3 Nefi 24

Ligji i Zotit për të Dhjetën

Çfarë na ka premtuar Zoti nëse e paguajmë të dhjetën? Shpëtimtari i përdori fjalët e Malakias për t’u dhënë mësim nefitëve rreth ligjit të së dhjetës dhe bekimeve të të jetuarit të këtij urdhërimi. Ky mësim ka për qëllim të të ndihmojë të ndiesh një dëshirë për ta paguar të dhjetën.

Mësimdhënia e shkrimeve të shenjta me bindje dhe qëllim. Disa të vërteta të ungjillit nxënësve mund t’u duken të vështira për t’u kuptuar dhe zbatuar në jetën e tyre. Ndihmojini nxënësit ta shohin rëndësinë e këtyre mësimeve. Jepni dëshminë tuaj për të vërtetën e këtyre parimeve dhe bekimeve që Zoti ua jep atyre që veprojnë me besim.

Përgatitja e nxënësve: Ftojini nxënësit të lexojnë tek 3 Nefi 24:8–10 dhe të mendojnë rreth përvojave që ata ose të tjerë kanë pasur me ligjin e Zotit për të dhjetën.

Veprimtari të Mundshme të të Mësuarit

Përvojat e tua

Skenarët vijues kanë për qëllim t’i ndihmojnë nxënësit të mendojnë rreth përvojave të tyre me ligjin e Zotit për të dhjetën. Përshtatini lirisht ata nëse për nxënësit tuaj të tjerë do të ishin më të përshtatshëm.

Përndryshe, mund të paraqitni një mandat të dhjete ose monedha dhe t’i pyetni nxënësit rreth përvojës së tyre, përvojave me të dhjetën dhe pyetjeve rreth saj.

Lexoji skenarët vijues duke kërkuar ata që duken më të përshtatshëm për ty ose të rinjtë në zonën tënde:

• Arbri po kursen para për një telefon. Atij nuk i shkon në mendje ta paguajë të dhjetën.

• Erisa e ka paguar gjithmonë të dhjetën kur ishte e re, por tani që ka një punë dhe fiton më shumë para, është bërë më e vështirë që ta bëjë këtë.

• Megi ia jep të gjitha paratë që fiton familjes së saj për ta ndihmuar. Ajo e pyet veten nëse duhet ta paguajë të dhjetën ndërkohë që familjes së saj i duhen paratë.

• Edi nuk fiton para, prandaj e pyet veten se si ose nëse ligji i së dhjetës është i zbatueshëm për të.

• Cilat situata ndien se janë më të përshtatshme? Përse?

Merreni parasysh t’i shkruani në tabelë përgjigjet e nxënësve për pyetjen e radhës.

• Çfarë pyetjesh ose shqetësimesh mund të kenë të rinjtë rreth së dhjetës?

Nxënësit mund të përsiatin për pyetjet vijuese ose t’u përgjigjen atyre në ditarët e tyre të studimit. Për shkak të natyrës personale të këtyre pyetjeve, mos ua kërkoni nxënësve t’i tregojnë përgjigjet e tyre.

Mendo për përvojat dhe kuptueshmërinë tënde për të dhjetën. A e paguan të dhjetën, apo a je i gatshëm ta paguash të dhjetën? Përse po ose përse jo? Çfarë ke mësuar nga përvojat e tua me të dhjetën? Teksa e studion këtë mësim, kërkoje udhërrëfimin e Frymës së Shenjtë për të të ndihmuar që t’i bindesh këtij ligji.

Ligji i Zotit për të dhjetën

Ndërkohë që u dha mësim nefitëve, Jezusi i urdhëroi ata t’i shkruanin fjalët që Malakia i kishte shënuar rreth 400 vjet më parë. Malakia profetizoi për Ardhjen e Dytë të Jezu Krishtit dhe për rolin e Shpëtimtarit në gjykimin e të ligut (shih te 3 Nefi 24:1–6).

Lexo tek 3 Nefi 24:7, duke e kërkuar problemin me të cilin u përballën njerëzit në kohën e Malakias.

• Çfarë ngjashmërie mund të kenë pasur nefitët me njerëzit në kohën e Malakias?

• Çfarë u premtoi Zotit njerëzve nëse ata do të ktheheshin tek Ai?

Për t’i nxitur njerëzit të ktheheshin te Zoti dhe të përgatiteshin për ardhjen e Tij, Zoti, nëpërmjet Malakias, u dha mësim rreth së dhjetës.

Lexo tek 3 Nefi 24:8–12 dhe merre parasysh ta shenjosh atë që Zoti dha mësim rreth ligjit të së dhjetës. Vër re që “gllabëruesi” (vargu 11) mund të nënkuptojë edhe insektet e dëmshme, thatësirat ose përmbytjet, madje edhe Satanin.

• Çfarë të bie në sy nga këto vargje?

  Falënderojini nxënësit për atë që tregojnë. Merreni parasysh t’ua kërkoni atyre ta shpjegojnë përse gjërat që treguan u bënë përshtypje atyre.

• Si mund të jetë i ngjashëm refuzimi për të paguar të dhjetën me vjedhjen e Perëndisë?

  Merreni parasysh ta paraqitni fjalinë vijuese të paplotë.

• Si mund ta përfundosh fjalinë vijuese: “Nëse i bindemi ligjit të Zotit për të dhjetën …”?

Këtu është një mënyrë se si mund ta kesh përfunduar fjalinë: Nëse i bindemi ligjit të Zotit për të dhjetën, Ai do t’i derdhë bekimet e Tij mbi ne.

Ka të ngjarë që në kohën e Malakias dhe në kohën e nefitëve shenjtorët ta kenë paguar të dhjetën duke dhënë një të dhjetën e ushqimit ose mallrave të tyre. Sot “anëtarët e Kishës ia japin një të dhjetën e të ardhurave të tyre Zotit nëpërmjet Kishës së Tij. Këto fonde përdoren për të ndërtuar Kishën dhe për ta çuar më tej punën e Zotit anekënd botës” (Gospel Topics, “Tithing”, topics.ChurchofJesusChrist.org). Nëse dikush nuk ka të ardhura, atij nuk i kërkohet ta paguajë të dhjetën, megjithëse duhet të jetë i gatshëm ta bëjë në të ardhmen.

Zoti përdori fraza të fuqishme dhe të gjalla kur foli rreth së dhjetës: “Më provoni [ose më vini në provë] … në qoftë se nuk do t’u hap dritaret e qiellit dhe nuk do të derdh një bekim, që nuk do të ketë mjaft vend për ta mbajtur” (3 Nefi 24:10).

• Çfarë mendon se po theksonte Zoti duke i përdorur fjalët dhe frazat që përdori? Çfarë mëson rreth Tij?

Merreni parasysh të vizatoni një dritare të madhe në tabelë dhe t’i ftoni nxënësit t’i shkruajnë në të bekimet e bindjes ndaj ligjit të së dhjetës. Nxënësit mund ta kopjojnë dritaren dhe bekimet e renditura në ditarët e tyre të studimit. Sa vijon mund t’i ndihmojë nxënësit të mendojnë ose të gjejnë ide:

• Lexoje vargun te Doktrina e Besëlidhje 64:23.

• Lexoji paragrafët nën kreun “Mësimi Numër 1 – Bekime Domethënëse, por të Padukshme” në bisedën e Plakut Dejvid A. Bednar “Pragjet e Qiellit” (Liahona, nëntor 2013, f. 17–20).

• Mendo për përvojat e tua dhe të njerëzve që ti njeh me pagimin e së dhjetës.

• Dërgoji një mesazh me tekst një prindi ose udhëheqësi Kishe duke e pyetur se çfarë bekimesh ka përjetuar nga pagimi i së dhjetës.

Nëse nxënësve u nevojitet ndihmë për t’i përcaktuar bekimet, pjesët “Komente dhe Informacion për Rrethanat” ose “Veprimtari Plotësuese të të Mësuarit” të këtij mësimi mund t’i ndihmojnë.

Ftojini disa nxënës ta rrethojnë në tabelë një bekim që është kuptimplotë për ta ose që do ta donin në jetën e tyre. Ftojini që të tregojnë përse.

• Si ndikojnë këto bekime në dëshirën tënde për ta paguar të dhjetën?

• Si mendon, përse Zoti e urdhëron popullin e Tij ta paguajë të dhjetën?

• Si na ndihmon bindja ndaj ligjit të së dhjetës të “kthehemi te” (3 Nefi 24:7) ose të bëhemi më të afërt me Zotin?

Zbatimi në planin vetjak

Mendo për atë që ke mësuar dhe ndier sot ndërsa e lexon thënien vijuese nga Plaku Dejvid A. Bednar, i Kuorumit të Dymbëdhjetë Apostujve:

“Pagimi i ndershëm i së dhjetës është shumë më tepër sesa një detyrë; është një hap i rëndësishëm në procesin e shenjtërimit shpirtëror. Atyre prej jush që e paguani të dhjetën tuaj, ju përgëzoj.

Atyre prej jush që tashmë nuk po i bindeni ligjit të së dhjetës, ju ftoj t’i merrni parasysh rrugët tuaja dhe të pendoheni. Ju dëshmoj se nëpërmjet bindjes suaj ndaj këtij ligji të Zotit, pragjet e qiellit do të hapen për ju.” (Dejvid A. Bednar, “Pragjet e Qiellit”, Liahona, nëntor 2013, f. 20)

Kujtojuani nxënësve fillimin e mësimit dhe pyetjet që mund të kenë të rinjtë rreth së dhjetës. Pyetini nxënësit nëse ndonjë gjë që e studiuan i ndihmon me pyetjet që përmendën. Ose mund t’i ftoni nxënësit ta shënojnë se si ndihen për të dhjetën.

Shënoje në ditarin tënd të studimit se si ndihesh për të dhjetën dhe përse. Nëse e ndien se pagimi i së dhjetës është ose do të jetë një mundim për ty, përfshije atë që mund të bësh për ta ftuar Zotin t’u përgjigjet pyetjeve të tua dhe t’i trajtojë shqetësimet e tua.

Komente dhe Informacion për Rrethanat

Ku mund të mësoj më shumë rreth ligjit të së dhjetës?

Për të mësuar më shumë rreth së dhjetës, mund të studioni burimet vijuese:

• Gospel Topics, “Tithing”, topics.ChurchofJesusChrist.org

• Doktrina e Besëlidhje 119–120

• Udhëzuesi për Shkrimet e Shenjta, “Dhjeta (të), Dhjetë (e)”, scriptures.ChurchofJesusChrist.org

Cilat janë disa bekime që i marrim nga pagimi i së dhjetës sonë?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Dritaret lejojnë dritë natyrale që të futet në ndërtesë. Në mënyrë të ngjashme, ndriçim dhe perspektivë shpirtërore derdhen përmes pragjeve të qiellit dhe në jetën tonë, kur ne e nderojmë ligjin e së dhjetës.” (Dejvid A. Bednar, “Pragjet e Qiellit”, Liahona, nëntor 2013, f. 18)

Plaku Bednar theksoi gjithashtu sa vijon rreth bekimeve të ligjit të Zotit për të dhjetën:

“Shpesh, kur japim mësim dhe dëshmojmë rreth ligjit të së dhjetës, ne theksojmë bekimet materiale të menjëhershme, mbresëlënëse dhe të lehta për t’u dalluar, që ne marrim. Dhe sigurisht bekime të tilla vërtet ndodhin. Sidoqoftë disa nga bekimet e shumëllojshme që fitojmë, kur i bindemi këtij urdhërimi, janë domethënëse, por të padukshme. Të tilla bekime mund të dallohen vetëm nëse jemi shpirtërisht të vëmendshëm dhe vëzhgues (shih te 1 Korintasve 2:14). …

Për shembull, një bekim i padukshëm, por domethënës që marrim, është dhurata shpirtërore e mirënjohjes, e cila e bën të mundur vlerësimin tonë për atë që kemi, që t’i përmbajmë dëshirat për atë që duam.” (Dejvid A. Bednar, “Pragjet e Qiellit”, Liahona, nëntor 2013, f. 17–18)

Për shembuj të tjerë të veçantë të bekimeve “të padukshme, por domethënëse”, shihni fjalimin e plotë të Plakut Bednar (“Pragjet e Qiellit”, Liahona, nëntor 2013, f. 17–20).

Veprimtari Plotësuese të të Mësuarit

3 Nefi 24:1–6. Përgatitja për Ardhjen e Dytë

Merreni parasysh të tregoni një përshkrim të Ardhjes së Dytë të Shpëtimtarit dhe t’i ftoni nxënësit t’i tregojnë mënyrat se si mund të përgatiten për të. Ftojini nxënësit të lexojnë tek 3 Nefi 24:1–6, duke kërkuar 1) çfarë mund të mësojnë rreth Jezu Krishtit dhe Ardhjes së Tij të Dytë dhe 2) frazat që mund t’i ndihmojnë ata të përgatiten për Ardhjen e Dytë.

Ndihmojini nxënësit ta kuptojnë sa vijon:

• Lajmëtari te vargu 1 mund t’i referohet Gjon Pagëzorit dhe Jozef Smithit (shihni Bruce R. McConkie, A New Witness for the Articles of Faith [1985], f. 629). Në zbulesën e sotme, ne shohim gjithashtu se rivendosja e ungjillit në vetvete është një lajmëtar i dërguar përpara Ardhjes së Dytë të Shpëtimtarit (shihni te Doktrina e Besëlidhje 45:9).

• Një rafinues e përdor zjarrin për ta nxehur një metal dhe për t’ia hequr papastërtitë.

• Një larës pastron ose zbardh cohat duke përdorur sapun.

Një parim që mund ta mësojnë nxënësit është se Zoti e dërgoi Jozef Smithin për ta përgatitur botën për Ardhjen e Dytë të Jezu Krishtit. Nxënësit mund të renditin mënyrat se si Jozef Smithi ndihmoi të përgatitet bota për Ardhjen e Dytë.

3 Nefi 24:8. Ofertat

Nëse nxënësve u duhet ndihmë për ta kuptuar ndryshimin ndërmjet “të dhjetës dhe ofertave (blatimeve ushqimore)”, mund t’i ftoni të studiojnë tek Udhëzuesi për Shkrimet e Shenjta, “Agjëroj, Agjërim”, “Blatim”, “Dhjeta (të), Dhjetë (e)”,scriptures.ChurchofJesusChrist.org. Nxënësit mund të diskutojnë më pas se ku ngjasojnë të dhjetat dhe ofertat, ku ndryshojnë, si dhe bekimet e premtuara për secilën.