Pagrerebyu ng Doctrinal Mastery 24

Unawain at Ipaliwanag

Ang doctrinal mastery ay makatutulong sa iyo na maunawaan at maipaliwanag ang doktrina ng Tagapagligtas sa sarili mong mga salita. Ang lesson na ito ay magbibigay sa iyo ng pagkakataong palalimin ang iyong pag-unawa at maipaliwanag ang mga katotohanang matatagpuan sa iba’t ibang doctrinal mastery passage mula sa Aklat ni Mormon.

Kilalanin pa ang iyong mga estudyante. Maghanap ng mga pagkakataong makilala ang mga estudyante. Ang pagmamasid at mga tapat na tanong ay gagabay sa iyo para malaman pa kung ano ang mahalaga sa bawat estudyante. Kapag mas naunawaan mo pa ang tungkol sa iyong mga estudyante, matutulungan ka ng Espiritu Santo na ituon ang iyong pagtuturo sa kanilang mga pangangailangan.

Paghahanda ng estudyante: Maaari mong anyayahan ang mga estudyante na mapanalanging pumili ng isang doctrinal mastery passage sa Aklat ni Mormon para pag-aralan ang gusto nilang mas maunawaan pa. Sabihin sa kanila na talakayin ang passage sa isang kapamilya, malapit na kaibigan, o lider ng Simbahan at pumasok sa klase na handang ibahagi ang natutuhan nila tungkol sa passage mula sa kanilang talakayan.

Mga Posibleng Aktibidad sa Pag-aaral

Maaaring kailangang magturo ng doctrinal mastery passage lesson kapalit ng lesson sa pagrerebyu na ito. Tingnan ang iskedyul sa pagtuturo na ibinigay ng area o region director o coordinator upang matiyak na maituturo ang bawat doctrinal mastery passage lesson habang may klase sa seminary.

Pagtatanong

Maaari mong anyayahan ang mga estudyante na maghanap ng isang tao sa klase na maaaring hindi nila gaanong kilala. Sabihin sa kanila na mag-ukol ng ilang minuto sa pagtatanong para matulungan sila na makilala ang isa’t isa. Kung kapaki-pakinabang, bigyan sila ng mga halimbawa ng mga itatanong, tulad ng “Ano ang gusto mong ginagawa?” at “Ano ang ilan sa mga paborito mong asignatura sa paaralan?”

Isipin ang isang taong kilalang-kilala mo.

• Paano mo siya nakilala?

• Anong papel ang ginampanan ng pagtatanong sa kakayahan mong makilala siya?

• Paano maiiba ang inyong ugnayan kung hindi ka kailanman nagtanong?

Tulad ng mahalagang magtanong para makilala nang personal ang isang tao, mahalaga ring magtanong habang pinag-aaralan mo ang mga banal na kasulatan upang mas makilala at maunawaan si Jesucristo sa pamamagitan ng mga ito.

Itinuro ni Pangulong Russell M. Nelson, “Ang pagbibigay ng mahahalagang tanong ay nakatutulong sa pagtamo ng patnubay sa mga banal na kasulatan” (“Living by Scriptural Guidance,” Ensign, Nob. 2000, 18).

Ang pagtatanong tungkol sa mga doctrinal mastery passage ay makatutulong sa atin na mas maunawaan ang mga ito at mas lubos na maanyayahan ang paggabay ng Tagapagligtas sa ating buhay.

Maaari mong ipakita ang huling 12 doctrinal mastery scripture reference ng Aklat ni Mormon o ipakita sa mga estudyante kung saan nila mahahanap ang mga ito sa Doctrinal Mastery Core Document (2023). Kung ninanais, gamitin ang lahat ng 24 na doctrinal mastery passage ng Aklat ni Mormon para sa pagrerebyu na ito, o pumili ng ilan, depende sa mga pangangailangan ng klase.

Maaari mong gawin ang sumusunod na aktibidad bilang isang klase gamit ang isa sa mga doctrinal mastery passage. Pagkatapos ay sabihin sa mga estudyante na ulitin ang aktibidad gamit ang iba’t ibang doctrinal mastery passage na pinili nila. Ang mga estudyante ay maaaring gumawa nang magkakagrupo, nang magkakapartner, o nang mag-isa, depende sa kanilang mga pangangailangan at kagustuhan.

Pumili ng isa sa mga doctrinal mastery passage na gusto mong mas maunawaan pa at basahin ito nang mabuti. Tumukoy ng kahit dalawang bagay na maitatanong mo tungkol sa passage para mas maunawaan ito at isulat ang mga ito. Halimbawa, habang binabasa mo ang 3 Nephi 27:20 maaari mong itanong, “Ano ang ibig sabihin ng pabanalin?” O habang binabasa mo ang Moroni 10:3–5 maaari mong itanong, ”Ano ang ibig sabihin ng magtanong ‘na may tunay na layunin’?”

Hanapin ang mga sagot sa mga tanong na naisip mo; gamitin ang mga tool sa pag-aaral ng mga banal na kasulatan tulad ng Gabay sa mga Banal na Kasulatan, Mga Paksa ng Ebanghelyo, o maging ang mga mensahe sa pangkalahatang kumperensya. Maaari mong gamitin ang iba pang mga estratehiya sa pag-aaral ng mga banal na kasulatan na alam mo, tulad ng pag-aaral ng mga talatang nauugnay rito upang mas maunawaan ang konteksto ng scripture passage.

Upang matulungan ang mga estudyante na matuto sa isa’t isa, maaari mong ipasulat sa kanila ang doctrinal mastery passage na pinili nila at ang kanilang mga tanong sa isang papel na may nakasulat na pangalan nila. Sabihin sa mga estudyante na makipagpalit ng papel sa isa pang estudyante. Bilang alternatibo, sabihin sa mga estudyante na ipasa ang kanilang mga papel sa harap para mapaghalu-halo ang mga ito at random na maipamahagi sa iba pang estudyante. Sabihin sa mga estudyante na isulat ang mga sagot sa mga tanong sa papel na ibinigay sa kanila. Pagkatapos ng sapat na oras, sabihin sa mga estudyante na ibalik ang mga papel sa mga estudyante na ang pangalan ay nakasulat sa mga ito.

Bigyan ng oras ang mga estudyante na pag-isipan ang mga sagot na isinulat ng ibang estudyante at, kung makatutulong, maghanap ng mga karagdagang sagot sa mga banal na kasulatan, sa pamamagitan ng panalangin, at iba pa.

Tandaan, maaaring hindi mo mahanap ang mga sagot sa lahat ng iyong mga tanong habang nag-aaral ka. Ngunit kapag patuloy kang nanampalataya sa Panginoon, tutulungan ka Niya na malaman mo ang katotohanan ng iyong hinahanap.

Ipabahagi sa ilang estudyante ang doctrinal mastery passage na pinili nila, ang ilan sa mga tanong na isinulat nila, at ang mga sagot na natuklasan nila o ng kanilang mga kaklase. Dagdag pa rito, maaari mong itanong kung ano ang ipinaunawa sa kanila ng passage tungkol sa Tagapagligtas o sa Kanyang ebanghelyo.

Kung may oras pa (o sa ibang araw), maaari mong anyayahan ang mga estudyante na ulitin ang aktibidad gamit ang isa pang doctrinal mastery passage.

Hikayatin ang mga estudyante na patuloy na magtanong tungkol sa mga banal na kasulatan at maghanap ng mga sagot.