Eter 1

“Magsumamo sa Panginoon”

Paano nagbabago ang pakikipag-ugnayan mo sa Panginoon kapag nahaharap ka sa mga pagsubok? Nang tangkain ng masasamang tao na magtayo ng isang tore upang makarating sa langit, ginulo ng Panginoon ang kanilang wika upang hindi nila maunawaan ang isa’t isa (tingnan sa Genesis 11:1–9). Ang kapatid ni Jared ay nagsumamo sa Panginoon, nagsumamo siya na iligtas Niya ang kanyang pamilya at mga kaibigan sa kalituhang ito (tingnan sa Eter 1:34–37). Sinagot ng Panginoon ang kanyang taimtim na mga panalangin nang may habag at awa. Ang lesson na ito ay naglalayong bigyan ka ng inspirasyon na manalangin nang mas taimtim at palagian.

Pagtuturo ng mga pangunahing konsepto. Maaaring madalas marinig ng mga estudyante ang tungkol sa mga pangunahing konsepto sa ebanghelyo ni Jesucristo (tulad ng panalangin). Ang pagtulong sa mga estudyante na makita kung paano mapagpapala ng mga pangunahing konseptong ito ang kanilang buhay ay makatutulong sa kanila na patuloy na pag-aralan ang mga lesson kung saan itinuturo ang mga pangunahing konseptong ito.

Paghahanda ng estudyante: Sabihin sa mga estudyante na basahin ang Eter 1:34–37 at markahan ang pariralang “magsumamo sa Panginoon.” Sabihin sa kanila na pumasok sa klase na handang ibahagi kung ano ang kahulugan ng pariralang ito para sa kanila at kung paano ito maaaring naiiba sa mga paraan kung paano tayo nagdarasal kung minsan.

Mga Posibleng Aktibidad sa Pag-aaral

Tapat at palagiang pagkilos

Maaari mong ipakita o isulat sa pisara ang mga sumusunod na pahayag na may mga patlang na pupunan. Sabihin sa mga estudyante na magpartner-partner o bumuo ng maliliit na grupo at ibahagi kung paano nila maaaring punan ang mga patlang.

Mag-isip ng isang bagay na mabuting gawin, tulad ng pag-aaral, pag-eehersisyo, o paglilingkod sa iba. Gamitin ang gawaing iyon sa mga sumusunod na pahayag, at kumpletuhin ang mga parirala sa angkop na paraan.

• Kung ang isang tao ay (gawain) paminsan-minsan, .

• Kung ang isang tao ay (gawain) nang taimtim at palagian sa loob ng mahabang panahon, .

• Paano mo kukumpletuhin ang dalawang magkaparehong pahayag na ito gamit ang pagdarasal?

  Maaari mong isulat sa pisara ang mga sagot ng mga estudyante sa sumusunod na tanong.

• Ano ang ilang dahilan kung bakit hindi tayo palaging taimtin o palagiang nananalangin tulad ng ninanais natin?

Sabihin sa mga estudyante na pag-isipan ang kanilang mga sagot sa mga tanong sa susunod na talata. Huwag ipabahagi sa mga estudyante ang kanilang mga sagot.

Maglaan ng ilang sandali na isipin ang iyong sariling panalangin. Ano ang nakatutulong sa iyo para maging taimtim at palagian ang iyong panalangin? Ano ang maaaring makahadlang sa pagiging taimtim at palagian ng iyong panalangin? Bakit gusto mong pagbutihin pa ito?

Sa pag-aaral mo ng lesson na ito, hanapin ang mga katotohanan na maaaring makatulong sa iyo sa iyong mga panalangin.

Ang aklat ni Eter

Sa bahaging ito ng Aklat ni Mormon, isinama ni Moroni ang aklat ni Eter. Naglalaman ito ng kuwento tungkol sa mga Jaredita. Ito ay isinalin mula sa 24 na laminang ginto na natagpuan ng mga taong ipinadala ni Limhi (tingnan sa Mosias 8:7–11; Eter 1:1–2). Ang aklat na ito ay nagsimula sa salaysay tungkol sa kapatid ni Jared at sa kanyang mga panalangin sa Panginoon. Tingnan ang sumusunod na timeline (tinataya ang mga petsa) para malaman kung kailan siya nabuhay kumpara sa iba pang mga tao na pinag-aralan mo sa Aklat ni Mormon sa taong ito:

Maaari mong ipakita ang sumusunod na timeline para matulungan ang mga estudyante na maunawaan kung kailan nabuhay ang mga Jaredita. Ang pag-unawa sa kontekstong ito ng mga banal na kasulatan ay makatutulong sa mga estudyante na magkaroon ng karagdagang kaalaman habang nag-aaral sila.

Basahin ang Eter 1:33 para makita kung ano ang nangyayari nang magsimula ang kuwento tungkol sa mga Jaredita.

• Ano ang nalalaman mo tungkol sa “malaking tore” at sa “nilito ng Panginoon ang wika ng mga tao” (Eter 1:33)?

Pakinggan ang mga sagot ng mga estudyante at ibuod ang sumusunod na kuwento o panoorin ang sumusunod na video kung makatutulong.

Kung hindi pamilyar sa iyo ang kuwentong ito, maaari mong panoorin ang video na “The Tower of Babel” (0:58), na matatagpuan sa ChurchofJesusChrist.org, o basahin ang Genesis 11:1–9 (tingnan din sa pangalawang talata ng pahina ng pamagat sa Aklat ni Mormon).

• Ano kaya ang pakiramdam na mabuhay sa panahong ito?

Nagsusumamo sa Diyos nang may pananampalataya

Kung minsan, ang mga banal na kasulatan ay naglalaman ng mga paulit-ulit na parirala para mas bigyang-diin o bigyang-kahalagahan ang mga pariralang iyon. Ang paghahanap sa mga paulit-ulit na pariralang ito ay makatutulong sa atin na mas maunawaan kung ano ang gustong ituro ng inspiradong may-akda.

Basahin ang Eter 1:34–37 para malaman kung paano hinangad ni Jared at ng kanyang kapatid na lutasin ang kanilang mga problema. Maaari mong markahan ang mga paulit-ulit na parirala na nagpapakita kung paano nanalangin ang kapatid ni Jared at kung paano sumagot ang Panginoon.

• Ano ang natutuhan mo mula sa mga parirala na minarkahan mo?

Makinig nang mabuti habang sumasagot ang mga estudyante. Isulat sa pisara ang anumang totoong alituntunin na ibinahagi nila.

Ang isang alituntunin na matututuhan natin mula sa salaysay na ito ay kapag nagsumamo tayo sa Diyos nang may pananampalataya, Siya ay mahahabag sa atin.

Sabihin sa mga estudyante na alalahanin ang kanilang paghahanda para sa klase. Matapos isulat ng mga estudyante ang mga naisip nila tungkol sa mga sumusunod na prompt, maaari mo silang pagpartner-partnerin at anyayahang ibahagi ang kanilang mga sagot.

Isulat kung paano mo ipaliliwanag ang alituntuning ito sa isang tao. Isama ang mga sumusunod na punto sa iyong paliwanag:

• Ang ibig sabihin para sa iyo ng magsumamo sa Panginoon nang may pananampalataya at kung paano ito maaaring naiiba sa kung paano tayo nagdarasal kung minsan

• Ang itinuturo sa iyo ng mga tugon ng Panginoon sa kapatid ni Jared tungkol sa Kanya

• Ilang paraan na maaaring sagutin ng Panginoon ang ating mga panalangin nang may habag

Para makakita ng makabagong halimbawa ng pagtugon ng Panginoon nang may habag sa taimtim at palagiang panalangin, panoorin ang “Mga Sagot sa Panalangin” mula sa time code na 2:17 hanggang 4:32, na matatagpuan ChurchofJesusChrist.org.

Mahalagang maunawaan na hindi natin alam kung gaano katagal bago natanggap ng kapatid ni Jared ang mga sagot sa kanya. Ibinahagi ni Elder Brook P. Hales ng Pitumpu ang sumusunod:

Alam ng Ama ang nangyayari sa atin, ang ating mga pangangailangan, at lubos tayong tutulungan. Kung minsa’y ibinibigay ang tulong na iyan sa mismong sandali o matapos man lang tayong humingi ng tulong sa Kanya. Kung minsa’y hindi sinasagot ang ating pinakataimtim at nararapat na mga hangarin sa paraang inaasam natin, ngunit nalalaman natin na may mas dakilang mga pagpapalang nakalaan ang Diyos. At kung minsan, hindi ipinagkakaloob sa buhay na ito ang ating matwid na mga hangarin. (Brook P. Hales, “Mga Sagot sa Panalangin,” Liahona, Mayo 2019, 12)

• Sa palagay mo, bakit mahalaga na matandaan natin ang mga turong ito?

  Kung makikinabang ang mga estudyante sa pag-aaral pa ng tungkol sa paraan kung paano sinasagot ng Diyos ang mga panalangin, maaari mong gawin ang karagdagang aktibidad na may pamagat na “Mga sagot sa mga panalangin” sa bahaging ito ng lesson.

Kung hindi masyadong personal ang kanilang mga sagot, maaari mong anyayahan ang mga estudyante na magbahagi ng ilang paraan na nagpakita ang Panginoon ng pagkahabag sa kanila nang manalangin sila sa Kanya. Maaari ka ring magbahagi ng sarili mong mga karanasan.

Pagdarasal nang palagian

Basahin ang Eter 1:38–43; 2:5, 13–15, at alamin ang iba pa tungkol sa panalangin at sa mga sagot ng Panginoon.

Sabihin sa mga estudyante na ibahagi ang natutuhan nila. Kung makatutulong, itanong ang ilan sa mga sumusunod:

• Anong mga parirala sa Eter 1:43 at 2:14 ang nagpapakita ng nadarama ng Panginoon tungkol sa palagian nating pagdarasal? Sa iyong palagay, bakit nais Niya na palagi tayong manalangin sa Kanya?

• May panahon na hindi gaanong palagian ang pagdarasal ng kapatid ni Jared (tingnan sa Eter 2:14). Ano ang ilang dahilan kung bakit hindi tayo gaanong palaging nagdarasal sa panahong ito?

Gawing mas mataimtim ang panalangin

Isiping kunwari na ikaw ay nasa isang youth panel discussion tungkol sa kung paano tutulungan ang kabataan na gawing mas taimtim ang kanilang mga panalangin.

Maaari mong anyayahan ang ilang estudyante na pumunta sa harapan ng silid para sa panel discussion. Maaaring magtanong ang mga estudyante gamit ang sarili nilang mga tanong para sa panel o gamitin ang mga tanong sa ibaba.

• Ano ang isang bagay na nagawa o magagawa mo para maging mas makabuluhan o taimtim ang iyong mga panalangin?

• Ano ang ginawa mo na tumulong sa iyo na palaging manalangin? Ano ang iba pang mga bagay na magagawa mo?

• Paano maaaring makaimpluwensya ang pag-iisip tungkol sa iyong kaugnayan sa Ama sa Langit sa palagian at kataimtiman ng iyong mga panalangin? (Tingnan sa Gabay sa mga Banal na Kasulatan, “Panalangin.”)

Hangarin ang inspirasyon ng Espiritu Santo at pag-isipan ang anumang pagbabago na sa palagay mo ay kailangan mong gawin sa iyong mga panalangin. Gumawa ng partikular na mithiin at mangakong gawin ang anumang impresyong natanggap mo.

Komentaryo at Impormasyon ng Konteksto

Ano ang pangalan ng kapatid ni Jared?

Isinalaysay ni Elder George Reynolds (1842–1909) ng Pitumpu na sa Kirtland, binigyang-pangalan at binasbasan ni Propetang Joseph Smith (1805–44) ang anak ni Elder Reynolds Cahoon at ang ipinangalan sa kanya ay Mahonri Moriancumer. Pagkatapos ng pagbabasbas, sinabi ng Propeta na ito ang pangalan ng kapatid ni Jared. (Tingnan sa Book of Mormon Student Manual Rel. 121–122 [2009], 362.)

Paano tayo pinagpapala ng pagdarasal nang taimtim at palagian?

Panoorin ang “Mga Panalangin nang May Pananampalataya” mula sa time code na 6:57 hanggang 8:40 para makita si Pangulong Henry B. Eyring ng Unang Panguluhan na nagbibigay ng ilang mungkahi.

Ipinaliwanag ni Elder Peter M. Johnson ng Pitumpu:

Manalangin sa Ama sa pangalan ni Jesucristo araw-araw, araw-araw, araw-araw. Sa panalangin ay madarama natin ang pagmamahal ng Diyos at maipapakita natin ang ating pagmamahal para sa Kanya. Sa panalangin ay nagpapasalamat tayo at nakakahingi tayo ng lakas at tapang na isuko ang ating kalooban sa kalooban ng Diyos at magabayan at mapatnubayan sa lahat ng bagay. (Peter M. Johnson, “Kapangyarihang Madaig ang Kaaway,” Liahona, Nob. 2019, 111)

Mga Karagdagang Aktibidad sa Pag-aaral

Alternatibong simula

Magpakita ng mga tanong sa iba’t ibang wika at itanong sa mga estudyante kung ano ang nauunawaan nila. Bilang alternatibo, sabihin sa mga estudyante na nagsasalita ng wika na maaaring hindi nauunawaan ng iba pa sa klase na magtanong sila sa klase. Sabihin sa mga estudyante na ibahagi kung ano ang madarama nila kung naninirahan sila sa isang lugar na hindi nila maunawaan ang sinasabi ng iba. Sa pag-aaral nila ng Eter 1, sabihin sa mga estudyante na isipin kung paano natutulad ang sitwasyong ito sa naranasan ng kapatid ni Jared at ano ang matututuhan nila mula sa kanyang solusyon.

Alternatibong alituntunin: Kung tayo ay palaging nananalangin sa Diyos nang may pananampalataya, makatatanggap tayo ng mga pagpapala nang higit pa sa hiniling natin

Kung makatutulong sa mga estudyante ang pag-aaral ng ibang katotohanan sa lesson na ito, sabihin sa kanila na hanapin ang alituntunin sa itaas sa pag-aaral nila ng Eter 1:35–43. Sabihin sa kanila na gumawa ng chart na katulad ng nasa ibaba para punan habang sila ay nag-aaral:

Ang hiniling ng kapatid ni Jared	Ang ibinigay ng Panginoon

Hilingin sa kanila na ibahagi ang natutuhan nila tungkol sa Ama sa Langit mula sa halimbawang ito. Maaari din silang magbahagi ng mga halimbawa mula sa kanilang buhay, sa buhay ng iba, at iba pang mga salaysay sa banal na kasulatan kung saan nagbigay ang Panginoon ng mga pagpapalang higit pa kaysa sa mga hiniling.

Mga sagot sa mga panalangin

Maaaring may mga tanong ang mga estudyante kung bakit tila hindi sinasagot ng Diyos ang kanilang mga panalangin nang malinaw tulad ng ginawa Niya sa kapatid ni Jared. Maaari kang maglahad ng isang sitwasyon sa mga estudyante na katulad ng sumusunod:

Matapos pag-aralan ang salaysay tungkol sa kapatid ni Jared sa seminary, narinig mong sinasabi ng isa sa mga kaklase mo, “Hindi talaga sinasagot ng Diyos ang aking mga dalangin, kahit hindi kagaya niyon.”

Magpahanap sandali sa mga estudyante ng sources na ibinigay ng Diyos na makatutulong sa isang tao na nakadarama nang ganito. Sabihin sa mga estudyante na ibahagi sa klase ang nahanap nila.