3 Nefi 27, Pjesa 1

“Ndërtuar mbi Ungjillin Tim”

Cilat janë disa nga karakteristikat më të rëndësishme të Kishës së Shpëtimtarit? Jezu Krishti u dha mësim dishepujve të Tij nefitë se Kisha e Tij duhet të quhet sipas emrit të Tij dhe të ndërtohet mbi ungjillin e Tij. Ky mësim mund të të ndihmojë ta kuptosh se çfarë është ungjilli i Shpëtimtarit dhe rëndësinë e emrit të Kishës.

Përgatituni për të qenë një instrument i Frymës së Shenjtë. Zoti ka dhënë mësim: “dhe nëse nuk e merrni Shpirtin, ju s’duhet të jepni mësim” (Doktrina e Besëlidhje 42:14). Ndërsa përpiqeni fort ta ndiqni shembullin e Shpëtimtarit lidhur me bindjen dhe ta jetoni ungjillin me gjithë zemrën tuaj, Shpirti do t’ju ndihmojë ta jepni mësim ungjillin e Jezu Krishtit.

Përgatitja e nxënësve: Mund t’i ftoni nxënësit të lexojnë tek 3 Nefi 27:1–10 dhe të zbulojnë se çfarë u dha mësim Shpëtimtari dishepujve të Tij nefitë për Kishën e Tij.

Veprimtari të Mundshme të të Mësuarit

Si do t’i përgjigjeshe?

Tregojuani nxënësve skenarin vijues. Mund t’i ftoni edhe dy nxënës të gatshëm ta interpretojnë atë.

Një ditë ndërsa po tregonin se çfarë kishin bërë gjatë fundjavës, Nela i përmendi shokut të saj, Marselit, se të dielën kishte shkuar në kishë.

Marseli e pyeti: “Ti je mormone, apo jo?”

Nela i tha: “Ndonjëherë njerëzit na quajnë ashtu, por na pëlqen më shumë të na quajnë anëtarë të Kishës së Jezu Krishtit të Shenjtorëve të Ditëve të Mëvonshme.”

Marseli iu përgjigj: “Tingëllon si emër i vështirë. Përse nuk thua thjesht se i përket kishës mormone? A nuk lexon nga Libri i Mormonit?”

Nxënësit mund të ftohen ta diskutojnë pyetjen vijuese me një partner ose grup të vogël.

• Cilat janë disa mënyra se si Nela mund t’i përgjigjet pyetjes së Marselit?

Sot ti do të studiosh disa nga mësimet e Shpëtimtarit për dishepujt e Tij nefitë të shënuara tek 3 Nefi 27. Ndërsa studion, kërko të vërtetat që Jezusi i dha mësim rreth Kishës së Tij, të cilat mund të të ndihmojnë kur përballesh me situata si ajo që sapo lexove.

Emri i Kishës

Pak pas vizitës së Krishtit te nefitët, dymbëdhjetë dishepujt e Tij nefitë u bashkuan në agjërim dhe lutje. Ata donin të dinin se cili duhet të ishte emri i Kishës. Ndërsa po luteshin, Shpëtimtari u shfaq dhe filloi t’u jepte mësim atyre (shih te 3 Nefi 27:1–3).

Lexo tek 3 Nefi 27:4–7, duke kërkuar atë që Shpëtimtari u dha mësim dishepujve të Tij rreth emrit të Kishës së Tij.

• Si tha Shpëtimtari se duhej të quhej Kisha e Tij?

Merreni parasysh ta shkruani të vërtetën vijuese në tabelë dhe të lini hapësirë në fund, që të mund të shtoni tek e vërteta më vonë në mësim.

Një e vërtetë që mësojmë nga këto vargje është se: Kisha e vërtetë e Jezu Krishtit duhet të quhet me emrin e Tij.

• Çfarë arsyesh dha Shpëtimtari për ta quajtur emrin e Kishës sipas vetë emrit të Tij?

Presidenti Rasëll M. Nelson tregoi arsyet përse është e rëndësishme që ne ta përdorim emrin e saktë të Kishës:

“Emri i Kishës nuk është i diskutueshëm. Kur Shpëtimtari e shpall qartë se cili duhet të jetë emri i Kishës së Tij dhe madje kur i paraprin deklaratës së Tij me fjalët: ‘Kështu do të quhet kisha ime’, Ai e ka seriozisht. Dhe nëse ne lejojmë që nofkat të përdoren, ose i pranojmë, ose madje i nxitim vetë ato nofka, Ai fyhet.

Çfarë vlere ka te një emër apo, në këtë rast, një nofkë? Për sa u përket nofkave të Kishës, të tilla si ‘Kisha SHDM’, ‘Kisha Mormone’, apo ‘Kisha e Shenjtorëve të Ditëve të Mëvonshme’, gjëja më e rëndësishme në ata emra është mungesa e emrit të Shpëtimtarit. Ta heqësh emrin e Zotit nga Kisha e Zotit, është një fitore madhore për Satanin. Kur ne e heqim emrin e Shpëtimtarit, ne po shpërfillim fshehtas gjithçka që Jezu Krishti bëri për ne – madje dhe Shlyerjen e Tij.” (Rasëll M. Nelson, “Emri i Saktë i Kishës”, Liahona, nëntor 2018, f. 87–88)

• Çfarë të bie në sy nga thënia e Presidentit Nelson?

• Si mendon se përpjekjet tona për ta përdorur emrin e saktë të Kishës mund të ndikojnë tek ata që nuk janë anëtarë të Kishës?

Si pjesë e diskutimit për pyetjen e mëparshme, merreni parasysh të shikoni njërin ose më shumë prej materialeve filmike nga pjesa “Komente dhe Informacion për Rrethanat” në kreun “Çfarë mund të ndodhë kur e përdorim emrin e saktë të Kishës?”

“Ndërtuar mbi ungjillin tim”

Përveç se ua theksoi se Kisha e Tij duhet të quhet me emrin e Tij, Shpëtimtari u dha mësim dishepujve të Tij nefitë për një tjetër karakteristikë thelbësore të Kishës së Tij.

Lexo tek 3 Nefi 27:8–10, duke e kërkuar këtë karakteristikë.

• Çfarë mund t’i shtosh nga këto vargje të vërtetës së theksuar me ngjyrë të zezë që e përcaktove më herët rreth Kishës së Shpëtimtarit?

Merreni parasysh ta përditësoni të vërtetën që shkruat më parë në tabelë me diçka të ngjashme me atë në vijim.

Një mënyrë se si mund t’i përmbledhim mësimet e Shpëtimtarit që i ke studiuar deri tani është: Kisha e vërtetë e Jezu Krishtit duhet të quhet me emrin e Tij dhe të ndërtohet mbi ungjillin e Tij.

• Si mendon ti, çfarë do të thotë që Kisha e Shpëtimtarit të ndërtohet mbi ungjillin e Tij?

Mund të jetë e dobishme ta kuptosh se fjala ungjill do të thotë “lajm i mirë” (shih Bible Dictionary, “Gospels”).

Për të të ndihmuar t’i kuptosh aspektet e rëndësishme të ungjillit të Shpëtimtarit, vizato një figurë të thjeshtë të një godine kishe në ditarin tënd të studimit, si ajo më poshtë. Sigurohu që të lësh hapësirë për të shkruar fjalë dhe fraza poshtë kishës.

Krijoni një figurë të një kishe në tabelë që të mund të përdoret si pjesë e diskutimit tuaj.

Lexo tek 3 Nefi 27:13–22, duke kërkuar atë që tha Jezu Krishti se është ungjilli i Tij. Shkruaji fjalët ose frazat që gjen në hapësirën poshtë skicës sate.

Ftojini nxënës të ndryshëm t’i renditin fjalët ose frazat që përcaktuan poshtë figurës së kishës në tabelë. Më pas diskutojeni se çfarë mësuan nxënësit nga studimi i tyre i këtyre vargjeve duke u bërë pyetje si ato në vijim.

• Nisur nga vargjet që studiove, si do ta përshkruaje se çfarë është ungjilli i Shpëtimtarit?

Vini në dukje aspekte të veçanta të ungjillit të Shpëtimtarit që janë të renditura në tabelë. Ndihmojini nxënësit ta kuptojnë rëndësinë e këtyre aspekteve duke bërë pyetje si këto: Përse mendoni se ky aspekt i ungjillit të Shpëtimtarit mund të quhet lajm i mirë? Përse mendoni se është e rëndësishme që Kisha e Shpëtimtarit të “ndërtohet mbi” (ose përqendrohet) këtë mësim ose parim? Si mund të ndikojë ky aspekt i ungjillit të Shpëtimtarit në jetën tuaj?

Kur të përfundoni me diskutimin, nëse dëshironi mund t’i riktheheni skenarit nga fillimi i mësimit dhe t’i vini nxënësit të ushtrojnë dhënien e përgjigjeve bazuar në atë çfarë mësuan.

Komente dhe Informacion për Rrethanat

Çfarë mund të ndodhë kur ne e përdorim emrin e saktë të Kishës?

Presidenti Rasëll M. Nelson premtoi:

“Vëllezërit dhe motrat e mia të dashura, ju premtoj që, nëse ne do të bëjmë më të mirën tonë për ta rivendosur emrin e saktë të Kishës së Zotit, Ai, Kisha e të cilit është kjo, do të derdhë fuqinë dhe bekimet e Tij mbi kokat e shenjtorëve të ditëve të mëvonshme, në mënyra të cilat ne nuk i kemi parë kurrë. Ne do të kemi njohurinë dhe fuqinë e Perëndisë që të na ndihmojnë për t’i çuar bekimet e ungjillit të rivendosur të Jezu Krishtit te çdo komb, fis, gjuhë e popull dhe për ta përgatitur botën për Ardhjen e Dytë të Zotit.” (Rasëll M. Nelson, “Emri i Saktë i Kishës”, Liahona, nëntor 2018, f. 89)

Për të parë shembuj të së mirës që ka ardhur nga individët që përdorin emrin e saktë të Kishës, shikoni disa ose të gjitha materialet filmike vijuese:

“Emri i Saktë i Kishës” (kodet kohore 11:34 deri në 13:07).

“The Name of the Church is Not Negotiable” [“Emri i Kishës nuk Është i Diskutueshëm”] (kodet kohore 4:36 deri në 6:41).

“The Name of the Church is Not Negotiable” [“Emri i Kishës nuk Është i Diskutueshëm”] (kodet kohore 10:45 deri në 12:16).

Si na ndihmon të jetuarit e ungjillit të Shpëtimtarit të bëhemi si Ai?

Plaku Tieri K. Mutombo, i Të Shtatëdhjetëve, shpjegoi se si mësimi, pranimi dhe ndjekja e ungjillit të Shpëtimtarit ndikoi tek ai dhe familja e tij.

“Kur filluam të takoheshim me këta misionarë të mrekullueshëm, të cilët ishin si engjëj të dërguar nga Perëndia, unë vura re se diçka filloi të ndryshonte në familjen tonë. Pas pagëzimit tonë, ne me të vërtetë filluam gradualisht që të kishim një mënyrë të re jetese për shkak të ungjillit të rivendosur. Fjalët e Krishtit filluan të zmadhonin shpirtrat tanë. Ato filluan të ndriçonin të kuptuarit tonë dhe u bënë të këndshme për ne, pasi të vërtetat që ne morëm, ishin të dallueshme dhe ne mund ta shihnim dritën, dhe kjo dritë bëhej përditë e më e shndritshme.

Kjo kuptueshmëri e pse‑së së ungjillit po na ndihmonte të bëheshim më shumë si Shpëtimtari.” (Tieri K. Mutombo, “Ju Do të Jeni të Lirë”, Liahona, maj 2021, f. 51)

Paraqitje filmike

Për të parë një përshkrim të Shpëtimtarit që u jep mësim Apostujve të Tij rreth Kishës së Tij dhe ungjillit të Tij, shikojeni “Jezu Krishti Shpall Emrin e Kishës së Tij dhe Doktrinën e Tij” nga kodi kohor 0:00 deri në 5:26.

Veprimtari Plotësuese të të Mësuarit

Fillim alternativ i mësimit

Merreni parasysh t’i ftoni nxënësit të imagjinojnë sikur ata dhe disa miq do të krijojnë një ekip për diçka që e pëlqejnë (një sport, një grup muzikor, etj.). Ftojini ata të mendojnë për një emër që do ta përdornin për grupin e tyre. Mund t’i pyesni se përse e zgjodhën atë emër dhe çfarë mund t’u komunikojë ai emër të tjerëve rreth grupit të tyre. Më pas ftojini ata të lexojnë tek 3 Nefi 27:4–7, duke kërkuar emrin që dha Shpëtimtari për Kishën e Tij dhe përse Ai e dha atë emër.

3 Nefi 27:11. Gëzim për një stinë

Disa mund të jenë të shqetësuar për të tjerët jashtë Kishës që duket se po përjetojnë lumturi dhe liri. Merreni parasysh ta tregoni historinë nga Plaku Robert C. Gei rreth një të reje që bëri këtë pyetje: “‘I dashuri im dhe unë kohët e fundit u ndamë dhe ai zgjodhi ta lërë Kishën. Ai më thotë se ai nuk ka qenë kurrë më i lumtur se tani. Si mund të ndodhë kjo?’” (“Marrja mbi Vete e Emrit të Jezu Krishtit”, Liahona, nëntor 2018, f. 99). Ftojini nxënësit të mendojnë se si mund të përgjigjen. Nxënësit mund të studiojnë tek 3 Nefi 27:10–17, duke kërkuar se çfarë mësimi dha Shpëtimtari që mund t’i ndihmojë ata të përgjigjen.

3 Nefi 27:13–15. Krishti i ngritur në kryq

Shpëtimtari e përdori pamjen e fuqishme të kryqit për t’ua kujtuar njerëzve se çfarë bëri për ta. Për shkak se Ai u ngrit lart, edhe ne do të ngrihemi lart, ose do të ngrihemi nga varri (ringjallemi) që të mund të gjykohemi më pas. Mund ta merrni parasysh t’i ftoni nxënësit të lexojnë te Gjoni 3:14–17 dhe ta bëjnë referencë-kryq me vargun tek 3 Nefi 27:14 në shkrimet e tyre të shenjta.