3 Nefi 27, Pjesa 2

Të Bërit të Shenjtëruar nëpërmjet Jezu Krishtit

fëmijë i lumtur që po pagëzohet

A ka raste kur ke dashur të ishe më i pastër shpirtërisht? Kur Jezu Krishti u dha mësim dishepujve të Tij në kontinentin e lashtë amerikan, Ai shpjegoi bekime të rëndësishme që janë në dispozicion të atyre që e ndjekin ungjillin e Tij, duke përfshirë shenjtërimin nëpërmjet Frymës së Shenjtë. Ky mësim mund të të ndihmojë ta kuptosh se si ta marrësh fuqinë shenjtëruese të Shpëtimtarit ndërsa bën përpjekje për ta jetuar ungjillin e Tij.

Ndihma ndaj nxënësve që të ndiejnë një ndjesi përkatësie. Seminari duhet të jetë një mjedis ku nxënësit janë të sigurt dhe përkrahen dhe kontributet e tyre vlerësohen. Tregojeni dashurinë dhe kujdesin tuaj për nxënësit ndërsa ndërveproni me ta. Nxitini pjesëtarët e klasës ta dëgjojnë njëri-tjetrin dhe t’i vlerësojnë këndvështrimet e bashkëmoshatarëve të tyre.

Përgatitja e nxënësve: Ftojini nxënësit t’i lexojnë tre paragrafët e parë për temën “Frymë e Shenjtë” tek Udhëzuesi për Shkrimet e Shenjta (scriptures.ChurchofJesusChrist.org). Ftojini ata të vijnë të përgatitur për ta treguar se si mendojnë se Fryma e Shenjtë mund t’i ndihmojë të bëhen të shenjtëruar, ose më shumë si Shpëtimtari.

Veprimtari të Mundshme të të Mësuarit

I papastër

Për t’i ndihmuar nxënësit të përgatiten për të studiuar rreth nevojës së tyre për të qenë të pastruar nga mëkatet e tyre, merreni parasysh t’ua tregoni rrëfimin vijues.

Plaku Alen D. Hejni, i Të Shtatëdhjetëve, tregoi historinë vijuese nga fëmijëria e tij.

Plaku Alen D. Hejni

“Kur unë isha nëntë vjeç, gjyshja ime flokëbardhë, një metër e gjysmë, nga ana e nënës, erdhi të kalonte disa javë me ne në shtëpinë tonë. Një pasdite ndërsa ajo ishte aty, unë dhe dy vëllezërit e mi më të mëdhenj vendosëm të hapnim një gropë në një fushë në krahun tjetër të rrugës nga shtëpia jonë. Nuk e di pse e bëmë atë; ndonjëherë djemtë hapin gropa. U bëmë pak pis, por gjë që nuk do të na hapte shumë telashe. Djemtë e tjerë në lagje e panë sa emocionuese ishte të hapje një gropë dhe filluan të na ndihmonin. Më pas ne të gjithë u bëmë edhe më pis së bashku. Dheu ishte i fortë, kështu që tërhoqëm një markuç dhe hodhëm pak ujë në fund të gropës që ta zbutnim dheun. U bëmë pak me baltë teksa gërmonim, por gropa vërtet u bë më e thellë.

Dikush në grupin tonë vendosi që ta kthenim gropën në një pishinë, kështu që e mbushëm me ujë. Duke qenë më i vogli dhe duke dashur të përshtatesha, unë u binda të hidhesha brenda dhe ta provoja. Tani unë isha me të vërtetë pis. Unë nuk planifikova që të isha i mbuluar me baltë, por ja që aty përfundova.

Kur filloi të bëhej ftohtë, kalova rrugën, me qëllim që të shkoja në shtëpi. Gjyshja ime më takoi përballë derës kryesore dhe nuk pranoi të më linte të hyja. Ajo më tha se, nëse më lejonte të hyja, unë do të lija gjurmë balte në shtëpinë që ajo sapo kishte pastruar. Kështu që bëra atë që çdo nëntëvjeçar do të bënte nën ato rrethana dhe vrapova te dera e pasme, por ajo ishte më e shpejtë nga sa e kisha menduar. U inatosa, përplasa këmbët dhe kërkova me ngulm të hyja në shtëpi, por dera mbeti e mbyllur.

Isha i lagur, me baltë, kisha ftohtë dhe në imagjinatën time të fëmijërisë unë mendova se mund të vdisja në vetë oborrin pas shtëpisë time. Më në fund, e pyeta atë se çfarë duhej të bëja që të hyja në shtëpi. Përpara se ta kuptoja, e gjeta veten duke qëndruar në oborrin pas shtëpisë ndërsa gjyshja ime më shpëlante me një markuç. Pas asaj që u duk një pafundësi, gjyshja më shpalli të pastër dhe më la të hyja në shtëpi. Ishte ngrohtë në shtëpi dhe unë isha në gjendje të vishja rroba të thata e të pastra.” (Alen D. Hejni, “Të Kujtojmë në Cilin Kemi Besuar”, Ensign ose Liahona, nëntor 2015, f. 121)

• Çfarë krahasimesh shpirtërore mund të bësh ndërmjet historisë së Plakut Hejni dhe jetës sonë?

Tek 3 Nefi 27, si pjesë e fjalimit të Shpëtimtarit ndaj dishepujve të Tij nefitë rreth ungjillit të Tij, Ai dha mësim për pasojat e mëkatit dhe se si mund t’i kapërcejmë ato dhe të bëhemi të pastër shpirtërisht.

Lexo te 3 Nefi 27:19, duke kërkuar mësimet e Shpëtimtarit.

• Çfarë të mëson ky varg rreth nevojës sate për Jezu Krishtin dhe Shlyerjen e Tij?

Të treguarit e paragrafit vijues mund t’i ndihmojë nxënësit ta dallojnë nevojën e tyre vetjake për fuqinë pastruese të Shpëtimtarit.

Jezu Krishti mund të të pastrojë nga njolla e mëkatit dhe mund të të ndihmojë të bëhesh i shenjtë. Mendo për nevojën tënde për të qenë i pastruar nga mëkati dhe se si mund të ndihesh ose mos ndihesh të jesh i pastër shpirtërisht. Ndërsa studion sot, kërkoji mësimet që mund të të ndihmojnë ta kuptosh më mirë se si mund t’i qasesh fuqisë shenjtëruese të Shpëtimtarit në jetën tënde.

Jezu Krishti përshkruan atë se si mund të shenjtërohemi nëpërmjet Frymës së Shenjtë

Tek 3 Nefi 27:20–22, Shpëtimtari dha mësim se çfarë mund të bëjmë për ta marrë fuqinë e Tij shenjtëruese dhe për t’u kualifikuar për jetën e përjetshme. Për të të ndihmuar t’i studiosh këto vargje, kopjoje tabelën vijuese në ditarin tënd të studimit.

Nëse dëshironi, mund ta kopjoni edhe këtë tabelë në dërrasë që nxënësit të mund ta plotësojnë si klasë pas studimit.

Urdhërimet	Bekimet

Lexo tek 3 Nefi 27:20–22 dhe plotësoje tabelën në bazë të asaj që gjen.

3 Nefi 27:20 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment për një pyetje ose situatë.

• Si do t’i përmblidhje mësimet e Shpëtimtarit te vargu 20 si një pohim të vërtete?

Një e vërtetë që mund të mësojmë është: nëse pendohemi dhe vijmë te Jezu Krishti duke u pagëzuar, atëherë mund të shenjtërohemi duke e marrë Frymën e Shenjtë dhe të qëndrojmë të panjollë përpara Tij në ditët e fundit.

Të shenjtërohesh do të thotë të “çlir[ohesh] nga mëkati, [të] bë[hesh] i dëlirë, i pastër dhe i shenjtë nëpërmjet Shlyerjes së Jezu Krishtit” (Udhëzuesi për Shkrimet e Shenjta, “Shenjtërim”, scriptures.ChurchofJesusChrist.org).

• Si na ndihmojnë pendimi dhe pagëzimi ta përjetojmë shenjtërimin nëpërmjet Jezu Krishtit?

• Si mund t’i përgjigjeshe dikujt që e pyet veten se si këto urdhërime gjejnë zbatim tek ai pasi e ka marrë ordinancën e pagëzimit?

Nëse është e nevojshme, ndihmojini nxënësit ta kuptojnë se, për shkak se jemi të papërsosur, ne kemi mundësi për t’u penduar çdo ditë. Gjithashtu, pasi pagëzohemi, ne duhet të përpiqemi vazhdimisht t’i mbajmë besëlidhjet e pagëzimit. Marrja denjësisht e sakramentit na jep një mundësi çdo javë për t’i ripërtërirë ato besëlidhje. Të gjitha këto veprime na ndihmojnë të bëhemi më të pastër shpirtërisht.

Thëniet nga Presidentët Rasëll M. Nelson dhe Bojd K. Paker në pjesën “Komente dhe Informacion për Rrethanat” duhet të përdoren për të ndihmuar të jepen mësim këto koncepte.

Të Bërit të Shenjtëruar nëpërmjet Frymës së Shenjtë

Fjalët e Jezu Krishtit te vargu 20 na mësojnë se mënyra se si Ai na ndihmon të bëhemi të shenjtëruar është nëpërmjet marrjes së Frymës së Shenjtë.

Presidenti Henri B. Ajring, i Presidencës së Parë, dha mësim rreth marrëdhënies ndërmjet Shlyerjes së Shpëtimtarit dhe ndikimit shenjtërues të Frymës së Shenjtë.

Presidenti Henri B. Ajring

“Nëse e keni ndier ndikimin e Frymës së Shenjtë sot, ju mund ta merrni atë si fakt që Shlyerja po funksionon në jetën tuaj. Për atë arsye dhe për shumë të tjera, ju do të bënit mirë ta vendosni veten në vende dhe punë që i ftojnë nxitjet e Frymës së Shenjtë. Të ndierit e ndikimit të Frymës së Shenjtë funksionon në të dyja mënyrat: Fryma e Shenjtë banon vetëm në një tempull të pastër dhe marrja e Frymës së Shenjtë na pastron nëpërmjet Shlyerjes së Jezu Krishtit.” (Henry B. Eyring, “Gifts of the Spirit for Hard Times”, Ensign, qershor 2007, f. 23.)

• Si e ke dalluar ndikimin rafinues të Shpirtit në jetën tënde?

  Si pjesë e diskutimit të pyetjes së mëparshme, merreni parasysh të tregoni shembuj se si Fryma e Shenjtë ju ka ndihmuar të keni më tepër pastërti shpirtërore. Kjo mund të përfshijë mënyrat se si Fryma e Shenjtë i ka shtuar dëshirat tuaja për ta ndjekur Jezu Krishtin ose nxitjet që ju ka dhënë Fryma e Shenjtë për t’i shmangur sjelljet që po ju largonin nga Shpëtimtari.

• Cilat janë disa mënyra se si mund ta ftojmë shoqërimin e vazhdueshëm të Frymës së Shenjtë që të bekohemi rregullisht me ndikimin e tij shenjtërues?

Zbatimi i mësimeve të Shpëtimtarit në jetën tënde

Të vërtetat që i ke studiuar sot janë të thjeshta, por thelbësore për t’u ndjekur vazhdimisht që të mund të kthehesh denjësisht në praninë e Perëndisë. Mendo se si do ta zbatosh në jetën tënde atë që ke mësuar dhe ndier. Mund të zgjedhësh njërën ose më shumë nga mundësitë vijuese ose të zgjedhësh një mënyrë tjetër për t’i zbatuar këto mësime.

Paraqitini mundësitë vijuese dhe jepuni nxënësve kohë të mjaftueshme për të përsiatur dhe mundësisht për të shkruar një plan veprimi në ditarët e tyre të studimit. Pasi të kenë mbaruar, dëshmoni për të vërtetat që i keni diskutuar në këtë mësim.

1. Pendohu në mënyrë të qëllimshme çdo ditë dhe vendos ta ndjekësh Shpëtimtarin më plotësisht.

2. Bëje pjesëmarrjen tënde në ordinancën e sakramentit një pjesë më kuptimplotë të adhurimit tënd të së dielës.

3. Përcakto një mëkat ose shpërqendrim që po e kufizon shoqërimin tënd me Frymën e Shenjtë. Ndërmerri veprimet e nevojshme për ta hequr atë mëkat ose shpërqendrim nga jeta jote.

4. Fillo të bësh diçka që do të të japë qasje më të madhe në shoqërimin e Frymës së Shenjtë.

Komente dhe Informacion për Rrethanat

Si mund të më ndihmojë pendimi i përditshëm ta përjetoj fuqinë shenjtëruese të Shpëtimtarit?

Presidenti Rasëll M. Nelson dha mësim:

Presidenti Rasëll M. Nelson

“Asgjë nuk është më çliruese, më fisnikëruese ose më e rëndësishme për përparimin tonë individual sesa një përqendrim i rregullt, i përditshëm te pendimi. Pendimi nuk është një ngjarje; është një proces. Është kyçi drejt lumturisë dhe paqes së mendjes. Kur ndërthuret me besimin, pendimi na jep të drejtën për të përdorur fuqinë e Shlyerjes së Jezu Krishtit. …

… Zoti nuk pret përsosuri prej nesh në këtë pikë të përparimit tonë të përjetshëm. Por Ai vërtet pret që ne të bëhemi gjithnjë e më të pastër. Pendimi i përditshëm është shtegu drejt pastërtisë dhe pastërtia sjell fuqi.” (Rasëll M. Nelson, “Ne Mund të Bëjmë më Mirë dhe të Jemi më të Mirë”, Ensign ose Liahona, maj 2019, f. 67, 68)

Si mund të pastrohem nga mëkatet e mia pasi jam pagëzuar?

Presidenti Bojd K. Paker (1924–2015), i Kuorumit të Dymbëdhjetë Apostujve, dha mësim:

Presidenti Bojd K. Paker

“Zakonisht ne kuptojmë se ordinanca e pagëzimit i lan mëkatet tona në varësi të pendimit tonë. Disa pyesin veten nëse u pagëzuan shumë herët. Ah sikur të mund të pagëzoheshin tani dhe t’ia nisnin nga e para. Por ajo nuk është e nevojshme! Nëpërmjet ordinancës së sakramentit, ju i ripërtërini besëlidhjet e bëra në çastin e pagëzimit. Kur i plotësoni të gjitha kushtet e pendimit, sado të vështira, mund të merrni faljen dhe shkeljet tuaja nuk do t’ua shqetësojnë më mendjen.” (Boyd K. Packer, “Washed Clean”, Ensign, maj 1997, f. 10)

Si na ndihmon Fryma e Shenjtë ta përjetojmë fuqinë shenjtëruese të Shpëtimtarit?

Plaku Kevin R. Dankan, i Të Shtatëdhjetëve, shpjegoi:

Plaku Kevin R. Dankan

“Fryma e Shenjtë luan një rol kyç për të na ndihmuar ta mposhtim mëkatin dhe zëvendësuar atë me dashurinë për drejtësinë dhe aftësinë për t’i zbatuar urdhërimet e Perëndisë.

E kam dëshmuar fuqinë shenjtëruese të Shpirtit në jetën e shumë njerëzve. Kam parë njerëz të këqij të bëhen të mirë dhe njerëz të mirë të bëhen madhështorë, kur ia kanë dorëzuar zemrën e tyre ndikimit rafinues të Shpirtit. Fryma e Shenjtë është një shenjtërues.” (Kevin R. Duncan, “The Sacred Roles of the Holy Ghost”, Ensign, tetor 2014, f. 65)

Për ta kuptuar më mirë se si Shpëtimtari na pastron nëpërmjet Frymës së Shenjtë, merreni parasysh ta shihni “Face to Face with President Eyring and Elder Holland” [“Ballë për Ballë me Presidentin Ajring dhe Plakun Holland”], në dispozicion në ChurchofJesusChrist.org, nga kodet kohore 1:03:17 deri në 1:09:16.

Paraqitje filmike

Për të parë një përshkrim të disa prej mësimeve të Shpëtimtarit te 3 Nefi 27, shikojeni “Jezu Krishti Shpall Emrin e Kishës së Tij dhe Doktrinën e Tij” nga kodi kohor 3:26 deri në 8:03.

Veprimtari Plotësuese të të Mësuarit

Fillim alternativ i mësimit

Para se të lexoni tek 3 Nefi 27:19, ju mund t’i ftoni nxënësit të përfytyrojnë se kanë një ngjarje të rëndësishme ku duhet të marrin pjesë, për shembull një intervistë ose një takim, që kërkon që ata të vishen bukur. Më pas vërini ata të imagjinojnë se si mund të ishin ndier nëse, përpara se të fillonte ngjarja, derdhën diçka mbi rrobat e tyre dhe i bënë me njolla ato. Mund t’u kërkoni më pas nxënësve të mendojnë për gjëra që mund t’i shtyjnë shpirtrat tanë të jenë të papastër dhe se si mund të ndihemi po të dalim përpara Perëndisë në atë gjendje të papastër shpirtërore.

3 Nefi 27:27. “Çfarë lloj njerëzish duhet të jeni?”

Tek 3 Nefi 27:23–33, Shpëtimtari u dha udhëzime dymbëdhjetë dishepujve të Tij dhe u dha mësim rreth përgjegjësive të tyre, duke përfshirë rolet e tyre si gjykatës të njerëzve. Ftojini nxënësit të lexojnë tek 3 Nefi 27:27, duke kërkuar një të vërtetë që mund ta mësojmë nga urdhërimi që Shpëtimtari ua dha dishepujve të Tij, i cili mund të gjejë zbatim në jetën e tyre. Një e vërtetë që nxënësit mund ta përcaktojnë është: Zoti i urdhëron dishepujt e Tij të bëhen siç është Ai.

Nxënësit mund të studiojnë ngjarje nga jeta e Shpëtimtarit që e tregojnë shembullin e Tij të përsosur dhe të kërkojnë për tiparet e Shpëtimtarit të cilave dëshirojnë t’u përngjasojnë. Ata mund të bëjnë një plan për të zhvilluar më plotësisht njërin prej tipareve të Tij në mënyrë që të bëhen më shumë si Ai.