“Moronae 7:20–43: Mauaina o le Faamoemoe ia Keriso,’” Tusi Lesona a le Faiaoga o le Tusi a Mamona (2024)
“Moronae 7:20–43,” Tusi Lesona a le Faiaoga o le Tusi a Mamona
Moronae 7:20–43
Mauaina o le Faamoemoe ia Keriso
Pe na e manaomia se lagona atili o le faamoemoe i lou olaga? O Moronae, o lē na fealualuai na o ia mo le tele o tausaga ina ua mavae le faaumatiaina o lona nuu, na faamaumauina upu a lona tamā e uiga i le faamoemoe e mafai ona tatou maua ia Keriso i mea silisili atu o le a oo mai. O lenei lesona e mafai ona fesoasoani ia te oe e lagona ai le faateleina o le faamoemoe e ala ia Iesu Keriso.
Fesoasoani i tamaiti aoga ia iloa tosinaga a le Alii i o latou olaga. Vaavaai mo avanoa e faamamafa atu ai le mana faagaeetia ma le alofa mutimutivale o le Faaola e pei ona tusia i tusitusiga paia. Valaaulia tamaiti aoga e mafaufau loloto pe na faapefea ona faamāmāina e Iesu Keriso a latou avega ma fesoasoani ia i latou e onosaia faigata. Fautuaina i latou e liliu atu i le Tama Faalelagi ma Iesu Keriso ma le faatuatua.
Sauniuniga a le tamaitiiti aoga: Mafaufau e valaaulia tamaiti aoga e faitau le 1 Peteru 3:15 ma mafaufau loloto pe faapefea ona tuu atu e Iesu Keriso ia i latou le faamoemoe.
Gaoioiga e Ono Mafai Ona Aoao Ai
Taofi mau i mea lelei uma
Afai e mafai, saunia se laulau e i ai ni mea e ono mananao i ai tamaiti aoga ma mea e le mananao i ai (mo se faataitaiga, e mafai ona i ai ni meaai mananaia i luga o le laulau faapea foi ma ni fualaau faisua tuai ma pepa lole ua leai ni mea o i ai). Amata i le valaaulia o tamaiti aoga e o mai ma “taofi mau” i se aitema se tasi latou te filifilia. Fesili atu ia i latou pe aisea ua latou filifili ai mea na latou filifilia ma pe o le a latou faavasegaina o se “mea lelei.”
I le Moronae 7, na fai mai ai Mamona na ia manao e fesoasoani i lona nuu ia iloa pe mafai faapefea ona latou “taofi mau i mea lelei uma” (fuaiupu 21).
-
Ina ua faaaoga e Mamona le fasifuaitau “mea lelei,” o le a sou manatu o le a le mea sa ia faatatau i ai?
-
O a nisi o “mea lelei” faaleagaga ma faavavau e te manao e taofi mau i ai, pe maua, i lenei olaga po o le olaga a sau?
Atonu e te manatua i le Moronae 7:12–19, na aoao mai ai Mamona o mea lelei uma e mai ia Iesu Keriso. Faitau le Moronae 7:20–26, ma vaavaai mo mea na aoao mai e Mamona e uiga i le ala e maua ai nei mea lelei mai ia Keriso.
-
O le a se mea sa e mauaina?
Afai e manaomia, faamalamalama atu na faamamafa mai e Mamona e tatau ona tatou faatuatua ia Iesu Keriso. Na aoao mai Mamona e faapea, ina ia fesoasoani ia i tatou ia maua le faatuatua ia Keriso, na auina mai ai e le Tama Faalelagi agelu e aoao mai e uiga i Lona Alo.
-
O a ni tala e mafai ona e mafaufau i ai lea na auina mai ai e le Tama Faalelagi agelu e folafola mai o Iesu Keriso o le Faaola o le lalolagi?
O nisi tali e mafai ona aofia ai agelu na o mai ia Atamu ma Eva (Mose 5:6–9), Tupu o Peniamina (Mosaea 3:1–11), ma leoleo mamoe (Luka 2:10–12).
O le uiga o le faamoemoe
Ina ia fesoasoani ia te oe e saunia e aoao atili e uiga i aoaoga a Mamona e faatatau i le faamoemoe, faitau le tala lenei mai ia Elder Dieter F. Uchtdorf o le Korama a Aposetolo e Toasefululua:
Ao le’i aulia lo’u aso fanau lona 12, sa faalua ona faamalosia lo matou aiga e sosola ese mai lo matou fale ma toe amata i le lotolotoi o vevesiga, fefe, ma lē mautonu na mafua mai i le taua ma fevaevaea’iga faaupufai. O se taimi o le atuatuvale mo a’u. …
O le taimi lea o le leai o se faamoemoe ina ua mavae le Taua Lona II o le Lalolagi, na tuua ai sona aafiaga tele i le lalolagi. Na tuua ai se aafiaga tele ia te a’u.
I na taimi, i le taaligoligoa o o’u taimi tuuatoatasi, sa tele ina ou tomanatu, “Pe o i ai ea se faamoemoe o totoe i le lalolagi?” (Dieter F. Uchtdorf, “O Loo ia i Tatou le Atua,” Liahona, Me 2021, 8)
-
O a nisi o mafuaaga e lagona ai e tagata le leai o se faamoemoe i aso nei?
Mafaufau e tusi tali a tamaiti aoga i luga o le laupapa.
Sa ta’ua e Elder Uchtdorf e faapea “a o malelemo le lalolagi i le masalosalo, lototiga, inoino, ma le fefe,” sa ia maua se mea na “faatumulia [o ia] i le faamoemoe” (“O Loo ia i Tatou le Atua,” Liahona, Me 2021, 8).
O e lagonaina le leai o se faamoemoe i lou olaga? Mafaufau i mea e aumaia ia te oe le faamoemoe e ui lava i tulaga e sili ona faigata. A o faaauau pea ona e suesue i lenei lesona, vaavaai mo upumoni e mafai ona fesoasoani e faatumulia ai oe i le faamoemoe.
Ua aoao mai Mamona e uiga i le faamoemoe
Faitau le Moronae 7:40–44, ma vaavaai pe faapefea ona fesootai lo tatou faatuatua ia Iesu Keriso ma le faamoemoe.
I le avea ai ma se vaega o lenei talanoaga, atonu e te manao e faailoa atu e faapea, ua aoao mai foi Mamona, o le alofa mama e manaomia e taofi mau ai i mea lelei uma e sau mai ia Keriso. O le a talanoaina le alofa mama i le lesona e sosoo ai.
-
E faapefea ona e toe aoteleina le fuaiupu e 41 i au lava upu?
O se upumoni mai aoaoga a Mamona
O se upumoni e tasi e mafai ona tatou aoao mai ia Mamona o le afai tatou te faaalia le faatuatua ia Iesu Keriso, e mafai ona tatou maua le faamoemoe e ala i Lana Togiola ina ia faatuina mai i le ola e faavavau.
-
O le a sou manatu i le uiga o le i ai o le faamoemoe ia Iesu Keriso?
A o tali mai tamaiti aoga, fesoasoani ia latou malamalama o lenei ituaiga o faamoemoe e le o moomooga o le lalolagi. O le faamoemoe ia Iesu Keriso o le faatumulia lea i le faamautinoaga o le a iu ina tatou agavaa mo le ola e faavavau.
-
Aisea e ono manaomia ai ona tatou lotomaualalo, pe “agamalu, ma maualalo o ia i le loto” (Moronae 7:43), e faaaoga ai le faatuatua ia Iesu Keriso ma maua le faamoemoe?
Ina ia vaai i se faataitaiga o se tasi na maua le faamoemoe e ala i le faatuatua ia Iesu Keriso, toe faamanatu se tasi o tala nei. A o e faia, vaavaai pe na faapefea ona maua e le tagata le faamoemoe e ala ia Iesu Keriso.
Filifili se tasi o tala nei e faasoa atu i le vasega, po o le saunia uma o tala ma tuu atu i tamaiti aoga e filifili po o le fea o tala latou te mananao e faitau pe matamata i ai.
-
Faitau le Alema 22:12–18, le tala i le tama o le Tupu o Lamonae.
-
Faitau le Alema 36:12–21, pe matamata i le “Alma Testifies to His Son Helaman,” o loo maua i le ChurchofJesusChrist.org, mai le faailo taimi 1:30 i le 2:32.
7:8Ua Molimau atu Alema i Lona Atalii o Helamana| Alema 36-37
Ua faamatala e Alema i lona atalii o Helamana lona liua. Ua folafola atu e Alema afai e tausia e Helamana poloaiga a le Atua, o le a ia manuia. Ua fai Alema ia Helamana e tausia faamaumauga paia o le nuu.
-
Matamata i le “Finding Hope through the Resurrection of Christ” (4:41), o loo maua i le ChurchofJesusChrist.org.
4:41Finding Hope Through the Resurrection of Christ
Jesus Christ is central to our Heavenly Father’s plan of salvation. Through our Savior’s atonement and resurrection, He made it possible for us to live again with our loved ones for eternity.
-
Matamata i le “The Master Healer,” o loo maua i le ChurchofJesusChrist.org, mai le faailo taimi 8:49 i le 11:53.
13:0The Master Healer
Sister Stephens testifies of the Savior’s power to heal us from our sins, from the unrighteous actions of others, and from difficulties of mortality.
Valaaulia tamaiti aoga e faasoa mai se taimi na latou lagonaina ai le faamoemoe e ala i le faaalia o le faatuatua ia Iesu Keriso ma pe na ono faapefea ona ese le tulaga e aunoa ma lena faamoemoe.
E taua le matau e tusa lava pe tatou te faaalia le faatuatua ia Iesu Keriso ma maua le faamoemoe mo faamanuiaga ua Ia ofoina mai, tatou te oo lava i taimi faigata ma tofotofoina i o tatou olaga. Ae a o faaauau pea ona tatou faaalia le faatuatua i le Faaola ma taulai atu ia te Ia ma le ola e faavavau ua Ia faaavanoa mai ia i tatou, o le a tatou maua le faamoemoe tatou te sailia.
Mo le gaoioiga lenei, mafaufau e valaaulia tamaiti aoga e galulue faatasi i ni vaega toalaiti e faatumu lea pepa e tufa atu.
Mauaina o le Faamoemoe ia Iesu Keriso
Tusi Lesona a le Faiaoga o le Tusi a Mamona (2024)—“Moronae 7:20–43: Mauaina o le Faamoemoe ia Keriso”
Ina ia fesoasoani ia te oe e mafaufau i le auala e mafai ai e le i ai o le faamoemoe ona o Keriso ona aafia ai o tatou olaga i tulaga eseese, filifili se tasi o ata faataitai nei (pe fai sa oe lava ata faataitai):
-
Ua toe pa’u atu Iakopo i mausa o le agasala lea na ia manatu ua ia tuua.
-
Ua le toe sau le tamā o Peka i le lotu ma ua tautino mai ua le toe talitonu o ia i le Atua.
-
O loo tauivi Analise e taulima uma ana matafaioi i le aoga, galuega, ma le aiga.
Faauma fasifuaitau nei e lua, ma ta’u mai pe faapefea ona ese le vaai a le tagata i lona tulaga:
-
A aunoa ma le faamoemoe ia Iesu Keriso,
-
Faatasi ai ma le faamoemoe ia Iesu Keriso,
Talanoaina fesili nei:
-
E mafai faapefea e lenei tagata ona faaali le faatuatua ia Iesu Keriso? Vaai pe mafai ona e maua se mau e faaaofia ai i lau tali.
-
E mafai faapefea e le faaalia o le faatuatua i lenei auala ona fesoasoani i lenei tagata ia maua atili le faamoemoe e ala ia Iesu Keriso?
-
Mata o le a sau tala e fai atu i lenei tagata pe afai na te fesili atu ia te oe pe aisea ua ia te oe ai le faamoemoe ia Iesu Keriso? (Tagai 1 Peteru 3:15.)
© 2023 e le Intellectual Reserve, Inc. Ua taofia aiā tatau uma.
A uma ona fai e vaega le gaoioiga, valaaulia i latou e fai se sooupu e faasoa mai se tasi o mea na latou talanoaina, latou te manatu o le a sili ona aoga.
Faasoa atu lau molimau e uiga i le i ai o le faamoemoe i le Faaola. Ia manatua o nisi o au tamaiti aoga atonu o loo saili mo se faamoemoe sili atu i o latou olaga. O lau molimau ma molimau a a latou tupulaga e mafai ona avea o se faamanuiaga sili ia i latou ma musuia ai i latou i le faamoemoe sili atu.