Мормон 9:7–27

“Гайхамшгуудын Бурхан”

Христ сохор хүнийг эдгээсэн нь

Заримдаа бид судруудаас гайхамшгуудын тухай уншихдаа өнөөдөр бидний өдрүүдэд яагаад ийм зүйлс тохиодоггүй юм бол гэж гайхаж магадгүй юм. Хожмын өдрүүдэд зарим хүнд ийм асуулт гарч ирнэ гэдгийг Моронай мэдэж байлаа. Энэ хичээл та нарт Бурханд итгэх итгэл нь хэрхэн бидний амьдралд гайхамшгуудыг үйлдэх боломжийг Түүнд олгодгийг ойлгоход тусална.

Есүс Христэд итгэх итгэлийг хөгжүүлэх. Судар судлах нь суралцагчдад Есүс Христийг таньж мэдэхэд тусалдаг. Тэднийг судалж байх явцдаа Түүнд итгэх итгэлээ хэрэгжүүлж, хөрвүүлэх зарчмуудад төвлөрөх замаар Аврагчид илүү ойртоход урамшуул.

Суралцагчийн бэлтгэл: Суралцагчдыг ахлагч Роналд А.Расбандын “Болгоогтун! Би бол гайхамшгуудын Бурхан” гэсэн үгийг унших юм уу сонсоход уриад, тэд юунд суралцаж эсвэл гайхамшгуудын талаар юуг асууж мэдмээр байгаа тухай бод. Түүний үгийг ChurchofJesusChrist.org-оос үзэх боломжтой.

Боломжит суралцах үйл ажиллагаа

Гайхамшгуудын Бурхан

Бурхан өнөөдөр хүүхдүүдийнхээ дунд гайхамшгуудыг хэрхэн үргэлжлүүлэн үйлдсээр байгаа тухай ярилцахад нь суралцагчдад туслахын тулд туршлага эсвэл жишээ хуваалцахыг бод. Та суралцагчдаас зарим хүн яагаад гайхамшгуудыг зүгээр л тохиолдлын зүйл гэж үздэг тухай бодохыг хүсэж болно.

Бид амьдралдаа тохиолдсон олон үйл явдлыг гайхамшиг гэж үзэж болно. Гэсэн хэдий ч зарим хүн үүнийг санамсаргүй тохиолдол гэж үздэг байж магадгүй. Зарим хүний санамсаргүй тохиолдол гэж андуурч болох гайхамшгуудын цөөн хэдэн жишээг бодоод үз.

• Хүмүүст гайхамшгийг санамсаргүй гэж андуурахад юу нөлөөлдөг гэж та нар бодож байна вэ?

• Өнөөдөр бидний амьдралд Бурхан гайхамшгуудыг үйлдэж байна гэдэгт итгэх нь тэр хүнд яагаад чухал вэ?

Бурхан гайхамшгуудыг үйлдэж чадна гэсэн итгэлийнхээ тухай тунгаан бод. Та судрын, бусдын эсвэл өөрийн амьдрал дахь гайхамшгуудад хэр хүчтэй итгэдэг вэ?

Моронай Бурханы гайхамшгуудыг гэрчлэв

Бидний өдрүүдийг урьдаас харсан Моронай гайхамшгууд тохиолдож болно гэдгийг үгүйсгэдэг хүмүүст хандан захиас бичжээ.

Мормон 9:7–11-ийг уншаад, Моронай Бурханы талаар юу заасныг олж мэд.

• Эдгээр шүлгийн юу нь танд онцгой санагдаж байна вэ?

• Та нар ямар ямар үнэнийг тодорхойлсон бэ?

Эдгээр үнэнийг самбар дээр бичих талаар бодож үз.

Моронайн заасан хоёр үнэн бол Бурхан өчигдөр, өнөөдөр, мөн үүрд адил ба Бурхан гайхамшгуудын Бурхан мөн юм.

• Эдгээр үнэнийг ойлгох нь Бурханд итгэх бидний итгэлд хэрхэн нөлөөлж чадах вэ?

Суралцагчдад энэ бүлэг дэх Моронайн сургаалын талаар илүү гүнзгий бодоход тусалж болох нэг арга замыг ол. Ийн үйлдэх нэг арга зам бол Моронайн сургаалыг нэгтгэн дүгнэж, жишээ болгон харуулсан товхимлыг суралцагчдаар хийлгэх явдал юм. Суралцагчид бие даан тус тусдаа эсвэл жижиг бүлгээрээ ажиллаж болно. Цаас, бичгийн хэрэгсэл, шаардлагатай зааварчилгааг тэдэнд өг. Магадгүй та гайхамшгуудыг үйлдэж буй Аврагчийн зургуудыг өгөн хайчлуулж, товхимлынх нь нүүрэнд наалгаж болно. Тэд мөн дижитал эсвэл өөрсдийн сонгосон өөр төрлийн танилцуулгыг хийж болох юм.

Эдгээр үнэнийг тайлбарласан танилцуулгыг бэлтгэснээр Моронайд захиасаа хуваалцахад нь та нар тусалж чадна гээд төсөөлөөд үз дээ.

Товхимол хийхдээ нүүр болон ар тал, дотор талын хоёр хуудас байхаар тооцоолж, цаасыг голоор нь нугал. Товхимлыг эмх цэгцтэй байлгахын тулд хуудаснуудыг дугаарлаж, нүүрэн дээр нь зураг эсвэл дүрс тавьж болно.

• 1-р хуудас (нүүр): “Бурхан бол гайхамшгийн Бурхан.”

• 2-р хуудас: “Гайхамшгуудын жишээ.”

• 3-р хуудас: “Өнөө үед тохиож буй гайхамшгууд.”

• 4-р хуудас: “Бурханыг гайхамшиг үйлдэхэд хэрхэн урих.”

Суралцах хугацаанд төрсөн бодол, мэдрэмж, сэтгэгдэл, ойлголтоо хичээлийн туршид нэмж оруул.

Гайхамшгуудын жишээ

Мормон 9:11–18-ыг уншаад, Моронайн бидэнд мэдүүлэхийг хүссэн гайхамшгуудыг олж мэд. Товхимлынхоо хоёр дахь хуудсан дээр олж мэдсэн зүйлсээ бич.

Моронайн эш татсан зарим гайхамшгийг олж мэдсэнийхээ дараа судраас өөрийн мэдэх өөр гайхамшгийг жагсаан бич.

• Эдгээр гайхамшиг нь Тэнгэрлэг Эцэг, Есүс Христ хоёрын талаар юуг ойлгоход та нарт тусалдаг вэ?

Өнөө үед тохиож буй гайхамшгууд

Мормон 9:19-ийг уншаад, одоо үе дэх гайхамшгуудын талаар Моронайн юу зааж байгааг олж мэд.

Арван хоёр төлөөлөгчийн чуулгын ахлагч Роналд А.Расбанд бид өнөө үед гайхамшгуудыг хэрхэн таних талаар ийн заасан.

Ахлагч Роналд А.Расбанд

Өнөө үед Есүс Христийн дагалдагчдын дунд, та нарын төдийгүй бидний амьдралд гайхамшгууд болон тэмдгүүд мөн ер бусын гайхалтай зүйлс дүүрэн байна. Гайхамшгууд нь Бурханы хязгааргүй хүчийн бурханлаг үйлдэл, илэрхийлэл, илрэл болдог төдийгүй Түүнийг “өчигдөр, өнөөдөр, мөн үүрд адил” гэдгийг баталж өгдөг.

Та нарын олонх нь гайхамшгуудыг харсан ч заримыг нь анзааралгүй өнгөрөөсөн байдаг. Есүсийн нас барагсдыг амилуулсантай харьцуулахад, эдгээр нь өчүүхэн мэт санагдаж болох юм. Гэхдээ гайхамшгийн цар хүрээ гайхамшгийг тодорхойлдоггүй, Бурханаас ирсэн эсэх нь үүнийг тодорхойлдог. (Роналд А.Расбанд, “Болгоогтун! Би бол гайхамшгуудын Бурхан,” Лиахона, 2021 оны 5-р сар, 109–110)

• Энэ мэдэгдэл гайхамшгийн талаар юуг ойлгоход бидэнд тусалж чадах вэ?

• Өнөө үед Бурханаас ирдэг том, жижиг ямар гайхамшиг байдаг вэ?

Товхимлынхоо “Өнөө үед тохиож буй гайхамшгууд” гэсэн гарчигтай гурав дахь хуудсанд өөрт эсвэл таньдаг хүмүүст тань тохиосон гайхамшгуудыг бич.

Суралцагчдыг өөрсдөд нь тохиолдсон гайхамшгуудаа хуваалцахад урихыг бод. Та тэднээс хэт хувийн чанартай эсвэл ариун нандин туршлагаа хуваалцахыг хүсэх ёсгүйг сана. Энэ нь санамсаргүй тохиолдол мэт жижиг гайхамшгуудаас авхуулаад өөрт тохиосон гайхамшгуудыг хуваалцах тохиромжтой цаг мөч ч байж магадгүй.

Та жишээ болгон “Sanctify Yourselves” видеог эсвэл ахлагч Роналд А.Расбандын хуваалцсан туршлагыг “By Divine Design” видеоноос цагийн код 7:16-аас 8:19 хүртэл үзүүлж болно.

Бурханыг гайхамшиг үйлдэхэд хэрхэн урих вэ?

Өнөөдөр танд хамгийн их хэрэгтэй байгаа эсвэл хүсэж байгаа гайхамшгуудынхаа талаар бод.

Moрмон 9:20–28-ыг уншаад, Бурхан биднийг гайхамшгуудаар адислахын тулд биднээс юу хийхийг хүсдэгийг олж мэд.

• Бид Бурханыг өөрсдийн амьдралд гайхамшгуудыг үйлдэхэд хэрхэн урих вэ?

Ерөнхийлөгч Рассэлл М.Нэлсоны дараах мэдэгдлийг унш эсвэл ChurchofJesusChrist.org-оос “Сүнслэг инерцийн хүч” видеог цагийн код 13:30-аас 14:05 хүртэл үзнэ үү.

Ерөнхийлөгч Рассэлл М.Нэлсон

Хэрэв та нар Түүнд “эргэлзэлгүйгээр” итгэх аваас Их Эзэн та нарыг гайхамшгуудаар адислах болно. Гайхамшгийг эрэлхийлэхийн тулд сүнслэг ажил хий. Та Бурханаас ийм итгэлийг хэрэгжүүлэхэд туслахыг залбиран гуй. Есүс Христ “эцэж ядарсанд тэнхээ өгч, чадал барагдсанд нь хүч нэмдэг” гэдгийг та бүхэн хувьдаа мэдрэх боломжтой гэдгийг би амлаж байна. (Рассэлл М.Нэлсон, “Сүнслэг инерцийн хүч,” Лиахона, 2022 оны 5-р сар, 97)

• Ерөнхийлөгч Нэлсоны үгээс юу нь та нарын анхаарлыг татсан бэ?

• Бид гайхамшгуудыг эрэлхийлэхийн тулд ямар сүнслэг ажил хийх хэрэгтэй байж болох вэ?

Суралцагчдыг хийж бүтээсэн товхимлуудаа ангийн бусад суралцагчтай хуваалцахад урихыг бод. Тэд ангийнхнаасаа сурсан зүйлээ нэмж оруулж болно. Дараа нь та дараах асуултуудын талаар ярилцаж болох юм.

• Мормон 9-ийг судалснаар та нар Аврагчийн талаар юу сурч мэдэж авсан мөн мэдэрсэн бэ?

• Түүний гайхамшгуудыг амьдралдаа урихын тулд та нар юу хийж чадах вэ?

Тайлбар ба нөхцөл байдлын талаарх мэдээлэл

Гайхамшгийн төлөө залбираад, тэр нь хэзээ ч ирэхгүй юм шиг бол яах вэ?

Арван хоёр төлөөлөгчийн чуулгын ахлагч Роналд А.Расбанд ийн хэлсэн.

Ахлагч Роналд А.Расбанд

Бидэнд хайртай хүнээ эдгээх, шударга бусыг өөрчлөх, хорон эсвэл урам нь хугарсан нэгний зүрх сэтгэлийг зөөлрүүлэхийн тулд гайхамшигт итгэж найдах үе гардаг. Бид мөнх бус нүдээр харж, Их Эзэнийг хөндлөнгөөс оролцон, эвдэрсэн зүйлийг засаасай хэмээн хүсдэг. Итгэлээр дамжуулан гайхамшиг тохиодог ч бидний цаг хугацаанд, бидний хүсэн хүлээснээр биш байж болно. Энэ нь бид итгэлгүй байна эсвэл Түүний тусламжийг авах эрхгүй гэсэн үг үү? Үгүй. Их Эзэн бидэнд хайртай. (Роналд А.Расбанд, “Болгоогтун! Би бол гайхамшгуудын Бурхан,” Лиахона, 2021 оны 5-р сар, 115)

Миний анзаараагүй ямар гайхамшгийг Аврагч өнөө үед үйлдэж байгаа вэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Ерөнхийлөгч Даллин Х.Өүкс

Бие махбодыг эдгээх, ариун сүмийг хамгаалах нь гайхамшиг, гэхдээ Түүнээс илүү агуу гайхамшиг бол Бурханы хүү эсвэл охины зүрх сэтгэлд хүчирхэг өөрчлөлт гарах юм (Мозая 5:2-ыг үзнэ үү). Зүрх сэтгэлийн өөрчлөлт, түүний дотор шинэ хандлага, зорилго, хүсэл эрмэлзэлтэй болох нь бие махбодтой холбоотой аливаа гайхамшгаас илүү агуу бөгөөд чухал билээ. (Dallin H. Oaks, “Miracles,” Ensign, June 2001, 17)

Далын ахлагч Доналд Л.Холлстром ийн гэрчилсэн.

Ахлагч Доналд Л.Холлстром

Өнөөдөр би гайхамшгуудын тухай гэрчилж байна. Бурханы хүүхэд байх нь гайхамшиг юм. Түүний дүр төрхөөр, Түүнтэй адил төстэй бүтээгдсэн бие махбодыг хүлээн авах нь гайхамшиг. Аврагчийн бэлэг бол гайхамшиг. Есүс Христийн Цагаатгал бол гайхамшиг. Мөнх амьдралыг олж авах чадавх нь гайхамшиг юм.

Бидний угсаа гарал, яс үндсээс мөн наманчилсан л бол бидний юу хийсэн, бидэнд юу тохиолдсон гэдгээс үл хамааран бидэнд эдгээр гайхамшгийг хүлээн авах эн тэнцүү боломж байдаг. (Доналд Л.Холлстром, “Гайхамшгуудын өдөр байхаа больсон гэж үү?” 2017 оны 10-р сарын Ерөнхий чуулган, 57)

Нэмэлт суралцах үйл ажиллагаа

Аврагчийн гайхамшгууд

Өнгөрсөн үеийн гайхамшгуудын талаар ярилцахдаа Аврагчийн үйлдсэн гайхамшгуудыг харуулсан видеог үзэх талаар бодож үз. Та “Finding Faith in Christ” видеог цагийн код 7:40-өөс 10:47 хүртэл үзэхийг нэг сонголтоо болгон ашиглаж болно.

Гайхамшгуудыг бичих

Магадгүй та суралцагчдыг “Гайхамшгийн тэмдэглэл”-ээс эхлэхэд урьж болох юм. Бурхан тэдний төлөө өдөр бүр юу хийснийг тунгаан бодож, тэмдэглэлдээ бичихэд тэднийг урамшуул. Жишээ болгон, “O Remember, Remember” (1:27) видеог үзэх юм уу ерөнхийлөгч Хэнри Б.Айрингийн “O Remember, Remember” хэлсэн үгийн хэсгээс үзнэ үү (Liahona, Nov. 2007, 66–69).