Moroni 2–3

Awtoridad ng Priesthood

Ang tunay na awtoridad ng priesthood mula sa Diyos ay mahalaga sa Simbahan ng Tagapagligtas. Sa ilan sa mga huling salita ni Moroni sa mga darating na henerasyon, nagturo siya tungkol sa awtoridad sa pagsasagawa ng mga ordenansa ng priesthood. Sa paggawa nito iningatan niya ang mahahalagang katotohanan kung paano ginagamit ang priesthood. Ang lesson na ito ay makatutulong sa iyo na maunawaan ang awtoridad ng priesthood sa Simbahan ng Tagapagligtas.

Tulungan ang mga estudyante na magtuon kay Jesucristo. Pagnilayan kung paano itinuturo ng mga banal na kasulatan ang mga alituntunin na tutulong sa atin na mas makilala at maunawaan ang Tagapagligtas. Sabihin sa mga estudyante na alamin kung ano ang matututuhan nila tungkol sa kapangyarihan, awa, at impluwensya ni Jesucristo mula sa mga alituntunin ng ebanghelyo na natutuklasan nila sa mga banal na kasulatan.

Paghahanda ng estudyante: Maaari mong anyayahan ang mga estudyante na kausapin ang isang maytaglay ng priesthood o isang taong naglilingkod sa isang katungkulan sa Simbahan. Maaaring itanong ng mga estudyante sa taong iyon kung ano ang nadarama niya tungkol sa pagtanggap ng awtoridad ng Tagapagligtas sa paggawa ng kanyang mga responsibilidad.

Mga Posibleng Aktibidad sa Pag-aaral

Bago magklase, magtago ng isang bagay na kakailanganin mo sa lesson, tulad ng chalk, marker, o mga banal na kasulatan. Sabihin sa mga estudyante na hanapin ang bagay na ito, at itanong kung bakit kailangan ito para sa lesson.

Ipaalala sa mga estudyante na maraming malinaw at mahahalagang katotohanan ang nawala sa panahon ng Malawakang Apostasiya (tingnan sa 1 Nephi 13:26–27, 32). Ang mga isinulat ni Moroni ay nagtuturo ng mahahalagang katotohanan tungkol sa pagtatatag ng Simbahan ng Tagapagligtas na nawala noong panahon ng Apostasiya.

“Mahalaga”

Si Moroni ay isa sa mga huling maytaglay ng priesthood ng kanyang dispensasyon sa kontinente ng Amerika. Alam niya na kapag siya ay namatay, ang mahalagang kaalaman tungkol sa Simbahan ng Tagapagligtas at sa Kanyang awtoridad ng priesthood ay mawawala. Sa ilan sa kanyang huling salita, isinulat ni Moroni ang sa palagay niya ay “magiging mahalaga“ sa mga darating na salinlahi (Moroni 1:4). Sumulat siya tungkol sa awtoridad at mga ordenansa ng priesthood na makukuha lamang sa Simbahan ng Tagapagligtas.

Noong dalawin ng nabuhay na mag-uling Tagapagligtas ang mga Nephita, “hinawakan niya ng kanyang kamay ang mga disipulo na kanyang pinili” at “ibinigay sa kanila ang kapangyarihan na magkaloob ng Espiritu Santo” (3 Nephi 18:36–37). Isinama ni Moroni sa kanyang talaan ang ilan sa mga tagubilin ng Tagapagligtas sa labindalawang Nephitang disipulo hinggil sa pagbibigay ng kaloob na Espiritu Santo.

Upang mapalahok pa ang mga estudyante, maaari mong anyayahan ang mga estudyante na makipagtulungan sa isang kaklase o sa maliliit na grupo para sa sumusunod na aktibidad. Maaaring pag-aralan ng mga estudyante ang Moroni 2 o 3 at pagkatapos ay ibahagi ang natutuhan nila sa isang taong nag-aral ng ibang kabanata. Maaaring ibigay ang sumusunod na impormasyon upang magabayan ang mga estudyante sa kanilang pag-aaral.

Awtoridad na ipagkaloob ang kaloob na Espiritu Santo

Basahin ang Moroni 2:1–3, at alamin ang itinuro ni Moroni na mahalaga.

• Ano ang nakita mo sa mga talatang ito na sa palagay mo ay mahalaga?

• Mula sa nalalaman mo na, anong awtoridad ng priesthood ang kailangan para maipagkaloob ang kaloob na Espiritu Santo?

• Anong mga katotohanan ang matututuhan natin mula sa Moroni 2?

Ang isang katotohanan ay ipinagkakaloob ng mga maytaglay ng Melchizedek Priesthood ang kaloob na Espiritu Santo sa mga nabinyagang miyembro ng Simbahan sa pamamagitan ng pagpapatong ng mga kamay.

• Sa iyong palagay, bakit napakahalaga ng pagkakaloob ng Espiritu Santo? (Para sa salaysay na nagpapakita nito, maaari mong basahin ang Mga Gawa 8:14–24.)

• Paano nakakaimpluwensya sa nadarama mo tungkol sa kaloob na Espiritu Santo ang kaalaman na ang awtoridad sa pagkakaloob nito ay nagmumula sa Tagapagligtas?

• Paano napagpala ng kaloob na Espiritu Santo ang buhay mo?

Pag-oorden sa iba sa mga katungkulan sa priesthood

Ang kasunod na ipinaliwanag ni Moroni ay kung paano mag-orden ng mga priest at teacher.

Basahin ang Moroni 3:1–4, at alamin kung paano inoorden ang mga indibiduwal sa mga katungkulan sa priesthood.

• Ano ang napansin mo sa kung paano inoorden ang mga indibiduwal sa mga katungkulan sa priesthood?

Maaaring basahin at iugnay ng mga estudyante ang Mga Saligan ng Pananampalataya 1:5 sa Moroni 3.

Bagama’t partikular na binanggit sa Moroni 3 ang ordenasyon sa mga katungkulan sa priesthood ng mga saserdote at guro [priest at teacher], ang awtoridad ay para din sa lahat ng may tungkulin sa Simbahan ng Tagapagligtas.

• Bakit mahalaga para sa mga taong naglilingkod sa Simbahan ng Tagapagligtas na magkaroon ng Kanyang awtoridad?

Kung maaari, magdala ng linya ng awtoridad ng priesthood [priesthood line of authority] sa klase.

Ang awtoridad ng priesthood ay nagmumula kay Jesucristo. Bagama’t lahat ng may tungkulin sa Simbahan ay may awtoridad ng priesthood, ang mga inordenan sa mga katungkulan sa Aaronic o Melchizedek Priesthood ay may priesthood line of authority. Tinutunton sa line of authority na ito ang awtoridad ng isang maytaglay ng priesthood pabalik kay Jesucristo. Ang mga maytaglay ng Melchizedek Priesthood ay maaaring humiling ng rekord ng kanilang line of authority sa ChurchofJesusChrist.org. Hindi nagbibigay ang Simbahan ng rekord ng line of authority para sa mga maytaglay ng Aaronic Priesthood. Gayunman, kung ang isang maytaglay ng Aaronic Priesthood ay inorden ng isang maytaglay ng Melchizedek Priesthood, maaaring malaman niya ang line of authority ng taong nag-orden sa kanya.

Ipinaliwanag ni Elder Jeffrey R. Holland ng Korum ng Labindalawang Apostol:

Ang paggawa nang may banal na awtoridad ay nangangailangan ng higit pa sa simpleng kasunduan ng kalalakihan. Hindi ito malilikha ng pagsasanay na panrelihiyon o pagbibigay-karapatan ng kongregasyon. Hindi, sa awtorisadong gawain ng Diyos dapat mayroong kapangyarihan na mas mataas kaysa sa taglay na ng mga tao sa mga kongregasyon o sa kalye o sa seminaryo—isang katotohanan na alam na at hayagang inamin ng maraming matatapat na nagsaliksik sa relihiyon sa loob ng maraming henerasyon na nagbigay-daan sa Pagpapanumbalik. …

… [Ang linya ng awtoridad ng priesthood ng bawat maytaglay ng priesthood sa Simbahan] ay matutunton pabalik sa tuloy-tuloy na kawing sa mga nagministeryong anghel na galing sa Anak ng Diyos mismo, dala ang di-matatawarang kaloob na ito mula sa langit. (Jeffrey R. Holland, “Ang Ating Natatanging Katangian,” Liahona, Mayo 2005, 44)

Maaari mong ipakita sa mga estudyante ang isang kadena. Ipaliwanag na ang unang kawing ng kadena ay kumakatawan kay Jesucristo at ang pangalawang kawing, sa mga inorden Niya sa priesthood. Ang pangatlong kawing ay kumakatawan sa mga inorden ng mga ito at iba pa, hanggang sa mga henerasyon sa mga maytaglay ng priesthood ngayon, na kinakatawan ng huling kawing ng kadena.

• Bakit mahalaga na matunton ang awtoridad ng priesthood pabalik kay Jesucristo?

• Paano nakakaimpluwensya ang kaalamang nakakonekta ito kay Jesucristo sa nadarama mo tungkol sa mga ordenansa, katungkulan, o pagpapalang natatanggap mo sa pamamagitan ng priesthood?

Maaaring magbahagi ang mga estudyante tungkol sa aktibidad sa paghahanda para sa klase.

Maaari ding rebyuhin ng mga estudyante ang Moroni 2 at 3, at alamin ang mga pagkakatulad ng mga kabanata, at ibahagi ang nalaman nila.

Ibahagi ang natutuhan mo

Kung makatutulong sa mga estudyante na ipakita ang pagkaunawa nila sa napag-aralan nila sa Moroni 2–3, maaari mong talakayin ang sumusunod na sitwasyon.

Kunwari ay may kapamilya ka na bibinyagan at ikukumpirma, ioorden sa priesthood, o itatalaga para sa isang katungkulan. Ano ang maibabahagi mo sa kanya mula sa Moroni 2 o 3 para matulungan siyang maunawaan ang kahalagahan ng kaganapang ito?

Komentaryo at Impormasyon ng Konteksto

Ano ang nagagawa ng priesthood para sa atin?

Ipinahayag ni Pangulong Dieter F. Uchtdorf, na noon ay miyembro ng Unang Panguluhan:

Alam nating lahat na ang priesthood ay higit pa sa pangalan o titulo. Itinuro ni Propetang Joseph na “ang Priesthood ay walang hanggang alituntunin, at umiral kasabay ng Diyos mula sa kawalang-hanggan … hanggang sa kawalang-hanggan, walang simula o katapusan ng mga panahon” [Mga Turo ng mga Pangulo ng Simbahan: Joseph Smith (2007), 121]. Taglay nito “maging ang susi ng kaalaman tungkol sa Diyos” [Doktrina at mga Tipan 84:19]. Sa katunayan, sa pamamagitan ng priesthood ang “kapangyarihan ng kabanalan ay makikita” [Doktrina at mga Tipan 84:20].

Ang mga pagpapala ng priesthood ay hindi natin kayang maunawaan. Ang matatapat na maytaglay ng Melchizedek Priesthood ay “magiging … hinirang ng Diyos.” [Doktrina at mga Tipan 84:34]. Sila ay “pababanalin sa pamamagitan ng Espiritu para sa pagpapanibago ng kanilang mga katawan” [Doktrina at mga Tipan 84:33] at sa huli ay tatanggap ng “lahat ng mayroon [ang] Ama” [Doktrina at mga Tipan 84:38]. Maaaring mahirap itong maunawaan, ngunit ito ay maganda, at pinatototohanan ko na totoo ito. (Dieter F. Uchtdorf, “Ang Inyong Potensyal, ang Inyong Pribilehiyo,” Liahona, Mayo 2011, 58)

Sino ang maaaring makatanggap ng mga pagpapala ng priesthood?

Ipinahayag ni Pangulong Dallin H. Oaks ng Unang Panguluhan:

Hindi katulad ng mga susi ng priesthood at mga ordinasyon sa priesthood, ang mga pagpapala ng priesthood ay maaaring matanggap ng kababaihan at kalalakihan sa parehong kondisyon. Ang kaloob na Espiritu Santo at ang mga pagpapala ng templo ay karaniwang mga halimbawa ng katotohanang ito. (Dallin H. Oaks, “Ang mga Susi at Awtoridad ng Priesthood,” Liahona, Mayo 2014, 52)

Mga Karagdagang Aktibidad sa Pag-aaral

Mga katungkulan sa priesthood

Bago tukuyin ang katotohanan sa Moroni 2, maaaring ilista ng mga estudyante sa pisara ang mga katungkulan ng Aaronic at Melchizedek Priesthood at lagyan ng tsek ang mga maaaring magkaloob ng kaloob na Espiritu Santo. Itanong sa mga estudyante kung paano natin nalaman iyon. Pagkatapos ay maaaring gamitin ng mga estudyante ang index para maghanap ng banal na kasulatan na nagtuturo nito. Kung kinakailangan, ituon sila sa ilang banal na kasulatan (tingnan sa Doktrina at mga Tipan 20:38, 41, 43; 107:18).

Linya ng awtoridad ng priesthood [Priesthood line of Authority]

Bago magklase, maghandang magdala ng rekord ng priesthood line of authority ng sinuman sa iyong pamilya o sa iyong ward o branch at ibahagi ito sa klase. Maaari kang gumawa ng kadenang papel. Isulat sa unang kawing ang pangalang “Jesucristo.” Isulat sa pangalawang kawing ang “Mga Disipulo: kabilang sina Pedro, Santiago, at Juan.” Patuloy na isulat ang pangalan ng bawat maytaglay ng priesthood mula sa linya ng awtoridad sa kadena. Tulungan ang mga estudyante na maunawaan na ang priesthood sa Simbahan ngayon ay ang parehong priesthood na ginamit ng Tagapagligtas sa paggawa ng mga himala at paggawa ng gawain ng Kanyang Ama.

Moroni 2–6. Mga ordenansa ng priesthood

Kung kailangan mong pagsamahin ang mga lesson, maaari mong ituro ang Moroni 2–6, at alamin ang mga ordenansa ng priesthood. Sabihin sa mga estudyante na isipin kung sa anong mga ordenansa sila nakibahagi at kung paano sila natulungan ng mga ordenansa na mas mapalapit sa Tagapagligtas. Pagkatapos ay maaari nilang isipin kung anong mga ordenansa ang mararanasan nila sa hinaharap (ang sakramento, mga ordenansa sa templo, at iba pa) at kung paano sila maghahandang makibahagi sa mga ito. Isiping rebyuhin ang bahagi sa Pumarito Ka, Sumunod Ka sa Akin—Para sa Tahanan at Simbahan: Aklat ni Mormon 2024 na may pamagat na “Moroni 2–6: Ang mga ordenansa ng priesthood ay kailangang pangasiwaan ayon sa mga utos ng Panginoon.”

Moroni 2–3. Video na “Blessings of the Priesthood”

Habang nagtuturo ka mula sa Moroni 2–3, maaari mong ipanood ang “Blessings of the Priesthood” (3:04), kung saan ipinaliwanag ni Elder Robert D. Hales (1932–2017) ng Korum ng Labindalawang Apostol ang ilang paraan kung paano mapagpapala ng priesthood ang ating buhay.