Moronae 8

“O Fanau Laiti Ua Ola ia Keriso”

I ana tusitusiga, sa faasoa mai ai e le perofeta o Moronae se tusi na tusi atu e lona tama o Mamona, ia te ia, e faatatau i le papatisoga o tamaiti laiti. O tusitusiga a Mamona e uiga i le mataupu na pogai mai i se faaaliga na ia maua mai ia Iesu Keriso. O loo faaalia i le faaaliga le mana o le Togiola a le Faaola ma le ala e aafia ai tamaiti laiti. O lenei lesona ua faamoemoe e fesoasoani ia te oe e malamalama atili ai pe aisea e le manaomia ai e tamaiti laiti le papatisoga ma mea o loo aoao mai ai i tatou e uiga i le Tama Faalelagi ma Iesu Keriso.

Tuu atu i tamaiti aoga ni avanoa e talanoaina ai upumoni o le talalelei. Faaavanoa se taimi mo tamaiti aoga e faataitai ai ona talanoa e uiga i mea o loo latou aoaoina e uiga i le Faaola ma Lana talalelei. E mafai ona fesoasoani lenei mea i tamaiti aoga e teuloto ma manatua ai nei upumoni ma faailoa manino atu ai. O lenei faiga e mafai foi ona faateleina ai le talitonuga o tamaiti aoga e faapea, e mafai ona latou faasoa atu upumoni i isi faatulagaga.

Sauniuniga a le tamaitiiti aoga: Atonu e te faasoa atu le tala mai le amataga o le lesona po o se mea e talitutusa ma fai atu i tamaiti aoga e mafaufau pe faapefea ona latou tali atu i lea tulaga.

Gaoioiga e Ono Mafai Ona Aoao Ai

E faapefea ona e tali atu i ai?

Mafaufau e faaali atu le vitio lenei pe faasoa atu le tala i au lava upu.

Faitau le tala lenei na faasoa mai e Peresitene Boyd K. Packer (1924–2015) o le Korama a Aposetolo e Toasefululua, pe matamata i le “E Taitaiina Foi i Latou e le Tama Itiiti” mai le taimi faailo 4:42 i le 5:59, o loo maua i le ChurchofJesusChrist.org. Manatu faapea o oe o se tasi o faifeautalai o loo i ai i lea tulaga.

Sa galulue ni faifeautalai se toalua i atumauga o le itu sasae o le Iunaite Setete. O se tasi aso, mai se tumutumu mauga, sa la vaaia ai ni tagata o potopoto i se nofoaga taalaelae e mamao lava i lālō. Sa le i toatele ni tagata na masani ona aoaoina e faifeautalai, o lea na la o atu ai loa i le nofoaga taalaelae lea.

Sa malemo se tamaitiiti, ma e ao ona fai se sauniga o le maliu. Sa aami e matua le faifeau e “lauga” i le falelauasiga o le la tama. Sa solomuli ia faifeautalai a o faasaga atu le faifeau sa aami i le tama ma le tina faavauvau ma amata lana lauga. Afai sa faamoemoe e matua ia maua se faamafanafanaga mai lenei faifeau, o le a le fiafia lava i la’ua.

Sa ia matua otegiaina lava i laua mo le le papatisoina o le la tama laitiiti. Sa la tolopoina ona o lea mea ma lea mea, ma o lea la ua tuai tele. Sa ia ta’u sa’o atu ia i la’ua ua alu atu nei le la tama i seoli. O lo la faatamala. Sa tuua’ia i laua mo le faanoanoa e le gata [o le la atalii].

Ina ua uma le lauga ma ufitai foi le tuugamau, sa faalatalata atu ia faifeautalai i matua faavauvau. “O i ma’ua o auauna a le Alii,” sa la ta’u atu ai i le tina, “ma ua ma o mai ma se savali mo oulua.” (Boyd K. Packer, “E Taitaiina Foi i Latou e le Tamaitiiti,” Liahona, Me 2012, 7)

Faatulaga lau tali i le fesili lenei i se fua faatatau o le 1 i le 4, ma le (1) le mautinoa, (2) fai sina mautinoa, (3) mautinoa, ma le (4) matuai mautinoa.

• O le a sou lagona mautinoa i le aoao atu ma le faamafanafanaina o nei matua faavauvau ma fesoasoani ia latou lagona le alofa o le Alii?

O le a maua e tamaiti aoga le avanoa i se taimi mulimuli ane o le lesona e faasoa mai ai pe faapefea ona latou tali atu i lea tulaga.

A o e suesueina le Moronae 8, mafaufau pe mafai faapefea ona e fesoasoani i nei matua ia malamalama atili i le Togiola a Iesu Keriso e faatatau i fanau laiti. Mafaufau foi pe mafai faapefea e upumoni mai le Moronae 8 ona fesoasoani ia te oe e malamalama atili ai i le agalelei ma le alofa mutimutivale o le Tama Faalelagi ma Iesu Keriso.

O tamaiti laiti e atoatoa

A o lei leva ona valaauina i le galuega a Iesu Keriso, sa maua ai e Moronae se tusi mai lona tamā, o Mamona. Na tusi atu Mamona i lona “atalii pele” (Moronae 8:2) e faapea sa ia “manatu pea ia te [ia] i [ana] talosaga” (Moronae 8:3). Sa ia fautuaina Moronae e uiga i finauga na tulai mai i totonu o sa Nifae e uiga i le papatisoina o tamaiti laiti. Mulimuli ane i lona olaga, na faaopoopo ai e Moronae lenei tusi i lana faamaumauga i papatusi auro.

Faitau le Moronae 8:4–8, ma vaavaai pe na faapefea ona tali atu Mamona ina ua ia faalogo i le finauga.

Valaaulia tamaiti aoga e faasoa mai soo se malamalamaaga sa latou maua mai nei fuaiupu.

Mafaufau e tusi le siata lenei i luga o le laupapa ma faatulaga tali a tamaiti aoga i koluma talafeagai. Fai i tamaiti aoga e faasoa mai pe aisea e ono taua ai pe anoa o latou malamalamaaga.

Kopi le siata lenei i lau api faamaumau mo suesuega, ma tusi mea ua e aoaoina mai nei fuaiupu. O le a e faaopoopo atu i lenei siata i se taimi mulimuli mai o le lesona.

Aisea e le manaomia ai e tamaiti laiti le papatisoga	O mea ua tatou iloa e uiga i le Tama Faalelagi ma Iesu Keriso

O se tasi o upumoni e mafai ona tatou aoao mai i nei fuaiupu o le, o tamaiti laiti ua atoatoa e ala i le Togiola a Iesu Keriso.

O se meafaigaluega aoga mo le suesueina o mau o le faaaoga lea o vaefaamatalaga. Matau le vaefaamatalagao o loo sosoo ma le upu “atoatoa” i le fuaiupu 8.

Faitau ia le itiiti ifo ma le tasi ia fuaiupu nei mai le vaefaamatalaga, ma vaavaai pe aisea ua atoatoa ai tamaiti laiti:

• Mataupu Faavae ma Feagaiga 29:46

  Atonu foi e te manao e faitau tamaiti aoga le fuaiupu 47, lea o loo ta’ua ai e le Alii e le mafai e tamaiti ona agasala seia oo ina mafai ona latou tali atu. Ua fetalai mai le Alii e amata mafai ona tali atu tamaiti i Ona luma i le valu tausaga le matutua. O faaaliga e uiga i lenei upumoni o loo maua i le Faaliliuga a Iosefa Samita o le Kenese 17:11 ma i le Mataupu Faavae ma Feagaiga 68:25–27. Mafaufau e faasoa atu nisi po o mea uma nei i tamaiti aoga pe afai e i ai ni a latou fesili.

• Mataupu Faavae ma Feagaiga 74:7

• O le a le uiga o le “ua atoatoa tamaiti laiti” i le Moronae 8:8 ?

E le manaomia e tamaiti laiti le papatisoga

Mafaufau e tuu tamaiti aoga i ni paga ma valaaulia paga taitasi e faitau se tasi o seti nei o fuaiupu.

Na tuuina mai e Mamona ni malamalamaaga faaopoopo e fesoasoani tatou te aoao atili ai e uiga i le Tama Faalelagi ma Iesu Keriso mai lenei aoaoga faavae e faatatau i tamaiti. Faitau fuaiupu nei, ma vaavaai mo manatu e mafai ona e faaopoopo i itu uma e lua o lau siata.

• Moronae 8:10–15

• Moronae 8:18–24

Valaaulia tamaiti aoga e faaopoopo i le siata. Afai e aoga, mafaufau e fesili atu po o a manatu sese e ono i ai i tagata ua faasa’o e nei fuaiupu.

Faaalu sina taimi e vaai ai i upumoni ua e tusia i le koluma lona lua o le siata. Manatunatu loloto i le fesili lenei:

• E mafai faapefea e le malamalama i nei upumoni e uiga i le Tama Faalelagi ma Iesu Keriso ona fesoasoani ia i tatou i o tatou olaga i aso nei?

Valaaulia ni nai tamaiti aoga e tali i le fesili o loo i luga. Afai e aoga, mafaufau e fai atu i tamaiti aoga e faasoa mai ni tulaga latou te ono feagai lea e mafai ai ona fesoasoani le iloaina o nei upumoni. Atonu e aofia ai le taimi e faaosoosoina ai i latou po o isi ia talitonu e faatagaina e le Atua na o nisi o tagata ina ia faaolaina. Mulimuli i uunaiga a le Agaga, ma vaavaai mo avanoa e fesoasoani ai i tamaiti aoga ia lagona le alofa o le Alii.

Toe mafaufau i le tala i faifeautalai e toalua mai le amataga o le lesona.

• E faavae i mea ua e aoaoina i le aso, o le a sau tala e fai atu i matua o lenei tamaitiiti e fesoasoani ai ia la’ua maua le filemu ia Iesu Keriso?

Valaaulia tamaiti aoga e tusi se tali i lenei fesili e faaaoga ai ia le itiiti ifo ma le lua ni fuaiupu sa latou suesueina i lenei lesona. O le isi filifiliga e mo tamaiti aoga e faataitai ai le faaleo o a latou tali i se tala faatino nai lo le na o le tusia i lalo. Ia mautinoa ua malamalama tamaiti aoga o le faamoemoega o lenei faiga o le fesoasoani lea i tagata ia lagona le faamoemoe ma le filemu e ala i le Togiola a Iesu Keriso; e le o le faitioina o faiga faalelotu a isi.

Manatu ma Talaaga o Faamatalaga

E mafai e tamaiti laiti ona agasala?

Sa aoao mai Peresitene Dallin H. Oaks o le Au Peresitene Sili:

Ua tatou malamalama mai la tatou aoaoga faavae e faapea, a o lei oo i le tausaga e tali atu ai, o se tamaitiiti “ua le mafai ona latou faia se agasala” [Moronae 8:8]. I le faagasologa o lena taimi, e mafai e tamaiti ona faia ni mea sese, e oo lava i mea sese e sili ona ogaoga ma faatamaia lea e tatau ona faasa’oina, ae o a latou amioga e le faitaulia o ni agasala. (Dallin H. Oaks, “Sins and Mistakes,” Ensign, Oct. 1996, 65)

Mataupu Faavae ma Feagaiga 29:47. O le a le uiga o tamaiti e “amata ona tali mai i latou”?

Na aoao mai e Elder Bruce R. McConkie (1915–85) o le Korama a Aposetolo e Toasefululua:

O le tali atu e le pasae atoatoa i luga o se tamaititi i soo se taimi o lona olaga. E faasolosolo lemu lava ona tali atu tamaiti, i le aluga o tausaga. O le mafai ona tali atu o se faagasologa, e le o se sini ia ausia pe a pasia ni fuainumera fitoitonu o le tausaga, aso, ma itula. I la tatou faaaliga ua fetalai mai ai le Alii, “E lē mafai ona agasala i latou, ona ua lē tuuina atu ia Satani le mana e faaosooso ai i tamaiti laiti, sei oo ina amata ona tali mai i latou i oʼu luma.” (MF&F 29:47.) Ae peitai, o le a oo mai le taimi, e moni ai le tali atu ma o le a i ai foi le agasala i olaga o i latou o e tutupu ae i tulaga masani. O le valu tausaga o le matua, o le matua lea e papatiso ai. (Bruce R. McConkie, “The Salvation of Little Children,” Ensign, Apr. 1977, 6)

Moronae 8:12, 19, 22. O le a le uiga o le “ola ia Keriso”?

Ina ia ola ia Keriso o lona uiga ia togiolaina e ala i le Togiola a Iesu Keriso ma agavaa e ola i le malo selesitila. O i latou e le mafai ona tali atu e togiolaina ma faaolaina ia Keriso e ala i le mana o le Togiola a Iesu Keriso. O i latou e mafai ona tali atu e mafai ona valaaulia le mana togiola o Iesu Keriso i o latou olaga e ala i le faatuatua, salamo, papatisoga, ma le mauaina o le Agaga Paia (Moronae 8:25–26).

Gaoioiga Faaopoopo e Aoao Ai

Moronae 8:8, 11. O tamaiti laiti e atoaota e ala ia Iesu Keriso

O se upumoni e tasi e mafai ona e faamamafaina o le, o tamaiti e maliliu a o lei oo i tausaga e tali atu ai e faaolaina i le malo selesitila. Mafaufau e valaaulia tamaiti aoga e faitau le Moronae 8:8, 11 ma le Mataupu Faavae ma Feagaiga 137:10 e faailoa mai ai lenei upumoni. Fesoasoani i tamaiti aoga ia malamalama o fanau laiti e faaolaina i le malo selesitila e aunoa ma le manaomia o le salamo ma le papatisoga (tagai Moronae 8:11). E mafai ona fesoasoani le vitio lenei i tamaiti aoga e faaloloto ai lo latou malamalama.

Moronae 9:6. “Ia ta galulue pea ma le filiga”

Afai e lava sou taimi, atonu e te manao e valaaulia tamaiti aoga e faitau mai i se isi tusi na tusia e Mamona ia Moronae. Mafaufau e faasoa atu se ata faataitai e pei o lenei: “I le avea ai ma se tasi o lau vasega po o le korama, ua talosagaina oe e valaaulia se tasi o isi tagata e lei sau i sauniga lotu po o gaoioiga i le silia ma le tausaga. A uma ona e tuuina atu ni valaaulia patino mo le tolu masina ua tuanai, e lei sau lava lenei tagata i soo se fonotaga po o gaoioiga.” Valaaulia tamaiti aoga e faasoa mai po o a ni mea latou te ono faia i lenei tulaga. Fai atu i tamaiti aoga e faitau le Moronae 9:1–6, ma vaavaai mo fautuaga o le a faaaoga i le ata faataitai. Valaaulia tamaiti aoga e faasoa mai manatu e uiga i mea o loo aoao mai e Mamona. E mafai ona e fai atu fesili e pei o nei: Aisea o le a faigata ai le faia o mea o loo aoao mai e Mamona? Aisea o le a lelei ai le faia o mea ua aoao mai e Mamona?

Moronae 9:25. “Ia siitia a’e oe i luga e Keriso”

Mafaufau e faapa’u se moli ua fofo’e ma se moli e le’i fofo’ea i se vai e vaai pe opeopea. Valaaulia tamaiti aoga e mafaufau loloto po o le a se mea e ono aumaia ai i tatou i lalo ma se mea e siitia ai i tatou i luga i le olaga.

Valaaulia tamaiti aoga e faitau le Moronae 9:25–26, ma vaavaai mo le mea na fai mai ai Mamona atonu na siitia ai le agaga o Moronae. Mafaufau e fai atu fesili e pei o nei: O a aoaoga o i nei fuaiupu e mafai ona siitia ai lou agaga? Aisea? O le a sou manatu o le a le uiga o le faapea, e mafai e Iesu Keriso ona sii ae i tatou? O le a se taimi na e oo ai i le tosinaga o le sii ae e Keriso i lou olaga?