3 Нифай 27, Хэсэг 2

Есүс Христээр дамжуулан ариусгагдах нь

Танд сүнслэг байдлын хувьд илүү цэвэр болохыг хүсэж байсан үе бий юү? Есүс Христ эртний Америк тив дэх шавь нартаа заахдаа Өөрийнх нь сайн мэдээг дагадаг хүмүүст ил боломжтой чухал адислалууд, тэр дундаа Ариун Сүнсээр дамжуулан ариусгагдах тухай тайлбарласан. Энэ хичээл Аврагчийн сайн мэдээгээр амьдрахын тулд хичээл зүтгэл гаргахдаа Түүний ариусгах хүчийг хэрхэн хүлээн авахыг ойлгоход тань тусална.

Суралцагчдад харьяалагдах мэдрэмжийг мэдрэхэд нь туслах. Семинар суралцагчдад аюулгүй, дэмжсэн, тэдний оруулсан хувь нэмрийг үнэлдэг орчин байх ёстой. Суралцагчидтай харилцахдаа тэднийг хайрлаж, халамжилж байгаагаа харуул. Ангийн гишүүдийг бие биеэ сонсож, үе тэнгийнхнийхээ үзэл бодлыг үнэлэхэд урамшуул.

Суралцагчийн бэлтгэл: Суралцагчдыг Судруудын удирдамжийн “Ариун Сүнс” хэсгээс эхний гурван догол мөрийг уншихад урь (scriptures.ChurchofJesusChrist.org). Ариун Сүнс тэднийг хэрхэн ариусгаж эсвэл Аврагчтай илүү адил болоход нь тусалж чадна гэж бодож байгаагаа хуваалцахад бэлтгэлтэй ирэхэд урь.

Боломжит суралцах үйл ажиллагаа

Цэвэр бус

Суралцагчдад нүглээсээ ангижрах хэрэгцээнийхээ талаар судлахад бэлдэхэд нь туслахын тулд дараах түүхийг хуваалц.

Далын ахлагч Аллэн Д.Хэйни бага насныхаа тухай дараах түүхийг хуваалцсан.

Намайг есөн настай байхад, буурал үстэй, 150 см өндөртэй ээжийн талын эмээ маань бидэнтэй хамт хэдэн долоо хоног байхаар манайд ирсэн юм. Түүнийг байх үеэр нэгэн өдөр би хоёр ахтайгаа хамт гэрийнхээ эсрэг гудамжны талбай дээр нүх ухахаар шийдэв. Бид яагаад үүнийг хийх болсноо ойлгодоггүй. Хөвгүүд зүгээр л нүх ухах дуртай байдаг шүү дээ. Бид бага зэрэг халтартсан болохоос биднийг асуудалд оруулах зүйл болоогүй байлаа. Хөрш айлын хөвгүүд нүх ухах нь сонирхолтой байгааг хараад, бидэнд тусалж эхлэв. Дараа нь бид бүгдээрээ халтар болсон байлаа. Газар хатуу байсан учраас бид зөөллөхийн тулд цэцгийн талбайн хуванцар хоолойг чирж авчран, нүхний ёроолыг бага зэрэг услав. Хэдийгээр бид халтартсан ч нүх улам гүнзгий болсон байв.

Хүүхдүүдийн нэг нь нүхээ усан сан болгох санал гаргаснаар бид нүхээ усаар дүүргэв. Би хамгийн бага нь байсан бөгөөд бусдадаа таалагдахын тулд, тийшээ үсэрч, туршиж үзэхээр болов. Үүний дараа би улам халтар болов. Би шавартай холилдох бодолгүй байсан ч, эцэст нь ийм үр дүнд хүрсэн билээ.

Сэрүүн болж эхлэхэд би гэртээ очих санаатай гудамж хөндлөн гарав. Эмээ надтай урд хаалган дээр тааралдаж, намайг гэрт орохыг зөвшөөрсөнгүй. Хэрэв намайг оруулах юм бол би түүний дөнгөж сая цэвэрлэсэн байшин дотор мөр гаргана гэж тэр хэлэв. Тиймээс би ямар ч есөн настнуудын адилаар арын хаалга руу гүйж очсон ч эмээ маань миний төсөөлснөөс илүү хурдан байлаа. Би багтартлаа уурлаж, хөлөө дэвсэлж байшиндаа орохыг хүссэн ч хаалга нээгдсэнгүй.

Би нойтон, шавартай бас даарч байсан болохоор хүүхэд насныхаа төсөөллөөр арын хашаандаа ингээд үхдэг байжээ гэж бодож билээ. Эцэст нь, би гэртээ орохын тулд юу хийх ёстойгоо эмээгээсээ асуусан юм. Юу болохыг бүрэн ойлгож амжихаас өмнө эмээ намайг арын хашаанд усаар шүршиж байлаа. Мөнх мэт санагдсан энэ үйл явдлын дараа эмээ намайг цэвэр болсон гэж хэлээд, гэрт оруулсан. Гэрт дулаахан байсан бөгөөд би хуурай, цэвэрхэн хувцас өмсөх боломжтой болсон юм. (Аллэн Д.Хэйни, “Хэнд итгэснээ санагтун,” 2015 оны 10-р сарын Ерөнхий чуулган, 117)

• Та ахлагч Хэйнигийн түүх, өөрсдийн амьдрал хоёрын хооронд ямар сүнслэг харьцуулалт хийж чадах вэ?

3 Нифай 27-д Аврагч Өөрийн сайн мэдээний талаар нифай шавь нартаа хэлсэн үгийнхээ нэг хэсэг болгон нүглийн үр дагавруудыг болон бид тэдгээрийг хэрхэн даван туулж, сүнслэг байдлын хувьд цэвэр болох талаар заасан.

3 Нифай 27:19-ийг уншаад, Аврагчийн юу заасныг олж мэд.

• Энэ шүлэг танд Есүс Христ болон Түүний Цагаатгал хэрэгтэй байгаа талаар юу зааж байна вэ?

Дараах мөрийг хуваалцах нь суралцагчдад Аврагчийн цэвэршүүлэх хүчний хувийн хэрэгцээг ойлгоход тусалж чадна.

Есүс Христ чамайг нүглийн толбоноос цэвэрлэж, ариун болоход тусалж чадна. Нүглээсээ ариусах хэрэгтэй байгаа, сүнслэг байдлын хувьд цэвэр байх нь ямар мэдрэмж төрүүлж болох ба төрүүлдэг талаар бодож үз. Та өнөөдөр суралцаж байхдаа Аврагчийн ариусгагч хүчийг амьдралдаа хэрхэн олж авч болохыг илүү сайн ойлгоход тань туслах сургаалуудыг олж мэд.

Есүс Христ бид Ариун Сүнсээр дамжуулан хэрхэн ариусгагдаж болохыг тайлбарласан байдаг

3 Нифай 27:20–22-т, Аврагч бидэнд Өөрийнх нь ариусгах хүчийг хүлээн авч, мөнх амьдралд орохын тулд юу хийж болохыг заасан. Эдгээр шүлгийг ойлгоход тань туслах дараах хүснэгтийг судлах тэмдэглэлдээ хуул.

Та мөн энэ хүснэгтийг самбар дээр хуулахыг хүсэж болох бөгөөд ингэснээр суралцагчид хичээлийн дараа ангиараа бөглөж болно.

Зарлиг	Адислал

3 Нифай 27:20–22-ыг уншаад, олж мэдсэн зүйл дээрээ үндэслэн хүснэгтийг гүйцээ.

3 Нифай 27:20 нь төгс эзэмших сургаалын хэсэг юм. Төгс эзэмших сургаалын судрын хэсгүүдийг дараа амархан олохын тулд онцгойлон тэмдэглэх талаар бодож үз. Та дараагийн хичээл дээр асуултад эсвэл нөхцөл байдалд энэ хэсэгт заасан сургаалыг хэрэгжүүлэх дадлага хийх боломжтой болно.

• Та 20-р шүлэг дэх Аврагчийн сургаалыг хэрхэн үнэний мэдэгдэл болгож, нэгтгэн дүгнэх вэ?

Бидний сурч мэдэж болох нэг үнэн бол хэрвээ бид наманчилж, баптисм хүртсэнээр Есүс Христэд ирвэл Ариун Сүнсийг хүлээн авснаар ариусгагдаж, эцсийн өдөр Түүний өмнө толбогүй зогсож чадна гэсэн үнэн юм.

Ариусгагдана гэдэг нь “Есүс Христийн цагаатгалаар нүглээс ангид, ариун, цэвэр ариун болох явц” (Судруудын удирдамж, “Ариусгал,” scriptures.ChurchofJesusChrist.org) гэсэн үг юм.

• Наманчлал, баптисм нь Есүс Христээр дамжуулан ариусгагдахад хэрхэн тусалдаг вэ?

• Баптисмын ёслолыг хүлээн авсныхаа дараа эдгээр зарлиг өөрт нь хэрхэн хамаарч болох талаар асуулттай хүнд та хэрхэн хариулж болох вэ?

Шаардлагатай бол суралцагчдад бид төгс бус учраас өдөр бүр наманчлах боломж байдаг гэдгийг ойлгоход нь тусал. Мөн бид баптисм хүртсэнийхээ дараа баптисмын гэрээгээ сахихыг үргэлж хичээх ёстой. Ариун ёслолоос үнэ цэнтэй хүртэх нь бидэнд долоо хоног бүр эдгээр гэрээг шинэчлэх боломжийг олгодог. Эдгээр бүх үйлдэл нь бидэнд сүнслэг байдлын хувьд илүү цэвэр болоход тусалдаг.

Ерөнхийлөгч Рассэлл М.Нэлсон, Боид К. Пакер нарын “Тайлбар ба нөхцөл байдлын талаарх мэдээлэл” хэсэг дээрх мэдэгдлүүдийг эдгээр ойлголтыг заахад ашиглаж болно.

Ариун Сүнсээр дамжуулан ариусгагдах

Есүс Христийн 20-р шүлэг дэх үг нь биднийг ариусгагдахад тусалдаг Түүний арга зам нь Ариун Сүнсийг хүлээн авснаар болдог гэдгийг заадаг.

Тэргүүн зөвлөлийн ерөнхийлөгч Хэнри Б.Айринг Аврагчийн Цагаатгал, Ариун Сүнсний ариусгагч нөлөө хоёрын хоорондын хамаарлын талаар заасан.

Хэрэв та өнөөдөр Ариун Сүнсний нөлөөг мэдэрсэн бол үүнийг Цагаатгал таны амьдралд үйлчилж буйн нотолгоо гэж үзэж болно. Энэ шалтгааны учир мөн бусад олон шалтгааны учир та Ариун Сүнсний өдөөлтийг урьдаг газар, ажил үүрэгт өөрийгөө байлгахын тулд илүү сайн хичээх ёстой. Ариун Сүнсний нөлөөг мэдрэх нь хоёр арга замаар илэрдэг: Ариун Сүнс зөвхөн ариун нандин Сүмд оршдог бөгөөд Ариун Сүнсийг хүлээн авах нь биднийг Есүс Христийн Цагаатгалаар дамжуулан цэвэршүүлдэг. (Henry B. Eyring, “Gifts of the Spirit for Hard Times,” Ensign, June 2007, 23)

• Та амьдралдаа Сүнсний цэвэршүүлэх нөлөөг хэрхэн анзаарсан бэ?

  Өмнөх асуултын талаар хэлэлцүүлгийн хэсэг болгон Ариун Сүнс таны сүнслэг цэвэр ариун байдлыг нэмэгдүүлэхэд хэрхэн тусалсан тухай жишээнүүдийг хуваалц. Үүнд: Ариун Сүнсний Есүс Христийг дагах таны хүслийг нэмэгдүүлсэн арга замууд эсвэл таныг Аврагчаас холдуулах зан үйлээс зайлсхийхийн тулд Ариун Сүнсний өгсөн өдөөлт багтаж болно.

• Бид Ариун Сүнсний ариусгах чадвараар тогтмол адислагдахын тулд Ариун Сүнсний байнгын хамтралыг урьж чадах зарим арга зам юу вэ?

Аврагчийн сургаалыг амьдралдаа хэрэгжүүлэх нь

Таны өнөөдөр судалсан үнэн энгийн боловч тууштай дагаж мөрдөхөд нэн чухал бөгөөд ингэснээр та Бурханы оршихуйд буцан очиход зохистой байж чадна. Сурч мэдсэн, мэдэрсэн зүйлээ амьдралдаа хэрхэн хэрэгжүүлэх талаар бодож үз. Та дараах сонголтуудын аль нэгийг эсвэл хэд хэдийг сонгож эсвэл эдгээр сургаалыг хэрэгжүүлэх өөр арга замыг сонгож болно.

Дараах сонголтуудыг үзүүлж, суралцагчдад тунгаан бодох, магадгүй үйл ажиллагааны төлөвлөгөөгөө судлах тэмдэглэлдээ бичих хангалттай хугацаа өг. Тэднийг дууссаны дараа энэ хичээл дээр ярьсан үнэнүүдийнхээ талаар гэрчил.

1. Өдөр бүр наманчлах зорилго тавьж, Аврагчийг бүрэн дүүрэн дагах шийдвэр гарга.

2. Ариун ёслолын ёслолд оролцох оролцоогоо Ням гаргийн шүтлэг бишрэлийнхээ илүү утга учиртай хэсэг болго.

3. Таны Ариун Сүнстэй харилцах харилцааг хязгаарлаж буй нүглийг эсвэл сатааруулах зүйлийг олж тодорхойл. Тэрхүү нүглийг эсвэл сатаарлыг амьдралаасаа зайлуулахын тулд шаардлагатай арга хэмжээ ав.

4. Ариун Сүнсний нөхөрлөлийг илүү их мэдрэх боломжийг танд олгох ямар нэг зүйлийг хийж эхлээрэй.

Тайлбар ба нөхцөл байдлын талаарх мэдээлэл

Өдөр бүр наманчлах нь Аврагчийн ариусгах хүчийг мэдрэхэд надад хэрхэн туслах вэ?

Ерөнхийлөгч Рассэлл М.Нэлсон ийн заасан.

Наманчлалд өдөр тутам, тогтмол анхаарлаа төвлөрүүлэхээс өөр юу ч бидний хувийн өсөлт хөгжилд нөлөөлж чадах тийм чөлөөлөгч, үлгэр жишээ болгогч, чухал зүйл гэж үгүй. Наманчлал бол нэг удаа болоод өнгөрдөг үйл явдал биш, харин үйл явц юм. Энэ нь сэтгэл санааны хувьд аз жаргал, амар амгаланг мэдрэх гол түлхүүр билээ. Наманчлал итгэлтэй нийлснээр Есүс Христийн Цагаатгалын хүчийг хүлээн авах боломжийг бидэнд нээж өгдөг. …

Их Эзэн мөнхийн өсөлт хөгжлийн энэ шатанд биднээс төгс төгөлдөр болохыг шаарддаггүй. Гэхдээ Тэр биднээс урьд урьдынхаасаа илүү цэвэр ариун байхыг шаарддаг. Өдөр тутмын наманчлал нь цэвэр ариун байдалд хүрэх зам бөгөөд цэвэр ариун байдал нь хүч чадлыг авчирдаг. (Рассэлл М.Нэлсон, “Бид илүү сайн үйлдэж, илүү сайн байж чадна,” 2019 оны 4-р сарын Ерөнхий чуулган, 77, 78)

Би баптисм хүртсэнийхээ дараа нүглээсээ хэрхэн цэвэршүүлэгдэж болох вэ?

Арван хоёр төлөөлөгчийн чуулгын ерөнхийлөгч Боид К.Пакэр (1924–2015) ийн заасан.

Ерөнхийдөө наманчлалд тулгуурласан баптисм хүртэх ёслол нь бидний нүглийг угаадаг гэдгийг бид ойлгодог. Зарим хүн хэтэрхий хурдан баптисм хүртсэн юм болов уу гэж эргэлздэг. Хэрэв тэд одоо баптисм хүртэж, цэвэрхэн эхэлсэн бол. Гэвч энэ нь чухал биш! Та ариун ёслолын ёслолоор дамжуулан баптисм хүртэхдээ хийсэн гэрээгээ шинэчилдэг. Хэчнээн хэцүү байсан ч та наманчлалын бүх нөхцөлийг хангасан үед уучлагдах ба таны алдаанууд оюун санааг тань дахин зовоохгүй. (Boyd K. Packer, “Washed Clean,” Ensign, May 1997, 10)

Аврагчийн ариусгах хүчийг мэдрэхэд Ариун Сүнс бидэнд хэрхэн тусалдаг вэ?

Далын ахлагч Кэвин Р.Дункан ийн тайлбарласан.

Ариун Сүнс бидэнд нүглийг ялан дийлж, үүнийг зөвт байдлын хайр, Бурханы зарлигуудыг дагах чадвараар солиход туслах гол үүрэг гүйцэтгэдэг.

Би олон хүний амьдралын Сүнсний ариусгагч хүчний гэрч болсон. Муу хүмүүс сайн болж, сайн хүмүүс Сүнсний цэвэршүүлэх нөлөөнд зүрх сэтгэлээ даатгаснаар агуу болохыг би харсан. Ариун Сүнс бол ариусгагч мөн.  

 

 

 

Нэмэлт суралцах үйл ажиллагаа

Хичээлийг эхлүүлэх өөр нэг хувилбар

3 Нифай 27:19-ийг уншихын өмнө, суралцагчдыг ярилцлага эсвэл уулзалт гэх мэт чухал арга хэмжээнд оролцох гэж байгаа гэж төсөөлөхөд урьж болно. Дараа нь тэд үйл явдал эхлэхээс өмнө хувцсан дээрээ ямар нэгэн зүйл асгаж, толботуулсан бол ямар мэдрэмж төрж болохыг төсөөл. Та дараа нь суралцагчдаас бидний сүнсийг цэвэр биш болоход хүргэж болох зүйлсийн талаар болон сүнслэг байдлын хувьд цэвэр бус нөхцөлд Бурханы өмнө зогсоход ямар мэдрэмж төрж болох талаар бодохыг хүс.

3 Нифай 27:27 “Тиймийн тул, та нар ямархуу маягийн хүмүүс байвал зохих билээ?

3 Нифай 27:23–33-д Аврагч арван хоёр шавьдаа заавар өгч, тэдний үүрэг хариуцлагын тухай, тэр дундаа ард түмний шүүгчийн үүргийн талаар заасан. Суралцагчдыг 3 Нифай 27:27-г уншаад, Аврагчийн шавь нартаа өгсөн тэдний амьдралд хэрэгжүүлж болох зарлигаас суралцаж болох үнэнийг эрэлхийл. Суралцагчдын тодорхойлж болох нэг үнэн нь Их Эзэн Есүс Христ шавь нартаа Өөртэй нь адил болох зарлигийг өгсөн гэсэн үнэн юм.

Суралцагчид Аврагчийн амьдралаас Түүний төгс жишээг харуулсан үйл явдлуудыг судалж, Аврагчаас дуураймаар байгаа зан чанараа хайж олох боломжтой. Тэд Түүний нэг зан чанарыг илүү бүрэн хөгжүүлэх төлөвлөгөө гаргаснаар Түүнтэй илүү адил болж чадна.