3 Нифай 24

Их Эзэний аравны нэгийн хууль

Хэрэв бид аравны нэгээ төлбөл Их Эзэн бидэнд юу амладаг вэ? Аврагч нифайчуудад аравны нэгийн хуулийг болон энэ зарлигийн дагуу амьдарснаар ирэх адислалуудын талаар заахын тулд Малахигийн үгийг ашиглажээ. Энэ хичээл аравны нэгээ төлөх хүсэлтэй болоход тань туслах зорилготой.

Судруудыг итгэл үнэмшилтэй, зорилготой заах. Суралцагчдад сайн мэдээний зарим үнэнийг ойлгож, амьдралдаа хэрэгжүүлэхэд хэцүү мэт санагдаж болох юм. Суралцагчдад эдгээр сургаалын хамаарлыг олж харахад тусал. Эдгээр зарчмын үнэний тухай болон Их Эзэнээс итгэлээр үйлддэг хүмүүст өгдөг адислалуудын талаарх гэрчлэлээ хуваалц.

Суралцагчийн бэлтгэл: Суралцагчдыг 3 Нифай 24:8–10-ыг уншаад, Их Эзэний аравны нэгийн хуулийн талаар өөрсдөд нь болон бусад хүнд тохиолдсон туршлагын талаар бодоход урь.

Боломжит суралцах үйл ажиллагаа

Таны туршлага

Дараах жишээнүүд нь суралцагчдад Их Эзэний аравны нэгийн хуультай холбоотой өөрийн туршлагыг бодоход туслах зорилготой. Хэрэв бусдын туршлага суралцагчдад тань илүү хамааралтай бол тэдгээрийг тохируулан өөрчилж болно.

Өөр нэг хувилбар бол та аравны нэгийн хуудас эсвэл зоос үзүүлж, суралцагчдаас тэдний аравны нэгийн талаарх ойлголт, туршлага, асуултуудынх нь талаар асууж болно.

Дараах жишээнүүдийг уншаад, өөрт тань болон танай бүсийн өсвөр үеийнхэнд хамгийн их хамааралтай гэж үзэж буй жишээг олж мэд.

• Карлос утас авахын тулд мөнгөө хадгалж байв. Тэрээр аравны нэгийг төлөх талаар огт боддоггүй.

• Сита багадаа дандаа аравны нэгийг төлдөг байсан бол одоо ажилтай болж, илүү их мөнгө олж байгаа ч үүнийг хийхэд хэцүү болжээ.

• Онэка гэр бүлдээ туслахын тулд олсон бүх мөнгөө өгдөг. Тэрээр гэр бүлд нь мөнгө хэрэгтэй байхад аравны нэгийг төлөх шаардлагатай эсэхэд эргэлздэг.

• Анжум мөнгө олдоггүй тул аравны нэгийн хууль өөрт нь хэр хамаатай байх бол гэсэн асуулттай байдаг.

• Аль нөхцөл байдал нь танд хамгийн хамааралтай санагдаж байна вэ? Яагаад?

Дараах асуултуудад хариулсан суралцагчдын хариултыг самбарт бич.

• Өсвөр үеийнхэнд аравны нэгийн талаар ямар асуулт байдаг вэ мөн юунд санаа зовнидог байж болох вэ?

Суралцагчид дараах асуултыг тунгаан бодож эсвэл судлах тэмдэглэлдээ хариулж болно. Эдгээр асуулт нь хувийн шинж чанартай учраас суралцагчдаас хариултаа хуваалцахыг бүү хүс.

Аравны нэгийн талаарх өөрийн туршлага, ойлголтын тухай бод. Та аравны нэгийг төлдөг үү эсвэл төлөхөд бэлэн байна уу? Яагаад тийм эсвэл яагаад үгүй вэ? Та аравны нэгийн туршлагаасаа юу сурч мэдсэн бэ? Энэ хичээлийг судлахдаа энэ хуулийг дагахад тань туслах Ариун Сүнсний удирдамжийг эрэлхийл.

Их Эзэний аравны нэгийн хууль

Есүс нифайчуудад зааж байхдаа 400 орчим жилийн өмнө Малахигийн цэдэглэсэн үгсийг бичихийг тэдэнд зарлигласан. Малахи Есүс Христийн Хоёр дахь ирэлтийг болон ёс бусчуудыг шүүх Аврагчийн үүргийн талаар бошиглосон (3 Нифай 24:1–6-г үзнэ үү).

3 Нифай 24:7-г уншаад, Малахигийн үед хүмүүст тулгарч байсан асуудлуудыг олж мэд.

• Нифайчууд хэрхэн Малахигийн үеийн хүмүүстэй адил байж болох вэ?

• Хүмүүс Өөрт нь эргэн ирвэл Их Эзэн тэдэнд юу амласан бэ?

Хүмүүсийг Их Эзэнд эргэн ирж, Түүний ирэлтэд бэлтгэхэд урамшуулан дэмжихийн тулд Их Эзэн Малахигаар дамжуулан аравны нэгийн тухай заасан.

3 Нифай 24:8–12-ыг уншаад, Их Эзэн аравны нэгийн хуулийн талаар юу гэж заасныг олж мэд. “Залгигч” (11-р шүлэг) гэдэг нь хор хөнөөл, ган гачиг, үер, тэр тусмаа Сатаныг хэлж болохыг анхаар.

• Эдгээр шүлгийн юу нь танд онцгой санагдаж байна вэ?

  Суралцагчдад хуваалцсан зүйлсийнх нь төлөө таларх. Тэднээс хуваалцсан зүйл нь яагаад онцгой санагдсаныг тайлбарлахыг хүс.

• Аравны нэгээ төлөхөөс татгалзах нь хэрхэн Бурханыг дээрэмдэхтэй адил байж болох вэ?

  Дараах гүйцэд бус өгүүлбэрийг үзүүл.

• Та дараах өгүүлбэрийг хэрхэн төгсгөж болох вэ? “Хэрэв бид Их Эзэний аравны нэгийн хуулийг дагавал …”?

Та өгүүлбэрийг дуусгаж болох нэг арга зам нь: Хэрэв бид Их Эзэний аравны нэгийн хуулийг дуулгавартай дагавал Тэр бидний дээр адислалаа цутгана.

Малахигийн үед болон нифайчуудын үед гэгээнтнүүд хоол хүнсний эсвэл эд зүйлийнхээ аравны нэгийг өгч, аравны нэгээ төлдөг байсан байх магадлалтай. Өнөө үед “Сүмийн гишүүд орлогынхоо аравны нэгийг Их Эзэнд Түүний Сүмээр дамжуулан өгдөг. Эдгээр өргөл нь Сүмийг байгуулж, дэлхий даяар Их Эзэний ажлыг явуулахад зарцуулагддаг” (Сайн мэдээний сэдвүүд, “Аравны нэг,” topics.ChurchofJesusChrist.org). Хэрэв хэн нэгэн орлогогүй бол аравны нэгээ төлөх шаардлагагүй ч ирээдүйд сайн дураараа төлөхөд бэлэн байх ёстой.

Их Эзэн аравны нэгийн тухай ярихдаа “Үүнийг хүлээн авах хангалттай зай байхгүй болтол би тэнгэрийн цонхыг нээж, мөн та нарын дээр адислалыг цутгах эсэхийг үүгээр намайг сорь [буюу шалга]” (3 Нифай 24:10) хэмээн хүчирхэг бөгөөд хурц тод хэллэг ашигласан.

• Их Эзэн Өөрийн хэлсэн эдгээр үг хэллэгийг ашигласнаар юуг онцолсон гэж та бодож байна вэ? Та Түүний талаар юу сурч мэдсэн бэ?

Самбарт том цонх зурж, суралцагчдыг түүн дээр аравны нэгийн хуулийг дагах адислалуудыг бичихэд урь. Суралцагчид тэмдэглэлдээ цонхыг хуулаад, адислалуудыг жагсаан бичиж болно. Дараах нь суралцагчдад санаануудыг бодож олоход тусална.

• Сургаал ба Гэрээ 64:23-ыг унш.

• Ахлагч Дэвид А.Бэднарын “Тэнгэрийн цонхнууд” хэлсэн үгийн “1 дэх сурсан зүйл—Чухал хийгээд чимээгүй адислалууд” (2013 оны 10-р сарын Ерөнхий чуулган, 19–21) гарчгийн доор байх догол мөрүүдийг унш.

• Өөрийнхөө болон таньдаг хүмүүс тань аравны нэгээ төлж байсан туршлагыг бод.

• Эцэг эхээсээ эсвэл Сүмийн удирдагчаас аравны нэгээ төлснөөр ямар адислал хүртсэн талаар нь асуусан зурвас бич.

Хэрэв суралцагчдад адислалыг тодорхойлоход тусламж хэрэгтэй байвал энэ хичээлийн “Тайлбар ба нөхцөл байдлын талаарх мэдээлэл” эсвэл “Нэмэлт суралцах үйл ажиллагаа” хэсэг тусалж магадгүй юм.

Цөөн хэдэн суралцагчийг өөрсдөд нь утга учиртай эсвэл амьдралдаа хүсэж буй адислалаа самбарт дугуйлахад урь. Яагаад гэдгээ хуваалцахад тэднийг урь.

• Эдгээр адислал аравны нэгээ төлөх хүсэлтэй байхад тань хэрхэн нөлөөлдөг вэ?

• Их Эзэн Өөрийн хүмүүсийг яагаад аравны нэгийг төлөхийг тушаасан хэмээн та бодож байна вэ?

• Аравны нэгийн хуулийг дагах нь бидэнд Их Эзэнд “эргэн ирэх”-д (3 Нифай 24:7) эсвэл илүү ойр болоход хэрхэн туслах вэ?

Хувьдаа хэрэгжүүлэх нь

Арван хоёр төлөөлөгчийн чуулгын ахлагч Дэвид А.Бэднарын дараах мэдэгдлийг уншиж байхдаа өнөөдөр юу сурч мэдсэн, мэдэрсэн тухайгаа бод.

Аравны нэгийг шударгаар төлөх гэдэг нь үүрэг хариуцлагаас илүү зүйл бөгөөд ариусгалд хүрэх үйл явцын чухал алхмуудын нэг юм. Аравны нэгээ төлдөг та нарт баярлалаа.

Одоогоор аравны нэгийн хуулийг дуулгавартай сахихгүй байгаа та бүхнийг өөрсдийгөө дүгнэж үзэн, наманчлахад урьж байна. Их Эзэний энэ хуульд дуулгавартай байснаар тэнгэрийн цонхнууд танд нээгдэх болно гэдгийг би танд гэрчилж байна. (Дэвид А.Бэднар, “Тэнгэрийн цонхнууд,” 2013 оны 10-р сарын Ерөнхий чуулган, 22)

Суралцагчдад хичээлийн эхэнд мөн аравны нэгийн талаар өсвөр үеийнхэнд байж болох асуултуудыг сануул. Суралцагчдаас тэдний судалсан ямар нэг зүйл тэдний дурдсан асуултад тусалсан эсэхийг асуу. Эсвэл та суралцагчдыг аравны нэгийн талаар ямар сэтгэгдэлтэй байгаагаа цэдэглэхэд урьж болно.

Аравны нэгийн талаар ямар бодолтой байгаагаа мөн яагаад гэдгийг судлах тэмдэглэлдээ бич. Хэрэв аравны нэгээ төлөх нь таны хувьд хэцүү юм шиг санагдаж байвал Их Эзэнийг асуултуудад тань хариулж, санаа зовоосон асуудлыг тань шийдвэрлэхэд урихын тулд юу хийж чадахаа багтаа.

Тайлбар ба нөхцөл байдлын талаарх мэдээлэл

Аравны нэгийн хуулийн талаар би хаанаас илүү ихийг сурч мэдэж болох вэ?

Аравны нэгийн талаар илүү ихийг ойлгохын тулд та дараах эх сурвалжуудыг судалж болно. Үүнд:

• Сайн мэдээний сэдэв, “Аравны нэг,” topics.ChurchofJesusChrist.org

• Сургаал ба Гэрээ 119–120

• Судруудын удирдамж, “Аравны нэг, Аравны нэгийн өргөл,” scriptures.ChurchofJesusChrist.org

Бид аравны нэгээ төлснөөр ямар адислал хүлээн авдаг вэ?

Арван хоёр төлөөлөгчийн чуулгын ахлагч Дэвид А.Бэднар ийн заасан.

Цонх барилга байгууламж дотор байгалийн гэрэл орох боломжийг олгодог. Үүнтэй адилаар, бид аравны нэгийн хуулийг хүндэтгэх аваас сүнслэг тусгал мөн ирээдүйн төлөв нь тэнгэрийн цонхоор бидний амьдралд асгаран ирэх болно. (Дэвид А.Бэднар, “Тэнгэрийн цонхнууд,” 2013 оны 10-р сарын Ерөнхий чуулган, 19)

Ахлагч Бэднар мөн Их Эзэний аравны нэгийн хуулийн адислалуудын талаар дараах зүйлийг ийн онцлон тэмдэглэсэн.

Бид аравны нэгийн хуулийн тухай зааж мөн гэрчилж байхдаа үүнээс хүлээн авдаг гэнэтийн эсвэл агуу том, амархан олж харах боломжтой материаллаг адислалуудаа тодруулан ярьдаг. Иймэрхүү төрлийн адислалууд үнэхээр тохиодог. Гэхдээ энэ зарлигт дуулгавартай байснаар олж авдаг янз бүрийн адислалын зарим нь чухал хийгээд чимээгүй байдаг. Бид тэдгээр адислалыг сүнслэг байдлын хувьд соргог мэдрэмжтэй, ажигч байх үедээ л ялган таньж чаддаг (1 Коринт 2:14-ийг үзнэ үү). …

Жишээлбэл: Бидний хүлээн авдаг чухал мөртлөө агуу адислалуудын нэг бол хүслээ хазаарлаж, байгаа зүйлдээ талархах хүчийг өгдөг сүнслэг бэлэг юм. (Дэвид А.Бэднар, “Тэнгэрийн цонхнууд,” 2013 оны 10-р сарын Ерөнхий чуулган, 19–20)

“Чухал хийгээд чимээгүй” адислалуудын нэмэлт жишээнүүдийг ахлагч Бэднарын хэлсэн үгээс бүрэн эхээр нь үзнэ үү (“Тэнгэрийн цонхнууд,” 2013 оны 10-р сарын Ерөнхий чуулган, 19–22).

Нэмэлт суралцах үйл ажиллагаа

3 Нифай 24:1–6. Хоёр дахь ирэлтэд бэлтгэх нь

Аврагчийн Хоёр дахь ирэлтийн дүрслэлийг үзүүлж, үүнд хэрхэн бэлдэж болох арга замыг хуваалцахад суралцагчдыг урь. Суралцагчдыг 3 Нифай 24:1–6-г уншаад, (1) тэд Есүс Христийн тухай мөн Түүний Хоёр дахь ирэлтийн талаар юу сурч мэдсэнийг, (2) Хоёр дахь ирэлтэд бэлтгэхэд нь туслах үг хэллэгүүдийг олж мэдэхэд урь.

Дараахыг ойлгоход суралцагчдад тусал.

• 1-р шүлэг-ийн захиас нь Баптисч Иохан, Иосеф Смит хоёрыг хэлж болно (Bruce R. McConkie, A New Witness for the Articles of Faith [1985], 629-ийг үзнэ үү). Орчин үеийн илчлэлтээс бид мөн сайн мэдээний Сэргээлт нь өөрөө Аврагчийн Хоёр дахь ирэлтээс өмнө илгээгдсэн захиас гэдгийг харж байна (Сургаал ба Гэрээ 45:9-ийг үзнэ үү).

• Цэвэршүүлэгчийг металлыг халааж, хольцыг нь салгахын тулд гал ашигладаг.

• Хувцас угаагч нь саван ашиглан, даавууг цэвэрлэж эсвэл цайруулдаг.

Суралцагчдын сурч мэдэж болох нэг зарчим бол Их Эзэн дэлхийг Есүс Христийн Хоёр дахь ирэлтэд бэлтгүүлэхээр Иосеф Смитийг илгээсэн юм. Суралцагчид Хоёр дахь ирэлтэд дэлхийг бэлтгэхэд тусалсан Иосеф Смитийн арга замуудыг жагсаан бичиж болно.

3 Нифай 24:8. Өргөлүүд

Хэрэв суралцагчдад “аравны нэг, өргөл” хоёрын хоорондох ялгааг ойлгоход тусламж хэрэгтэй бол та тэднийг Судруудын удирдамж, “Мацаг, мацаг барих,” “Өргөл,” “Аравны нэг, Аравны нэгийн өргөл”-ийг scriptures.ChurchofJesusChrist.org-оос судлахад урьж болно. Суралцагчид дараа нь аравны нэг, өргөл хоёрын төстэй болон ялгаатай талыг мөн тус бүрийн амласан адислалуудын талаар ярилцаж болно.