Zotërimi Doktrinor: 3 Nefi 27:20

“Ejani tek Unë dhe Pagëzohuni … , Që Të Shenjtëroheni Nëpërmjet Marrjes së Frymës së Shenjtë.”

Në studimin tënd të kapitullit tek 3 Nefi 27, ti mësove rreth shenjtërimit që mund të përjetosh nga Fryma e Shenjtë ndërsa e jeton ungjillin e Shpëtimtarit. Ky mësim mund të të ndihmojë të mësosh përmendsh referencën e shkrimit të shenjtë dhe frazën kyç të shkrimit të shenjtë për vargun te 3 Nefi 27:20, ta shpjegosh doktrinën që jepet mësim në këtë fragment dhe t’i zbatosh parimet e marrjes së njohurisë shpirtërore në situata nga jeta reale.

Ndihma ndaj nxënësve që të zhvillojnë aftësinë për t’i diskutuar me të tjerët bindjet për ungjillin. Kuptueshmëria e nxënësve rritet kur ata ia shpjegojnë ungjillin njëri-tjetrit. Krijoni një mjedis në të cilin nxënësit ndihen të lirshëm ta tregojnë kuptueshmërinë e tyre për të vërtetat e ungjillit.

Përgatitja e nxënësve: Merreni parasysh t’i ftoni nxënësit të fillojnë ta mësojnë përmendsh referencën e shkrimit të shenjtë dhe frazën kyç të shkrimit të shenjtë për vargun te 3 Nefi 27:20: “Ejani tek unë dhe pagëzohuni … , që të shenjtëroheni nëpërmjet marrjes së Frymës së Shenjtë.”

Veprimtari të Mundshme të të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “3 Nefi 27, Pjesa 2”, që është mësimi kontekstual për fragmentin e zotërimit doktrinor tek 3 Nefi 27:20. Nëse ky mësim për fragmentin e zotërimit doktrinor duhet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Shpjego dhe mëso përmendsh

Nga studimi yt i vargut tek 3 Nefi 27:20, ti mësove të vërtetën vijuese: Nëse pendohemi, vijmë te Jezu Krishti dhe pagëzohemi, atëherë mund të shenjtërohemi duke e marrë Frymën e Shenjtë dhe qëndrojmë të panjollë para Shpëtimtarit në ditët e fundit.

Imagjinoje sikur pate një mundësi për t’ia dhënë mësim këtë të vërtetë një fëmije të vogël.

Përpara se t’i ftoni nxënësit t’i përgjigjen pyetjes vijuese me zë të lartë, merreni parasysh t’i ftoni ata ta shkruajnë përgjigjen e tyre në ditarin e tyre të studimit. Mund t’i ftoni më pas nxënësit t’ia tregojnë atë që shkruan një partneri ose një grupi të vogël.

• Si do t’ia shpjegoje këtë të vërtetë një fëmije të vogël në një mënyrë që ai ose ajo mund ta kuptojë?

Ushtroje mësimin përmendsh të frazës kyç të shkrimit të shenjtë për vargun tek 3 Nefi 27:20: “Ejani tek unë dhe pagëzohuni … , që të shenjtëroheni nëpërmjet marrjes së Frymës së Shenjtë.”

Ndaji referencën e shkrimit të shenjtë dhe frazën kyç në segmentet vijuese. Ushtroje thënien përmendsh të secilit segment disa herë. Më pas bashkoji segmentet dhe thuaje përmendsh të gjithë referencën dhe frazën kyç.

Për të shtuar larmi, mund t’u kërkoni nxënësve ose grupeve të ndryshme të nxënësve ta mësojnë përmendsh njërin prej segmenteve vijuese. Drejtohuni te një nxënës ose grup dhe vëreni atë ta thotë përmendsh segmentin që i është caktuar. Vazhdojeni këtë derisa të jetë përsëritur e gjithë referenca e shkrimit të shenjtë dhe fraza kyç. Mund t’i caktoni më pas secilit nxënës ose grup një segment të ndryshëm dhe përsëriteni këtë veprimtari.

• 3 Nefi 27:20

• Ejani tek unë

• dhe pagëzohuni

• që të shenjtëroheni

• nëpërmjet marrjes së Frymës së Shenjtë

Ushtroje vënien në zbatim

Për të të ndihmuar ta bësh përsëritjen, rendit për 30 sekonda gjithçka që mund të të kujtohet rreth njërit prej parimeve të marrjes së njohurisë shpirtërore. Më pas bëje të njëjtën gjë me dy parimet e tjera. Nëse të duhet ndihmë për t’i kujtuar parimet, mund të shohësh paragrafët 5–12 te pjesa “Marrja e Njohurisë Shpirtërore” e materialit Dokumenti Bazë i Zotërimit Doktrinor (2023).

Një mundësi tjetër për ta bërë përsëritjen e parimeve të marrjes së njohurisë shpirtërore është ta ndani klasën në tre grupe dhe t’ia caktoni secilit grup njërin nga parimet për ta përsëritur. Një nxënës nga secili grup mund të shkruajë në tabelë atë që grupi i tij ose i saj mban mend rreth parimit të caktuar.

Pasi nxënësit të kenë mbaruar së përsërituri parimin që u është caktuar, tregojani klasës skenarin vijues. Nëse dëshironi, mund ta paraqitni skenarin vijues që nxënësit të mund t’i referohen gjatë gjithë mësimit.

Ti dhe shoqja jote Jona po bëni një diskutim për ungjillin ndërkohë që po ktheheni nga shkolla. Jona pyet: “A ndien ndonjëherë ankth për takimin me Perëndinë përsëri? Unë përpiqem të bëj një jetë të drejtë dhe të pendohem kur bëj gabime, por mendimi i daljes përpara Perëndisë për t’u gjykuar më tmerron.”

Ftojini nxënësit ta diskutojnë se si mund t’i përdorin parimet e marrjes së njohurisë shpirtërore dhe doktrinën që jepet mësim te 3 Nefi 27:20 për ta ndihmuar Jonën me shqetësimin e saj.

Mund të merrni parasysh ta filloni diskutimin duke u kërkuar nxënësve të tregojnë se me cilin prej parimeve mund të fillojnë dhe se si ai parim mund të jetë i dobishëm. Më pas vazhdojeni diskutimin e parimeve të tjera të marrjes së njohurisë shpirtërore derisa ta keni diskutuar se si të tria këto parime mund të ndihmojnë për shqetësime si ato të Jonës.

Sipas nevojës, përdorini pyetjet vijuese si pjesë e diskutimit tuaj. Nuk është nevoja t’i përdorni të gjitha këto pyetje dhe mund t’i bëni ato sipas rendit që është më i dobishëm.

Shqyrtoji Konceptet dhe Pyetjet me një Këndvështrim të Përjetshëm

• Cilat mund të jenë disa supozime të rreme që Jona i ka rreth Atit Qiellor ose planit të Tij?

• Cilat janë disa të vërteta që do të doje që Jona t’i kuptonte rreth Atit Qiellor dhe planit të Tij?

Kërkoni Kuptueshmëri të Mëtejshme nëpërmjet Burimeve të Caktuara në Mënyrë Hyjnore

• Cilat janë disa mësime nga 3 Nefi 27:20 që mund të ndihmojnë në këtë situatë?

• Cilat janë disa shkrime të shenjta ose thënie të tjera nga udhëheqësit e Kishës që mund të jenë të dobishme?

Vepro me Besim

• Çfarë veprimesh mund të ndërmarrë Jona që mund ta ndihmojnë atë të ndihet më në paqe për shqetësimin e saj? Pse mendon se këto veprime mund të ndihmojnë?

Përsëritja e zotërimit doktrinor

Veprimtaria vijuese mund të përdoret në një mësim të ardhshëm për t’i ndihmuar nxënësit ta mësojnë përmendsh referencën e shkrimit të shenjtë dhe frazën kyç të shkrimit të shenjtë për vargun tek 3 Nefi 27:20. Kjo veprimtari mund të bëhet si klasë, në grupe të vogla ose në dyshe.

Ftojini nxënësit ta shkruajnë në një copë letër referencën dhe frazën kyç të shkrimit të shenjtë për vargun tek 3 Nefi 27:20 dhe thuajeni përmendsh referencën dhe frazën kyç me zë të lartë tri herë. Kërkojuni atyre t’i ndajnë fjalët veç e veç dhe t’i përziejnë ato. Më pas vërini nxënësit t’i vendosin ato sipas rendit.