4 Nefi

“Të Kthyer në Besim te Zoti”

grup të rejash të lumtura me veshje kishe

Për mijëra vjet, individët, familjet dhe shoqëritë kanë kërkuar ideale si harmonia, paqja dhe uniteti. Këto mund të duken të paarritshme, por ekzistojnë. Rrëfimi te Nefi i Katërt është një shembull i asaj. Një çelës për t’i përjetuar këto bekime është ta thellojmë kthimin tonë në besim te Zoti dhe ta kemi dashurinë e Perëndisë në zemrën tonë. Ky mësim mund të të ndihmojë të ndiesh dashuri më të madhe për Atin Qiellor dhe Jezu Krishtin në mënyrë që të kthehesh më tepër në besimin tek Ata.

Përgatitu duke studiuar fjalën e Perëndisë. Ne jemi ngarkuar me përgjegjësinë për t’i dhënë mësim të vërtetat që gjenden në shkrimet e shenjta dhe mësimet e profetëve dhe apostujve të ditëve të fundit. Duke e studiuar me lutje fjalën e Perëndisë, ne mund të jemi në harmoni me Frymën e Shenjtë dhe të marrim ide dhe drejtim.

Përgatitja e nxënësve: Merreni parasysh t’i ftoni nxënësit ta studiojnë kuptimin e fjalës kthim në besim në burimet në dispozicion të Kishës. Përndryshe, mund t’i ftoni ata ta pyesin dikë që e njohin se çfarë kuptimi ka për të kthimi në besimin te Krishti.

Veprimtari të Mundshme të të Mësuarit

Një mundësi qiellore

Imagjino se si do të ishte nëse ti dhe njerëzit që të rrethojnë ta donit dhe po përpiqeshit të gjithë ta ndiqnit Jezu Krishtin.

Merreni parasysh t’i vendosni nxënësit në grupe të vogla dhe t’u kërkoni t’i diskutojnë shkurtimisht pyetjet vijuese.

• Si do të ndryshonte komuniteti yt?

• Si do të ndryshonte shkolla ose kisha jote?

• Si do të ndryshonte shtëpia jote?

Libri i Nefit të Katërt përmban rrëfimin e njerëzve që jetuan pas vizitës së Shpëtimtarit në kontinentin amerikan. Ndërsa i studion përvojat e tyre, kërko ndikimin që patën Jezu Krishti dhe ungjilli i Tij te këta njerëz. Mendo se si këto mësime mund të ndikojnë në mënyrën se si ti zgjedh ta jetosh jetën tënde.

Efekti i ungjillit të Shpëtimtarit

Lexo te 4 Nefi 1:1–2, duke kërkuar efektin që patën Shpëtimtari dhe mësimet e Tij te njerëzit.

• Çfarë vure re?

Nëse dëshiron, mund ta shenjosh frazën “i gjithë populli ishte kthyer në besim te Zoti” te vargu 2.

Merreni parasysh t’i ftoni nxënësit që e përfunduan veprimtarinë e përgatitjes ta tregojnë se çfarë mësuan rreth kuptimit të të qenit i kthyer në besim te Zoti. Mund të tregoni gjithashtu përkufizimin vijues.

Të jesh i kthyer në besim te Zoti do të thotë “ndryshim nga dikush i besimeve, zemrës dhe jetës së tij për të pranuar dhe për të bërë vullnetin e Perëndisë … [dhe] të bëhesh dishepull i Krishtit” (Udhëzuesi për Shkrimet e Shenjta, “Kthim, Kthyer (i)”, scriptures.ChurchofJesusChrist.org).

Bekimet e kthimit në besim

Nefitët dhe lamanitët përjetuan bekime të pabesueshme për shkak të kthimit të tyre në besimin te Jezu Krishti. Në ditarin tënd të studimit, shkruaj “Bekimet nga Kthimi në Besim” në mes të faqes.

Krahas nxënësve që e shkruajnë kreun në ditarin e tyre të studimit, ju mund ta shkruani atë në tabelë. Nxënësit mund t’i shkruajnë përgjigjet e tyre në tabelë pasi t’i studiojnë vargjet vijuese.

Lexo te 4 Nefi 1:2–18 dhe shenjoji fjalët ose frazat që i ilustrojnë bekimet që ata morën. Në letrën tënde, shkruaji këto fjalë ose fraza përreth titullit “Bekimet nga Kthimi në Besim”. (Mund të jetë e dobishme ta dini kuptimin e disa prej fjalëve te vargu 16. Trazira u referohet rrëmujave, lavirësi i referohet mëkateve seksuale dhe ndyrësi i referohet epshit dhe mungesës së dëlirësisë.)

Mendo se cilin prej këtyre bekimeve dëshiron ta përjetosh më shumë në jetën tënde. Merre parasysh t’i rrethosh ato në faqen te ditari yt i studimit.

Ftojini nxënësit ta tregojnë se çfarë mësuan ose ndien nga studimi i tyre për vargjet 2–18. Mund të ftoni nxënës të ndryshëm ta tregojnë një frazë që është veçanërisht e rëndësishme për ta dhe ta shpjegojnë rëndësinë e saj.

• Çfarë të bëri përshtypje nga këto vargje? Përse?

• Nisur nga ajo që mësove nga këto vargje, si mund ta përfundosh fjalinë vijuese: “Kur ktheheni në besimin te Zoti …”?

Një e vërtetë që mund të përcaktojmë nga këto vargje është: kur kthehemi në besimin te Zoti, ne bekohemi me lumturi dhe unitet si fëmijë të Krishtit.

• Si mendon, përse të kthyerit në besimin te Jezu Krishti dhe të jetuarit e ungjillit të Tij mund të prodhojnë bekime të tilla?

• Si mund të ndikojë të kuptuarit e kësaj të vërtetë në veprimet tona të përditshme?

Dashuria e Perëndisë

Plaku Xhefri R. Holland, i Kuorumit të Dymbëdhjetë Apostujve, tregoi bisedën vijuese rreth arsyes përse këta njerëz ishin në aftë të jetonin në një gjendje të tillë lumturie dhe uniteti.

Plaku Xhefri R. Holland

“Cili është kyçi i këtij zbulimi të madh lidhur me të jetuarit të kënaqur e të lumtur? Është i ngulitur atje në tekstin e një fjalie: ‘Dashuri[a e] Perëndisë … jetonte në zemrat e njerëzve’ [4 Nefi 1:15]. Kur dashuria e Perëndisë vendos tonin e jetës sonë, të marrëdhënieve tona me njëri‑tjetrin dhe më së fundmi të ndjenjës sonë për gjithë njerëzimin, atëherë dallimet e vjetra, etiketimet kufizuese dhe përçarjet artificiale fillojnë të largohen dhe paqja shtohet. Kjo është pikërisht ajo që ndodhi në shembullin tonë në Librin e Mormonit. Nuk kishte më lamanitë, ose jakobitë, ose jozefitë, ose zoramitë. Nuk kishte asnjë lloj ‘‑itësh’. Njerëzit kishin marrë mbi vete vetëm një identitet të mrekullueshëm. Ata që të gjithë, siç thuhet, njiheshin si ‘fëmijë të Krishtit’ [4 Nefi 1:17].” (Xhefri R. Holland, “Pasuria më e Madhe”, Liahona, nëntor 2021, f. 9)

Merre parasysh ta shenjosh frazën në vargun 15 rreth dashurisë së Perëndisë që banon në zemrat e njerëzve. Të kemi dashurinë e Perëndisë në zemrën tonë mund të nënkuptojë që ta ndiejmë dashurinë që Perëndia ka për ne dhe për të tjerët. Mund të nënkuptojë gjithashtu të ndiesh dashuri ndaj Atit Qiellor dhe Jezu Krishtit.

• Cilat janë disa veprime që mund t’i ndërmarrim që do të na ndihmonin të ndiejmë dashuri më të madhe për Atin Qiellor dhe Jezu Krishtin?

Kërkoni përgjigje të shumta për pyetjen vijuese. Si pjesë e këtij diskutimi, mund të jetë me dobi t’u kërkoni nxënësve ta shpjegojnë se çfarë i ka ndihmuar të ndiejnë dashuri më të madhe për Perëndinë. Ju mund të doni gjithashtu të tregoni shembuj nga jeta juaj.

Një mënyrë se si mund të ndiejmë dashuri më të madhe për Atin Qiellor dhe Jezu Krishtin është duke mësuar dhe arritur t’i njohim Ata në shkrimet e shenjta.

Nxënësit mund ta plotësojnë veprimtarinë vijuese individualisht ose në një grup të vogël.

Ndalu për t’i studiuar fragmentet e shkrimit të shenjtë rreth Atit Qiellor dhe Jezu Krishtit që mund të të ndihmojnë të ndiesh dashuri më të madhe për Ta. Kushtoji vëmendje asaj që mëson rreth tipareve, dëshirave dhe roleve të Tyre. Mund të kërkosh terma si “Ati në Qiell” ose “Jezu Krishti” duke përdorur mjetet e studimit si Udhëzuesi për Shkrimet e Shenjta ose funksioni i kërkimit Gospel Library [Biblioteka e Ungjillit].

Ftojini nxënësit t’i tregojnë vargjet që gjetën që ishin veçanërisht kuptimplota për ta. Kërkojuni atyre ta shpjegojnë se si të vërtetat e dhëna mësim mund të na ndihmojnë të ndiejmë dashuri më të madhe për Atin Qiellor ose Jezu Krishtin.

• Kur nxënësit të kenë mbaruar së treguari, merreni parasysh t’i ftoni ata t’i përgjigjen pyetjes vijuese në ditarët e tyre të studimit. Më pas dëshmoni për të vërtetat që i keni diskutuar sot.

• Cila është një gjë që do të përpiqesh ta bësh në ditët në vijim, që mund të të ndihmojë të bëhesh më i kthyer në besimin te Jezu Krishti?

Komente dhe Informacion për Rrethanat

Çfarë mund të më ndihmojë ta thelloj kthimin tim në besimin te Zoti?

Motra Boni L. Oskarson, ish‑Presidente e Përgjithshme e Të Rejave, dha mësim:

Presidentja Boni L. Oskarson

“Kthimi në besim ndodh kur jemi të zellshëm në bërjen e lutjeve tona, në studimin e shkrimeve tona të shenjta, në frekuentimin e kishës dhe në të qenit të denjë për të marrë pjesë në ordinancat e tempullit. Kthimi në besim vjen ndërsa veprojmë sipas parimeve të drejta që mësojmë në shtëpitë tona dhe në klasë. Kthimi në besim vjen ndërsa bëjmë jetë të dëlira e të virtytshme dhe gëzojmë shoqërinë e Frymës së Shenjtë. Kthimi në besim vjen ndërsa e kuptojmë Shlyerjen e Jezu Krishtit, e pranojmë Atë si Shpëtimtarin dhe Shëlbuesin tonë dhe e lejojmë Shlyerjen të veprojë në jetët tona.” (Boni L. Oskarson, “Kthehuni në Besim”, Ensign ose Liahona, nëntor 2013, f. 77–78)

Po sikur të ndiej se kthimi në besim nuk po ndodh për mua?

Plaku Dejvid A. Bednar, i Kuorumit të Dymbëdhjetë Apostujve, dha mësim:

Plaku Dejvid A. Bednar

“Për shumë prej nesh, kthimi në besim është një proces i vazhdueshëm dhe jo një ngjarje që ndodh vetëm një herë e që vjen si pasojë e një përvoje të fuqishme ose dramatike. Rresht pas rreshti dhe parim pas parimi, gradualisht dhe pothuajse pa u kuptuar, shtysat tona, mendimet tona, fjalët tona dhe veprat tona pajtohen me vullnetin e Perëndisë. Kthimi në besim te Zoti kërkon si këmbëngulje ashtu edhe durim.” (Dejvid A. Bednar, “Të Kthyer në Besim te Zoti”, Ensign ose Liahona, nëntor 2012, f. 107–108)

Si mund të më ndihmojë të pasurit e dashurisë së Perëndisë në zemrën time të përjetoj unitet më të madh me të tjerët?

Plaku Dejll G. Renland, i Kuorumit të Dymbëdhjetë Apostujve, dha mësim:

Plaku Dejll G. Renland

“Uniteti kërkon përpjekje. Ai zhvillohet kur ne kultivojmë dashuri për Perëndinë në zemrat tona dhe përqendrohemi te fati ynë i përjetshëm. Neve na bashkon identiteti ynë i përbashkët parësor si fëmijë të Perëndisë dhe zotimi ynë ndaj të vërtetave të ungjillit të rivendosur. Për rrjedhojë, dashuria jonë për Perëndinë dhe dishepullimi ynë ndaj Jezu Krishtit prodhojnë një shqetësim të çiltër për të tjerët.” (Dejll G. Renland, “Paqja e Krishtit e Shuan Armiqësinë”, Liahona, nëntor 2021, f. 84)

Veprimtari Plotësuese të të Mësuarit

Një shembull i rrugëtimit për kthimin në besim

Merreni parasysh ta shfaqni materialin filmik “A Mighty Change: Conversion” [“Një Ndryshim i Madh: Kthimi në Besim”], (2:47) duke kërkuar atë që bëri Alehandra për t’u bërë e kthyer në besim te Zoti dhe bekimet që përjetoi ajo.

4 Nefi 1:1–18. Ndërtimi i Sionit

Kujtojuani nxënësve qytetin e Enokut dhe përse Zoti i quajti ata “Sion” (shihni te Moisiu 7:18). Pyetini ata se si i vunë re karakteristikat e përshkruara te Moisiu 7:18 midis popullit te 4 Nefi. Mund t’i ftoni gjithashtu nxënësit të lexojnë te 3 Nefi 26:19 dhe të shohin një përshkrim tjetër të këtyre njerëzve që mund të krahasohet me popullin e Enokut.

4 Nefi 1:19–49. Natyra shkatërrimtare e mëkatit

Te 4 Nefi 1:19–49, ne lexojmë rreth rënies shpirtërore të njerëzve. Për ta ilustruar këtë, merreni parasysh të paraqitni thënien nga Plaku Xhefri R. Holland, i Kuorumit të Dymbëdhjetë Apostujve: “Një proverb i vjetër thotë se një udhëtim prej një mijë milje fillon me një hap, prandaj, kujdes hapin” (Xhefri R. Holland, “Jo Më Vend për Armikun e Shpirtit Tim”, Ensign ose Liahona, maj 2010, f. 45).

Vërini nxënësit të kërkojnë te 4 Nefi 1:20–35, 38–45, duke kërkuar hapa ose veprime të ndryshme që njerëzit i ndërmorën, të cilët i çuan ata larg Jezu Krishtit dhe drejt ligësisë dhe pikëllimit.