Moрмон 3–6

Нифай үндэстний уналт

Та нарт хайртай хүнийхээ төлөө санаа зовж байсан үе бий юу? Мормон эргэн тойрныхоо хүмүүсийн талаар “би тэднийг удирдсан, … бүх зүрх сэтгэлээрээ хайрладаг байв” (Мормон 3:12) гэж хэлжээ. Гэсэн хэдий ч Мормон ард түмнээ Бурханд хандан тусламж хүсэхээсээ татгалзсаны улмаас устгал руу явж байгаад нь санаа зовж, гашуудаж байв. Энэ хичээл та нарт амьдралдаа Тэнгэрлэг Эцэг, Аврагч хоёрт хандахын чухлыг мэдрэхэд тусална.

Судрын чухал үйл явдлын тоймыг хэлж өг. Суралцагчид том дүр зургийг хараад, судруудын нөхцөл байдал, агуулгыг илүү сайн ойлгож чадна. Тодорхой үйл явдал дахь чухал хүн, үйл явдал болон бошиглолын сургаалуудыг онцол. Эдгээр мэдээлэл Их Эзэний сайн мэдээний талаарх ойлголтод хэрхэн нөлөөлж байгааг бодоход суралцагчдыг урамшуул.

Суралцагчийн бэлтгэл: Суралцагчдыг асуудалтай тулгарсан үедээ Бурханаас гуйгаад, тусламж хүлээн авсан үеэ эргэн санахад урь.

Боломжит суралцах үйл ажиллагаа

Та юу хийх байсан бэ?

Мюррэй Линг гэдэг хүн шөнө гүүрэн дээгүүр автомашинаа жолоодоод явж байтал урд нь явсан машин гэнэт алга болсныг харсан тухай түүхийг Далын ахлагч Спэнсэр Ж.Конди ярив. Түүний урд гүүрний томоохон хэсэг нуран унасан байлаа. Мюррэй яг зөв цагтаа тоормос гишгэн, машинаа зогсоожээ.

• Хэрэв та нар Мюррэйн нөхцөл байдалд байсан бол машинаа зогсоонгуут хамгийн түрүүнд юу хийх байсан бэ?

Мюррэйн юу хийхээр сонгосон тухай дараах түүхийг унш. Та нар ChurchofJesusChrist.org-оос “Prophets Warning” видеог цагийн код 0:00-оос 0:58 хүртэл үзэж болно.

“Мюррэй ирж буй машинуудыг ослоос сэрэмжлүүлж эхэлжээ. Сандарсандаа гараараа даллахад, нэг машин “түүнийг тойрон, ёроолгүй ангал уруу эрчээрээ давхиад орчихов” (Stephen Johnson, “Over the Edge!” Reader’s Digest, Nov. 1977, p. 128). Хоёр дахь машин ам мөлтөс зогссон ч гурав дахь машин хурдаа сааруулах янзгүй дөхөж ирснээ, гүүрний ирмэг дээр зогсож байсан Лингийн машины араас мөргөөд зогслоо.

Гэнэт дүүрэн хүнтэй автобус гараараа даллахыг нь тоолгүй, Мюррэйн өөдөөс чиглэн гарч ирэв. (Spencer J. Condie, “A Mighty Change of Heart,” Ensign, Nov. 1993, 17)

• Хэрэв чи Мюррэйн нөхцөл байдалд байгаад, хүмүүс таныг үл тоомсорловол ямар санагдах байсан бэ? Та тэднийг аврах гэж оролдохоо болих уу? Яагаад тийм? Эсвэл яагаад үгүй вэ?

Мюррэй Лингийн нэгэн адил Мормон ард түмнээ устгал руу явж байгааг харсан. Мормон нифайчуудын их цэргийн удирдагч, Бурханы бошиглогчийн хувьд тэднийг сэрэмжлүүлж, хамгаалж, Аврагчийн талаар заахаар чадах бүхнээ хийжээ. Харамсалтай нь, түүний хүмүүсийн ихэнх нь Мормоны хүчин чармайлтыг үл тоомсорлож эсвэл үгүйсгэсэн.

Мормоны хүмүүсийн дээр ирэх аюул

Бурхан нифайчуудыг Өөртэй нь тэрсэлсээр байвал юу болох талаар олон зуун жилийн турш анхааруулсаар ирсэн.

Ийм нэгэн жишээг үзэхийн тулд Хиламан 13:8–10-ыг уншаад, Мормоныг төрөхөөс 300 гаруй жилийн өмнө лемен хүн Самуелаар дамжуулан Бурханаас өгсөн бошиглолыг олж мэд. Уншиж байхдаа бошиглол хэзээ биелэхийг анзаар. (Мормоны өдрүүдэд гүйцэлдэх Бурханы бошиглол болон сэрэмжлүүлгийн жишээг 1 Нифай 12:6, 11–19 ба 3 Нифай 27:30–32-оос үзнэ үү.)

• Бурхан яагаад эдгээрийг ийм урьдаас хэлсэн гэж та нар бодож байна вэ?

Суралцагчдыг дараах хэсгүүдийг уншаад, Мормон ард түмнийхээ устгалын талаарх бошиглолуудыг мэдэж байсан ч яагаад тэдэнд туслахаар ингэж их хичээсэн тухай бодоход урь. Дараа нь тэднийг ойлгосон зүйлээ хамтрагчтайгаа хуваалцахад урь. Нифай үндэстэн устана гэдгийг Мормон мэдэж байсан ч чадах чинээгээрээ олон хүнийг аврах хүсэлтэй байсан гэсэн хариулт гарч ирж магадгүй.

• Мормон 3:1–3, 12

• Моронай 9:3–5, 18–22 (Моронай өөрийн эцэг Мормоны бичсэн захидлыг хуваалцсан.)

• Мормоны хичээл зүтгэл, хүсэл Аврагчийнхтай юугаараа ижил төстэй байгааг та нар харж байна вэ?

Бурханыг дуудах

Дараах гүйцэд бус өгүүлбэрийг самбарт бичээд, суралцагчдыг самбарын өмнө гарч, өсвөр үеийнхэнд тулгардаг нийтлэг асуудлыг хоосон зайд бичихэд урь.

• “Өнөө үеийн олон өсвөр насныханд асуудал тулгардаг.”

Нифайчууд тэмцэж байхдаа зовж шаналж байсан нэг шалтгааныг Мормон хуваалцсан. Мормон 5:2-ыг уншаад, нифайчуудын тэмцэж байхдаа юу хийгээгүйг олж мэд.

• Мормоны 2-р шүлэгт хуваалцсан зүйл өнөөгийн олон хүнд хэр хамаатай байж болох вэ?

Самбар дээрх мэдэгдлийг дараах байдлаар гүйцээ.

• “Өнөөдөр асуудалтай тулгардаг олон өсвөр үеийнхэн Бурханаас тусламж гуйлгүйгээр тэмцдэг.”

Бурхан бидний асуудал бэрхшээлийг үргэлж замаас маань зайлуулахгүй ч хэрэв биднийг Түүнд хандвал тэдгээрийг даван туулахад тусалдаг гэдгийг суралцагчдад ойлгуул. Суралцагчдыг самбар дахь асуудлуудын аль нэгтэй тулгарсан үедээ Бурханаас тусламж гуйж, даван гарахад нь Тэр хэрхэн тусалсан талаар өөрсдийн хүслээр хуваалцахад урь. Суралцагчдад ангийнхантайгаа хэт хувийн шинжтэй зүйлийг хуваалцахгүй байхыг анхааруул.

Бурханаас тусламж гуйгаагүй бэрхшээл амьдралд нь байгаа эсэхийг тунгаан бодоход суралцагчдыг урь. Тэдгээрийн аль нэгд Түүнээс тусламж эрэлхийлснээр цаашид ямар өөрчлөлт гарахыг анзаарахад урамшуул.

Нифайчуудын устгал

Энэ зургийг үзүүлээд, юу дүрсэлж байгаа талаар хуваалцахад нэг суралцагчийг урихыг бод. Шаардлагатай бол дараах догол мөр дээрх материалыг ашигла.

Мормон нифайчуудын их цэргийг олон арван жил хайрлаж, зааж, удирдсаны эцэст, леменчүүдтэй тулалдсан сүүлчийн тулаанд хүнд шархаджээ. Тэрээр гүвээний оройгоос нифай үндэстнээс юу үлдсэнийг харахаар хараа бэлчээв. Мормон, түүний хүү Моронай гээд нифайчуудаас ердөө 24 цэрэг амьд үлджээ (Мормон 6:9–15-ыг үзнэ үү).

Мормон 6-д Мормон “[өөрийн] хүмүүсийн сүүлчийн тулалдаан” (Мормон 6:6)-ыг тэмдэглэсэн байдаг. Мормон 6:7, 10–15-ыг уншаад, энэ сүүлчийн тулалдаанаар нифайчуудад юу тохиолдсоныг олж мэд.

Та тулалдааны эхэнд хэдэн нифай цугларч, дараа нь хэд үлдсэнийг олж мэдэхийг суралцагчдаас хүсэж болно. Тэд нифайчууд 23 захирагчтай, тус бүрдээ 10000 цэрэгтэй, нийтдээ 230 мянгуулаа байсныг анзаарах байх. Энэ эцсийн тулаанд нифайчуудаас ердөө 24 нь л үлдсэн.

Мормоны оронд өөрийгөө тавьж, хайртай хүмүүсээ алдсандаа гашуудаж байгаа ч хойч үедээ богино захиас үлдээх гэж байна гээд төсөөл. Та нар хожмын үеийн хүмүүсийг юуг мэдээсэй гэж хүсэх вэ?

Мормон 5:10–11, 16–18; 6:16–20-оос Мормоны сүнслэгээр өдөөгдөн бидэнд зориулж сийлсэн хэд хэдэн захиасыг харна уу. Та нар бидний үеийн хүмүүсийн хамгийн их сонсох хэрэгтэй гэж бодож буй үг хэллэгүүдийг тэмдэглэж болно.

Суралцагчдыг олсон хэллэгээ хамтрагчтайгаа хуваалцахад урьж болно. Тэдний олж тогтоох үнэнүүдийг та самбарт жагсаан бичиж болно. Хичээлийн үлдсэн хэсэгт дараах үнэнүүд дээр төвлөр. Суралцагчдын тодорхойлсон өөр өөр үнэнд анхаарлаа төвлөрүүлэх нь, танд ямар нэг сэтгэгдэл төрүүлж магадгүй.

Наманчилж, Есүс Христ рүү ирэхээр сонгосон хүмүүсийг Тэр хүлээн авахаар гараа дэлгэн зогсдог (Мормон 6:17-г үзнэ үү) гэсэн үнэнийг Мормон заасан.

Хэдэн хором нүдээ аниад, Есүсийг гараа дэлгэн, чам руу хараад зогсож байгаагаар төсөөл. Есүс таныг хүлээж авахаар гараа дэлгэн зогсож байгаа нь таны амьдралд ямар утгатай болох тухай өөрийн бодол, мэдрэмж, сэтгэгдлийг тэмдэглэлдээ бич.

Хэрэв та дараах асуултуудыг ангийнхантайгаа ярилцах гэж байгаа бол суралцагчдыг хэт хувийн шинжтэй зүйлсийг хуваалцахгүй байхад урамшуул.

• Мормоны заавруудаас аль нь чиний амьдралд хамгийн их хэрэгтэй вэ? Яагаад?

• Мормон чамаас Тэнгэрлэг Эцэг, Есүс Христ хоёрын талаар юуг ойлгоосой гэж хүссэн бэ?

• Хэрэв Мормоны бичсэн зүйлд олон хүн итгэсэн бол манай дэлхий хэр өөр байх байсан гэж та нар боддог вэ?

Тайлбар ба нөхцөл байдлын талаарх мэдээлэл

“Есүсийн мутарт [чанга] тэврэгдэж” (Мормон 5:11) гэдэг нь юу гэсэн үг вэ?

Далын ахлагч Кэнт Ф.Ричардс ийн хэлсэн.

Ирэх бүх зүйл “Есүсийн мутарт тэврэгдсэн” [Мормон 5:11] байж болно. Түүний хүч бүх бодгалийг эдгээж чадна. Бүх өвдөлтийг намдааж чадна. Түүгээр бид бодгальдаа “амралтыг олох болно” (Матай 11:29). Мөнх бус байдал дахь нөхцөл байдал маань тэр дороо өөрчлөгдөхгүй байж болох ч Түүний амар амгалан, эдгээгч гавар бидний өвчин зовлон, санаа зовнил, шаналал, айдсыг бүрхэх болно. (Кэнт Ф.Ричардс, “Цагаатгал бүх зовлонг багтаадаг,” 2011 оны 4-р сарын Ерөнхий чуулган, 16)

Мормон 6:17. “Чамайг хүлээж авахаар гараа дэлгэн” зогсож буй Есүсийн дүрээс чи юу сурч болох вэ?

Арван хоёр төлөөлөгчийн чуулгын ахлагч Нийл Л.Андэрсэн ийн хуваалцсан.

Ах, эгч нар минь ээ, Их Эзэн Есүс Христэд итгэх итгэлээ өсгөн нэмэгдүүлэх нь та нарт нэмэлт хүч чадал, илүү агуу найдварыг авчрах болно гэдгийг би амлаж байна. Зөв шударга та нарын хувьд бидний бодгалийг Эдгээгч Өөрийн цагт, Өөрийн арга замаар таны бүх шархыг эдгээх болно. Түүний тайвшрал, амар амгалан, өнө удаан үргэлжлэх найдварт хэчнээн гүн гүнзгий, хэчнээн өргөн хүрээтэй, зовуурь шаналгаатай байсан ч бүхий л шударга бус байдал, хавчлага шахалт, зовлон бэрхшээл, уйтгар гуниг, өвчин шаналал, шарх сорви бүгд багтах бөгөөд Тэрээр биднийг Өөрийнхөө оршихуйд сорвитой мутраа дэлгэн урих болно. (Нийл Л.Андэрсэн, “Шархадсан тэд,” 2018 оны 10-р сарын Ерөнхий чуулган, 81)

Арван хоёр төлөөлөгчийн чуулгын ахлагч Нийл А.Максвэлл (1926–2004) Есүс Өөрөө хаалганы сахиул бөгөөд “тэрээр нэгээхэн зарцыг тэнд үл ажиллуулдаг” (2 Нифай 9:41) гэж тайлбарлажээ. … Би та нарт Мормоны Номын өөр нэг судрын хэсэгт байдаг, “гараа дэлгэн” (Мормон 6:17) хүлээж байгаа гэсэн үгийн гол учир шалтгааныг юу гэж бодож байгаагаа чин сэтгэлийнхээ итгэл үнэмшлээр хэлье. Энэ шалтгааны улмаас Тэр тэнд байгаа! … Энэ дүрслэлийг анзаарахгүй өнгөрч боломгүй дэндүү хүчтэй. … Түүний биднийг хайрлах хайр төгс учраас Тэр биднийг гараа дэлгэн хүлээдэг (Neal A. Maxwell, “But a Few Days,” [address to Church Educational System religious educators, Sept. 10, 1982; punctuation modernized], 9–10).

Нэмэлт суралцах үйл ажиллагаа

Moрмон 5:11. “Есүсийн мутарт тэврэгдсэн”

Хэрэв суралцагчид Аврагчийн биднийг энгэртээ тэврэн авах хүсэлд анхаарлаа төвлөрүүлэх нь тустай гэж үзвэл, Түүний хэн нэгнийг тэвэрч буй дараахтай адил зургийг харуулахыг бод.

Дараа нь суралцагчдыг Мормон 5:11, Мормон 6:17-г судалж, уг зургийг дүрсэлж чадах үг хэллэгүүдийг хайж олоход урь. Суралцагчдыг олсон үг хэллэгүүдээ ямар утгатай гэж бодож байгаагаа хуваалцахад урь. (Хэрэв тустай гэж үзвэл, та “Тайлбар ба нөхцөл байдлын талаарх мэдээлэл” хэсэг дэх ахлагч Ричардс, Андэрсэн, Максвэлл нарын үгийг хуваалцаж болно.)

Видеоны сонголт

Мормон, Моронай хоёрын нифайчуудын устгалд гашуудаж буйг нүдээр харах нь суралцагчдад тустай гэж үзвэл “O Ye Fair Ones” (5:21) видеог үзүүлж болно.