ និងប្រទានពរដល់ពួកគេផងដែរ ។
គោលបំណងនៃសកម្មភាពខាងក្រោម គឺដើម្បីជួយដល់សិស្សឲ្យបង្កើតសេចក្ដីស្រឡាញ់ឲ្យកាន់តែខ្លាំងឡើងចំពោះព្រះអង្គសង្គ្រោះតាមរយៈការមើលឃើញអំពីលក្ខណៈនៃសេចក្តីអាណិតអាសូររបស់ទ្រង់ ។ សិស្សប្រហែលជាបានអនុវត្តជំនាញនេះរួចហើយ នៅខណៈពេលដែលកំពុងសិក្សា នីហ្វៃទី ៣ ១១°។ ការអនុវត្តជំនាញនេះឡើងវិញម្តងហើយម្តងទៀត អាចជួយដល់សិស្សនៅក្នុងការបង្កើនសមត្ថភាពរបស់ពួកគេនៅក្នុងការប្រើប្រាស់វា ។
សូមបង្ហាញអំពីសំណួរ និងវគ្គបទគម្ពីរខាងក្រោមនេះ ។ សូមអញ្ជើញសិស្សឲ្យជ្រើសរើសវគ្គបទគម្ពីរណាដែលពួកគេចង់សិក្សា ហើយសុំពួកគេឲ្យសញ្ជឹងគិតទៅលើសំណួរនេះនៅពេលដែលពួកគេសិក្សា ។ សិស្សអាចឆ្លើយសំណួរទាំងនេះនៅក្នុងសៀវភៅកំណត់ហេតុការសិក្សារបស់ពួកគេនៅក្រោម « ការសិក្សាអំពីព្រះយេស៊ូវគ្រីស្ទនៅក្នុង នីហ្វៃទី ៣ » ។
សូមពិចារណាអនុញ្ញាតឲ្យសិស្សជ្រើសរើសរៀនតែម្នាក់ឯង ឬដោយស្ងៀមស្ងាត់ជាមួយដៃគូម្នាក់ ។
-
តើពេលវេលាមួយណាដែលមានលក្ខណៈពិសេសបំផុតសម្រាប់អ្នក ? ហេតុអ្វី ?
-
តើអ្វីខ្លះបានធ្វើឲ្យអ្នកចាប់អារម្មណ៍ចំពោះរបៀបដែលព្រះយេស៊ូវបានធ្វើការងារបម្រើ ?
-
តើព្រះបន្ទូល និងសកម្មភាពរបស់ទ្រង់មានឥទ្ធិពលទៅលើអារម្មណ៍របស់អ្នកចំពោះទ្រង់ដោយរបៀបណា ?
-
នីហ្វៃទី ៣ ១៧:៧–១០ ៖ ការព្យាបាលជំងឺ និងការរងទុក្ខរបស់ពួកគេ
-
នីហ្វៃទី ៣ ១៧:១៣–២០ ៖ ការអធិស្ឋានជាមួយពួកគេ និងសម្រាប់ពួកគេ
-
នីហ្វៃទី ៣ ១៧:១១–១២, ២១–២៥ ៖ ការប្រសិទ្ធពរដល់កុមារ
សូមពិចារណាបង្ហាញសំណួរខាងក្រោមនេះ ហើយទុកពេលឲ្យសិស្សគិតអំពីសំណួរទាំងនោះមុននឹងឆ្លើយ ។
-
ប្រសិនបើអ្នកបានមានវត្តមាននៅទីនោះ តើបទពិសោធន៍នេះមានឥទ្ធិពលចំពោះទំនាក់ទំនងរបស់អ្នក ជាមួយនឹងព្រះយេស៊ូវគ្រីស្ទជាព្រះអង្គសង្គ្រោះដោយរបៀបណា ?
-
តើអ្នកគិតថា ព្រះយេស៊ូវគ្រីស្ទបង្ហាញនូវចិត្តអាណិតអាសូរចំពោះយើងនៅថ្ងៃនេះដោយរបៀបណា ?
-
តើអ្នកទទួលបានអារម្មណ៍ជំរុញទឹកចិត្តឲ្យធ្វើអ្វីខ្លះ ដើម្បីបង្ហាញអំពីសេចក្ដីស្រឡាញ់របស់អ្នកចំពោះព្រះយេស៊ូវគ្រីស្ទ ?
ប្រសិនបើមានពេល សូមពិចារណាច្រៀងទំនុកតម្កើងអំពីសេចក្ដីស្រឡាញ់ និងសេចក្តីអាណិតអាសូររបស់ព្រះអង្គសង្គ្រោះ ។ ឧទាហរណ៍មួយចំនួនរួមមាន « ព្រះយេស៊ូវអើយគ្រាន់តែនឹកឡើង » ( ទំនុកតម្កើង ល.រ. ៨០ ) « Precious Savior, Dear Redeemer » ( ទំនុកតម្កើង ល.រ. ១០៣ ) និង « ក្តីស្នេហ៍ព្រះអង្គ » ( ទំនុកតម្កើង ល.រ. ៥៩ ) ។
ប្រសិនបើមានឱកាសសមរម្យ សូមអញ្ជើញសិស្សឲ្យចែកចាយអំពីអារម្មណ៍របស់ពួកគេនៅក្នុងអំឡុងពេលសិក្សាមេរៀននៅថ្ងៃនេះ ។ សូមលើកទឹកចិត្តពួកគេឲ្យបន្តស្វែងរកភស្តុតាងអំពីសេចក្តីអាណិតអាសូររបស់ព្រះអង្គសង្គ្រោះនៅក្នុងជីវិតរបស់ពួកគេ ។