Môrmôna 3

“Tsy maintsy mijoro avokoa eo anoloan’ny toeram-pitsaran’i Kristy ianareo”

Efa nanontany tena ve ianao hoe mety hanao ahoana ny Fitsarana Farany? Rehefa nijery ny faharatsian’ny olony i Môrmôna, dia nampianatra momba izay hitsara antsika sy ny fomba hitsarana antsika amin’io Fitsarana Farany io. Ity lesona ity dia afaka manampy anao hijoro amim-patokisan-tena sy fifaliana eo anatrehan’i Jesoa Kristy amin’ny Fitsarana Farany.

Manasa ny mpianatra hametraka fanontaniana. Rehefa mahita lohahevitra ao amin’ny soratra masina izay mety handeha ho azy ny hananan’ny mpianatra fanontaniana momba azy ianao, dia mitadiava fahafahana hamela azy ireo haneho ireny fanontaniana ireny ao amin’ny kilasy. Asao izy ireo hikatsaka valiny mandritra ny lesona sy ao amin’ny fandalinan’izy ireo manokana.

Fanomanana ny mpianatra: Asao ho tonga efa vonona hizara ny fanontaniana ananan’izy ireo momba ny Fitsarana Farany ny mpianatra. Hevero ny hampiasa tsapan-kevitra tsy mitonona anarana mba hamelana ny mpianatra handefa ny fanontanian’izy ireo alohan’ny fotoam-pianarana. Mety ho afaka mitari-dalana anao amin’ny fanomanana lesona iray mba hamaly ny filan’izy ireo ny fanontanian’izy ireo.

Sahanasa fianarana azo atao

Ny fanadinana farany

Ny tanjon’ity sahanasa manaraka ity dia ny hanampy ny mpianatra hahafantatra ny lanjan’ny hoe vonona amin’ny Fitsarana Farany.

Alohan’ny hanombohan’ny fotoam-pianarana dia hevero ny hanomana sy hampiseho toromarika izay toa milaza fa hisy fanadinana farany na tombana tsy ampoizina mandritra ny fotoam-pianarana anio. Avy eo, hanombohana ny fotoam-pianarana, dia hevero ny hametraka fanontaniana sarotra maro toy ireto manaraka ireto amin’ny mpianatra:

1. Misy andininy firy ao amin’ny Bokin’i Môrmôna?

2. Impiry i Kristy no resahina amin’ny alalan’ny iray amin’ireo anarany na fiantsoana Azy ao amin’ny Bokin’i Môrmôna?

3. Lamanita firy no niova fo tamin’ny alalan’ny fampianaran’i Nefia sy i Lehia ao amin’ny Helamàna 5?

Eritrereto raha afaka mamaly marina tsy misy fanomanana ireo fanontaniana ireo ianao.

• Inona no mety hiova amin’ny fahatsapanao momba ilay fitsapana raha nilaza mialoha momba izany taminao ny mpampianatra anao ary nanome anao tari-dalam-panadalinana natao hanomanana anao amin’izany?

• Na dia tsy hangatahina hizara zava-misy kisendrasendra avy ao amin’ny soratra masina amin’ny Fitsarana Farany aza isika, amin’ny fomba ahoana no ahafahana mampitaha ny Fitsarana Farany amina fitsapana izay hatrehintsika rehetra indray andro any? Inona no tsy mampitovy izany amin’ny fiatrehana fitsapam-pahaizana akademika?

Fomba iray mety hahafahan’ny mpianatra mamaly ny fanontaniana teo aloha ny fanantitranterana fa ilay fitsarana dia resaka hoe lasa inona kokoa isika fa tsy dia hoe inona no fantatsika (jereo ny Dallin H. Oaks, “The Challenge to Become,” Ensign, nôv. 2000, 32–34). Asao hisaintsaina mangina ny fahatsapan’izy ireo momba ny Fitsarana Farany ny mpianatra. Ity andiam-pehezanteny manaraka ity dia azo ampiasaina hanampy amin’ny fitarihana ny eritreritr’izy ireo.

Saintsaino ny fahavononanao amin’ny Fitsarana Farany. Hainao ve ny fomba fiomanana amin’izany? Nahoana no te ho vonona amin’izany ianao?

Tia anao ny Ray any An-dantra sy i Jesoa Kristy ary nanome ny soratra masina mba hanampiana anao hahafantatra momba ilay andro sy hiomana amin’izany rehefa “hijoro eo anoloan’ny toeram-pitsaran’i Kristy” ianao (Môrmôna 3:20). Rehefa mandalina ianao, dia mitadiava fahamarinana izay afaka manampy anao ho vonona hijoro amim-patokisan-tena sy fifaliana eo anatrehan’i Jesoa Kristy amin’ny Fitsarana Farany.

Nampianatra momba ny Fitsarana Farany i Môrmôna

Tia ny Nefita i Môrmôna ary nitarika azy ireo tamina ady imbetsaka. Niangavy azy ireo hibebaka amin’ny faharatsian’izy ireo sy hitodika amin’ny Mpamonjy izy. Na izany aza, izy ireo dia nandà ny Tompo ary nirehareha tamin’ny herin’izy ireo manokana, nianiana tamina fianianana masina izay nampianarina azy ireo tsy hampiasaina mihitsy, koa nisy fotoana nandà tsy hitarika azy ireo i Môrmôna (jereo ny Môrmôna 3:10–16). Avy eo izy dia nampianatra momba ny Fitsarana Farany izay hatrehin’ny olombelona rehetra.

Hevero ny hampiseho na, raha tsy izany, hanome ny mpianatra ity tabilao manaraka ity sy hanasa azy ireo hameno izany miaraka amina namana iray na vondrona kely.

Eo amin’ny ilany havia amin’ny tabilaonao, manaova lisitry ny fanontaniana anananao momba ny Fitsarana Farany tahaka ireo ohatra nomena.

Fanontaniana momba ny Fitsarana Farany ananako	Valinteny sy hevi-baovao lalina ary fahatsapana azoko
Fanontaniana momba ny Fitsarana Farany ananako Iza no hitsara ahy?	Valinteny sy hevi-baovao lalina ary fahatsapana azoko
Fanontaniana momba ny Fitsarana Farany ananako Rahoviana no hitsarana ahy?	Valinteny sy hevi-baovao lalina ary fahatsapana azoko

Rehefa avy manao lisitra ny valintenin’izy ireo ny tsiroaroa na vondrona tsirairay, dia asao hizara ny fanontanian’izy ireo amina tsiroaroa na vondrona hafa izy ireo. Hevero ny hanasa ny mpianatra hanoratra eny amin’ny solaitrabe ny sasany amin’ny valintenin’izy ireo mba hampiasaina ao amin’ny lesona rehefa avy eo.

Vakio ny tenin’i Môrmôna ao amin’ny Môrmôna 3:18–22; 6:17–22 mba hitadiavana valiny amin’ireo fanontaniana notanisainao. Soraty eo amin’ny tsanganana havanan’ny tabilaonao ny hevi-baovao hitanao, ao anatin’izany ny toko sy andinin-tsoratra masina nahitanao ny hevi-baovao tsirairay.

Ny toeram-pitsaran’i Kristy

Fahamarinana iray ianarantsika amin’ireo andalan-tsoratra masina ireo ny hoe isika rehetra dia hijoro eo anoloan’ny toerampitsaran’i Kristy mba hotsaraina amin’ny asantsika, na tsara na ratsy izany. Hevero ny hanisy marika ny andian-teny izay mampianatra io fahamarinana io ao amin’ny Môrmôna 3:20.

• Nahoana no mety hampionona ny fahafantarana fa ny Mpamonjy no Mpitsara antsika? (Raketo an-tsoratra ao amin’ny tsanganana havanan’ny tabilaonao ny valinteninao).

Mba hahazoana fanampiana amin’ny famaliana ny fanontaniana teo aloha, dia azonao atao ny mamaky ny Almà 7:11–13, hitadiavana ny zavatra niainan’ny Mpamonjy ka ahafahany mahatakatra antsika tanteraka amin’ny Fitsarana. Azonao atao ihany koa ny mihaino teny iray nambaran’ny Filoha Dallin H. Oaks ao amin’ny Fiadidiana Voalohany ao amin’ny “Ilay drafitra lehibe” manomboka eo amin’ny kaodim-potoana 14:06 hatramin’ny 14:51 hita ao amin’ny ChurchofJesusChrist.org.

Hevero ny hihazona ny mpianatra ho tsiroaroa na vondrona kely amin’ity sahanasa manaraka ity ary hanendry ny vondrona tsirairay amin’iray amin’ireo loharanom-pahalalana hohalalinina.

Mety mbola manana fanontaniana sy ahiahy momba ny Fitsarana Farany ianao. Mitadiava valiny sy hevi-baovao hafa amin’ny alalan’ny fampiasana loharanom-pahalalana eo ambany na loharano hafa avy amin’ Andriamanitra. Soraty eo amin’ny tsanganana mifanaraka amin’izany ao amin’ny tabilaonao ny hevi-baovao hitanao.

• Teny iditry ny Torolalana ho an’ny Soratra Masina eo ambanin’ny hoe “Fitsarana Farany, ny”

• Teny iditry ny Topical Guide eo ambanin’ny “Judgment, the Last”

• Môzià 3:10; 3 Nefia 27:13–20

• Fotopampianarana sy Fanekempihavanana 45:3–5; 58:42–43; 137:9

Azo asaina ny olona iray ao amin’ny vondrona tsirairay hizara hevi-baovao avy amin’ireo loharano nohalalinin’ny vondrona mba hahafahan’ny kilasy iray manontolo mianatra amin’ny tsirairay amin’ireo loharanom-pahalalana.

Raha manana fanontaniana momba ny hoe iza no handray anjara amin’ny fitsarana antsika ny mpianatra, dia hevero ny hizara ireo toko sy andinin-tsoratra masina ao amin’ny fizaràna voalohany amin’ny fizaràna hoe Fanamarihana sy fampahalalana voarakitra.

Mety ho azonao atao ihany koa ny mihaino fampianarana hafa avy amin’ny Filoha Oaks momba ny Fitsarana Farany ao amin’ny “Divine Love in the Father’s Plan (Fitiavan’ Andriamanitra ao amin’ny Drafitry ny Ray)” manomboka eo amin’ny kaodim-potoana 1:44 hatramin’ny 3:32, na ny “Voadio amin’ny alalan’ny fibebahana” manomboka eo amin’ny kaodim-potoana 8:09 hatramin’ny 12:03, samy hita ao amin’ny ChurchofJesusChrist.org.

Asaovy mijery ireo fanontaniana izay noraketina an-tsoratra teny amin’ny solaitrabe teo aloha ny mpianatra. Hevero ny hanome markera ny mpianatra maro mba hanoratana ny valiny hitan’izy ireo eo akaikin’ireo fanontanina mifanaraka amin’izany. Avy eo dia asaovy manome ny hafa ilay markera ny mpianatra mba hanaovana toy izany. Avereno mandra-panoratry ny mpianatra vonona rehetra zavatra iray hitan’izy ireo izany. Avy eo dia asao hizara ny valintenin’izy ireo amin’ireto fanontaniana manaraka ireto ny mpianatra:

• Inona avy no fahamarinana momba ny Ray any An-danitra, sy i Jesoa Kristy, ny fibebahana, ary ny Fitsarana Farany hozarainao amin’ny olona iray izay matahotra momba ny Fitsarana Farany? Nahoana?

Ao amin’ny fizaràna hoe Fanamarihana sy fampahalalana voarakitra dia mety hisy fanambarana izay mety hanampy ny mpianatra hamaly ny fanontaniana teo aloha.

Fatokisan-tena amin’ny Andro Fitsarana

Asao hisaintsaina mangina izao manaraka izao ny mpianatra:

Eritrereto ny fahatsapanao nandritra ity fandalinana ity. Mahatsapa ho matoky tena sy faly kokoa na tsy dia matoky tena sy tsy dia faly kokoa momba ny Fitsarana Farany noho ny talohan’ity lesona ity ve ianao? Nahoana no izany no fahatsapanao? Inona no itarihan’ny Fanahy Maisna mba hataonao?

Ao amin’ny diary fandalinanao, dia manaova drafitra hanomboka hiomana an-tsitrapo kokoa amin’ny Fitsarana Farany. Saintsaino ary manapaha hevitra amina hetsika iray azonao atao mba hanampy anao hahatsapa fatokian-tena sy fifaliana kokoa eo am-piomananao hijoro eo anoloan’i Kristy. Ohatra, ny fibebahana isan’andro amin-kitsimpo dia fomba iray mahery vaika hahitana “fahasambarana sy fiadanan-tsaina”. (Jereo ny Russell M. Nelson, “Afaka manao tsaratsara kokoa sy ho lasa tsaratsara kokoa isika,” Liahona, mey 2019, 67.) Manolora tena hanaraka ny drafitrao.

Fanamarihana sy fampahalalana voarakitra

Môrmôna 3:17–22. Iza no handray anjara amin’ny fitsarana antsika?

Ny soratra masina dia mampianatra fa hisy loharano dimy farafahakeliny ao anatin’ny fitsarana antsika:

1. Ny tenantsika (jereo ny Almà 41:3–7)

2. Ny soratra masina (jereo ny 2 Nefia 25:18; 29:11; 33:14; 3 Nefia 27:25–26)

3. Ny Apôstôly (jereo ny Matio 19:27–30; 1 Nefia 12:9; 3 Nefia 27:27; Môrmôna 3:18; Fotopampianarana sy fanekempihavanana 29:12)

4. I Jesoa Kristy (jereo ny Jaona 5:22; 2 Nefia 9:41; 3 Nefia 27:14)

Nanazava ny anjara asan’ny Mpamonjy amin’ny maha-Mpitsara Azy ny Loholona Bruce R. McConkie (1915–85) tao amin’ny Kôlejin’ ny Apôstôly Roambinifolo.

Hisy antanan-toha-mpitsara izay hitsara ny marina eo ambanin’i Kristy. Izy irery ihany no hamoaka ny didy hanamelohana ny ratsy fanahy. (Bruce R. McConkie, The Millennial Messiah: The Second Coming of the Son of Man [1982], 520)

Inona no hifotoran’ny fitsarana antsika?

Nanazava toy izao ny Filoha Dallin H. Oaks ao amin’ny Fiadidiana Voalohany:

Ny Fitsarana farany dia tsy fanombatombanana ny fitambaran’ny asa tsara sy ratsy fotsiny—ny zavatra izay vitantsika. Izany dia fampahafantarana ny vokatra farany avy amin’ireo asa nataontsika sy eritreritra nananantsika—lasa inona no niafarantsika. Tsy ampy ho an’iza na iza ny manao zavatra iray fotsiny tsy am-pieritreretana. Ny didy sy ny ôrdônansy ary ny fanekempihavanana dia tsy lisitr’ireo vola takina mba harotsaka any amin’ny banky any an-danitra akory. Drafitra iray izay mampiseho antsika ny fomba hahatongavantsika amin’izay tian’ny Raintsika any An-danitra hiafarantsika ny filazantsaran’i Jesoa Kristy. (Dallin H. Oaks, “The Challenge to Become,” Liahona, nôv. 2000, 32)

Ahoana no ahafahan’ny fibebahana manomana antsika amin’ny Fitsarana Farany?

Nampianatra toy izao ny Filoha Russell M. Nelson:

Ny tena katsahantsika indrindra amin’ny fiainana dia ny miomana ny hihaona amin’ilay Mpahary antsika. Ataontsika izany amin’ny fiezahana isan’andro ny ho lasa mitovy kokoa amin’i Jesoa Kristy Mpamonjy antsika. Ary manao izany isika rehefa mibebaka isan’andro sy mandray ny heriny manadio sy manasitrana ary mampatanjaka. (Russell M. Nelson, “Hafatra fanokafana,” Liahona, mey 2020, 6)

Sahanasa fianarana fanampiny

Fomba hafa hanombohana ny lesona

Hevero ny hanasa ny mpianatra haka sary an-tsaina ny Fitsarana Farany sy fiatrehana ny Mpamonjy. Asao izy ireo hirakitra an-tsoratra ny eritreritra sy fahatsapana mety hananan’izy ireo amin’io toe-javatra io. Asao izy ireo handalina io lesona io, hitadiavana fahamarinana izay afaka manampy azy ireo hiatrika io zavatra hiseho io amim-patokian-tena sy fifaliana lehibe kokoa.

Môrmôna 2:10–15. “Alahelo teo anoloan’ny Tompo”

Raha toa ka hahasoa ny mpianatra ny fandalinana ny fahasamihafana eo amin’ny alahelo izay mitarika ho amin’ny fibebahana sy alahelo izay tsy mitarika amin’izany, dia hevero ny hanasa azy ireo hamaky ny Môrmôna 2:10–15, hitadiavana ny zavatra nanome fanantenana an’i Môrmôna amin’ny hoavin’ny olony sy ny zavatra nahatonga ny alahelony hiverina.

Ampio ny mpianatra hahita ny fahamarinana ao amin’io andalan-tsoratra masina io fa ny alahelo izay mitarika ho amina fibebahana amin-kitsimpo dia manampy antsika hahazo ny famindram-po sy fahari-pon’i Jesoa Kristy.

Asao ny mpianatra hifanakalo hevitra momba ny fomba ahafahan’ny tanora iray izay tsy faly amin’ny safidy nataony mitodika amin’ny Mpamonjy mba hahazo fanamaivanana.

Môrmôna 3:9–15. Ny fireharehana amin’ny herintsika manokana dia hahatonga antsika hanary ny herin’ Andriamanitra

Angataho hizara ny tsy mampitovy ny fatokisan-tena amin’ny fireharehana sy ny antony mety haha-zava-dehibe izany fahasamihafana izany ny mpianatra.

Angataho handalina ny Môrmôna 3:9–15 sy hitady ny vokatry ny fireharehan’ny Nefita tamin’ny herin’izy ireo manokana izy ireo.

Avy eo dia azon’ny mpianatra atao ny mizaha ny Torolalana ho an’ny Soratra Masina eo ambanin’ny hoe “Fiavonavonana”. Azon’izy ireo atao ny mitady ohatra hafa amin’ny fomba anariantsika ny herin’ Andriamanitra rehefa mirehareha amin’ny herintsika manokana isika.

Asao hitanisa toetra tahaka ny an’i Kristy vitsivitsy izay afaka manampy antsika hisoroka ny fireharehana ny mpianatra. Azon’ny mpianatra atao ny manoratra taratasy ho an’ny tenan’izy ireo amin’ny hoavy, hizaràna ny zavatra nianaran’izy ireo sy tsapan’izy ireo ka afaka manampy azy ireo hisoroka ny fiankinana sy fireharehana amin’ny herin’izy ireo manokana.

Maka sary an-tsaina Ilay Fitsarana

Rehefa avy mandalina ny Môrmôna 3, dia hevero ny hanasa ny mpianatra haka sary an-tsaina ny hoe eo amin’ny Fitsarana miaraka amin’ny Ray any An-danitra sy i Jesoa Kristy. Vakio ny Fotopampianarana sy Fanekempihavanana 45:3 ary ampahatsiahivo azy ireo ny anjara asan’ny Mpamonjy amin’ny maha mpisolo vava azy ireo Azy. Asao izy ireo haka sary an-tsaina ny Mpamonjy milaza ny teny ao amin’ny Fotopampianarana sy Fanekempihavanana 45:4–5. Iza no asain’ny Mpamonjy jeren’ny Ray any An-danitra? Nahoana?

Angataho izy ireo hizara ny fomba anomezan’ny fakana sary an-tsaina ireo andininy ireo azy ireo fatokian-tena amin’ny Fitsarana sy ny anton’izany.