“Моронай 1: Би Христийг үгүйсгэх нь үгүй,” Мормоны Номын багшийн гарын авлага (2024)
“Моронай 1,” Мормоны Номын багшийн гарын авлага
Моронай 1
Би Христийг үгүйсгэх нь үгүй
Есүс Христийн дагагч байх нь хэзээд амар байсангүй. Мормоны Номын төгсгөлийн хэсэгт бошиглогч Моронай Христийн дагагчид Аврагчийг үгүйсгээгүй бол үхэлд хүргэгдэж байсныг илчилсэн (Моронай 1:2-ыг үзнэ үү). Моронай Есүс Христийг үгүйсгэхээс татгалзсан учир аюулгүй гэж үзсэн газраар тэнүүчилж, леменчүүдээс нуугдахаас өөр аргагүй болов. Магадгүй, та итгэлээрээ амьдарч, Аврагчид мөн Түүний Сүмд үнэнч үлдэхийг оролдох үедээ ганцаардлыг мэдэрсэн байх. Энэ хичээл үргэлж Есүс Христийг дагаж, Түүнийг үгүйсгэхгүй байхыг урамшуулахад тань тусалж чадна.
Өөрийгөө эргэцүүлэн шинжихэд хүргэх асуулт тавих нь. Суралцагчдыг судрууд, тэдний одоогийн нөхцөл байдал, Аврагчийн талаарх тэдний мэдрэмжийг эсвэл тэдэнд заах Сүнсийг урьж чадах хэрэгжүүлэх зарчмуудыг тунгаан бодоход урих асуултууд.
Суралцагчийн бэлтгэл: Хэдийгээр ганцаардсан мэт санагдаж эсвэл хавчигдаж байсан ч гэсэн Есүс Христийг дагасан өөрсдийн эсвэл таньдаг хэн нэгний туршлагын талаар бодоход суралцагчдыг урь.
Боломжит суралцах үйл ажиллагаа
Эсэргүүцэлтэй нүүр тулах нь
Та Бурханы талаарх таны жишиг эсвэл итгэл үнэмшлийг хуваалцахгүй хүмүүсээр хүрээлэгдсэн үедээ ямар үйлдэл гаргах хандлагатай байдаг талаараа бодоход цаг зарцуул.
Энэ бүдүүвч зургийг самбарт харуул. Өөр нэг хувилбар бол үйл ажиллагааны үеэр өргөж байх дөрвөн өнгийн цаасыг суралцагчдад өгөх явдал юм. Үүнийг хийснээр суралцагчдыг хичээлд хамруулахад тусалж болох юм.
Энэ бүдүүвч зураг дахь өнгөнүүд нь Есүс Христийн шавьд тулгарч болох эсэргүүцлийн янз бүрийн түвшнийг төсөөлөхөд тусална. Ногоон өнгө нь ямар ч эсэргүүцэл байхгүй байгааг төлөөлнө. Шар ба улбар шар нь эсэргүүцлийн түвшин нэмэгдэж байгааг илтгэх ба харин улаан нь хамгийн хэцүү эсэргүүцлийг бэлгэднэ.
Бүдүүвч зургийн өнгөнүүд нь юуг төлөөлж байгааг танилцуулсны дараа хэн нэгэн Христийн шавь байснаараа эсэргүүцэлтэй нүүр тулсан хувийн туршлагаа эсвэл Ерөнхий чуулган дээр хуваалцсан туршлагыг хуваалц. Суралцагчдыг нөхцөл байдал бүрийн эрчийг хамгийн сайнаар дүрслэх өнгийг сонгоход урь. Энэ нь Есүс Христэд үнэнч байх талаарх харилцан яриаг эхлүүлэхэд тусална.
Ерөнхийлөгч Томас С.Монсон (1927–2018) залуу байхдаа цэрэгт алба хааж, олон зоригтой үйл хэргийг гэрчилжээ. Тэрээр дараах жишээг хуваалцсан юм.
Энэ залуу эрийн туулсан эсэргүүцлийн түвшнийг төлөөлөхийн тулд ямар өнгө сонгохоо бод. Та ижил нөхцөл байдалд орсон бол ямар үйлдэл гаргах байсан гэж бодож байна вэ?
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe2%2F09%2Fe209564ecf3b64252fb86f90e0e15fac9ba757e8%2Fe209564ecf3b64252fb86f90e0e15fac9ba757e8.jpeg/full/!250,/0/default)
Хэзээ ч мартагдамгүй нэгэн тохиолдол бол манай сүмийн гишүүн биш, залбирахдаа санаа зовдоггүй, 18 настай нэгэн цэргийн үзүүлдэг байсан энгийн зориг юм. Заримдаа танхай этгээдүүд тохуурхаж, үл итгэгчид шоолдог байсан ч хорооны 250 эрэгтэйгээс орой бүр орныхоо дэргэд өвдөг сөгддөг ганц хүн бол тэр цэрэг байсан юм. Тэрээр толгойгоо бөхийлгөн, Бурханд хандан залбирдаг байв. Тэр үүнд хэзээ ч эргэлзэж байгаагүй юм. Тэр хэзээ ч шантарч байгаагүй. Тэр зоригтой байсан. (Томас С.Монсон, “Хүчтэй бөгөөд зоригтой бай,” 2014 оны 4-р сарын Ерөнхий чуулган, 87)
-
Энэ жишээнээс юу таны анхаарлыг илүү их татаж байна вэ?
-
Есүс Христийг үргэлж дагахын юу нь хэцүү гэж та бодож байна вэ? Юу танд тусалдаг вэ?
Есүс Христийг дагахад сорилттой байж болох бусад нөхцөл байдлыг жагсааж бич. Тодорхой нарийн мэдээллийг төсөөлөөд, нөхцөл байдал бүрд бүдүүвч зургийн аль өнгө хамгийн сайн тохирохыг анхаарч үз.
Мэдээж, бидэнд сорилт тулгарсан тэр мөчид Есүс Христэд өгсөн амлалтаа дагахаас илүүтэй ярих нь илүү амар байдаг. Та энэ хичээлийг судалж байхдаа Есүс Христэд итгэх итгэл үнэмшилдээ мөн Түүний сэргээсэн Сүмийн жишигт үнэнчээр үлдэхийн тулд танд хэрэгтэй урам зоригийг олохоор эрэлхийл.
Моронай леменчүүдэд хөөгдөж байв
Моронайд нифайчуудын цэдгийг хөтлөх, хамгаалах үүрэг өгөх үед тэрээр мөн эсэргүүцэлтэй нүүр тулсан.
Моронай 1:1–4-ийг уншаад, түүний нүүр тулсан эсэргүүцлийг хэрхэн үнэлж болохыг бод.
Моронайд амьдрал ямар байсан талаар илүү сайн ойлголт авахад туслахын тулд та ChurchofJesusChrist.org дээрх “Moroni Invites All to Come unto Christ (Моронай бүгдийг Христэд ирэхэд урьсан нь)” видеог цагийн код 0:00-ээс 3:59 хүртэл үзэж болох юм.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F77%2F94%2F7794521da0ef693fa6a0cb5c92cb0feee6e0de28%2F7794521da0ef693fa6a0cb5c92cb0feee6e0de28.jpeg/full/!250,/0/default)
-
Моронайн эсэргүүцлийн эрчийг хэрхэн үнэлэх вэ?
-
Бид Моронайн жишээнээс юу мэдэж авч болох вэ?
Бид ямар ч нөхцөлд Есүс Христэд үнэнч байж, Түүнийг үгүйсгэхгүй байж чадна гэсэн нэг үнэнийг бид мэдэж авч чадна.
Энэхүү үнэнийг самбарт бичиж болно. Ингэснээр суралцагчид энэ үнэнээр амьдардаг хүмүүсийн янз бүрийн жишээг уншихдаа үүнийг харж чадна.
-
Есүс Христэд үнэнч, шударга байх нь яагаад бидэнд чухал вэ?
-
Моронайд Есүс Христэд туйлын үнэнч шударга байхад нь тусалсан ямар туршлага байсан гэж та бодож байна вэ?
-
Өөрийг нь үгүйсгэхгүй байхыг урамшуулах Есүс Христийн тухай юуг та мэдэх вэ?
3-р шүлэг дээрх Моронайн үгсийг тэмдэглэ. Та мөн Есүс Христийг үргэлж дагахад таныг урамшуулах нэрээ Моронайн нэрийн хажууд тэмдэглэж бичиж болно.
Суралцагчдыг хүнд хэцүү нөхцөл байдалд Бурханд үнэнч байсан судрууд дээрх хүмүүсийн жишээнүүдийг хуваалцахад урь. Доорх жишээнүүдийн заримыг ашигла. Хэрэгтэй бол хам сэдвийг өг. Мөн суралцагчдад Есүс Христ үргэлж үнэнч, шударга байдгийг олж тодорхойлоход тусал. Тэр бидний нэг хүн бүрийн төлөө дуртайяа амиа алдсан.
-
Хатан Естер (Естер 4:16-г үзнэ үү)
-
Шадрах, Мешах, Абеднего нар (Даниел 3:17–18-ыг үзнэ үү)
-
Абинадай (Мозая 17:20-ийг үзнэ үү)
-
Иосеф Смит (Сургаал ба Гэрээ 135:4–5-ыг үзнэ үү)
-
Онитагийн охид (Абрахам 1:11-ийг үзнэ үү)
Амлалтдаа хүрдгээ харуулах
Энэ нь суралцагчдад хичээлд бэлдсэн зүйлээ тайлагнах тохиромжтой үе байж болох юм. Та дараахтай адил асуултыг тавих замаар суралцагчдад тусалж болно.
-
Та эсвэл таны мэддэг хэн нэгэн хүнд хэцүү нөхцөл байдалд Христэд үнэнч гэдгээ хэзээ харуулж байсан бэ?
Суралцагчдыг дараах асуултуудад судлах тэмдэглэлдээ хариулахад урь.
-
Есүс Христийг дагаснаар эсэргүүцэлтэй нүүр тулсан ямар нэг нөхцөл байдал танд байгаа юу?
-
Тэдгээр нөхцөл байдалд та Есүс Христэд үнэнч байхын тулд юу хийж чадах вэ?
Суралцагчдад энэ хичээлээр сурч мэдсэн зүйлээ эргэцүүлэн бодоход нь туслахын тулд ямар ч нөхцөл байдалд Христэд үнэнчээр үлдэхэд нь тэднийг болон бусдыг урамшуулж чадах зурагт хуудас эсвэл олон нийтийн сүлжээний нийтлэл хийхэд тэднийг урь. Тэд үүнийгээ хувийн урам зориг авах зорилгоор хаана ч байрлуулж эсвэл бусадтай хуваалцаж болно. Суралцагчдад хэрэг болох материал болон энэ үйл ажиллагаанд зориулсан зааврыг өг. Боломжтой бол Өсвөр үеийнхний бат бөх байдлын төлөө сэтгүүлээс авсан саяхны жишээнүүдийг харуул. Нэг жишээг доор оруулъя.
Суралцагчид www.ChurchofJesusChrist.org/media дээрх “Зургийн цуглуулга” хэсгээс ашиглах зураг хайн эхэлж болно. Дараа нь суралцагчдад мессеждээ оруулах Есүс Христэд үнэнч байх талаар агуулсан судруудыг олоход нь тусал. Тэд Моронай 1-ийн шүлэг, өөрсдөө олсон судраас эсвэл дараахтай адил таны өгсөн жагсаалтаас авсан нэг шүлгийг ашиглаж болно.
Суралцагчдад нийтлэл эсвэл зурагт хуудсаа хийх хангалттай цаг гаргаж өгсний дараа, өөрсдийн хийсэн зүйлээ ангийнхандаа хуваалцахыг тэдэнд зөвшөөр. Суралцагчид өөрсдийн бүтээсэн зүйл нь үнэ цэнтэй, утга учиртай гэдгийг мэддэг аюулгүй орчин бүрдүүлэх арга замыг эрэлхийлэхээ бүү март.