Мормон 3

“Та нар бүгд Христийн шүүлтийн суудлын өмнө зогсох ёстой”

Та нар эцсийн шүүлт ямар байх талаар хэзээ нэгэн цагт бодож байсан уу? Мормон ард түмнийхээ ёс бус байдлыг хараад, биднийг хэн шүүх, энэ эцсийн шүүлтэд бид хэрхэн шүүгдэх талаар заасан. Энэ хичээл та нарт эцсийн шүүлтэд Есүс Христийн өмнө итгэл дүүрэн, баяр хөөртэй зогсохоор бэлтгэхэд тусалж чадна.

Суралцагчдыг асуулт тавихад урих. Судрууд дахь сэдвүүдийг харах явцад суралцагчдад асуултууд урган гарч ирж магадгүй тул тэдгээр асуултаа ангидаа илэрхийлэх боломж олго. Тэднийг хичээлийн туршид мөн хувийн сургалтынхаа үеэр асуултуудынхаа хариултыг эрэлхийлэхэд урь.

Суралцагчийн бэлтгэл: Суралцагчдыг эцсийн шүүлтийн талаарх асуултуудаа хуваалцах бэлтгэлтэй ирэхэд урь. Нэрээ нууцалсан санал асуулгыг ашиглан, хичээлээс өмнө асуултаа илгээх боломжийг тэдэнд олгохыг бод. Тэдний асуултууд хэрэгцээнд нь тохирох хичээл бэлтгэхэд танд тусална.

Боломжит суралцах үйл ажиллагаа

Эцсийн шалгалт

Дараах үйл ажиллагаа нь суралцагчдад эцсийн шүүлтэд бэлтгэхийн ач холбогдлыг ойлгоход туслах зорилготой.

Өнөөдрийн хичээлийн үеэр гэнэтийн эцсийн шалгалт эсвэл үнэлгээ хийнэ гэдгийг илтгэсэн зааварчилгааг бэлдэж, хичээл эхлэхээс өмнө харуулахыг бод. Дараа нь хичээлийн эхэнд тэдэнд дараах хэд хэдэн хэцүү асуултыг тавь.

1. Мормоны Ном хэдэн шүлэгтэй вэ?

2. Мормоны Номд Христийн нэр, цолыг хэдэн удаа дурдсан байдаг вэ?

3. Хиламан 5 дахь Нифай, Лихай хоёрын сургаалаар хэчнээн лемен хүн хөрвөгдсөн бэ?

Та нар эдгээр асуултад бэлтгэхгүйгээр үнэн зөв хариулж чадах эсэхээ тунгаан бод.

• Хэрэв багш тань та нарт шалгалтын талаар урьдчилж хэлээд, үүнд бэлдэх хичээлийн гарын авлагыг өгсөн бол шалгалтын талаарх та нарын мэдрэмж хэр өөр байх бол?

• Хэдий эцсийн шүүлтийн үеэр биднээс судрын талаар ямар нэгэн тоо мэдээг хуваалцахыг хүсэхгүй ч бид үүнийг нэг л өдөр бүгдээрээ өгөх сорилттой ямар байдлаар харьцуулж болох вэ? Энэ нь академик шалгалт өгөхөөс юугаараа ялгаатай байх вэ?

Өмнөх асуултад хариулах нэг арга бол шүүлт нь бидний мэддэг зүйлээс илүү бидний хэн болсон тухай дүгнэлт байх болно гэдгийг онцлох явдал юм (Dallin H. Oaks, “The Challenge to Become,” Ensign, Nov. 2000, 32–34-ийг үзнэ үү). Суралцагчдыг эцсийн шүүлтийн талаар ямар мэдрэмжтэй байгаагаа дотроо тунгаан бодоход урь. Дараах догол мөрийг тэдний бодол санааг удирдан чиглүүлэхэд ашиглаж болно.

Эцсийн шүүлтэд хэр бэлтгэлтэй байгаагаа тунгаан бод. Та нар үүнд хэрхэн бэлдэхээ мэдэх үү? Та нар яагаад үүнд бэлэн байхыг хүсэж байна вэ?

Тэнгэрлэг Эцэг, Есүс Христ хоёр танд хайртай бөгөөд таныг “Христийн шүүлтийн суудлын өмнө зогсох” (Мормон 3:20) өдрийн тухай мэдэж, үүнд бэлтгэхэд туслах судруудыг өгсөн. Судлах явцдаа, эцсийн шүүлтэд Есүс Христийн өмнө итгэл дүүрэн, баяр хөөртэй зогсохоор бэлтгэхэд туслах үнэнүүдийг олж мэд.

Мормон эцсийн шүүлтийн тухай заасан

Мормон нифайчуудад хайртай байсан ба тэднийг тулалдаанд олон удаа удирджээ. Тэрээр ёс бус үйлүүдээ наманчилж, Аврагчид хандахыг тэднээс гуйсан. Гэсэн хэдий ч тэд Их Эзэнийг үгүйсгэж, өөрсдийн хүч чадлаар бардамнан сайрхаж, хэзээ ч болохгүй гэж заасан ариун нандин зүйлээр тангарагласан тул Мормон хэсэг хугацаанд тэднийг удирдахаас татгалзжээ (Мормон 3:10–16-г үзнэ үү). Дараа нь тэрээр бүх хүн төрөлхтөнд тулгарах эцсийн шүүлтийн тухай заасан.

Суралцагчдад дараах хүснэгтийг үзүүлэх юм уу тарааж өгөөд, хамтрагчтайгаа эсвэл жижиг бүлгээрээ хамт бөглөхөд урь.

Эцсийн шүүлтийн талаарх асуултуудаа хүснэгтийнхээ зүүн хэсэгт өгөгдсөн жишээнүүд шиг жагсаа.

Эцсийн шүүлтийн талаарх миний асуултууд	Миний хүлээн авсан хариулт, ойлголт, сэтгэгдэл
Эцсийн шүүлтийн талаарх миний асуултууд Хэн намайг шүүх вэ?	Миний хүлээн авсан хариулт, ойлголт, сэтгэгдэл
Эцсийн шүүлтийн талаарх миний асуултууд Намайг хэзээ шүүх вэ?	Миний хүлээн авсан хариулт, ойлголт, сэтгэгдэл

Тэднийг хоёр хоёроороо эсвэл бүлгээрээ асуултуудаа жагсаасны дараа өөр хос эсвэл бүлэгтэй асуултаа хуваалцахад урь. Дараа нь тэднийг хичээлд ашиглах асуултуудаа самбарт жагсаахад урих талаар бодож үз.

Мормон 3:18–22; 6:17–22 дахь Мормоны үгсийг уншаад, дээр жагсаан бичсэн асуултуудынхаа хариултыг олж мэд. Олж мэдсэн зүйлээ хүснэгтийнхээ баруун баганад, тэр дундаа үүнийг олж мэдсэн судрын эшлэлүүдийг жагсаан бич.

Христийн шүүлтийн суудал

Бид бүгдээрээ Христийн шүүлтийн суудлын өмнө зогсож, сайн ч бай, муу ч бай өөрсдийн бүх үйлийн дагуу шүүгдэх болно гэсэн үнэнийг эдгээр эшлэлээс бид сурах болно. Мормон 3:20 дахь энэ үнэнийг заасан үг хэллэгүүдийг тэмдэглэхийг бодож үз.

• Аврагч бидний Шүүгч гэдгийг мэдэх нь яагаад биднийг тайтгаруулдаг вэ? (Хүснэгтийнхээ баруун баганад хариултаа бич.)

Өмнөх асуултад хариулахын тулд та нар Алма 7:11–13-ыг уншаад, Аврагчийн туулсан юу биднийг шүүлтийн үед төгс ойлгох боломжийг Түүнд олгосон талаар олж мэд. Та нар мөн ChurchofJesusChrist.org-оос Тэргүүн зөвлөлийн ерөнхийлөгч Даллин Х.Өүксийн “The Great Plan” дахь мэдэгдлийг цагийн код 14:06-аас 14:51 хүртэл үзэж болно.

Дараах үйл ажиллагаанд суралцагчдыг хоёр хоёроор нь эсвэл жижиг бүлгээр нь оролцуулж, бүлэг бүрд судлах нэг эх сурвалжийг хуваарил.

Та нарт эцсийн шүүлтийн талаарх асуулт болон санаа зовнисон зүйл байсаар байж магадгүй. Доорх эсвэл бусад бурханлаг эх сурвалжийг ашиглан нэмэлт хариулт, ойлголтыг хайж ол. Олж мэдсэн зүйлээ хүснэгтийнхээ баруун баганад бич.

• Судруудын удирдамж дахь “Эцсийн шүүлт”

• Сэдэвчилсэн удирдамжаас “Эцсийн шүүлт” гэсэн хэсэг

• Мозая 3:10; 3 Нифай 27:13–20

• Сургаал ба Гэрээ 45:3–5; 58:42–43; 137:9

Бүлэг бүрээс нэг гишүүн бүлгээрээ судалсан эх сурвалжаас олж авсан ойлголтоо хуваалцсанаар бусад суралцагчид бүх эх сурвалжаас суралцах боломж гарах болно.

Хэрэв суралцагчид бидний шүүлтэд хэн оролцох талаар асуувал Тайлбар ба нөхцөл байдлын талаарх мэдээллийн эхний хэсэгт байгаа судрын эшлэлүүдийг хуваалцахыг бод.

Мөн та нар ерөнхийлөгч Өүксийн бусад сургаалыг ChurchofJesusChrist.org дахь “Divine Love in the Father’s Plan” хэлсэн үгээс цагийн код 1:44-өөс 3:32 эсвэл “Cleansed by Repentance” хэлсэн үгээс цагийн код 8:09-өөс 12:03 хүртэл үзэж болно.

Суралцагчдыг өмнө нь самбарт тэмдэглэсэн асуултууд руу чиглүүл. Хэд хэдэн суралцагчид самбарын үзэг өгч, тохирох асуултын хажууд олсон хариултаа бичихэд урь. Дараа нь суралцагчдаас самбарын үзгийг бусдадаа дамжуулахыг хүс. Хүсэлтэй бүх суралцагчийг олсон зүйлээ бичиж дуустал ийн үргэлжлүүл. Дараа нь суралцагчдыг дараах асуултын хариултыг хуваалцахад урь.

• Та нар эцсийн шүүлтийн талаар санаа зовж буй хүнтэй Тэнгэрлэг Эцэг, Есүс Христ хоёрын тухай болон наманчлал, Эцсийн шүүлтийн талаарх ямар үнэнийг хуваалцах вэ? Яагаад?

Суралцагчдад өмнөх асуултад хариулахад тус болох мэдэгдлүүд Тайлбар ба нөхцөл байдлын талаарх мэдээлэл хэсэгт байж магадгүй.

Шүүлтийн өдөр итгэлтэй зогсох

Суралцагчдыг дараах асуултыг дотроо тунгаан бодоход урь.

Энэ хичээлийн явцад та нарт ямар мэдрэмж төрснийг бод. Энэ хичээл орсноор эцсийн шүүлтийн талаарх итгэлтэй байдал, баяр хөөр чинь нэмэгдсэн үү, буурсан уу? Та нар яагаад ингэж мэдэрч байна вэ? Ариун Сүнс та нарыг юу хийхэд өдөөж байна вэ?

Эцсийн шүүлтэд илүү зорилготой бэлдэж эхлэхийн тулд төлөвлөгөө гаргаж, судлах тэмдэглэлдээ бич. Христийн өмнө өөртөө илүү итгэлтэй, баяр хөөртэй зогсохоор бэлтгэхэд туслах нэг үйлдлийн талаар тунгаан бодож, үйлдэхээр шийд. Жишээлбэл: Өдөр бүр чин сэтгэлээсээ наманчлах нь “аз жаргал, сэтгэлийн амар амгаланг” олох хүчирхэг арга юм. (Рассэлл М.Нэлсоны “Бид илүү сайн үйлдэж, илүү сайн байж чадна” захиасыг 2019 оны 4-р сарын Ерөнхий чуулганы х. 77-оос үзнэ үү.) Төлөвлөгөөнийхөө дагуу үйлдэх амлалт өг.

Тайлбар ба нөхцөл байдлын талаарх мэдээлэл

Мормон 3:17–22. Хэн бидний шүүлтэд оролцох вэ?

Судруудад бидний шүүлтэд оролцох дор хаяж таван эх сурвалж байгаа гэж заадаг.

1. Бид өөрсдөө (Алма 41:3–7-г үзнэ үү).

2. Судрууд (2 Нифай 25:18; 29:11; 33:14; 3 Нифай 27:25–26-г үзнэ үү.)

3. Төлөөлөгчид (Матай 19:27–30; 1 Нифай 12:9; 3 Нифай 27:27; Мормон 3:18; Сургаал ба Гэрээ 29:12-ыг үзнэ үү.)

4. Есүс Христ (Иохан 5:22; 2 Нифай 9:41; 3 Нифай 27:14-ийг үзнэ үү)

Арван хоёр төлөөлөгчийн чуулгын ахлагч Брүс Р.Макконки (1915–1985) Аврагчийн шүүх үүргийг ийн тайлбарласан.

Христийн доор зөв шударга хүмүүсийг шүүх шүүгчдийн бүхэл бүтэн шатлал бүхий ёс байх болно. Зөвхөн Тэр ганцаараа ёс бус хүмүүсийг шийтгэх тогтоолуудыг гаргана. (Bruce R. McConkie, The Millennial Messiah: The Second Coming of the Son of Man [1982], 520)

Бидний шүүлт юун дээр үндэслэх вэ?

Тэргүүн зөвлөлийн ерөнхийлөгч Даллин Х.Өүкс ийн тайлбарласан.

Эцсийн шүүлт бол бидний хийсэн сайн, муу үйлийг дэнслэн, нийтэд нь үнэлэлт дүгнэлт өгөх төдий зүйл биш. Энэ нь бидний хэн болсны буюу үйлс, бодлын маань эцсийн үр дүнгийн хариу байх болно. Хүмүүсийн хувьд зүгээр урсгалаараа явах нь хангалттай биш юм. Сайн мэдээний зарлиг, ёслол, гэрээнүүд нь тэнгэр дэх хадгаламжинд хураагдаж байдаг зүйлсийн жагсаалт биш. Есүс Христийн сайн мэдээ бол Тэнгэрлэг Эцэгийн биднээс хүсдэг тийм хүмүүс болохыг бидэнд харуулдаг төлөвлөгөө юм. (Dallin H. Oaks, “The Challenge to Become,” Liahona, Nov. 2000, 32)

Наманчлал биднийг эцсийн шүүлтэд хэрхэн бэлтгэх вэ?

Ерөнхийлөгч Рассэлл М.Нэлсон ийн заасан.

Бидний амьдралын эцсийн зорилго бол Бүтээгчтэйгээ уулзахад бэлтгэх явдал билээ. Бид өдөр бүр Аврагч Есүс Христтэй илүү адилхан болохыг хичээснээр уг зорилгодоо хүрдэг. Мөн бид өдөр болгон наманчилж, Түүний хүчирхэгжүүлэгч, эдгээгч, цэвэршүүлэгч хүчийг хүлээн авснаар тэрхүү зорилгодоо хүрдэг. (Рассэлл М.Нэлсон, “Нээлтийн захиас,” 2020 оны 4-р сарын Ерөнхий чуулган, 110)

Нэмэлт суралцах үйл ажиллагаа

Хичээлийг эхлүүлэх өөр хувилбар

Суралцагчдыг эцсийн шүүлтийг болон өөрсдийгөө Аврагчийн өмнө байгаагаар төсөөлөхөд урьж болно. Ийм нөхцөлд төрөх бодол, мэдрэмжээ бичихийг тэднээс хүс. Тэднийг энэ хичээлийг судлаад, эцсийн шүүлтийг илүү итгэлтэй, баяр хөөртэйгөөр угтахад туслах үнэнүүдийг олж мэдэхэд урь.

Мормон 2:10–15. “Их Эзэний өмнөх харуусал”

Наманчлалд хүргэдэг ба наманчлалд хүргэдэггүй харууслын хоорондын ялгааг ойлгож мэдэх нь тустай гэж үзвэл Moрмон 2:10–15-ыг уншаад, юу Моронайд ард түмнийх нь ирээдүйн талаар найдвар төрүүлж, юу гуниг харууслыг буцаан авчирч байсныг олоход урь.

Чин сэтгэлээсээ наманчлахад хүргэдэг харуусал нь Есүс Христийн нигүүлсэл, тэвчээрийг олж авахад тусалдаг гэсэн үнэнийг олж мэдэхэд суралцагчдад тусал.

Суралцагчдыг сонгосон сонголтдоо сэтгэл дундуур байгаа өсвөр үеийн хүүхэд Аврагчид хандаж хэрхэн тайвширч болох талаар ярилцахад урь.

Moрмон 3:9–15. Өөрийнхөө хүчинд сагсуурах нь Бурханы хүчийг алдахад хүргэдэг.

Өөртөө итгэлтэй байх нь сагсуурахаас юугаараа ялгаатай, ялгаа нь яагаад чухал болохыг хуваалцахыг суралцагчдаас хүс.

Мормон 3:9–15-ыг судлаад, өөрсдийн хүчинд бардамнан сагсуурсан нифайчуудын төгсгөлийг олж мэдэхийг тэднээс хүс.

Суралцагчид дараа нь Сэдэвчилсэн удирдамжаас “Бардамнал” хэсгийг харж болно. Бид өөрсдийн хүч чадалд бардамнах үедээ Бурханы хүчийг хэрхэн алддаг тухай нэмэлт жишээг тэд хайж болох юм.

Бидэнд бардамнан сагсуурахаас зайлсхийхэд тусалж чадах Христийнхтэй адил хэдэн зан чанарыг жагсаахад суралцагчдыг урь. Тэд өөрсдийнхөө ирээдүйд захидал бичиж, үүндээ өөрийнхөө хүч чадалд найдаж, бардамнахаас зайлсхийхэд тусалж болох сурсан, мэдэрсэн зүйлээ хуваалцаж болно.

Шүүлтийг төсөөлөн бодох

Мормон 3-ыг судалж дуусаад, суралцагчдыг шүүлт дээр Тэнгэрлэг Эцэг, Есүс Христ хоёртой хамт байгаагаар төсөөлөхөд урь. Сургаал ба Гэрээ 45:3-ыг уншаад, тэдэнд Аврагчийн өмгөөлөх үүргийг сануул. Сургаал ба Гэрээ 45:4–5 дахь үгсийг хэлж буй Аврагчийг төсөөлөхийг тэднээс хүс. Аврагч Тэнгэрлэг Эцэгийг хэн рүү харахад урьдаг вэ? Яагаад?

Эдгээр шүлгийг төсөөлөн бодох нь тэдэнд хэрхэн шүүлтэд итгэлтэй байхад тусалж байгааг мөн яагаад гэдгийг хуваалцахыг тэднээс хүс.