“Môrmôna 1–2: I Môrmôna mpaminany,” Boky torolalana ho an’ny mpampianatra ny Bokin’i Môrmôna (2024)
“Môrmôna 1–2,” Boky torolalana ho an’ny mpampianatra ny Bokin’i Môrmôna
Môrmôna 1–2
I Môrmôna mpaminany
Rehefa miezaka mafy manara-dia an’i Kristy ianao, dia mety ho voamarikao indraindray fa mitondra tena tsy tahaka ny olona manodidina anao ianao. Mety ho nieritreritra ianao hoe: “Ahoana no ahafahako ho matanjaka tsara ka ho afaka hanara-dia an’i Kristy rehefa toa tsy manara-dia azy ny fahitana ny hafa?” Niaina toe-javatra mitovitovy amin’izany i Môrmôna mpaminany fony izy tanora. Ity lesona ity dia afaka manampy anao hahatakatra avy amin’ny ohatra nasehon’i Môrmôna momba ny fomba fanarahana an’i Kristy na inona na inona safidìn’ny hafa atao.
Ampianaro hitady toetran’ny Mpamonjy eo amin’ny fiainan’ny hafa ny mpianatra. Ny soratra masina dia ahitana fitantarana be dia be mombana lehilahy sy vehivavy nahatoky izay naneho toetran’i Jesoa Kristy. Ampio ny mpianatra hianatra momba ny Mpamonjy amin’ny alalan’ny fandinihana ny fiainan’ireo izay miezaka maka tahaka Azy.
Fanomanana ny mpianatra: Asao ho tonga efa vonona hizara zavatra niainana tamina fotoana nisafidianan’izy ireo ny tsy hitovy amin’ny hafa mba hanarahana an’i Jesoa Kristy sy ny antony naha-zavatra mendrika ny hatao izany.
Sahanasa fianarana azo atao
Misongadina amin’ny maha-mpianatr’i Jesoa Kristy
Hevero ny hampiseho sary iray toy io izay mampiseho zavatra iray izay mazava ny tsy fitoviany amin’ny zavatra manodidina azy. Avy eo dia apetraho ireto fanontaniana manaraka ireto:
-
Inona no fampitahana azonao atao eo amin’io sary io sy ny olona iray miezaka manara-dia an’i Kristy eo amin’izao tontolo izao ankehitriny?
-
Inona avy no toe-javatra sasantsasany izay tsy maintsy isafidianan’ny zatovo amin’ny fanaovana izay mety sy ny fanarahana ny zavatra ataon’ny hafa manodidina azy ireo?
Rehefa manomboka ny fandalinanao ny fiainana sy fampianaran’i Môrmôna mpaminany ianao, dia mitadiava hevi-baovao izay afaka manampy anao hanara-dia ny Mpamonjy rehefa mety hisafidy zavatra hafa ny hafa manodidina anao.
I Môrmôna mpaminany
Hevero ny hampiseho ity sarin’i Môrmôna manaraka ity. Mangataha mpianatra manolo-tena hanazava hoe inona ireo takela-by izay novolavolainy. Raha ilaina, mizarà fampahalalana avy ao amin’ity andiam-pehezanteny manaraka ity.
Nofidin’ Andriamanitra hitahiry sy hiaro ireo rakitsoratra masin’ny olony i Môrmôna ary hampiditra ny tantarany sy zavatra niainany manokana ao amin’izany. Ny sasany amin’ireo rakitsoratra izay nosoratany, nofoheziny ary notehiriziny dia hadikan’ny Mpaminany Joseph Smith ho Bokin’i Môrmôna any aoriana.
Mba hahatonga izany handraisan’ny rehetra anjara, dia azonao atao ity manaraka ity: Asao ny mpianatra haka sary an-tsaina hoe mamorona mombamomba an-tambajotran-tserasera ho an’i Môrmôna na miomana ny hampahafantatra azy amina vondron’olona izy ireo. Miatoa kely aorian’ny andian’andininy tsirairay ary asao hampiditra zavatra iray nianaran’izy ireo ao amin’ilay mombamomba na fampahafantarana ny mpianatra.
Vakio ireto andalan-tsoratra masina manaraka ireto mba hianarana zavatra vitsivitsy momba an’i Môrmôna:
-
Inona no nanan-danja taminao tamin’ny famaritan’i Môrmôna?
Na dia tany amin’ny fahatanorany aza i Môrmôna, dia tsy maintsy nofantariny raha hanaraka ny zavatra nataon’ny maro nanodidina azy izy na vonona hiavaka amin’ny maha-mpianatr’i Jesoa Kristy azy.
Mety ho tsaroanao ny fianarana momba ny sivilizasiôna marina izay natsangana taorian’ny fitsidihan’ny Mpamonjy an’i Amerika. Nampalahelo fa taorian’ny efa ho 200 taona niainana tamim-pahamarinana, dia nanomboka niavonavona ny Nefita sy ny Lamanita. Tamin’ny farany dia lasa tena ratsy fanahy sy mpifanditra izy ireo (jereo ny 4 Nefia 1:24–49).
Vakio ny Môrmôna 1:13–14, 16; 2:18–19, hitadiavana ny famaritan’i Môrmôna ilay fiarahamonina nahalehibe azy.
-
Inona no azonao ianarana avy amin’ny ohatr’i Môrmôna?
Fahamarinana iray mety ho hitan’ny mpianatra ny hoe afaka misafidy ny hanara-dia ny Mpamonjy isika, na dia tsy manao izany aza ny hafa manodidina antsika. Mety ho azonao atao ny manoratra io fahamarinana io eny amin’ny solaitrabe.
Noho ny fahamarinan’i Môrmôna, dia nandray fitahiana mahagaga avy amin’ Andriamanitra izy, na dia tany amin’ny fahatanorany aza. Vakio ny Môrmôna 1:15, hitadiavana ny iray amin’ireo fitahiana ireo.
-
Inona avy no fomba mety hitahiana ny zatovo “[hanandrana] sy [hahafantatra] ny hatsaram-pon’i Jesoa”?
Valinteny mety hitranga amin’io fanontaniana io ny hoe voavela heloka na fiainana fahasambarana mandritra ny fotoan-tsarotra. Mety hiresaka fotoana izay nahatsapan’izy ireo ny herin’i Jesoa nanampy azy ireo hanao zavatra iray tsy tsapan’izy ireo fa nahafenoan’izy ireo fepetra na vitan’izy ireo ihany koa ny mpianatra.
-
Ahoana no nitahian’ny Ray any An-danitra anao hanaraka ny ohatr’i Jesoa Kristy na dia tsy nanao izany aza ny hafa?
Raha niomana ny hampahafantatra an’i Môrmôna ny mpianatra na nanomana mombamomba an-tamban-tsera sosialy ho azy, dia asao hizara ny zavatra nomanin’izy ireo amina vondrona kely izy ireo.
Ohatr’i Môrmôna
Ny ohatr’i Môrmôna dia afaka manampy anao hamantatra fomba manokana maromaro azonao anarahana an’i Kristy na dia tsy manao izany aza ny hafa manodidina anao. Ireto sahanasa manaraka ireto dia afaka manampy anao hampitombo ny fahatakaranao ny toetran’i Môrmôna sy hitady fomba hampiharana izany amin’ny fanarahana an’i Kristy.
Hevero ny hizara ny kilasy ho vondrona kely maromaro. Tendreo handalina ny iray amin’ireto toetra ireto ny vondrona tsirairay, ary omeo azy ireo ny taratasy zaraina mifandray amin’izany. Avy eo dia asao hanao tatitra ny zavatra nianaran’izy ireo amina vondrona iray izay nandalina toetra hafa ny mpianatra.
Sahanasa 1
Fahamatorana
Boky torolalana ho an’ny mpampianatra ny Bokin’i Môrmôna (2024)—“Môrmôna 1–2: I Môrmôna Mpaminany”
Vakio ny Môrmôna 1:2, 15, ary hevero ny hanisy marika ny teny hoe “matotra”. (Mety ho azonao raketina an-tsoratra ao amin’ny soratra masinao fa ny hoe matotra dia mety hidika hoe manaja, matotra ary mieritreritra.)
Vakio ity teny nambaran’ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo manaraka ity:
Nahita maodelin’ny fanajana fatratra sy ny tsy fanajana ao amin’ny Fiangonana isika. Raha toa ka olona maro no tokony hoderaina noho ny fanajana fatratra ananany, isika kosa dia mivily lalana amin’ny fanajana fatratra. Tena manana antony hitebitebena mafy isika. …
Mety amin’ny tanjon’ny fahavalo ny tsy fanajana amin’ny alalan’ny fanembantsembanana ilay tambazotran’ny fanambarana ao amin’ny saina sy ny fanahy. (Boyd K. Packer, “Reverence Invites Revelation,” Ensign, nôv. 1991, 22)
-
Inona avy no zavatra sasantsasany tokony hoentina am-panajana sy amim-pahamatorana ka tsy amim-panajana no itondran’ny sasany azy?
-
Inona avy no fomba sasantsasany anomezan’ny Mpamonjy ohatra amin’ny hoe matotra (manaja, sy matotra, ary mieritreritra)?
© 2023 by Intellectual Reserve, Inc. All rights reserved.
Sahanasa 2
Faingam-pandinika
Boky torolalana ho an’ny mpampianatra ny Bokin’i Môrmôna (2024)—“Môrmôna 1–2: I Môrmôna Mpaminany”
Vakio ny Môrmôna 1:2 ary hevero ny hanisy marika ny andian-teny hoe “faingam-pandinika”.
Vakio ity teny nambaran’ny Loholona David A. Bednar ao amin’ny Kôlejin’ny Apôstôly Roambinifolo manaraka ity:
Rehefa faingana amin’ny fandinihana isika dia mijery na mahatsikaritra haingana ary mankatò. Ireo singa fototra roa ireo, ny —fijerena sy fankatoavana—dia zava-dehibe mba ahafahana ho faingana amin’ny fandinihana. Ary ohatra mahatalanjona amin’ny fampiharana io fanomezam-pahasoavana io ny mpaminany Môrmôna. (David A. Bednar, “Quick to Observe,” Ensign, des. 2006, 32)
-
Inona avy no fampianarana hitanao fa manampy amin’ny fahafainganana mahita sy mankatò? Nahoana?
-
Inona no torohevitra azonao omena ny namana iray izay mahatsapa fa afaka miandry any aoriandriana kokoa eo amin’ny fiainana ny fankatoavana ny Tompo?
-
Tamin’ny fomba ahoana no nanomezan’i Jesoa Kristy ohatra amin’ny fahafainganam-pandinika?
© 2023 by Intellectual Reserve, Inc. All rights reserved.
Fanampiana sy hery hijanonana ho mahatoky
Hevero ny hizara ny mpianatra ho vondrona kely maromaro hamita ity sahanasa manaraka ity. Avy eo dia asao izy ireo hizara ny valintenin’izy ireo amin’ny iray kilasy.
Mba hanampiana anao hahita fomba hampiharana ireo toetra tahaka ny an’i Kristy eo amin’ny fiainanao manokana, dia mitanisà fanamby roa farafahakeliny atrehin’ny zatovo amin’ny fiainana eo amin’izao tontolo izao ankehitriny. Avy eo dia soraty ny fomba mety hahafahan’ny iray na izy roa amin’ireo toetra nohalalininao manampy ny zatovo handray fanampiana sy hery avy amin’ny Ray any An-danitra sy i Jesoa Kristy.
Hevero ny hizara fitahiana noraisinao tamin’ny fanarahana an’i Kristy. Avy eo dia amporisiho hanao drafitra hanaovana zavatra amin’ny zavatra nohalalinin’izy ireo sy tsapan’izy ireo androany ny mpianatra.