3 Nefi 25

Puna në Tempull dhe për Historinë Familjare

familje e lumtur duke bërë historinë familjare

A ia ke shpjeguar ndonjëherë dikujt se përse kemi tempuj ose bëjmë punë për historinë familjare? Sa të rëndësishme janë për ty puna për historinë familjare dhe puna në tempull? Ndërkohë që iu dha mësim nefitëve, Jezusi citoi një mesazh që në fillim ia dha Malakias, i cili përfshinte kthimin e Elias dhe rolin e tij të rëndësishëm në punën në tempull dhe për historinë familjare. Ky mësim ka për qëllim të të ndihmojë të marrësh pjesë në punën për historinë familjare dhe në tempull.

Ndihma ndaj nxënësve që të ndërmarrin veprim të drejtë e të efektshëm. Ngritja e besimit dhe bërja më shumë si Krishti nuk ndodhin në një orë të shkurtër mësimore. Teksa i ftoni ata, të cilëve u jepni mësim, që të veprojnë sipas doktrinës së vërtetë, ju i ndihmoni ta shtrijnë përvojën e të mësuarit në shtëpitë dhe jetën e tyre të përditshme (shihni te Doktrina e Besëlidhje 43:8–10).

Përgatitja e nxënësve: Ftojini nxënësit të përgatiten për të treguar rreth një individi që jeton ose ka ndërruar jetë, për të cilin kanë mësuar në historinë familjare. Mund të jetë e dobishme që nxënësit të flasin me një prind ose gjysh ose të përdorin programin kompjuterik FamilySearch.

Veprimtari të Mundshme të të Mësuarit

Paraardhësit e tu

Merreni parasysh t’i shpërndani secilit nxënës kopje të tabelës vijuese dhe t’i ftoni ta plotësojnë atë me sa më shumë informacion të munden.

tabela e trungut familjar me katër breza

Reflekto mbi atë që di dhe ndien rreth jetës së njerëzve të tu të dashur, atë që mund të duash të dish dhe se si ata kanë ndikuar në jetën tënde.

• Përse është e rëndësishme që të kërkojmë të dimë më shumë rreth paraardhësve tanë?

  Përcaktojeni a do të ishte më mirë që nxënësit t’i tregojnë përgjigjet e tyre për sa vijon, të bëjnë një anketë anonime ose thjesht të bëjnë një vlerësim në heshtje.

• Në një shkallë nga 1–10 (1 = i painteresuar, 10 = jashtëzakonisht i interesuar), sa i interesuar je t’i njohësh paraardhësit e tu? Po të marrësh pjesë në punën në tempull dhe për historinë familjare? Përse?

Ndërsa studion, kërko ide që mund të të ndihmojnë të nxitesh për të marrë pjesë më shumë në këtë punë.

“Para ardhjes së ditës së madhe dhe të tmerrshme të Zotit”

Duke përdorur gjuhën e figurshme të pasur dhe fjalët simbolike të shënuara nga profeti Malakia i Dhiatës së Vjetër, Jezusi u dha mësim njerëzve të kontinentit amerikan rreth Ardhjes së Tij të Dytë në tokë dhe profetizoi rreth punës në tempull dhe për historinë familjare.

Lexo tek 3 Nefi 25:1–2, duke kërkuar atë që dha mësim Shpëtimtari se do të ndodhë kur Ai të kthehet në tokë. Përkufizimet dhe interpretimet vijuese të simboleve mund të jenë të dobishme.

Merreni parasysh ta shpjegoni sa vijon:

• Kashtë: Fije byku që mbeten në një fushë pas të korrave, të cilat një bujk i djeg

• Rrënjë: Paraardhësit

• Degë: Pasardhësit

• Shërim në krahët e Tij: Shërimi dhe fuqia mbrojtëse e Zotit dhe e Shlyerjes së Tij

• Viça stalle: Izraeli do të trajtohet mirë dhe do t’i plotësohen nevojat ashtu si kafshëve në një stallë

• Si do ta shpjegoje atë që do të ndodhë në Ardhjen e Tij të Dytë sipas këtyre vargjeve? Çfarë do t’u ndodhë të ligjve?

  Nëse është e nevojshme, shpjegoni se në Ardhjen e Dytë të Jezu Krishtit, të ligjtë do të përjetojnë shkatërrim dhe do të ndahen nga paraardhësit dhe pasardhësit (shihni te 3 Nefi 25:1).

• Çfarë mësojmë nga këto simbole rreth Shpëtimtarit dhe bekimeve të Tij për ata që e ndjekin Atë?

Lexo tek 3 Nefi 25:5–6 dhe merre parasysh ta shenjosh atë që do të bënte Shpëtimtari për t’i ndihmuar familjet e botës përpara Ardhjes së Tij të Dytë. Një nga kuptimet e fjalës “kthehet” do të thotë lidhet apo vuloset (shih Mësimet e Presidentëve të Kishës: Jozef Smith [2009], f. 505). Poshtëshënimet në shkrimet e tua të shenjta mund të të ndihmojnë gjithashtu t’i kuptosh këto vargje më mirë.

Mund të duash të vësh në dukje se kjo profeci përsëritet në secilën nga veprat standarde. Mund t’i ftoni nxënësit të shohin nëse mund ta gjejnë secilin prej këtyre katër rasteve ose t’ua tregoni atyre vargjet vijuese: Malakia 4:5–6; Lluka 1:17; Doktrina e Besëlidhje 110:15–16; Joseph Smith – Historia 1:38–39.

Merreni parasysh t’i pyesni nxënësit se çfarë dinë rreth Elias dhe çelësave që mbante ai. Nisur nga përgjigjet e nxënësve, tregojuani paragrafët vijues (ose pjesët e nevojshme).

Elija, një profet i lashtë, mbante çelësat e fuqisë vulosëse. Fuqia vulosëse i bën të vlefshme në qiell ordinancat e kryera nga autoriteti i priftërisë në tokë (Udhëzuesi për Shkrimet e Shenjta, “Vulos, Vulosje”, scriptures.ChurchofJesusChrist.org).

Elija shfaqet në tempullin e Kirtlandit

Lexo te Doktrina e Besëlidhje 110:13–16 për të parë se çfarë ndodhi në tempullin e Kirtlandit në vitin 1836 ku përfshihen Elia, Jozef Smithi dhe Oliver Kaudëri.

Për shkak të fuqisë vulosëse të rivendosur, ne mund ta bëjmë punën e tempullit edhe për veten, edhe për paraardhësit tanë që kanë ndërruar jetë.

• Çfarë ke mësuar nga 3 Nefi 25 dhe Doktrina e Besëlidhje 110?

  Disa të vërteta që nxënësit mund t’i përcaktojnë përfshijnë sa vijon: Nëpërmjet profetit Elia, Jezu Krishti i rivendosi çelësat vulosës për punën e tempullit dhe për historinë familjare. Ndërsa marrim pjesë në punën e tempullit dhe për historinë familjare, ne e përgatitim veten dhe familjen tonë për Ardhjen e Dytë të Shpëtimtarit.

• Cilat janë disa mënyra të veçanta se si të rinjtë mund të marrin pjesë në punën e tempullit dhe për historinë familjare?

• Si mund ta ndihmojë dikë pjesëmarrja në punën e tempullit dhe për historinë familjare të përgatitet për Ardhjen e Dytë të Shpëtimtarit?

Është thelbësore që të kuptosh se, jo vetëm që Shpëtimtari i rivendosi çelësat vulosës, por vetëm me anë të Shlyerjes së Tij ne dhe ata që janë pjesë e familjeve tona mund të shëlbohen, pastrohen dhe marrin ordinancat dhe bekimet e përjetshme, duke përfshirë ordinancën vulosëse.

Përsiat përse puna e tempullit dhe për historinë familjare ka rëndësi në jetën tënde. Ndërsa përsiat, mund të duash të shikosh materialin filmik “The Promised Blessings of Family History 2” [“Bekimet e Premtuara të Historisë Familjare 2”] (4:04), në dispozicion në ChurchofJesusChrist.org.

Merreni parasysh t’i ftoni nxënësit të diskutojnë sa vijon në dyshe ose në grupe të vogla përpara se t’i tregojnë përgjigjet e tyre si klasë.

• Çfarë përvojash ke pasur me tempujt dhe historinë familjare?

• Çfarë bekimesh ke vënë re në jetën tënde si rrjedhojë e kësaj?

Pjesëmarrja në punën në tempull dhe për historinë familjare

Për të të ndihmuar të marrësh pjesë në punën e tempullit dhe për historinë familjare, bëje njërën ose dy nga pikat në vijim. Mund të marrësh parasysh edhe të bësh diçka tjetër që lidhet me punën e tempullit ose për historinë familjare që ti ndihesh i udhërrëfyer ta bësh me anë të Shpirtit.

Sa vijon ka për qëllim të krijojë një mundësi që nxënësit të marrin pjesë në punën në tempull dhe për historinë familjare në klasë. Mund të përqendroheni në një veprimtari si klasë ose t’i lejoni nxënësit ta zgjedhin një veprimtari dhe të punojnë individualisht. Nëse është e dobishme dhe me miratimin e drejtuesit tuaj të priftërisë, merreni parasysh ta ftoni në orën mësimore këshilltarin për historinë familjare të lagjes ose kunjit tuaj për t’ju ndihmuar.

• Duke përdorur llogarinë tënde në ChurchofJesusChrist.org, kyçu në FamilySearch.org. Eksploro burime për të mësuar rreth njërit prej paraardhësve të tu. Merre parasysh të fillosh me “Si dëshiron ta nisësh?”

• Dërgo mesazh me tekst, telefono ose cakto një kohë për të folur me prindërit, gjyshërit ose të afërm të tjerë për të mësuar më shumë rreth jetës, historive të tyre ose kthimit të tyre në besimin në ungjill. Merre parasysh ta shënosh atë që mëson.

• Merr pjesë në indeksim. Për ndihmë për të kuptuar se çfarë është kjo dhe se si të fillosh, merre parasysh që në fillim të shohësh materialin filmik “FamilySearch Indexing – How it Works” [“Indeksimi në FamilySearch – Si Funksionon”] (1:48), në dispozicion në FamilySearch.org.

• Gjeji emrat e paraardhësve që kanë ndërruar jetë për të cilët duhet të kryhet puna e ordinancës në tempull në programin kompjuterik FamilySearch ose në adresën FamilySearch.org. Merre parasysh të fillosh me “Si dëshiron ta nisësh?”

Pasi nxënësit të kenë pasur kohë për të krijuar përvojë në orën mësimore me punën në tempull dhe për historinë familjare, merreni parasysh t’i ftoni t’i tregojnë përvojat e tyre. Pyetjet vijuese mund t’ju ndihmojnë ta mbyllni mësimin.

• Çfarë është diçka që ti e ndien se Zoti do të donte që ta bëje që të vazhdosh të marrësh pjesë në punën në tempull dhe për historinë familjare? Çfarë ndryshimi do të sjellë kjo në jetën tënde?

Ndërsa kërkon të vazhdosh të marrësh pjesë në punën në tempull dhe për historinë familjare, kujtoje këtë thënie nga Presidenti Rasëll M. Nelson:

Presidenti Rasëll M. Nelson

“Në çfarëdo kohe që bëni çfarëdo gjëje që e ndihmon cilindo – në çdonjërën prej anëve të velit – të hedhë një hap drejt bërjes së besëlidhjeve jetike me Perëndinë dhe marrjes së ordinancave të veta thelbësore të pagëzimit dhe tempullit, ju po ndihmoni që Izraeli të mblidhet.” (Rasëll M. Nelson dhe Uendi W. Nelson, “Shpresa e Izraelit” [takim shpirtëror mbarëbotëror për rininë, 3 qershor 2018], ChurchofJesusChrist.org)

Jepni dëshmi ose ftojini nxënësit të dëshmojnë për rëndësinë e punës në tempull ose për historinë familjare.

Komente dhe Informacion për Rrethanat

Cilat janë disa nga bekimet e pjesëmarrjes në punën në tempull dhe për historinë familjare?

Motra Uendi W. Nelson shpjegoi:

Motra Uendi W. Nelson

“Pra, nëse do të donit pak më shumë gëzim në jetën tuaj, pak më shumë kuptim, më shumë lidhje të sinqerta, më shumë përqendrim, energji, nxitje, më shumë prej shumë gjërave të mrekullueshme, gjeni kohë për t’i ndihmuar ata në anën tjetër [të velit] të bëjnë besëlidhje me Perëndinë. Fuqia e Perëndisë do të vërshojë në jetën tuaj ndërsa e bëni këtë gjë.” (Wendy W. Nelson, “… My Soul Delighteth in the Covenants of the Lord” [fjalim i mbajtur në Konferencën e Grave të Universitetit “Brigam Jang”, 30 prill, 2015])

Plaku Dejll G. Renland, i Kuorumit të Dymbëdhjetë Apostujve, tregoi:

Plaku Dejll G. Renland

“Ju do të gjeni jo vetëm mbrojtje nga tundimi dhe vështirësitë e botës, por do të gjeni edhe fuqi vetjake – fuqi për të ndryshuar, fuqi për t’u penduar, fuqi për të mësuar, fuqi për të qenë të shenjtëruar dhe fuqi për t’i kthyer zemrat e pjesëtarëve të familjes suaj ndaj njëri-tjetrit dhe për ta shëruar atë që ka nevojë për shërim.” (Dale G. Renlund, “Family History and Temple Blessings”, Ensign, shkurt 2017, f. 31)

Veprimtari Plotësuese të të Mësuarit

Fillim alternativ i mësimit

Merreni parasysh të paraqitni një figurë të një dege dhe një peme ose të sillni një degë të vogël dhe ta drejtoni vëmendjen e nxënësve te një pemë përjashta. Ftojini nxënësit të mendojnë për sa më shumë ngjashmëri dhe ndryshime të munden ndërmjet degës dhe pemës. Ftojini ata të mendojnë se si këto gjëra mund të krahasohen me ne dhe familjet tona. Shpjegojuani se në shkrimet e shenjta Zoti e përdor shpesh metaforën e një peme me rrënjë dhe degë për të dhënë mësim rreth familjes. Rrënjët janë si familja jonë që ka qenë para nesh dhe degët janë si ne dhe pasardhësit tanë që lindin prej nesh. Ftojini nxënësit ta marrin parasysh se çfarë mund të bëjnë për ta lejuar Shpëtimtarin t’i forcojë dhe ruajë rrënjët, trungun dhe degët e pemës suaj familjare ndërsa e studiojnë kapitullin te 3 Nefi 25.

3 Nefi 26. Ndërsa besojmë atë që Perëndia ka zbuluar dhe veprojmë sipas asaj, ne e përgatitim veten për të marrë zbulesë më të madhe.

Te 3 Nefi 26, Jezu Krishti i parashtroi shkrimet e shenjta dhe Mormoni dha mësim se çfarë duhet bërë për të marrë zbulesë të gjërave më të mëdha nga Shpëtimtari. Nxënësit mund të lexojnë tek 3 Nefi 26:6–8 duke kërkuar se sa nga mësimet e Jezusit u shënuan në Librin e Mormonit dhe te 3 Nefi 26:9–11 duke kërkuar se përse nuk u përfshinë të gjitha mësimet e Tij. Premtojuani nxënësve se, ndërsa i studiojnë dhe zbatojnë me besnikëri parimet në Librin e Mormonit, ata do të marrin kuptueshmëri më të madhe të ungjillit. Merrni parasysh pyetje si ajo në vijim: “Çfarë po bëni në jetën tuaj që e tregon besimin tuaj te Libri i Mormonit?” “Si ju ka çuar leximi i Librit të Mormonit me qëllim të vërtetë drejt marrjes së zbulesës vetjake?”

fletushka e trungut familjar me katër breza