Mormon 8:27–41; 9:1–6, 27–37

Isinulat para sa Ating Panahon

Ipagpalagay na nabuhay ka daan-daang taon na ang nakalipas ngunit alam mo kung ano ang pakiramdam ng mabuhay sa ating panahon. Naranasan ito ni Moroni; ipinakita sa kanya ng Panginoon ang ating panahon. Inilarawan ni Moroni ang mga kasalanan at pag-uugali na magiging laganap sa mga huling araw. Inanyayahan niya tayong “bumaling … sa Panginoon” (Mormon 9:6) at nagbigay siya ng iba pang payo na tutulong sa atin na sundin si Jesucristo. Ang lesson na ito ay makatutulong sa iyo na maunawaan na ang Aklat ni Mormon ay isinulat upang tulungan tayo, sa mga huling araw, na bumaling sa Panginoon.

Kilalanin si Jesucristo sa pamamagitan ng pag-aaral ng Kanyang salita. Ang pag-aaral ng mga banal na kasulatan ay makatutulong sa atin na mas mapalapit kay Jesucristo. Tulungan ang mga estudyante na kilalanin si Jesucristo habang nag-aaral sila. Kapag ginawa nila ito, palalakasin nila ang kanilang ugnayan sa Kanya at matatamasa nila ang mga pagpapala ng ebanghelyo.

Paghahanda ng estudyante: Maaari mong anyayahan ang mga estudyante na pumasok sa klase na handang magbahagi ng isang banal na kasulatan mula sa Aklat ni Mormon na makatutulong sa atin na bumaling kay Jesucristo.

Mga Posibleng Aktibidad sa Pag-aaral

Sumulat si Moroni sa atin

Magdala ng isang kahon na kumakatawan sa isang time capsule.

Ipagpalagay na nabuhay ka noong unang panahon at hiniling sa iyong sumulat ng mensaheng ilalagay sa isang time capsule na bubuksan sa ating panahon.

Bigyan ang mga estudyante ng maliit na papel para isulat ang kanilang mga sagot sa sumusunod na tanong. Sabihin sa mga estudyante na ilagay ang kanilang mga papel sa time capsule, pagkatapos ay basahin ang ilan sa klase.

• Anong babala, payo, o panghihikayat ang ibibigay mo para tulungan ang isang tao na harapin ang mga hamon ngayon?

Bago namatay si Mormon, ipinagkatiwala niya sa kanyang anak na si Moroni ang mga laminang ginto (tingnan sa Mormon 8:1). Inilarawan ni Moroni ang isang paraan na tinulungan siya ng Panginoon na malaman kung ano ang isusulat sa mga tao sa ating panahon. Basahin ang Mormon 8:34–35; 9:30, at alamin ang mga paraan na pinagpala ng Panginoon si Moroni sa kanyang sagradong responsibilidad.

• Ano ang ipinakita ng Panginoon kay Moroni?

• Anong mga katotohanan ang matututuhan natin mula rito?

Ang isang katotohanan na natutuhan natin ay binigyang-inspirasyon ni Jesucristo ang mga propeta sa Aklat ni Mormon na magsulat na isinasaisip ang ating panahon.

• Paano maaaring makaimpluwensya sa paraan ng pagbabasa natin ng Aklat ni Mormon ang kaalamang nakita ng mga propeta sa Aklat ni Mormon ang ating panahon?

Basahin ang sumusunod na pahayag ni Pangulong Ezra Taft Benson (1899–1994) tungkol sa mga propeta sa Aklat ni Mormon:

Kung nakita nila ang ating panahon, at pinili ang mga bagay na iyon na magiging malaki ang kahalagahan sa atin, hindi ba iyon ang dapat na paraan ng pag-aaral natin ng Aklat ni Mormon? Dapat nating palaging itanong sa ating sarili, “Bakit binigyang-inspirasyon ng Panginoon si Mormon (o si Moroni o si Alma) na isama iyon sa kanyang talaan? Anong aral ang matututuhan ko mula roon na tutulong sa akin na mamuhay sa panahong ito?” (Ezra Taft Benson, “The Book of Mormon—Keystone of Our Religion,” Ensign, Nob. 1986, 6)

Ang pagtatanong ng tulad ng mga iminungkahi ni Pangulong Benson ay isang epektibong kasanayan sa pag-aaral ng mga banal na kasulatan na makatutulong sa mga estudyante na makahanap ng higit na kahulugan at kaugnayan sa kanilang pag-aaral ng Aklat ni Mormon. Maaaring isulat ng mga estudyante ang mga tanong na ito upang magamit nila sa kanilang pag-aaral ngayon at sa kanilang personal na pag-aaral sa hinaharap.

• Sa iyong palagay, paano mapahuhusay ang pag-aaral mo ng mga banal na kasulatan ng pagtatanong ng mga ito?

Maaari mong hatiin ang klase o pagpartner-partnerin ang mga estudyante, na ang bawat isa ay magbabasa ng isa sa mga sumusunod na passage. Sabihin sa mga estudyante na isulat sa pisara ang nalaman nila sa ilalim ng heading na tulad ng Mga Espirituwal na Problema sa Ating Panahon. Kung kinakailangan, tulungan ang mga estudyante na maunawaan ang kahulugan ng mga salita sa mga paglalarawan ni Moroni.

Ang pahayag ni Sister Oscarson sa bahaging “Komentaryo at Impormasyon ng Konteksto” ay makatutulong sa mga estudyante na maunawaan ang mga talatang ito.

Basahin ang Mormon 8:27–33 o Mormon 8:36–41, at alamin kung paano inilarawan ni Moroni ang espirituwal na kalagayan ng mga tao sa ating panahon.

• Alin sa mga kalagayang inilarawan ni Moroni ang nakikita mo sa ating lipunan?

• Paano nakakaapekto ang mga pag-uugali at gawing ito sa ating paniniwala kay Jesucristo?

Mga espirituwal na solusyon sa ating panahon

Sabihin sa mga estudyante na isulat sa pisara ang nalaman nila sa mga sumusunod na talata sa ilalim ng heading na tulad ng Mga Espirituwal na Solusyon sa Ating Panahon. Tulungan ang mga estudyante na talakayin kung paano makatutulong sa atin ang partikular na mga solusyon na madaig ang partikular na mga espirituwal na problema. Tiyaking tatalakayin ng mga estudyante kung paano tayo itinuturo ni Moroni kay Jesucristo.

Ang Mormon 9:7–26 ay pag-aaralan sa susunod na lesson.

Basahin ang Mormon 9:6, 27–31, at alamin ang isinulat ni Moroni na binigyang-inspirasyon ng Panginoon para tulungan tayong madaig ang mga negatibong espirituwal na kalagayan.

• Ano ang itinuro ni Moroni na makatutulong sa atin na madaig ang mga kasalanan at pag-uugali na karaniwan sa ating panahon?

• Alin sa mga turong ito ang pinakamahusay na makatutulong sa mga kabataan ng henerasyong ito na mas umasa kay Jesucristo?

• Ang susunod na tanong ay para sa personal na pagninilay-nilay, hindi para talakayin sa klase.

  Sa palagay mo, alin sa mga turong ito ang makatutulong sa iyo nang lubos ngayon? Bakit?

Mga turo sa Aklat ni Mormon

Ang Aklat ni Mormon ay isinulat upang tulungan tayong maniwala at bumaling kay Jesucristo (tingnan sa 1 Nephi 6:4; Mormon 7:5; Moroni 10:30, 32).

Anyayahan ang maraming estudyante na maghanap at magbahagi ng mga passage sa Aklat ni Mormon na makatutulong sa atin na bumaling kay Jesucristo. Maaaring gamitin ng mga estudyante ang paghahanda nila para sa klase. Maaaring magbahagi ang mga estudyante sa iba’t ibang paraan—halimbawa, sa pamamagitan ng pagsusulat ng mga scripture reference sa pisara o sa isang papel na ipinasa sa buong klase.

Sabihin sa mga estudyante na ibahagi kung bakit makabuluhan sa kanila ang mga passage. Maaari mo ring talakayin kung paano makatutulong sa atin ang mga passage na maniwala kay Jesucristo at bumaling sa Kanya (tingnan sa Mormon 9:6).

Maaari mo ring anyayahan ang mga estudyante na maglagay ng isang maikling sulat sa time capsule na may banal na kasulatan at mensahe tungkol sa Tagapagligtas. Maaari mong basahin ang mga mensaheng ito sa isang sesyon ng klase sa hinaharap.

Ibahagi ang iyong patotoo tungkol kay Jesucristo. Sabihin sa mga estudyante na itanong ang mga bagay na sinabi ni Pangulong Benson na itanong natin.

Komentaryo at Impormasyon ng Konteksto

Para kanino isinulat ang Aklat ni Mormon?

Ibinahagi ni Elder Gary E. Stevenson ng Korum ng Labindalawang Apostol:

Alam ba ninyo na ang Aklat ni Mormon ay isinulat para sa inyo—at para sa inyong panahon? Ang aklat na ito ay isa sa mga pagpapala ng mabuhay sa tinatawag nating dispensasyon ng kaganapan ng mga panahon. Bagama’t ang Aklat ni Mormon ay isinulat ng inspiradong sinaunang mga awtor—na karamihan ay mga propeta—sila at ang mga tao sa kanilang panahon ay hindi nagkaroon ng buong aklat na ito. Ngayo’y abot-kamay na ninyo ang sagradong talaang pinakaingatan, tinanggap, at pinangalagaan ng mga propeta, saserdote, at hari! Pribilehiyo ninyong mahawakan ang buong Aklat ni Mormon. Ang nakakatuwa, nakita ng isa sa mga propeta sa Aklat ni Mormon, si Moroni, ang ating panahon—ang inyong panahon. Nakita pa nga niya kayo, sa pangitain, daan-daang taon na ang nakararaan! (Gary E. Stevenson, “Basahin ang Aklat, Umasa sa Panginoon,” Liahona, Nob. 2016, 46)

Paano inilarawan ni Moroni ang mga huling araw?

Itinuro ni Sister Bonnie L. Oscarson, dating Young Women General President:

Sinabi ni Moroni na nakita niya ang ating panahon, at kasama roon ang mga digmaan at mga balita tungkol sa digmaan, polusyon, patayan, nakawan, at mga taong nagsasabi sa atin na walang tama o mali sa mata ng Diyos. Inilarawan niya ang mga taong palalo, na ang inaalala ay ang isusuot na mamahaling damit, at pinagtatawanan ang relihiyon. Ipinakita sa kanya ang mga taong nahuhumaling sa mga makamundong bagay kaya “ang mga nangangailangan, at ang hubad, at ang may karamdaman at ang naghihirap na dumaraan” [Mormon 8:39] ay hindi napapansin.

Malalim ang tanong ni Moroni sa atin—tayo na nabubuhay sa mga panahong ito. Sabi niya, “Bakit kayo nahihiyang taglayin sa inyong sarili ang pangalan ni Cristo?” [Mormon 8:38]. Tumpak na inilalarawan ng paratang na ito ang lumalalang sekular na kalagayan ng ating mundo. (Bonnie L. Oscarson, “Tumanggap ng Responsibilidad nang May Lakas, Kababaihan ng Sion,” Liahona, Nob. 2016, 12)

Sa anong wika isinulat ang Aklat ni Mormon?

Ipinahayag ni Moroni na may kakayahan siyang makapagsulat sa kahit dalawang wika: Hebreo at ang binagong wikang Egipto. Sinabi niya na kung ang “mga lamina ay naging sapat ang laki,” isinulat niya sana ito sa wikang Hebreo; gayunman, ang mga nag-ingat ng talaan ay gumamit ng “binagong wikang Egipto” dahil sa kakulangan ng espasyong pagsusulatan (Mormon 9:32–33). Sa unang bahagi ng Aklat ni Mormon, kapwa sinabi nina Nephi at Haring Benjamin na wikang Egipto ang gamit nila. Sinabi ni Nephi na nagsulat siya sa “wika ng mga taga-Egipto” nang inukit niya ang maliliit na lamina (1 Nephi 1:2).

Gayunpaman, sinabi ni Moroni na sumulat siya gamit ang “binagong wikang Egipto” na “ipinasa at … binago, alinsunod sa paraan ng [kanilang] pagsasalita” (Mormon 9:32), na ipinahihiwatig na nagkaroon ng ilang pag-aakma sa paggamit ng wika sa nakalipas na libu-libong taon simula noong panahon ni Lehi. Maaaring ipinaliliwanag nito kung bakit nagtapos si Moroni sa pagsasabing “walang ibang taong nakaaalam ng aming wika” ngunit ang Diyos ay “naghanda ng mga paraan” para sa pagpapaliwanag at pagsasalin ng talaan (Mormon 9:34).

Mga Karagdagang Aktibidad sa Pag-aaral

Mormon 8:33–41. Pananagutin tayo ng Diyos sa paraan ng pagtrato natin sa mga maralita at nangangailangan

Narito ang isang paraan para pag-aralan ang isang karagdagang alituntunin sa Mormon 8. Maaaring sumulat ang mga estudyante ng isang pangungusap para ibuod ang natutuhan nila sa Mormon 8:33–41 tungkol sa ating responsibilidad na pangalagaan ang mga maralita at nangangailangan. Maaaring matukoy ng mga estudyante na pananagutin tayo ng Diyos sa paraan ng pagtrato natin sa mga maralita at nangangailangan.

Talakayin ang iba’t ibang uri ng mga pangangailangan ng mga tao at kung paano makatutulong ang mga tinedyer na matugunan ang mga pangangailangang iyon. Maaari mo ring talakayin kung paano nagmamalasakit ang Tagapagligtas sa mga nangangailangan.

Sabihin sa mga estudyante na magbahagi ng mga karanasan na natulungan nila ang isang taong nangangailangan o tinulungan sila sa oras ng pangangailangan.

Mormon 8:34–35. Isinulat para sa ating panahon

Maaari mong gamitin ang mga doctrinal mastery scripture passage para matulungan ang mga estudyante na makita kung paano isinulat ang Aklat ni Mormon para sa ating panahon. Maaaring magtalaga sa mga estudyante o maaari silang pumili ng isa o mahigit pang doctrinal mastery passage sa Aklat ni Mormon. Sabihin sa mga estudyante na basahin ang passage at itanong: Bakit iyon isinama ng isang propeta sa Aklat ni Mormon sa kanyang talaan? Anong aral ang matututuhan ko mula roon para matulungan akong mamuhay sa panahong ito?

Sabihin sa maraming estudyante na ibahagi ang kanilang mga naisip.

Isang paraan para masuri ang mga banal na kasulatan

Ang sumusunod ay makatutulong sa mga estudyante na masuri ang teksto sa Mormon 8–9.

Ang isang paraan para masuri ang ilang scripture passage ay basahin ang mga ito na para bang ikaw ay isang doktor na nagsusuri ng sakit at nagrereseta ng gamot.

Halimbawa, kapag binasa ng mga estudyante ang Mormon 8:27–33 o Mormon 8:36–41, maaari nilang hanapin ang mga espirituwal na karamdaman na kailangang gamutin. Pagkatapos ay maaari silang maghanap ng mga lunas sa Mormon 9:6, 27–29.