Zotërimi Doktrinor: Moroni 7:45–48

“Dashuria Hyjnore Është Dashuria e Pastër e Krishtit”

dy gra duke u përqafuar

Në studimin tënd të vargjeve te Moroni 7:44–48, ti mësove se si të përpiqesh ta zhvillosh dashurinë hyjnore, dashurinë e pastër të Jezu Krishtit. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargjet te Moroni 7:45–48, ta shpjegosh doktrinën që jepet mësim në këtë fragment, dhe t’i zbatosh në situata nga jeta reale parimet e marrjes së njohurisë shpirtërore.

Nxitni përsëritje të shpeshta të zotërimit doktrinor. Nxitini nxënësit të vazhdojnë t’i zotërojnë dhe përdorin fragmentet e shkrimit të shenjtë për zotërimin doktrinor. Kujtojuni atyre se zbatimi i doktrinës së përjetshme që ata e mësojnë nga këto fragmente, do t’u sigurojë drejtim dhe udhërrëfim shpirtëror gjatë gjithë jetës së tyre.

Përgatitja e nxënësve: Ftojini nxënësit të mendojnë për situata që kanë përjetuar ose dëshmuar, ku ata mund ta ushtrojnë dashurinë hyjnore.

Veprimtari të Mundshme të të Mësuarit

Ky mësim i fragmentit të zotërimit doktrinor është hartuar për t’u dhënë pas mësimit “Moroni 7:44–48”, që është mësimi kontekstual për fragmentin e zotërimit doktrinor te Moroni 7:45–48. Nëse ky mësim për fragmentin e zotërimit doktrinor duhet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Shpjego dhe mëso përmendsh

Merreni parasysh t’i ftoni nxënësit të punojnë me një partner për ta përfunduar veprimtarinë vijuese. Ftojini disa dyshe nxënësish t’ia tregojnë përgjigjet e tyre klasës.

Imagjino sikur gjatë diskutimit Eja, Më Ndiq me familjen tënde, ndërsa flisni rreth kuptimit të dashurisë hyjnore, vëllai yt më i vogël thotë diçka të ngjashme me “A nuk është dashuria hyjnore thjesht të bësh gjëra të mira për njerëzit?” Ti i thua vëllait tënd se sjellja e mirë është pjesë e dashurisë hyjnore, por që ti mësove më shumë rreth saj në seminar.

• Çfarë hollësish të tjera rreth dashurisë hyjnore do t’i tregoje vëllait tënd?

Ndihmojini nxënësit ta mësojnë përmendsh referencën e shkrimit të shenjtë dhe frazën kyç të shkrimit të shenjtë për vargjet te Moroni 7:45–48. Merreni parasysh ta kopjoni figurën vijuese në tabelë dhe ta ftoni një nxënës ta renditë me rendin e duhur referencën e shkrimit të shenjtë dhe frazën kyç të shkrimit të shenjtë duke i shkruar ato me saktësi brenda zemrës. Fshijeni pjesën e brendshme të zemrës dhe ftojeni një nxënës tjetër ta plotësojë veprimtarinë. Nxiteni secilin nxënës të vizatojë një zemër në ditarin e studimit me referencën e shkrimit të shenjtë dhe frazën kyç të shkrimit të shenjtë të shkruar me saktësi brenda saj. Ftojeni të gjithë klasën t’i thotë përmendsh së bashku me zë të lartë.

skicë e zemrës me referencën e shkrimit të shenjtë dhe frazën kyç të shkrimit të shenjtë për vargjet te Moroni 7:45–48 përreth zemrës në një rend të çrregullt

Ushtroje vënien në zbatim

Për t’i ndihmuar nxënësit t’i shqyrtojnë parimet e marrjes së njohurisë shpirtërore, merreni parasysh t’i përzieni fjalët e të tre parimeve të marrjes së njohurisë shpirtërore, siç tregohet më poshtë. Shkruajini variantet e ngatërruara në tabelë dhe ftojini nxënësit ta korrigjojnë vetë secilin parim me aq sa mbajnë mend. Nëse është e nevojshme, nxënësit mund t’i shqyrtojnë paragrafët 5–12 të pjesës “Marrja e Njohurisë Shpirtërore” të materialit Dokumenti Bazë i Zotërimit Doktrinor (2023). Pas një kohe të mjaftueshme, ftojini tre nxënës që të vijnë në tabelë dhe secili ta shkruajë njërin prej parimeve me saktësi.

1. Shqyrto me besim.

2. Kërko kuptueshmëri të mëtejshme nëpërmjet këndvështrimit të caktuar në mënyrë hyjnore.

3. Vëri në zbatim konceptet dhe pyetjet me një burim të përjetshëm.

Ftojini nxënësit të mendojnë për situata që i kanë dëshmuar ose përjetuar, ku të rinjtë mund ta ushtrojnë dashurinë hyjnore, ose përdorni disa prej skenarëve vijues.

• Olsi mërzitet shpejt nga vëllezërit dhe motrat e tij më të vogla. Ata shpesh i përgjërohen Olsit që të luajë me ta ose t’i ndihmojë për detyrat e shtëpisë. Olsi do vetëm që vëllezërit dhe motrat e tij ta lënë rehat që ai të bëjë punën e vet.

• Hera mësoi se një vajzë tjetër në klasën e saj të Të Rejave ka përhapur thashetheme për të. Hera ndihet e pështjelluar dhe e lënduar nga kjo dhe nuk është e sigurt se si të reagojë.

• Klodi dëshiron të gëzojë popullaritet në shkollë dhe shfaqet si i patrembur para shokëve të tij. Ai shpesh i përçmon shokët e tjerë të klasës dhe ua merr gjërat pa i pyetur.

Njëri prej këtyre skenarëve mund të diskutohet si klasë, ose nxënësit mund të ndahen në grupe të vogla dhe t’u caktohet një skenar për ta diskutuar. Nxitini ata të vendosin se cili prej parimeve të marrjes së njohurisë shpirtërore do të ishte më i dobishëm në skenarin e tyre dhe përse. Ftojeni secilin grup t’ia tregojë pjesës tjetër të klasës se çfarë diskutuan. Disa prej pyetjeve vijuese mund t’i udhërrëfejnë nxënësit në këtë diskutim.

Kërko kuptueshmëri të mëtejshme nëpërmjet burimeve të caktuara në mënyrë hyjnore

• Çfarë mund të tregosh nga Moroni 7:45–48 që mund t’i japë shtysë këtij personi të reagojë me më shumë dashuri hyjnore në situatën e tij?

• Cilat janë disa shkrime të shenjta ose thënie të tjera nga udhëheqësit e Kishës që mund të ndihmojnë?

Vepro me besim

• Me çfarë sfidash mund të përballet ky person ndërsa përpiqet ta zbatojë atë që ti i thua?

• Si mund të veprojë ai me besim pavarësisht këtyre sfidave?

Shqyrtoji konceptet dhe pyetjet me një këndvështrim të përjetshëm

• Si mund ta ndihmojë atë shikimi i situatës me një këndvështrim të përjetshëm që të ndiejë më shumë dashuri hyjnore për të tjerët?

• Si mund ta ndihmojë këtë person shqyrtimi i mënyrës se si Jezu Krishti i trajtoi të tjerët, që të jetë më i dashur?

Pas orës mësimore ose diskutimit në grup, merreni parasysh t’i pyesni nxënësit a ka aspekte të tjera të parimeve të marrjes së njohurisë shpirtërore që mund të jenë gjithashtu të dobishme në skenarë.

Përsëritja e zotërimit doktrinor

Gjatë një mësimi të ardhshëm, vizatoni një zemër të madhe në tabelë dhe ftojini nxënësit të kujtojnë se cila referencë e zotërimit doktrinor dhe frazë kyç lidhet me skicën. Nxiteni secilin nxënës ta shkruajë referencën (Moroni 7:45–48) dhe frazën kyç të shkrimit të shenjtë (“Dashuria hyjnore është dashuria e pastër e Krishtit”) përmendsh disa herë në ditarin e vet të studimit.