Moroni 7:1–19

“Kërkoni me Zell në Dritën e Krishtit”

Ndonjëherë mund të jetë e vështirë të dish se çfarë është e drejtë dhe çfarë nuk është. Megjithatë, Perëndia na ka siguruar ndihmë. Moroni, duke përdorur fjalët e atit të tij, na nxiti ta përdorim Dritën e Krishtit për ta dalluar të drejtën nga e gabuara. Ky mësim mund të të ndihmojë të mbështetesh te Jezu Krishti për të gjykuar ndërmjet së mirës dhe së keqes.

Nxitini nxënësit të mendojnë thellësisht rreth parimeve të ungjillit. Studimi i kujdesshëm i shkrimeve të shenjta mund t’i frymëzojë nxënësit të kujtojnë se si kanë ndikuar parimet e ungjillit në jetën e tyre. Ftojini nxënësit të kujtojnë përvojat e kaluara që i ndihmuan ata të vinin më pranë Jezu Krishtit.

Përgatitja e nxënësve: Ftojini nxënësit të vijnë të përgatitur për të treguar se si zgjedhjet që bëjnë, ndikohen nga besimi i tyre te Jezu Krishti.

Veprimtari të Mundshme të të Mësuarit

Cili katror është më i çelur?

Merreni parasysh ta filloni orën mësimore duke paraqitur figurën vijuese. Ftojini nxënësit t’i shohin të dy katrorët gri dhe t’i thonë një partneri se cili është më i çelur.

A do të habiteshe po ta dije se të dy katrorët gri janë e njëjta nuancë? Truri yt i percepton të dy katrorët gri si nuanca të ndryshme për shkak të ngjyrave të çelura ose të errëta rreth tyre.

Në vend që të lexojnë paragrafin vijues, merreni parasysh t’i ftoni nxënësit të lexojnë tek Isaia 5:20 dhe t’u kërkoni atyre ta krahasojnë iluzionin e katrorëve me profecinë e Isaias për kohën tonë.

Si ky iluzion, mund të ketë situata në të cilat është e vështirë të japësh gjykime të sakta. Isaia profetizoi se në ditët e fundit, disa njerëz do ta “quajnë të mirë të keqen dhe të keqe të mirën; [dhe] ndërrojnë terrin në dritë dhe dritën në terr” (Isaia 5:20; shih edhe te 2 Nefi 15:20).

Për t’i ndihmuar nxënësit të mendojnë se si e shohin përmbushjen e profecisë së Isaias në kohën tonë, merreni parasysh të diskutoni një ose më shumë prej këtyre pyetjeve me nxënësit.

• Cila është një mënyrë se si ti i ke parë njerëzit në kohën tonë “ta quajnë të mirë të keqen dhe të keqe të mirën”?

• Çfarë ia bën të vështirë dikujt ta shohë të vërtetën me lehtësi ose qartësi?

Ftojini nxënësit t’i përsiatin në heshtje përgjigjet e tyre për pyetjet vijuese.

• Si e përcakton nëse diçka është e drejtë ose e gabuar?

• Sa i sigurt je se mund ta dallosh të mirën nga e keqja? Përse?

Mendo për diçka që do të doje ta dalloje më qartë si të mirë ose të keqe. Për shembull, dikush mund të mendojë se zgjedhja e vet muzikore është e mirë, por prindërit e vet mund të mos bien dakord. Kush ka të drejtë? Shembuj të tjerë mund të jenë të vendosësh se cilin qëndrim do të mbash për një çështje shoqërore, të zgjedhësh kë të kesh shok/shoqe, të marrësh pjesë në një veprimtari të kohës së lirë e kështu me radhë.

Ndërsa studion sot, kërko se çfarë mund të të ndihmojë të dish nëse diçka është e mirë ose jo.

Dallimi ndërmjet së mirës dhe së keqes

Si Isaia, edhe Moroni e pa kohën tonë (shih te Mormoni 8:35). Ai përfshiu ndihmë për ne në Librin e Mormonit. Pasi dha mësim për rëndësinë e bërjes së veprave të mira me dëshirë të sinqertë (shih te Moroni 7:1–11), ai i shënoi fjalët që ati i tij, Mormoni, ia pati dhënë mësim anëtarëve të Kishës rreth gjykimit ndërmjet së mirës dhe së keqes.

Lexo te Moroni 7:12–17 dhe merre parasysh ta shënosh atë që gjen për secilën nxitje më poshtë:

1. Si mund ta kuptojmë a është e mirë diçka

2. Si mund ta kuptojmë a është e keqe diçka

3. Çfarë bën Shpëtimtari për të na ndihmuar

Nëse e ndieni se do të ishte më e efektshme, shkruajini të tria nxitjet në tabelë dhe ftojini nxënësit t’i shkruajnë frazat e duhura që zbuluan nën secilën.

• Bazuar tek ajo që gjete në këto vargje, si do t’i përmblidhje parimet e diskutuara?

Nga Moroni 7:12–17 ne mund të zbulojmë se të gjitha gjërat që janë prej Perëndisë, na ftojnë të bëjmë mirë, të besojmë te Jezu Krishti, si dhe ta duam e t’i shërbejmë Perëndisë. Nga ana tjetër, ajo që është e keqe, na bind të mëkatojmë, ta mohojmë Jezu Krishtin ose të luftojmë kundër Perëndisë.

Nxënësit mund ta bëjnë veprimtarinë vijuese individualisht, në grupe të vogla ose si klasë.

Për të të ndihmuar t’i kuptosh mësimet e Mormonit, supozo sikur një person beson se muzika që ai ose ajo dëgjon dhe mënyra se si e përdor telefonin dhe teknologji të tjera është e mirë, por prindërit ose udhëheqësit e vet nuk bien dakord.

• Bazuar në të vërtetat që ke përcaktuar, çfarë mund të kërkojë ky person nga vetja për të zbuluar nëse muzika dhe përdorimi i teknologjisë nga ana e vet janë të mira ose jo?

Dëgjojini përgjigjet e nxënësve dhe merreni parasysh t’i shkruani ato në tabelë. Nëse nxënësit nuk i përmendin ato, merreni parasysh t’i përdorni shembujt vijues:

• Dëgjimi i kësaj muzike ose përdorimi i telefonit dhe teknologjisë sipas mënyrës sime a …

  • … e mbush mendjen time me mendime për të bërë mirë apo për të kryer mëkat?

  • … më nxit të bëj gjërat që do të bënte apo nuk do të bënte një ndjekës i Jezu Krishtit?

  • … më ndihmon t’i dua gjërat e Perëndisë, apo jo?

Vër re që mund të të nevojitet të përsiatësh individualisht për artistë ose këngë të caktuara, si edhe për aplikacione, lojëra ose media të caktuara. Gjithashtu, sasia e kohës që kalon me një veprimtari, mund të jetë një faktor i rëndësishëm për t’u marrë parasysh.

Dritë për të të ndihmuar të shohësh

Mund të kesh vënë re se në disa situata, mund të jetë e vështirë të gjykosh ndërmjet së drejtës ose së gabuarës.

Merreni parasysh t’i ndihmoni nxënësit ta përjetojnë atë që u është kërkuar ta imagjinojnë në paragrafin vijues.

Kjo mund të bëhet duke i fikur dritat dhe duke u kërkuar nxënësve të përpiqen ta përshkruajnë një figurë ose të lexojnë diçka. Më pas ndizini sërish dritat dhe ftojini ata ta përshkruajnë ose ta lexojnë atë sërish.

Me këtë imazh në mendje, vër re frazat te vargu 16 që tregojnë se si na ndihmon Shpëtimtari.

Lexoje thënien vijuese nga Presidenti Henri B. Ajring, i Presidencës së parë, për të të ndihmuar ta kuptosh Dritën e Krishtit:

“Secilit fëmijë të Atit Qiellor të lindur në botë i jepet në lindje, si dhuratë falas, Drita e Krishtit. Ju e keni ndier atë. Është ndjesia se çfarë është e drejtë e çfarë e gabuar, çfarë është e vërtetë e çfarë e rreme. Ajo ka qenë me ju që kur filloi udhëtimi juaj në jetë. …

… Ju bëni zgjedhje çdo ditë dhe gati çdo orë që ju bëjnë të vazhdoni të ecni në dritë ose ju largojnë drejt errësirës.” (Henri B. Ajring, “Të Ecim në Dritë”, Liahona, maj 2008, f. 123–124)

• Çfarë mësove rreth Dritës së Krishtit?

Për më shumë informacion mbi Dritën e Krishtit, shih te Gospel Topics [Temat e Ungjillit], “Light of Christ” [“Drita e Krishtit”], topics.ChurchofJesusChrist.org.

Lexo te Moroni 7:18–19, duke kërkuar këshillën shtesë që dha Mormoni rreth gjykimit ndërmjet së mirës dhe së keqes.

• Çfarë mendon se do të thotë “të kërkosh me zell në dritën e Krishtit”?

  Dëgjojini me kujdes përgjigjet e nxënësve. Nxënësit mund të përmendin përsiatjen në heshtje, të menduarit thellë të vendimeve dhe dëgjimin e ndërgjegjes ose zërit tonë të brendshëm. Një ide tjetër është të menduarit rreth asaj që do të na sjellë më pranë Jezu Krishtit. Nëse është e dobishme, merreni parasysh të bëni disa nga pyetjet vijuese:

• Si mund të jenë shembulli dhe mësimet e Shpëtimtarit si një dritë për të na ndihmuar të gjykojmë me saktësi ndërmjet së drejtës dhe së gabuarës sot?

• Cilat janë disa mënyra të tjera se si mund t’i dëgjojmë fjalët e Tij dhe ta ndiejmë ndikimin e Tij të na udhërrëfejnë?

Mund të jetë gjithashtu e dobishme të pyesni: “Kur patët mundësinë ta dallonit diçka si të mirë ose si të keqe për shkak të dritës së Krishtit në jetën tuaj?”

Zbatimi i asaj që mësove

Kujtoje situatën që mendove më herët, kur t’u kërkua të mendosh për diçka, që do të doje ta dalloje më mirë si diçka të mirë ose jo. Shpenzo disa minuta për të marrë parasysh me lutje se si mund t’i përdorësh parimet që mësove sot, për të përcaktuar a është e drejtë ose e gabuar. Përpiqu ta hetosh me zell me Dritën e Krishtit ndërsa përsiat për situatën. Mbaji shënim mendimet e tua në ditarin tënd të studimit.

Pyetjet në vijim mund të përdoren për ta përmbyllur orën mësimore me një diskutim rreth asaj çfarë mësuan nxënësit.

• Çfarë mësove sot që mund të të ndihmojë ta përmirësosh aftësinë tënde për të zgjedhur ndërmjet së drejtës dhe së gabuarës?

• Cilat janë dy ose tri fusha të jetës sate ku ti sheh nevojën për ta dalluar me sukses të mirën nga e keqja? Përse?

Komente dhe Informacion për Rrethanat

Çfarë bën Drita e Krishtit?

Plaku Timothi J. Daiks, i Të Shtatëdhjetëve, dha mësim:

“Në dashurinë e Tij të përsosur, Perëndia ia dhuron Dritën e Krishtit çdo personi ‘që vjen në botë’ [Doktrina e Besëlidhje 93:2] që ai të mund ta ‘dallojë të mirën nga e keqja’ [Moroni 7:16] dhe të nxitet ‘për të bërë mirë përherë’ [Moroni 7:13]. Ajo dritë, duke u shpalosur nëpërmjet asaj që shpesh e quajmë ndërgjegjja jonë, na shtyn përherë që të veprojmë e të jemi më të mirë, të jemi vetja jonë më e mirë.” (Timothi J. Daiks, “Drita Kapet pas Dritës”, Liahona, maj 2021, f. 113)

Si na ndihmon Drita e Krishtit ne dhe të tjerët?

Plaku Mark A. Breg, i Të Shtatëdhjetëve, dha mësim:

“Drita e Krishtit do të na ndihmojë që t’i shohim të tjerët nëpërmjet syve të Shpëtimtarit. Ne do të jemi më të dashur dhe të kuptueshëm ndaj mundimeve të të tjerëve. Ajo do të na ndihmojë që të jemi më të duruar me ata të cilët mund të mos adhurojnë siç adhurojmë ne apo shërbejnë siç mund të bëjmë ne. Ajo do të na ndihmojë ta kuptojmë më plotësisht planin e madh të lumturisë dhe të shohim se si të gjithë ne bëjmë pjesë në atë plan të madh e të dashur. Ajo i jep jetë, kuptim dhe qëllim gjithçkaje që ne bëjmë.” (Mark A. Breg, “Shkëlqen Gjithnjë e më Shumë, Derisa Dita Është e Plotë”, Liahona, maj 2017, f. 38)

Veprimtari Plotësuese të të Mësuarit

Një fillim i ndryshëm

Merreni parasysh të shfaqni një figurë të një qyteti ose një shtëpie dhe më pas ta ktheni atë përmbys.

Thuajuni nxënësve se Plaku Riçard J. Mejns, i Të Shtatëdhjetëve, e quajti botën tonë bashkëkohore si “të përmbysur” (“ A Celestial Connection to Your Teenage Years”, Liahona, nëntor 1997, f. 30). Ftojini nxënësit të lexojnë tek Isaia 5:20–21 dhe të tregojnë mënyrat se si bota jonë sot mund të jetë e përmbysur.

Tregojeni thënien vijuese nga Plaku Mejns:

“Si të rinj që rriteni në këtë botë të përmbysur, ju keni një sfidë të madhe të përballjes me presione të ndryshme të jetës bashkëkohore” (Richard J. Maynes, “A Celestial Connection to Your Teenage Years”, Liahona, nëntor 1997, f. 30).

Moroni 7:5–12. Me dëshirë të sinqertë

Ftojini nxënësit t’u përgjigjen pyetjeve vijuese: “Sa i rëndësishëm është qëllimi ynë kur përpiqemi fort të bëjmë vepra të mira? Përse?” Nxënësit mund të lexojnë te Moroni 7:5–12 duke kërkuar përgjigjet për këto pyetje. Ndihmojini nxënësit të kuptojnë fjalë dhe fraza si “dëshirë e sinqertë” dhe “pa zemër” që mund ta përshkruajnë përkushtimin tonë për ta ndjekur Jezu Krishtin, ose mungesën e tij. Ftojini ata të përshkruajnë mënyrat se si dikush mund t’i bëjë sa vijojnë me dëshirë të sinqertë: të lutet, ta frekuentojë kishën dhe t’u shërbejë të tjerëve. Gjithashtu, ftojini ata të tregojnë se çfarë mund të bëjë dikush për të kërkuar qëllimin e drejtë nëse nuk e ka aktualisht atë.

Ndihma ndaj dikujt për të njohur të mirën nga e keqja

Ftojini nxënësit të imagjinojnë sikur revista Për Forcën e Rinisë ka pyetjen vijuese në pjesën “Pyetje dhe Përgjigje”:

“E di se duhet të jetë e lehtë të kuptosh çfarë është e mirë dhe çfarë është e keqe dhe pjesën më të madhe të kohës mundem ta bëj. Megjithatë, ndonjëherë shokët e mi kanë arsye të vlefshme që i bëjnë dhe i besojnë ato gjëra që bëjnë. Si mund ta kuptoj se çfarë është e mirë dhe çfarë është e keqe, kur vija midis së mirës dhe së keqes nuk duket gjithmonë aq e qartë?”

Ftojini nxënësit të shkruajnë një përgjigje për këtë pyetje. Lëruni nxënësve kohë për të studiuar te Moroni 7:12–19 dhe shkrime të shenjta ose mësime profetike shtesë për këtë temë.