Moronae 7:44–48

“O Le Alofa Le Pona o Keriso”

Mafaufau i taimi na e lagonaina ai le alofa faaKeriso. O le a se eseesega ua faia e le alofa faaKeriso i lou olaga? Na tusifaamaumau e Moronae le faaiuga o le lauga a lona tamā, o Mamona, na tuuina atu i se sunako i tausaga na mavae atu. Na aoao mai e Mamona le ala e “taofi mau i mea lelei uma” (Moronae 7:20, 25), aemaise lava le alofa mama, “o le alofa le pona lea o Keriso” (Moronae 7:47). O lenei lesona ua faamoemoe e fesoasoani ia te oe e malamalama ai ma saili le alofa mama i lou olaga.

Saili le meaalofa o le alofa mama. Na aoao mai Mamona e mafai ona tatou valaaulia atoatoa atili le meaalofa o le alofa mama e ala i le tatalo faatauanau mo lena mea (tagai Moronae 7:48). Ole atu i le Tama Faalelagi e faatumu lou loto i le alofa mama mo au tamaiti aoga. O au taumafaiga faamaoni e faalautele atu le agaalofa ma le malamalama e mafai ona fesoasoani i au tamaiti aoga ia lagona le alofa mama o le Faaola.

Sauniuniga a le tamaitiiti aoga: Valaaulia tamaiti aoga e mafaufau i faataitaiga na faaalia ai e le Faaola le alofa, faapea foi ma faataitaiga o le alofa faaKeriso i aso nei.

Gaoioiga e Ono Mafai Ona Aoao Ai

Alofa faaKeriso

Afai e mafai, mafaufau e amata le vasega i le faaali atu po o le faitauina o se tasi o tala nei e uiga i se tasi o loo aapa atu i le alofa. Valaaulia tamaiti aoga e mafaufau loloto i le eseesega e mafai ona faia e le alofa faaKeriso.

• Ua tuuina atu ma le le manatu faapito e se tamaitiiti talavou i se isi tamaitiiti o loo manaomia le fesoasoani. Matamata i le “The Coat” (2:07), o loo maua i le ChurchofJesusChrist.org, pe faitau le tala, o se tala moni mai le olaga o Peresitene Heber J. Grant a o laitiiti (“The Coat,” Friend, Mat. 2012, 16–17).

• Nai lo le faia o se mea ula i se tagata ese, sa tonu i ni alii se toalua e fesoasoani i ai. Matamata i le “Gordon Hinckley: Lessons I Learned as a Boy” (4:04), o loo maua i le ChurchofJesusChrist.org.

• Na aapa atu se vaega o tamaitai talavou i le agalelei ma le alofa mama i se tamaitiiti aoga e i ai se manaoga faapitoa. Matamata i le “Charity: An Example of the Believers” (4:50), o loo maua i le ChurchofJesusChrist.org.

• Aisea e te manatu ai o le alofa faaKeriso e mafai ona avea ma se faatosinaga mamana i o tatou olaga?

• O ai na avea ma se faataitaiga o le alofa faaKeriso i lou olaga?

Mafaufau e valaaulia tamaiti aoga e iloilo e i latou lava pe o faapefea ona latou atiina ae le alofa mama. O le gaoioiga lea o se tasi lea o auala e mafai ona latou faia ai.

Na aoao mai e Mamona ma le Aposetolo o Paulo e faapea, o le atiina ae o le alofa faaKeriso e taua mo lo tatou alualu i luma (tagai Moronae 7:44; 1 Korinito 13:2). Ina ia fesoasoani ia te oe e iloilo po o le a le lelei o lou atiina ae o le alofa faaKeriso, mafaufau loloto i le moni o faamatalaga nei mo oe i se fuafaatatau o le 1 i le 5 (1 = e le moni lava; 5 = e moni i taimi uma):

• Ou te taumafai e fesoasoani ma auauna atu i isi, ae maise pe a o latou tauivi pe lotovaivai.

• Ou te taumafai ia agalelei, onosai, ma faamagalo atu i isi, e tusa lava pe faigata ona galulue faatasi ma i latou.

• Afai e talafeagai, ou te ta’u atu i isi ou te alofa ia i latou ma manatu popole mo i latou.

A o e suesue i le Moronae 7, ole atu i le Alii e fesoasoani ia te oe ia malamalama ma saili le alofa mama.

O le lauga a Mamona e uiga i le alofa mama

E lata i le faaiuga o lana talafaamaumau, sa faaaofia ai e Moronae se lauga a lona tamā, o Mamona, na tuuina atu i “soo fifilemu o Keriso” (Moronae 7:3). Na aoao atu e Mamona mataupu faavae o le alofa lea, ana faapea e faalogo ma ua’i atu i ai, na semanu e taofia ai le faatafunaga o sa Nifae. O nei aoaoga o le a alagatatau foi ia Moronae, o lē na molimauina le faatafunaga matautia o sa Nifae e sa Lamana ma fealualuai ai na o ia mo le tele o tausaga.

Faitau le Moronae 7:47 ma maka le fasifuaitau o loo faamatala ai le alofa na aoao mai e Mamona.

Mafaufau e tusi le upumoni lenei i luga o le laupapa: O le alofa mama o le alofa le pona lea o Keriso.

Ua faia e Iesu Keriso le faataitaiga atoatoa mo i tatou i le auala e alolofa atu ai i isi. Faitau le Moronae 7:45–48, ma vaavaai mo fasifuaitau e (1) faamatala atili ai le alofa mama, po o le auala e alofa ai e pei o le Faaola, ma le (2) faateleina ai lou manao e atiina ae le alofa mama i lou olaga.

O leMoronae 7:45–48 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga ese ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Ina ia faaopoopo se eseesega ma le anoa i lenei gaoioiga, e mafai ona e tuuina se ata o le Faaola i luga o le laupapa. Faataamilo i le ata, tusi ai fasifuaitau e maua e tamaiti aoga. Afai e aoga, fesoasoani i tamaiti aoga ia malamalama i faamatalaga nei.

E mafai foi ona fesoasoani faauigaga nei:

• “talitiga” = tumau i tofotofoga ma le onosai

• “e le losilosivale” = e le lotovale i isi

• “e le faafefeteina” = lotomaualalo

• “e le sailia e ia ana lava mea” = e tuu faamuamua le Atua ma manaoga o isi nai lo ia lava

• “e le faaitaitagofie” = e le faigofie ona ita

• “e talitonu i mea uma” = talia upumoni uma

Mafaufau e maka mai le fasifuaitau “e le uma le alofa mama” i le fuaiupu 46 e oo i le fasifuaitau “e tumau e faavavau” i le fuaiupu 47. Na aoao mai Elder Jeffrey R. Holland o le Korama a Aposetolo e Toasefululua:

O le olaga e i ai lana faalumaga o le fefe ma le toilalo. E i ai taimi e le atoatoa ai. O nisi taimi ua faatoilaloina i tatou e tagata, po o le tamaoaiga po o pisinisi po o faigamalo e faatoilaloina i tatou. Ae peitai e tasi le mea i taimi po o le faavavau e le faatoilaloina i tatou—o le alofa le pona o Keriso. (Jeffrey R. Holland, Christ and the New Covenant: The Messianic Message of the Book of Mormon [1997], 337)

• Aisea e te manatu ai o le a le faatoilaloina lava e le alofa le pona o Keriso i tatou?

• E mafai faapefea e le alofa o le Faaola ona fesoasoani ia i tatou i auala e leai se isi mea e mafai ona faia?

Na aoao mai Peresitene Thomas S. Monson (1927–2018) e uiga i le auiliiliga o le alofa mama. Afai e mafai, matamata i le “Charity Never Faileth,” o loo maua i le ChurchofJesusChrist.org, mai le taimi 15:05 i le 17:22. Pe faitau le saunoaga, e amata i le “Ou te mafaufau i le alofa mama” ma faaiu i le “tetee atu i le lagona e faavasega ai isi” (“E Le Uma le Alofa,” Liahona, Nov. 2010, 124). Vaavaai mo ni fuaitau faaopoopo na faaaoga e Peresitene Monson e faamatala ai le alofa le pona o Keriso.

Valaaulia tamaiti aoga e faasoa mai mea na latou faalogo i ai pe faitauina ma tusi ni fuaitau faaopoopo po o upu autu faataamilo i le ata o le Faaola.

O au fesili e uiga i le alofa mama

O a ni au fesili o i ai e uiga i le, o le a le alofa mama po o le e faapefea ona faatumulia i lenei alofa?

Mafaufau e tusi fesili a tamaiti aoga i luga o le laupapa.

Saili le taitaiga a le Agaga Paia ia iloa ai pe tatau i tamaiti aoga ona fai taitoatasi le gaoioiga lenei pe fai i vaega toalaiti.

Ina ia fesoasoani e tali au fesili, ia fai mea nei:

1. Suesue i aoaoga nei a le Faaola e uiga i le alofa po o le alofa mama: Mataio 5:43–44; Mataio 22:37–40; Ioane 15:12.

2. Mafaufau i se tala faatusipaia i se taimi na faapupula mai ai e le Faaola le alofa mama. Sue ma faitau le faataitaiga na e mafaufau i ai, pe faaaoga se tasi o mea nei:

   1. Sa taumamafa faatasi le Faaola ma telona ma tagata agasala (tagai Mataio 9:10–13). (O se telona o se ao lafoga mo tagata Roma, lea na faatoilaloina Isaraelu i lena taimi.)

   2. Na laveai ma aoaoina e le Faaola le fafine na maua o mulilua (tagai Ioane 8:1–11).

   3. Na puapuagatia, togiola, ma maliu le Faaola mo tagata uma (tagai Luka 22:41–44; 23:33–34; 1 Nifae 19:9; Mataupu Faavae ma Feagaiga 19:16–19).

   4. Sa faamaloloina ma faamanuiaina e le Faaola tagata o le atu Amerika (tagai 3 Nifae 17:5–12, 21–24).

3. Mafaufau i ni aafiaga i se taimi na e lagonaina ai le alofa le pona o loo i ai i le Tama Faalelagi ma Iesu Keriso mo oe po o se taimi na e lagonaina ai le alofa mama i se isi tagata.

Valaaulia tamaiti aoga e faasoa mai mea sa latou aoaoina pe manatuaina ma pe ono faapefea ona fesoasoani e tali ai a latou fesili.

Auala e maua ai ma faaalia ai le alofa mama

Mafaufau e faailoga le apoapoaiga a Mamona ia “tatalo atu i le Tamā ma le malosi atoa o le loto, ina ia faatumulia outou i lenei alofa” (Moronae 7:48).

• O le a sou manatu e mafai faapefea e le tatalo i le Tama Faalelagi ona fesoasoani e faatumulia ai i tatou i le alofa mama?

Atonu e aoga le ta’u atu i tamaiti aoga o le alofa mama o se meaalofa paia lea e sau mai le Tama Faalelagi e fesoasoani ia i tatou ia avea atili e faapei o Iesu Keriso. E mafai ona tatou faia le mea sili tatou te mafaia e mulimuli ai i le faataitaiga a Iesu Keriso, ae mulimuli ane, o le meaalofa o le alofa mama e sau mai le Tama Faalelagi e ala i le Togiola a Lona Alo.

Fesoasoani i tamaiti aoga e fatu se ata faataitai talafeagai lea e mafai ai e le tali a se talavou ona faaalia ai pe ua faatumulia i latou i le alofa mama pe leai. Ona tuu atu lea i tamaiti aoga e talanoaina fesili nei.

• E tusa ai ma mea ua e aoaoina mai le Moronae 7:45, 47–48 ma le faataitaiga a le Faaola, e mafai faapefea ona e faaali atu le alofa faaKeriso i lenei tulaga?

• E mafai faapefea ona fesoasoani le tatalo faamaoni ia te oe e tali atu ai ma le alofa i lenei tulaga?

• O a ni luitau e ono feagai ma oe a o e taumafai e faaaoga mea ua e aoaoina? E mafai faapefea ona e faatino i le faatuatua e oo lava i nei luitau?

Faaalu sina taimi e tusi ai i lalo mea e te manao e fai ia malamalama atili ai ma atiina ae le uiga o le alofa mama.

Manatu ma Talaaga o Faamatalaga

E mafai faapefea ona tatou iloa pe o ia i tatou le alofa mama?

Na aoao mai Elder Marvin J. Ashton (1915-94) o le Korama a Aposetolo e Toasefululua:

Atonu o le alofa moni maoae o le a maua pe a tatou agalelei i le tasi ma le isi, pe a tatou le faamasino atu pe faatusatusa se isi tagata, pe a tatou taumafai e mafaufau i mea sili e uiga i le tasi ma le isi, pe gugu foi e aua le faia se tala. O le alofa mama o le talia lea o uiga e ese, vaivaiga, ma faaletonu o se tasi; ma onosai i le isi tagata ua ia tuu i tatou i lalo; pe o le tetee atu foi i le lagona o le faaonoono pe a le taulimaina e le isi tagata se mea i se ala atonu sa tatou faamoemoe i ai. O le alofa mama o le musu lea e faaaoga vaivaiga o le isi tagata mo so tatou lelei, ma naunau e faamagalo atu i se tasi ua faatiga mai ia i tatou. O le alofa mama o le faamoemoe lea i mea sili ona lelei mai le tasi i le isi. (Marvin J. Ashton, “The Tongue Can Be a Sharp Sword,” Ensign, Me 1992, 19)

O a nisi faataitaiga o le auala e faaali atu ai le alofa mama?

Sa faasoa mai e Elder Neil L. Andersen ni faataitaiga se lua o le alofa mama. Matamata i le “Two Examples of Charity” (2:11).

Sa faamatala e Elder D. Todd Christofferson se alii sa auauna atu i se aiga sulufai. Faitau i le “Come to Zion,” e amata i le “Ou te manatua le tala” ae faaiu i le “foai moni atu” (Liahona, Nov. 2008, 40). Pe matamata le vitio mai le taimi faailo 13:58 i le 15:59.

Sa faamatala e Peresitene Gordon B. Hinckley (1910–2008) e uiga i se alii talavou sa lei faaalia i ai le alofa mama e tagata o le Ekalesia ae na mulimuli ane faia se uo moni o le sa faaalia le alofa faaKeriso. Matamata i le “The Need for Greater Kindness” mai le taimi 6:32 i le 11:34.

Sa faamatala e Peresitene Susan W. Tanner, o le sa avea muamua ma Peresitene Aoao o Tamaitai Talavou, le tala ia Ray Hinton, o se alii na molia sese sa faasalaina i le oti lea na aapa atu i isi i le alofa. Matamata i le “The Greatest of These Is Charity” (36:41) mai le taimi 17:28 i le 21:50.

Na ofoina mai e Elder Jeffrey R. Holland o le Korama a Aposetolo e Toasefululua malamalamaaga loloto lenei:

O le alofa mama moni e na o le tasi lava le taimi na iloa ai. O loo faaalia atoatoa ma le mama i le alofa manumalo, faaiu ma le togiola a Keriso mo i tatou. … E pei ona faataitaia e Keriso e faapea, “e le uma le alofa.” O le alofa moni lena—lona alofa le pona mo i tatou—a aunoa ma lena o le a leai i tatou, leai se faamoemoe, mai alii ma tamaitai uma lava e sili le faanoanoa. E moni lava, o i latou e maua ua i ai faamanuiaga o lona alofa i aso amulī—o le Togiola, o le Toetu, ola e faavavau, folafolaga e faavavau—e mautinoa lava o le a lelei ia i latou. (Jeffrey R. Holland, Christ and the New Covenant: The Messianic Message of the Book of Mormon [1997], 336.)

Gaoioiga Faaopoopo e Aoao Ai

O se isi amataga

Ina ia saunia tamaiti aoga e talanoaina le alofa mama, mafaufau e fai atu ia i latou e tali mai ae le faailoaina i latou i le fesili lenei:

• O a ni uiga e sili ona e fiafia i ai, talisapaia, ma faamemelo i ai e uiga i tagata o lau vasega?

Faitau leotele a latou tali i le vasega. Afai e toatele le vasega, mafaufau e faitau nisi o tali i vasega i le lumanai. Atonu o se mea atamai le faaaofia ai faalilolilo o nisi o au lava tali e uiga i tamaiti aoga o e atonu e itiiti le faailoaina e a latou tupulaga.

Ona fesili atu lea:

• O a ni uiga e sili ona e fiafia i ai, talisapaia, ma faamemelo i ai e uiga ia Iesu Keriso?

A o latou suesueina le lesona, valaaulia tamaiti aoga e vaavaai mo se tasi o uiga auaumama silisili o le Faaola ma pe faapefea ona atiina ae ia i tatou lava.

Moronae 7:46. A aunoa ma le alofa mama, o i tatou o meanoa

A uma ona faitau le Moronae 7:46, valaaulia tamaiti aoga e faasoa mai pe aisea latou te manatu ai na aoao mai ai Mamona o i tatou o se mea noa pe a aunoa ma le alofa mama. Mafaufau e valaaulia i latou e suesue i aoaoga a le Aposetolo o Paulo e uiga i le alofa mama i le 1 Korinito 13 mo se malamalamaaga faaopoopo. Mafaufau e fai atu fesili e pei o nei:

• Aisea e ono le atoatoa ai isi uiga lelei tatou te maua pe a leai le alofa mama?

• E mafai faapefea e le taumafai mo le alofa mama ona fesoasoani ia tatou “faapei” ai o le Faaola? (Moronae 7:48).