Vlerësoni të Mësuarit Tuaj 9

Mormoni 7 – Ethëri 15

Reflektimi për të mësuarit tënd shpirtëror dhe vlerësimi i tij mund të të ndihmojë të afrohesh më shumë me Shpëtimtarin. Ky mësim mund të të ndihmojë të kujtosh dhe vlerësosh se si përvojat e tua me kapitujt te Mormoni 7 – Ethëri 15 të kanë ndihmuar të rritesh shpirtërisht.

Ndihmojini nxënësit ta përdorin vetëvlerësimin për të ardhur te Krishti. Vlerësimi i rregullt dhe i vazhdueshëm mund t’i ndihmojë nxënësit të shohin se si ata po bëhen më shumë si Shpëtimtari. Ftojini nxënësit të marrin parasysh me lutje atë që dinë dhe ndiejnë rreth Jezu Krishtit. Nxitini ta vlerësojnë me sinqeritet ecurinë e tyre dhe t’i marrin parasysh ndryshimet që mund të bëjnë ndërsa përpiqen fort ta jetojnë ungjillin e Tij.

Përgatitja e nxënësve: Ftojini nxënësit ta shqyrtojnë atë që kanë mësuar duke e përfunduar thënien vijuese: “Një mësim nga kapitujt te Mormoni 7 – Ethëri 15 që do të doja t’ia tregoja një shoku apo shoqeje është …”

Veprimtari të Mundshme të të Mësuarit

Në këtë mësim nxënësit do të kenë mundësi për ta shpjeguar rëndësinë e Librit të Mormonit në Rivendosjen e ungjillit dhe të reflektojnë mbi përpjekjet e tyre për ta ushtruar besimin te Jezu Krishti. Studimi juaj si klasë i kapitujve nga Mormoni 7 – Ethëri 15 mund të kenë theksuar të vërteta të tjera nga ato në veprimtaritë vijuese. Nëse është kështu, mund t’i përshtatni veprimtaritë që t’i përfshini ato të vërteta.

Rrathët e pemës

Kjo pjesë e mësimit ka për qëllim t’i përgatitë nxënësit për t’i shpjeguar disa nga ato që mësuan dhe për t’i vlerësuar synimet që mund të kenë vendosur gjatë studimit të tyre të kapitujve nga Mormoni 7 – Ethëri 15. Kjo mund të jetë një kohë e mirë për t’i ftuar nxënësit t’i tregojnë përgjigjet e tyre nga veprimtaria e përgatitjes.

Paraqiteni një figurë të rrathëve të pemës dhe kërkojuni nxënësve të tregojnë se çfarë mund të mësojmë rreth një peme duke i shqyrtuar rrathët e saj.

Presidenti Diter F. Uhtdorf, asokohe i Presidencës së Parë, dha mësim:

“Është e habitshme se sa shumë mund të mësojmë për jetën duke studiuar natyrën. Për shembull, shkencëtarët mund të shohin rrathët e pemëve dhe të bëjnë pandehma shkencore mbi klimën dhe kushtet e rritjes qindra dhe madje mijëra vite më parë. Një nga gjërat që mësoni nga studimi i rritjes së pemëve, është që, gjatë stinëve kur kushtet janë ideale, pemët rriten me ritëm normal. Megjithatë, gjatë stinëve kur kushtet e rritjes nuk janë ideale, pemët e ngadalësojnë rritjen dhe ia kushtojnë energjinë e tyre elementeve bazë të domosdoshme për mbijetesë.” (Diter F. Uhtdorf, “Për Gjërat që Kanë më Shumë Rëndësi”, Liahona, nëntor 2010, f. 19)

Ashtu si pemët, ne kemi periudha rritjeje dhe raste kur mund të ndihemi sikur thjesht po përpiqemi të mbijetojmë. Secili prej nesh përjeton rritje në mënyra të ndryshme dhe me shpejtësi të ndryshme. Mendo për rastet në jetën tënde kur mund të kesh përjetuar rritje shpirtërore.

• Cilat ishin disa nga kushtet që të ndihmuan të rritesh shpirtërisht? Çfarë lloj rritjeje përjetove?

• Cilat janë disa mënyra se si mund ta vlerësojmë në mënyrë periodike rritjen tonë shpirtërore?

Në këtë mësim, ti do të kesh mundësinë të shpjegosh disa nga ato që mësove dhe të vlerësosh synimet që mund të kesh vendosur gjatë studimit të kapitujve nga Mormoni 7 – Ethëri 15.

Shpjegoje rëndësinë e Librit të Mormonit

Në këtë pjesë të mësimit, nxënësit do të ftohen të shpjegojnë rëndësinë e Librit të Mormonit në Rivendosjen e ungjillit. Ata mund të mbështeten tek ajo që studiuan te Mormoni 8. Nëse dëshironi, ju mund ta zgjeroni veprimtarinë që të përfshini rolin e Librit të Mormonit për të ndihmuar në mbledhjen e Izraelit, duke u mbështetur tek 3 Nefi 21.

Nëse dëshironi, mund t’i vendosni nxënësit në dyshe, si misionarët. Një mënyrë për ta bërë këtë është të shkruani në shirita letre vende ose shtete të ndryshme për një detyrë misioni. Shkruajeni secilën detyrë misioni në dy shirita letre të veçantë. Më pas shpërndajani letrat klasës. Nxënësit mund ta gjejnë partnerin e tyre duke kërkuar personin me të njëjtën detyrë misioni.

Imagjino sikur je një misionar që po shpjegon rëndësinë e Librit të Mormonit në Rivendosjen e ungjillit. Ti je gati t’i japësh dikujt një kopje të Librit të Mormonit për ta lexuar.

Përgatite se çfarë do të thoshe duke përdorur një ose më shumë fragmente të shkrimit të shenjtë te Mormoni 8. Mund të përdorësh gjithashtu faqen e titullit të Librit të Mormonit. Kërko mundësi për të shpjeguar se si Libri i Mormonit na ndihmon të besojmë te Jezu Krishti.

Lëvizni nëpër klasë, duke i ndihmuar dyshet sipas nevojës. Nëse nxënësve u nevojitet ndihmë për t’i përcaktuar fragmentet e shkrimit të shenjtë, mund t’i drejtoni ata te Mormoni 8:14–16, 25–26, 34–35. Nëse është e nevojshme, kujtojuani atyre se vargjet 16 dhe 25 i referohen Jozef Smithit.

Pas një kohe të mjaftueshme, ftojini dyshet ta interpretojnë me role situatën me një dyshe tjetër. Nëse koha e lejon, dyshet mund të ushtrojnë sërish shpjegimin për një dyshe tjetër.

Reflekto mbi planet për të ushtruar besimin te Jezu Krishti

Kjo pjesë e mësimit mund t’i ndihmojë nxënësit të reflektojnë mbi përpjekjet e tyre për ta ushtruar besimin te Jezu Krishti. Nxënësit mund ta krahasojnë ushtrimin e besimit te Jezu Krishti me pjekjen e bukës.

Nëse është e mundur, sillni një tas për përzierje dhe përbërësit për të bërë një copë bukë. Ju mund të sillni edhe një copë bukë për ta ndarë me nxënësit. Ftojini nxënësit ta shpjegojnë shkurtimisht procesin e bërjes së bukës duke bërë pyetje si ato në vijim:

• Cilët janë disa përbërës në një copë bukë?

• Përveç se t’i bashkosh përbërësit, çfarë tjetër nevojitet të bësh për të bërë bukë?

Përbërësit në një copë bukë mund të përfshijnë miellin, majanë, kripën dhe ujin. Mund të të nevojitet gjithashtu kohë që brumi të vijë, si dhe nevojitet ta pjekësh.

Pjekja e bukës mund të krahasohet me ushtrimin e besimit te Jezu Krishti. Rezultatet, dëshmia ose mrekullia që kërkon, është si copa e gatuar e bukës. Përpjekjet e tua për të ushtruar besimin te Jezu Krishti mund të krahasohen me përbërësit, kohën e fryrjes dhe pjekjen e bukës. Në mësimet e fundit, ti studiove rrëfime të individëve që e ushtruan besimin te Jezu Krishti (shih tek Ethëri 3:1–16; 12:6–22). Ti studiove gjithashtu fjalët e profetëve që të ftojnë ta ushtrosh besimin te Zoti dhe të kërkosh mrekulli (shih te Mormoni 9:15–27; Ethëri 12:6–9).

Ju mund ta krahasoni më nga afër ushtrimin e besimit me bërjen e bukës duke diskutuar disa nga elementët në vijim: pritja për Zotin është si koha e ardhjes së brumit (shihni tek Isaia 40:31), mbajtja e besëlidhjeve tona është si kripa (shihni te Doktrina e Besëlidhje 101:39) dhe fuqia e Shpëtimtarit është si uji (shihni te Gjoni 4:14).

Lexo te Mormoni 9:19–21; Ethëri 3:9; 12:6–9 për të të ndihmuar ta kujtosh atë që studiove rreth besimit te Jezu Krishti dhe planet që mund të kesh bërë.

Ftojini nxënësit të mendojnë rreth rezultateve, dëshmisë ose mrekullisë që kërkojnë ndërsa u përgjigjen pyetjeve vijuese. Nëse dëshironi, mund t’i paraqitni pyetjet dhe t’i ftoni nxënësit të përgjigjen në ditarët e tyre të studimit.

• Çfarë ke bërë për ta ushtruar besimin te Jezu Krishti?

• Nëse ushtrimi i besimit te Jezu Krishti është si pjekja e bukës, në cilën pjesë të procesit je aktualisht? A po i mbledh ose përzien ende përbërësit? A po pret që të vijë brumi? A po piqet buka? Apo e ke ngrënë bukën tashmë? Shpjegoje përse.

• Cilat janë disa sfida që ke pasur ose që ende nevojitet t’i kapërcesh? Çfarë të ka ndihmuar ose mund të të ndihmojë t’i kapërcesh ato?

• Si e ndien se je bekuar për përpjekjet që ke bërë për ta ushtruar besimin te Jezu Krishti?

Ftojini nxënësit e gatshëm t’i tregojnë përvojat e tyre të të ushtruarit të besimit te Jezu Krishti dhe ndikimin që ai ka pasur në jetën e tyre. Merreni parasysh të jepni dëshminë tuaj se si jeni bekuar nga ushtrimi i besimit te Jezu Krishti.