Мормон 8:27–41; 9:1–6, 27–37

Бидний үед зориулан бичсэн

Хэдэн зуун жилийн өмнө амьдарч байсан ч бидний цаг үед амьдрах ямар байхыг мэддэг байсан гээд төсөөлөөд үз дээ. Моронай үүнийг мэдэж байсан ба Их Эзэн түүнд бидний үеийг харуулжээ. Моронай эцсийн өдрүүдэд давамгайлах гэм нүгэл, зан байдлыг дүрсэлсэн. Тэрээр биднийг “Их Эзэнд ханд” (Мормон 9:6) хэмээн уриад, Есүс Христийг дагахад туслах өөр нэг зөвлөгөөг өгсөн. Энэ хичээл Мормоны Ном биднийг хожмын үед Их Эзэнд хандахад туслахын тулд бичигдсэн гэдгийг ойлгоход тусална.

Түүний үгийг судлах замаар Есүс Христийг таньж мэд. Судруудыг судлах нь Есүс Христэд ойртоход бидэнд тусална. Судлах явцдаа Есүс Христийг хайж олох дадлага хийхэд нь суралцагчдад тусал. Ийн үйлдсэнээр тэд Түүнтэй харилцах харилцаагаа бэхжүүлж, сайн мэдээний адислалуудад баясах болно.

Суралцагчийн бэлтгэл: Суралцагчдыг ангид ирэхдээ Есүс Христ рүү хандахад бидэнд тусалж чадах судрыг Мормоны Номоос хуваалцах бэлтгэлтэй ирэхэд урих талаар бодож үз.

Боломжит суралцах үйл ажиллагаа

Моронай бидэнд хандаж бичсэн

Цаг хугацааны капсулыг төлөөлсөн хайрцгийг авчир.

Та нар өөрсдийгөө эрт дээр үед амьдарч байгаагаар мөн бидний үед нээгдэх цаг хугацааны капсулд зурвас бичиж хийхийг та нараас хүссэн гэж төсөөл.

Суралцагчдад дараах асуултуудын хариултыг бичих жижиг цаас өг. Суралцагчдаас цаасаа цаг хугацааны капсулд хийхийг хүс. Дараа нь цөөн хэдийг ангийнханд уншиж өг.

• Та нар өнөө цаг үед тулгардаг сорилт бэрхшээлийг удирдахад туслах ямар анхааруулга, зөвлөгөө, урмын үгийг бичих вэ?

Мормон нас барахаасаа өмнө хүү Моронайдаа алтан ялтаснуудыг даатгаж өгсөн (Мормон 8:1-ийг үзнэ үү). Моронай Их Эзэний өөрт нь бидний үеийн хүмүүст хандан юу бичихээ мэдэхэд тусалсан нэг арга замыг дүрсэлжээ. Мормон 8:34–35; 9:30-ийг уншаад, Их Эзэн Моронайг ариун нандин үүрэг даалгаварт нь хэрхэн адисалсныг олж мэд.

• Их Эзэн Моронайд юу үзүүлсэн бэ?

• Үүнээс бид ямар үнэнийг мэдэж авч болох вэ?

Бидний олж мэдсэн нэг үнэн бол Есүс Христ Мормоны Номын бошиглогчдыг бидний үеийг оюундаа тунгааж бичихэд сүнслэгээр нөлөөлсөн гэх үнэн юм.

• Мормоны Номын бошиглогчид бидний үеийг харсан гэдгийг мэдэх нь үүнийг унших арга замд маань хэрхэн нөлөөлж болох вэ?

Мормоны Номын бошиглогчдын талаар ерөнхийлөгч Эзра Тафт Бэнсоны (1899–1994) хэлсэн дараах үгсийг унш.

Хэрэв тэд өнөө үеийг харж, бидэнд агуу үнэ цэнтэй зүйлсийг сонгож бичсэн юм бол бид Мормоны Номыг судлах ёсгүй гэж үү? “Их Эзэн юуны учир үүнийг цэдэгтээ оруулахад Мормонд (эсвэл Моронайд болон Алмад) сүнслэгээр нөлөөлсөн юм бол? Энэ эрин үед амьдрахад туслах зүйлээс би ямар сургамж авч болох вэ?’ гэж бид өөрсдөөсөө байнга асууж байх ёстой.” (Ezra Taft Benson, “The Book of Mormon—Keystone of Our Religion,” Ensign, Nov. 1986, 6)

Ерөнхийлөгч Бэнсоны санал болгосонтой адил асуултуудыг тавих нь суралцагчдад Мормоны Номыг илүү утга учиртай, өөртөө илүү хамаатуулж судлахад туслах учир энэ бол судраас судлах үр дүнтэй ур чадвар юм. Суралцагчид эдгээр асуултыг тэмдэглэж аваад, өнөөдрийн мөн ирээдүйн хувийн сургалтдаа ашиглаж болно.

• Эдгээр асуултыг тавьснаар судар судлах тань хэрхэн сайжирна гэж та нар бодож байна вэ?

Ангийг хоёр хэсэг болгож хуваах юм уу суралцагчдыг хоёр, хоёроор нь болгоод, дараах хэсгүүдээс аль нэгийг уншуул. Суралцагчдыг олж мэдсэн зүйлээ Бидний цаг үе дэх сүнслэг асуудлууд гэсэн гарчгийн доор, самбарт бичихэд урь. Шаардлагатай бол суралцагчдад Моронайн дүрслэл дэх үгсийн утгыг ойлгоход нь тусал.

“Тайлбар ба нөхцөл байдлын талаарх мэдээлэл” хэсэг дэх Оскарсон эгчийн хэлсэн үг суралцагчдад эдгээр шүлгийг ойлгоход тусалж чадна.

Мормон 8:27–33-ыг эсвэл Мормон 8:36–41-ийг уншаад, Моронай бидний үеийн хүмүүсийн сүнслэг байдлыг хэрхэн дүрсэлснийг олж мэд.

• Та нар Моронайн тодорхойлсон нөхцөл байдлын алиныг нь одоогийн нийгмээс харж байна вэ?

• Эдгээр хандлага, зан үйл бидний Есүс Христэд итгэх итгэлд хэрхэн нөлөөлж чадах вэ?

Бидний үеийн сүнслэг шийдлүүд

Суралцагчдыг дараах шүлгүүдээс олж мэдсэн зүйлээ Бидний цаг үе дэх сүнслэг шийдлүүд гэсэн гарчгийн доор, самбарт бичихэд урь. Тодорхой шийдэл нь сүнслэг тодорхой асуудлуудыг даван туулахад бидэнд хэрхэн тусалж болох тухай ярилцахад нь суралцагчдад тусал. Моронай биднийг Есүс Христ рүү хэрхэн чиглүүлж байгаа талаар ярьж байгаа эсэхэд анхаар.

Дараагийн хичээлээр Мормон 9:7–26-г судлах болно.

Мормон 9:6, 27–31-ийг уншаад, бидэнд сүнслэг сөрөг нөхцөл байдлыг даван туулахад туслахын тулд Их Эзэн Моронайг юу бичихэд өдөөснийг олж мэд.

• Моронай бидэнд энэ цаг үеийн нийтлэг гэм нүгэл, зан байдлыг даван туулахад туслах юуг заасан бэ?

• Эдгээр сургаалын аль нь энэ үеийн өсвөр үеийнхэнд Есүс Христэд илүү найдахад хамгийн сайн тусалж чадах вэ?

• Дараагийн асуултыг ангиараа ярилцахад бус, хувь хувьдаа эргэцүүлэн бодоход зориулсан болно.

  Эдгээр сургаалын аль нь та нарт яг одоо хамгийн их тусалж чадна гэж бодож байна вэ? Яагаад?

Мормоны Номын сургаал

Мормоны Ном нь бидэнд Есүс Христэд итгэж, түүнд хандахад туслах зорилгоор бичигдсэн (1 Нифай 6:4; Мормон 7:5; Моронай 10:30, 32-ыг үзнэ үү).

Хэд хэдэн суралцагчийг Есүс Христэд хандахад бидэнд туслах Мормоны Номын судрын хэсгүүдийг олж, хуваалцахад урь. Тэд хичээлд бэлтгэхдээ ашигласан судрын хэсгээ хуваалцаж болно. Суралцагчид судрын эшлэлүүдийг самбарт бичих эсвэл цаасан дээр бичээд, ангийнханд тараах гэх мэт янз бүрийн аргаар хуваалцаж болно.

Суралцагчдыг уг судрын хэсгүүд яагаад тэдний хувьд утга учиртай болохыг хуваалцахад урь. Та мөн уг судрын хэсгүүд нь бидэнд Есүс Христэд итгэж, Түүнд хандахад хэрхэн тусалж болох талаар ярилцаж болно (Мормон 9:6-г үзнэ үү).

Мөн та суралцагчдыг Аврагчийн тухай судар болон захиас бүхий тэмдэглэл бичээд, цаг хугацааны капсулд хийхэд урьж болох юм. Та эдгээр зурвасыг ирээдүйд хичээл дээрээ уншиж өгч болно.

Есүс Христийн тухай гэрчлэлээ хуваалц. Суралцагчдыг ерөнхийлөгч Бэнсоны асуухад урамшуулсан асуултуудыг ашиглахад урь.

Тайлбар ба нөхцөл байдлын талаарх мэдээлэл

Мормоны Номыг хэнд зориулан бичсэн бэ?

Арван хоёр төлөөлөгчийн чуулгын ахлагч Гари Э.Стивэнсон ийн хуваалцсан.

Мормоны Ном нь та нарт зориулагдан, та бидний өдрүүдэд бичигдсэнийг ухаарч байна уу? Энэ ном бол бидний хэлдгээр цаг хугацааны бүрэн байдлын эрин үед амьдарч байгаагийн маань нэгэн адислал мөн. Хэдийгээр Мормоны Номыг сүнслэгээр нөлөөлөгдсөн эртний хүмүүс бичиж, тэдний олон нь бошиглогчид байсан боловч тэдэнд болон тэдний үед амьдарч байсан хүмүүст энэ номыг бүхлээр нь эзэмших боломж тохиогоогүй юм. Бошиглогч, санваартан, хаадын дээдлэн, хүндэтгэж, хадгалж ирсэн ариун нандин цэдгийг одоо та нар хялбархан уншиж болохоор болсон. Бүрэн бүтэн Мормоны Номыг гартаа барьж үзэх аз завшаан та нарт байгаа. Мормоны Номын бошиглогчдын нэг Моронай бидний үеийг буюу та нарын амьдрах өдрүүдийг харсан нь сонирхолтой. Олон зуун жилийн өмнө тэрээр та нарыг харсан. (Гари Э.Стивэнсон, “Номонд ханд мөн Их Эзэнд ханд,” 2016 оны 10-р сарын Ерөнхий чуулган, 33)

Моронай эцсийн өдрүүдийг хэрхэн дүрсэлсэн бэ?

Залуу эмэгтэйчүүдийн ерөнхий ерөнхийлөгч асан Бонни Л.Оскарсон ийн заасан.

Моронай дайн тулаан, дайны цуурхал, асар их жигшил зэвүүцэл, аллага, дээрэм, Бурханы мэлмийд зөв эсвэл буруу зүйл гэж байдаггүй гэж бидэнд хэлэх хүмүүс зэрэг бидний үеийг олж харснаа хэлдэг. Тэрээр бардамналаар дүүрч, үнэтэй хувцсанд шунан дурлаж, шашныг шоолон басамжилдаг хүмүүсийн тухай өгүүлсэн байдаг. Тэр “гачигдалтай, мөн нүцгэн, мөн шаналсан нь хажуугаар” [Мормон 8:39] өнгөрөхөд анзаардаггүй, дэлхийн зүйлүүдэд хэт автсан хүмүүсийг мөн харуулсан.

Moронай энэ цаг үед амьдарч байгаа бидэнд өөртөө дүгнэлт хийж болох нэгэн асуултыг тавьдаг. Тэрээр: “Яагаад та нар Христийн нэрийг өөрсөд дээрээ авахаас ичнэ вэ?” хэмээн асуусан. [Мормон 8:38]. Энэ шүүмжилсэн асуулт дэлхийд улам бүр ихсэж буй шашнаас ангид байх байдлыг маш зөв тодорхойлдог. (Бонни Л.Оскарсон, “Сионы эгч нар аа, хүч чадалтай байж, өндийн босоцгооё,” 2016 оны 10-р сарын Ерөнхий чуулган, 133–136)

Мормоны Номыг ямар хэл дээр бичсэн бэ?

Моронай еврей, шинэчлэгдсэн египет гэсэн хоёр хэл дээр бичих чадвартайгаа дурдсан. Тэр хэрэв “ялтаснууд хангалттай том байсан аваас” еврей хэл дээр бичих байсан; гэвч зай бага байсан тул цэдгийг хадгалсан хүмүүс “шинэчлэгдсэн египет” (Moрмон 9:32–33-ыг үзнэ үү) хэлийг ашигласан гэдгийг хэлжээ. Мормоны Номон дээр өмнө нь Нифай, Бенжамин хаан хоёр хоёул египет хэл мэддэг байснаа мэдэгдсэн байдаг. Нифай жижиг ялтаснуудыг сийлбэрлэх үедээ “египетчүүдийн хэл” дээр бичсэнээ тунхагладаг (1 Нифай 1:2).

Гэвч Моронай Лихайн үеэс хэдэн мянган жилийн туршид хэлэнд зарим тохируулга ашиглан, “бидний ярианы маягийн дагуу, биднээр доош дамжигдан өөрчлөгдсөн” (Moрмон 9:32) “шинэчлэгдсэн египет хэл” дээр бичсэнээ хэлдэг. Энэ нь яагаад Моронай “өөр ямар ч хүн бидний хэлийг эс мэднэ” харин Бурхан цаашид цэдгийн хөрвүүлэг, орчуулгад зориулан “нэгэн хэрэгслийг бэлтгэсэн” (Moрмон 9:34) хэмээн төгсгөснийг тайлбарлаж байна.

Нэмэлт суралцах үйл ажиллагаа

Мормон 8:33–41. Ядууст болон гачигдагсдад хэрхэн хандсанаар маань Бурхан биднээс хариуцлага нэхэх болно

Мормон 8 дахь нэмэлт зарчмыг судлах нэг аргыг доор өгөв. Суралцагчид Moрмон 8:33–41-ээс сурсан ядуус, гачигдагсдыг халамжлах үүргийнхээ талаар товч дүгнэн, нэг өгүүлбэр бичиж болох юм. Тэд Ядууст болон гачигдагсдад хэрхэн хандсанаар маань Бурхан биднээс хариуцлага нэхэх болно гэж бичиж магадгүй.

Хүмүүсийн өөр өөр төрлийн хэрэгцээний тухай, тэдгээрийг хангахад өсвөр үеийнхэн хэрхэн тусалж болох талаар ярилц. Та мөн Аврагч гачигдагсдыг хэрхэн халамжилдаг байсан талаар ярилцаж болно.

Суралцагчдаас тусламж хэрэгтэй байгаа хүнд тусалсан эсвэл хэрэгтэй үедээ тусламж авч байсан туршлагаа хуваалцахыг хүс.

Мормон 8:34–35. Бидний үед зориулан бичсэн

Мормоны Номыг хэрхэн бидний цаг үед зориулан бичсэнийг суралцагчдад ойлгуулахын тулд төгс эзэмших сургаалын судрын хэсгүүдийг ашиглах талаар бодож үз. Та тэдэнд Мормоны Номын төгс эзэмших сургаалын нэг эсвэл хэд хэдэн судрын хэсгийг хуваарилж өгөх юм уу тэднээр сонгуулж болно. Суралцагчдыг авсан хэсгээ уншаад, дараа нь “Яагаад Мормоны Номын бошиглогч үүнийг цэдэгтээ оруулсан байж болох вэ?” гэж асуухад урь. Энэ эрин үед амьдрахад надад туслах юуг би үүнээс сургамж болгон авч болох вэ?

Хэдэн суралцагчийг бодол санаагаа хуваалцахад урь.

Судруудад дүн шинжилгээ хийх арга

Дараах нь суралцагчдад Мормон 8–9 дэх бичвэрт дүн шинжилгээ хийхэд тусална.

Судрын хэсгүүдэд дүн шинжилгээ хийх нэг арга бол та нар тэдгээрийг уншихдаа өвчнийг оношилж, эмчилгээ бичиж байгаа эмч шиг байх явдал юм.

Жишээлбэл: Суралцагчид Мормон 8:27–33-ыг эсвэл Мормон 8:36–41-ийг уншихдаа эмчилгээ шаардлагатай сүнслэг өвчнийг эрж хайж болно. Дараа нь тэд Мормон 9:6, 27–29-өөс эмчилгээний аргуудыг олох боломжтой.