Atamai i Aoaoga Faavae: Moronae 7:45–48

“O le alofa mama o le alofa le pona lea o Keriso”

I lau suesuega o le Moronae 7:44–48, ua e aoao ai i le auala e saili ai e atiina ae le alofa mama, le alofa le pona lea o Iesu Keriso. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Moronae 7:45–48, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Uunaia le fai soo o le atamai i aoaoga faavae. Uunai tamaiti aoga e faaauau le taulotoina ma le faaaogaina o fuaitau o mau o le atamai i aoaoga faavae. Faamanatu atu ia i latou o le faaaogaina o aoaoga faavae e faavavau latou te aoaoina mai nei fuaitau o le a tuuina atu ai le taialaga faaleagaga ma le taitaiga i o latou olaga atoa.

Sauniuniga a le tamaitiiti aoga: Valaaulia tamaiti aoga e mafaufau i ni tulaga na latou oo i ai pe molimauina lea e mafai ona latou faatinoina ai le alofa mama.

Gaoioiga e Ono Mafai Ona Aoao Ai

O lenei lesona o le atamai i aoaoga faavae ua fuafuaina ia aoaoina atu pe a uma le lesona o le “Moronae 7:44–48,” o le lesona e faatatau mo le fuaitau o le atamai i aoaoga faavae o le Moronae 7:45–48. Afai e manaomia le toe tuu atu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

Mafaufau e valaaulia tamaiti aoga e galulue ma se paga e faamaea le gaoioiga lenei. Valaaulia ni nai paga o tamaiti aoga e faasoa mai a latou tali i le vasega.

Vaai faalemafaufau i le taimi o se talanoaga o le Sau, Mulimuli Mai ia te A’u ma lou aiga, a o talanoa e uiga i le uiga o le alofa mama, ua fai mai lou uso laitiiti se mea faapenei, “Pe le o le alofa mama le na o le faia o ni mea lelei mo tagata?” E te ta’u atu i lou uso o le agalelei o se vaega o le alofa mama ae sa e aoao atili e uiga i ai i le seminare.

• O a isi faamatalaga e uiga i le alofa mama o le a e ta’u atu i lou uso?

Fesoasoani i tamaiti aoga e tauloto le mau faasino ma le fasifuaitau autu o le mau mo le Moronae 7:45–48. Mafaufau e kopi le ata lenei i luga o le laupapa ma valaaulia se tamaitiiti aoga e toe faatulaga le mau faasino ma le fasifuaitau autu o le mau e ala i le tusi faasa’o i totonu o le fatu. Tape totonu o le fatu, ma valaaulia se isi tamaitiiti aoga e faauma le gaoioiga. Ia uunaia tamaiti aoga taitasi e tusi se ata o se fatu i totonu o a latou api faamaumu mo suesuega faatasi ai ma le mau faasino ma le fasifuaitau autu o le mau e tusi sa’o ai i totonu. Valaaulia le vasega atoa e tauloto leotele faatasi.

Faataitai le faaaogaina

Ina ia fesoasoani i tamaiti aoga e toe faamanatu ia mataupu faavae o le mauaina o le malamalama faaleagaga, mafaufau e faafefiloi upu o mataupu faavae e tolu o le mauaina o le malamalama faaleagaga, e pei ona faaalia i lalo. Tusi lomiga fefiloi i luga o le laupapa ma valaaulia tamaiti aoga e faasa’o mataupu faavae taitasi e i latou lava mai o latou manatuaga. A manaomia, e mafai e tamaiti aoga ona toe faamanatu parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2023). A uma ua lava se taimi, valaaulia ni tamaiti aoga se toatolu e o mai i le laupapa ma tusi faasa’o e i latou taitoatasi se mataupu faavae se tasi.

1. Suesue i le faatuatua.

2. Saili le malamalama atili e ala i manatu faalelagi ua atofaina.

3. Faatino manatu faavae ma fesili faatasi ai ma se punavai e faavavau.

Valaaulia tamaiti aoga e mafaufau i ni tulaga na latou molimauina pe oo i ai lea e mafai ai e le autalavou ona faatino le alofa mama, pe faaaoga nisi o ata faataitai nei.

• E faigofie lava ona ita Oskar i ona tei laiti. E masani ona latou augani atu ia Oskar e taaalo ma i latou pe fesoasoani atu i a latou meaaoga. Na o le manao lava o Oskar i ona tei e tuua na o ia ina ia mafai ona fai ana lava mea.

• Sa iloa e Hae-Won o se isi teineitiiti i lana vasega a Tamaitai Talavou ua faasalalauina ni tala feaveai e uiga ia te ia. E lagona e Hae-Won le le mautonu ma le tiga i lenei mea ma e le o mautinoa pe faapefea ona tali atu.

• E manao Kapo ia lauiloa i le aoga ma foliga le fefe i luma o ana uo. E masani ona ia ta’ufaatauvaaina isi tagata o le vasega ma ave a latou mea e aunoa ma le fesili.

O se tasi o nei ata faataitai e mafai ona talanoaina o se vasega, pe mafai foi ona vaevae tamaiti aoga i ni vaega toalaiti ma atofa atu i ai se ata faataitai e talanoaina. Uunaia i latou e filifili po o fea o mataupu faavae o le mauaina o le malamalama faaleagaga o le a sili ona aoga i la latou ata faataitai ma pe aisea. Valaaulia vaega taitasi e faasoa mai i le vasega atoa mea na latou talanoaina. O nisi nei o fesili e mafai ona taiala ai tamaiti aoga i lenei talanoaga.

Saili le malamalama atili e ala i punavai paia filifilia

• O le a se mea e te ono faasoa atu mai le Moronae 7:45–48 e mafai ona faaosofia ai lenei tagata e tali atu ma le alofa mama sili atu i o latou tulaga?

• O a nisi o mau po o saunoaga mai taitai o le Ekalesia e ono mafai ona fesoasoani i ai?

Faatino i le faatuatua

• O a ni luitau e ono feagai ma lenei tagata a o latou taumafai e faaaoga mea e te faasoa atu ia i latou?

• E mafai faapefea ona latou faatino i le faatuatua e ui lava i nei luitau?

Iloilo manatu faavae ma fesili faatasi ai ma se vaaiga e faavavau

• E mafai faapefea e le vaai atu i le tulaga ma se vaaiga e faavavau ona fesoasoani ia te ia e lagona atili ai le alofa mama mo isi?

• E mafai faapefea e le suesueina o le ala na taulimaina ai e Iesu Keriso isi ona fesoasoani i lenei tagata ia sili atu ona agaalofa?

A uma le talanoaga a le vasega po o le vaega, mafaufau e fesili i tamaiti aoga pe o i ai nisi vaega o mataupu faavae o le mauaina o le malamalama faaleagaga lea e ono fesoasoani foi i ata faataitai.

Toe faamanatu o le atamai i aoaoga faavae

I le taimi o se lesona i le lumanai, tusi se fatu tele i luga o le laupapa ma valaaulia tamaiti aoga e manatua po o le fea o mau faasino o le atamai i aoaoga faavae ma le fuaitau autu o le mau e fesootai i le ata. Uunaia tamaiti aoga taitoatasi e tusi le mau faasino (Moronae 7:45–48) ma le fasifuaitau autu o le mau (“O le alofa mama o le alofa le pona lea o Keriso”) mai le manatua i ni nai taimi i a latou api faamaumau mo suesuega.