3 Nefi 23

Kërkimi me Zell i Shkrimeve të Shenjta

Krishti dhe njerëzit në kontinentin amerikan duke parë fletët e arta

Si po ecën me studimin vetjak të shkrimeve të shenjta? Çfarë ndryshimi sjell kjo në jetën tënde? Tek 3 Nefi 23, Jezusi theksoi rëndësinë e ruajtjes dhe studimit të shkrimeve të shenjta dhe fjalëve të profetëve. Ky mësim ka për qëllim të të ndihmojë t’i studiosh më me zell fjalët e Zotit.

Ndihma ndaj nxënësve që të zhvillojnë aftësi studimi. Për t’i ndihmuar nxënësit të jenë më të suksesshëm në studimin e tyre të shkrimeve të shenjta, ndihmojini ata në zhvillimin e një larmie aftësish të studimit të shkrimeve të shenjta. Këto aftësi duhet të synojnë t’i ndihmojnë nxënësit ta ftojnë Shpirtin në studimin e tyre, kuptojnë më mirë shkrimet e shenjta dhe zbulojnë dhe zbatojnë doktrinën dhe parimet e ungjillit.

Përgatitja e nxënësve: Ftojini nxënësit të shpenzojnë kohë duke i studiuar shkrimet e shenjta përpara këtij mësimi, duke i kushtuar vëmendje të veçantë asaj që bëjnë që e bën studimin e tyre më kuptimplotë. Nxitini ata ta vlerësojnë vlerën dhe cilësinë e studimit të tyre dhe ndikimin që ka, ose nuk ka, në jetën e tyre.

Veprimtari të Mundshme të të Mësuarit

Studimi yt i përditshëm vetjak i shkrimeve të shenjta

Përpara orës mësimore, merreni parasysh të fshihni sende të ndryshme nëpër dhomë. Shkruajeni fjalën “kërko” në tabelë. Tregojuani nxënësve se çfarë po kërkojnë dhe ftojini ata të gjejnë sa më shumë sende të munden.

• Çfarë do të thotë të kërkosh?

• Çfarë ka interesante ose emocionuese kërkimi?

• Çfarë mund të ketë të vështirë ose shkurajuese tek ai?

Ftesa e Shpëtimtarit

Lexo tek 3 Nefi 23:1–5, duke kërkuar se çfarë na urdhëroi Shpëtimtari të kërkojmë dhe pse.

Ftojini nxënësit ta tregojnë atë që gjetën.

Në kapitujt e mëparshëm, Shpëtimtari citoi një pjesë të mirë të Isaias për t’i ndihmuar dhe bekuar nefitët. (Shih te 3 Nefi 16:18–20; 20:32, 34–45; 21:8; 22:1–17.)

• Çfarë arsyesh na dha Zoti për t’i kërkuar fjalët e Isaias? (shih te 3 Nefi 23:1–3).

  Mund të duash të shpenzosh pak kohë në orën mësimore duke e diskutuar vlerën e mësimeve të Isaias. Për shembull, mund t’ua kërkoni nxënësve të tregojnë se si ndihen rreth fjalëve të Isaias. Ata mund t’i lexojnë dhe të reflektojnë mbi vargjet nga Isaia dhe të përsiatin përse ia vlen që ato të studiohen. Shembujt mund të përfshijnë vargjet tek Isaia 7:14; 9:6–7; 41:10; 49:13–16; 53:1–5; 55:1–3; 61:1–3.

• Sipas vargut tek 3 Nefi 23:5, përse duhet t’ua vëmë veshin fjalëve të Zotit dhe fjalëve të profetëve?

Dëgjojini me kujdes përgjigjet e nxënësve dhe merreni parasysh t’i shkruani ato në tabelë.

Një nga parimet e rëndësishme që mësojmë në këtë mësim është se Shpëtimtari na urdhëron t’ua vëmë veshin fjalëve të Tij dhe t’i kërkojmë me zell fjalët e profetëve.

• Si mendon, çfarë do të thotë të kërkosh me zell në shkrimet e shenjta?

Ndalu një çast për të reflektuar mbi studimin e shkrimeve të shenjta. Kjo mund të përfshijë studimin vetjak ose familjar, si edhe studimin në kishë dhe seminar. A e ndien se kërkon me zell në shkrimet e shenjta? Përse po ose përse jo?

• Cilat janë disa arsye përse mund të jetë e vështirë të kërkosh me zell në shkrimet e shenjta?

  Ndërsa nxënësit përgjigjen, merreni parasysh t’i shkruani përgjigjet e tyre në njërën anë të tabelës. Nëse gjen zbatim, ju mund t’i referoheni veprimtarisë së kërkimit në fillim të mësimit. Për të menduar për vështirësitë e mundshme, nxënësit mund ta krahasojnë kërkimin në shkrimet e shenjta me kërkimin për sendet në veprimtari.

  Një përgjigje mund të jetë që mund të jetë e vështirë të ndalesh për të kërkuar në shkrimet e shenjta kur nuk e ndiejmë se po gjejmë diçka të rëndësishme. Ose mund të jetë e vështirë për t’u kuptuar ose monotone. Një nga mënyrat më të mira për t’i kapërcyer shumë prej këtyre vështirësive është ta dini se si t’i gjeni idetë ose të vërtetat që mund të na ndihmojnë në jetën tonë.

• Pavarësisht këtyre vështirësive, cilat janë disa gjëra që ti i ke bërë ose mund t’i bësh, për të pasur një përvojë kuptimplotë të studimit të shkrimeve të shenjta?

Ndërsa nxënësit përgjigjen, bëni një listë në anën tjetër të tabelës. Nëse është e dobishme, shtojeni cilindo prej shembujve vijues.

Ja disa shembuj:

• Lutu përpara se të studiosh.

• Shenjoji fjalët dhe frazat e rëndësishme, sidomos ato që të ndihmojnë ta njohësh Shpëtimtarin më mirë.

• Kërkoji fjalët ose frazat që janë të vështira për t’u kuptuar.

• Ndalo dhe përmblidhe atë që ke lexuar.

• Përdor referenca-kryq për ta kuptuar më mirë një temë ose doktrinë.

Krishti duke folur me Nefin rreth analeve

Për t’i ushtruar dy prej këtyre aftësive, lexo te 3 Nefi 23:6–14 dhe bëje sa vijon:

• Përmblidhe me fjalët e tua atë që lexon.

• Shenjoje çdo fjalë ose frazë që të ndihmon ta kuptosh më mirë Shpëtimtarin.

  Ftojini nxënësit ta tregojnë atë që gjetën. Për ta bërë këtë, ata mund të punojnë në dyshe, ku një nxënës i përmbledh vargjet dhe tjetri nxjerr në pah fjalët ose frazat që i ndihmojnë ata ta kuptojnë Shpëtimtarin.

  Nëse nxënësit kanë vështirësi për ta përmbledhur atë që e lexojnë, ju mund t’ua shpjegoni se Shpëtimtari kërkoi t’i shihte analet e nefitëve. Ai vuri në dukje se profecia e Samuelit për shenjtorët e ringjallur që iu shfaqën shumë vetave (shih te Helamani 14:25) ishte përmbushur, por përmbushja nuk gjendej tek analet. Shpëtimtari i urdhëroi nefitët ta shënonin këtë rrëfim.

• Cilat fjalë e bëjnë të qartë se Shpëtimtari kujdeset për atë që është e shënuar në shkrimin e shenjtë?

• Si mund të ndikojë dijenia e kësaj rreth Shpëtimtarit në mënyrën se si ti i studion shkrimet e shenjta?

Ushtrimi i studimit të efektshëm të shkrimeve të shenjta

Shpenzo disa minuta për ta ushtruar kërkimin me zell në shkrimet e shenjta. Mund të zgjedhësh ta studiosh një kapitull ose t’i kërkosh vargjet rreth një teme për të cilën dëshiron të dish më shumë. Përdor të paktën një aftësi të shkrimit të shenjtë që të erdhi ndërmend ose e zbulove në listën më sipër.

Lëruni nxënësve kohë të mjaftueshme për të lexuar dhe reflektuar. Ftojini nxënësit të tregojnë diçka që e studiuan që është kuptimplotë për ta dhe çfarë aftësish përdorën. Pyetjet vijuese kanë për qëllim të ndihmojnë me një diskutim.

• Çfarë qasje studimi përdore? Përse mund të të ndihmojë kjo të studiosh më me zell?

• Çfarë mësove rreth Shpëtimtarit që nuk e kishe kuptuar më parë?

• Cilat nga këto aftësi mund t’i zbatosh në studimin tënd të ardhshëm të shkrimeve të shenjta? Si do ta bësh këtë?

Gjatë javës së ardhshme, reflekto mbi atë që ke mësuar sot. Zgjidh një mënyrë se si mund të përpiqesh të kërkosh në shkrimet e shenjta më me zell. Merre parasysh se si kjo mund të të ndihmojë në jetën tënde.

Komente dhe Informacion për Rrethanat

Cilat janë disa bekime që mund të vijnë nga studimi i shkrimeve të shenjta?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

Plaku Riçard G. Skot

“Meditimi mbi një varg të shkrimeve të shenjta mund të jetë kyçi për të hapur zbulesën dhe drejtimin e frymëzimin nga Fryma e Shenjtë. Shkrimet e shenjta mund të qetësojnë një shpirt të trazuar, duke i dhënë paqe, shpresë dhe rivendosje të besimit në aftësinë e njeriut për të kapërcyer sfidat e jetës. Ato kanë fuqinë e madhe të shërojnë sfidat emocionale kur ka besim te Shpëtimtari. Ato mund të përshpejtojnë shërimin fizik.” (Riçard G. Skot, “Fuqia e Shkrimeve të Shenjta”, Liahona, nëntor 2011, f. 6)

Si mund ta ndihmojë leximi i Librit të Mormonit familjen time?

Presidenti Henri B. Ajring, i Presidencës së Parë, dha mësim:

Presidenti Henri B. Ajring

“Nëpërmjet Librit të Mormonit, Zoti mund të na mësojë gjithashtu rreth të qenit me njerëzit dhe shërbimit ndaj tyre. Ky libër e zbulon vullnetin e Zotit për jetën familjare në një mënyrë që shkrimet e tjera të shenjta as nuk e trajtojnë. Unë besoj se kjo është më së shumti për shkak të strukturës së tij interesante. Ka të bëjë me familjet; ka të bëjë me marrëdhëniet e njerëzve. Fillon me familjet, përfundon me familjet dhe ne arrijmë t’i duam këto familje.” (Henry B. Eyring, “A Discussion on Scripture Study”, Liahona, korrik 2005, f. 22)

Si mund ta përmirësoj studimin vetjak të shkrimeve të shenjta?

Plaku Dejvid A. Bednar, i Kuorumit të Dymbëdhjetë Apostujve, dha mësim:

Plaku Dejvid A. Bednar

“Një nga mënyrat më të mira për t’iu afruar Atij, si edhe për të mësuar mbi Të e për t’u bërë më shumë si Zoti Jezu Krisht, është që të studiojmë në mënyrë të vazhdueshme shkrimet e shenjta, të ‘ushqehemi me bollëk [çdo ditë] me fjalët e Krishtit’ (2 Nefi 32:3).

Ju lutem, vini re që përdora fjalën studiojmë dhe jo fjalën lexojmë. Studimi dhe të ushqyerit sugjeron një përqendrim dhe një forcë që shkojnë përtej leximit të zakonshëm ose shqyrtimit të shpejtë. Studimi dhe të ushqyerit, të pasuar nga lutja e sinqertë dhe zbatimi i palëkundur i të vërtetave dhe parimeve që mësojmë, çojnë në vendim vetjak, zotim shpirtëror dhe një dritë të fortë dëshmie. Studimi, mësimi, lutja dhe zbatimi i përafërt i të vërtetave të ungjillit janë të gjitha elemente kyç në procesin e ardhjes te Shpëtimtari.” (David A. Bednar, “Because We Have Them before Our Eyes”, New Era, prill 2006, f. 4)

Veprimtari Plotësuese të të Mësuarit

3 Nefi 23:1. “Të mëdha janë fjalët e Isaias”

Kjo veprimtari mund t’i nxitë nxënësit t’i studiojnë fjalët e Isaias. Nxënësit mund të lexojnë vargjet tek 3 Nefi 20:11; 23:1, në të cilat Shpëtimtari na urdhëron të kërkojmë në fjalët e Isaias. Nxënësit mund të lexojnë gjithashtu 1 Nefi 19:23; 2 Nefi 6:5; 25:7–8, duke kërkuar arsye shtesë për ta studiuar Isaian.

Më pas ftojini nxënësit të kërkojnë në mësimet e Isaias për ide që janë të rëndësishme për ta. Disa shembuj janë Isaia 1:18; 9:6; 26:3–4; 40:31; 41:10; 48:17; 53:3–5; 55:1, 8–9.

Nxjerrja në pah e seminarit

Ndërsa nxënësit e diskutojnë se si të kërkojnë me zell në shkrimet e shenjta, pranojeni pjesëmarrjen e tyre në seminar dhe studimin e shkrimeve të shenjta në orën mësimore. Një nga qëllimet e seminarit është t’i ndihmojë të rinjtë të afrohen më pranë Shpëtimtarit nëpërmjet shkrimeve të shenjta. Merreni parasysh të bëni pyetjen: “Si ju ka ndihmuar seminari të kërkoni më me zell në shkrimet e shenjta?”

Mbajtja shënim e përvojave shpirtërore

Nëse do të ishte e dobishme të përqendroheni në shënimin e përvojave shpirtërore, sillni një ditar, ose tregoni fotografi ose materiale filmike të kujtimeve nga jeta juaj. Mund t’u kërkoni gjithashtu nxënësve t’i sjellin në klasë ditarët e tyre, fotografi ose materiale filmike për t’i treguar. Pyetini përse shënimi i përvojave është i rëndësishëm.

Ftojini nxënësit të lexojnë tek 3 Nefi 23:6–13, duke kërkuar përvojën që nefitët nuk arritën ta shënonin. Ndihmojini nxënësit ta përcaktojnë të vërtetën se shënimi i përvojave shpirtërore mund të ndihmojë në forcimin e besimit tonë dhe besimit të të tjerëve.

Merreni parasysh ta tregoni përvojën e Presidentit Henri B. Ajring për mbajtjen shënim të përvojave shpirtërore që e tregoi në fjalimin e tij “O, Kujtoni, Kujtoni” (Liahona, nëntor 2007, f. 66–69). Ose tregoni një shembull nga Plaku Nil L. Andersen “Kujtime që të Përcaktojnë Shpirtërisht” (Liahona, maj 2020, f. 18–22) dhe lexojini dy paragrafët e fundit të fjalimit.

Jepuni nxënësve kohë t’i shënojnë përvojat e veta shpirtërore. Ndihmojini ata ta kuptojnë se përvojat shpirtërore mund të mos jenë tejet dramatike ose të bujshme, por përkundrazi mjaft të thjeshta dhe, njëkohësisht, shumë të rëndësishme. Ftojini nxënësit të tregojnë përse shënimi i përvojave shpirtërore vetjake mund ta forcojë besimin tonë dhe besimin e të tjerëve.