Moronae 7:1–19

“Sailiili ma le Filiga i le Malamalama o Keriso”

E mafai i nisi taimi ona faigata ona iloa le mea sa’o ma le mea e le sa’o. Peitai, ua saunia e le Atua le fesoasoani mo i tatou. O Moronae, i le faaaogaina o upu a lona tama, na faamalosiauina i tatou e faaaoga le Malamalama o Keriso ia iloa ai le sa’o mai le sese. O lenei lesona e mafai ona fesoasoani ia te oe e faalagolago ai ia Iesu Keriso e faamasino ai i le va o le lelei ma le leaga.

Faamalosiau i tamaiti aoga e mafaufau loloto e uiga i mataupu faavae o le talalelei. O le suesue ma le toto’a i tusitusiga paia e mafai ona musuia ai tamaiti aoga e manatua pe na faapefea ona tosinaina o latou olaga e mataupu faavae o le talalelei. Valaaulia tamaiti aoga e toe mafaufau i aafiaga ua mavae na fesoasoani ia i latou e faalatalata atili atu ai ia Iesu Keriso.

Sauniuniga a le tamaitiiti aoga: Valaaulia tamaiti aoga e o mai saunia e faasoa mai pe faapefea e filifiliga latou te faia ona tosinaina ai lo latou talitonuga ia Iesu Keriso.

Gaoioiga e Ono Mafai Ona Aoao Ai

O le fea o faatafafā e vaivai lona lanu?

Mafaufau e amata le vasega i le faaali atu o le ata lenei. Valaaulia tamaiti aoga e tilotilo i faatafafa lanuefuefu e lua ma ta’u atu i se paga po o le fea e vaivai lona lanu.

Mata e faateia oe i le iloa o faatafafa uma e lua e tutusa lanu? Ua manatu lou faiai o faatafafa lanuefuefu e lua e eseese o la lanu o ona o lanu vaivai ma pā’auli o loo siomia ai.

Nai lo le faitauina o le parakalafa lenei, mafaufau e valaaulia tamaiti aoga e faitau le Isaia 5:20 ma fai atu ia i latou e faatusatusa le vaaiga taufaasese o faatafafa i le valoaga a Isaia e uiga i o tatou aso.

E pei o lenei vaaiga taufaasese, atonu e i ai ni tulaga e faigata ai ona faia faamasinoga sao. Na valoia e Isaia e faapea, o aso e gata ai, o nisi tagata o le a “fai mai, ua lelei le mea leaga, a e leaga le mea lelei; [ma] fai ma malamalama le pouliuli, a e fai foi ma pouliuli le malamalama” (Isaia 5:20; tagai foi 2 Nifae 15:20).

Ina ia fesoasoani i tamaiti aoga e mafaufau pe faapefea ona latou vaai i le faataunuuina o le valoaga a Isaia i o tatou aso, mafaufau e talanoaina se tasi pe sili atu o nei fesili ma tamaiti aoga.

• O le a se auala se tasi ua e vaaia ai tagata i o tatou aso ua “fai mai, ua lelei le mea leaga, a e leaga le mea lelei”?

• O le a le mea e faigata ai i se tasi ona iloa gofie pe manino le upumoni?

Valaaulia tamaiti aoga e mafaufau loloto le leoa i a latou tali i fesili nei:

• E faapefea ona e filimaotia pe ua sa’o pe sese se mea?

• O le a lou mautinoa e mafai ona e iloa le lelei mai le leaga? Aisea?

Mafaufau i se mea e te manao e iloa manino atili e lelei pe leaga. Mo se faataitaiga, atonu e manatu se tasi ua lelei la latou filifiliga o musika, ae atonu e le ioeina e o latou matua. O ai e sa’o? O isi faataitaiga o le filifili lea po o le fea le tulaga e tu ai i se faafitauli faaagafesootai, filifili po o ai e faauo i ai, auai i se mea e fiafia i ai, ma isi mea faapena.

A o e suesue i le aso, vaavaai mo mea e mafai ona fesoasoani ia te oe e iloa ai pe lelei se mea pe leai.

O le eseesega i le va o le lelei ma le leaga.

E pei o Isaia, na vaai foi Moronae i o tatou aso (tagai Mamona 8:35). Sa ia faaaofia ai le fesoasoani mo i tatou i le Tusi a Mamona. Ina ua uma ona aoao atu i le taua o le faia o galuega lelei ma le manatu moni i ai (tagai Moronae 7:1–11), sa ia tusia upu na aoao atu e lona tama, o Mamona, i tagata o le Ekalesia e uiga i le faamasinoina i le va o le lelei ma le leaga.

Faitau le Moronae 7:12–17, ma mafaufau e faailoga mea e te maua mo uunaiga taitasi o loo i lalo:

1. Auala e mafai ona tatou iloa ai pe o lelei se mea

2. Auala e mafai ona tatou iloa ai pe o leaga se mea

3. O mea e faia e le Faaola e fesoasoani ai ia i tatou

Afai e te lagona o le a sili atu ona aoga, tusi ia uunaiga e tolu o loo i luga i le laupapa ma valaaulia tamaiti aoga e tusi ni fuaitau talafeagai na latou mauaina i lalo ifo o mea taitasi.

• E faavae i mea sa e mauaina i nei fuaiupu, e faapefea ona e aoteleina ia faamatalaga na talanoaina?

Mai le Moronae 7:12–17 e mafai ona tatou iloa ai o mea uma e mai le Atua e valaaulia ai i tatou e fai mea lelei, talitonu ia Iesu Keriso, ma alofa ma auauna atu i le Atua. I se isi itu, o le mea ua leaga e faatauanauina i tatou e agasala, faafitia Iesu Keriso, pe tau faasaga i le Atua.

E mafai e tamaiti aoga ona fai lenei gaoioiga taitoatasi, i vaega toalaiti, pe o se vasega.

Ina ia fesoasoani ia e malamalama i aoaoga a Mamona, manatu faapea, e talitonu se tagata o musika o latou faalogologo i ai ma le auala latou te faaaogaina ai a latou telefoni ma isi tekinolosi e lelei, ae e le ioeina e o latou matua po o taitai.

• E faavae i upumoni ua e faailoaina, o le a se mea e mafai e lenei tagata ona fesili ifo ai ia i latou lava e iloa ai pe lelei pe leai a latou musika ma tekinolosi?

Faalogo i tali a tamaiti aoga ma mafaufau e tusi i luga o le laupapa. Afai e le ta’ua maia e tamaiti aoga, mafaufau e faaaoga faataitaiga nei:

• Pe o le faalogologo i lenei musika po o le faaaogaina o la’u telefoni ma tekinolosi i le ala o loo ou faia ai …

  • … faatumu lo’u mafaufau i mafaufauga e fai le lelei pe fai le agasala?

  • … uunaia au e fai mea o le a faia pe le faia e se soo o Iesu Keriso?

  • … fesoasoani ia ou fiafia i mea a le Atua pe leai?

Ia matau atonu e manaomia ona e mafaufau loloto i tagata pepese faapitoa po o ni pese taitasi, faapea foi ni polokalama, taaloga, po o ala o faasalalauga faapitoa. E le gata i lea, o le tele o le taimi e te faaaluina i se gaoioiga atonu o se vaega taua lea e mafaufau i ai.

Malamalama e fesoasoani e te vaai ai

Atonu ua e matauina i nisi o tulaga atonu e faigata ona faamasino i le va o le sa’o po o le sese.

Mafaufau e fesoasoani i tamaiti aoga ia iloa mea ua talosagaina i latou e vaai faalemafaufau i ai i le parakalafa lenei.

E mafai ona faia lenei mea i le tapeina o moli ma fai atu i tamaiti aoga e taumafai e faamatala se ata pe faitau se mea. Ona toe ki lea o moli ma valaaulia i latou e toe faamatala pe toe faitau i ai.

Faatasi ai ma lenei atafaatusa i le mafaufau, matau fasifuaitau i le fuaiupu 16 o loo faaalia ai le ala e fesoasoani ai le Faaola ia i tatou.

Faitau le saunoaga lenei a Peresitene Henry B. Eyring o le Au Peresitene Sili e fesoasoani e te malamalama ai i le Malamalama o Keriso:

O fanau uma a le Tama Faalelagi e fananau mai i le lalolagi ua tuuina atu i ai i le taimi e fananau ai, se meaalofa mauafua, o le Malamalama o Keriso. E te lagonaina lena mea? O le lagona o le mea sa’o ma le mea sese ma le mea moni ma le mea pepelo. Sa i ai lena mea ia te oe talu mai ona amata lau malaga i le olaga. …

… E te faia filifiliga i aso uma ma toetoe lava o itula uma e te savali ai pea i le malamalama po o le agai ese atu i le pogisa. (Henry B. Eyring, “Savavali i le Malamalama,” Liahona, Me 2008, 123–124)

• O le a se mea ua e aoaoina e uiga i le Malamalama o Keriso?

Mo nisi faamatalaga i le Malamalama o Keriso, tagai Gospel Topics, “Light of Christ,” topics.ChurchofJesusChrist.org.

Faitau le Moronae 7:18–19, ma vaavaai mo nisi fautuaga na tuuina mai e Mamona e uiga i le faamasinoina i le va o le lelei ma le leaga.

• O le a sou manatu i le uiga o le “sailiili ma le filiga i le Malamalama o Keriso”?

  Faalogo ma le toto’a i tali a tamaiti aoga. Atonu e ta’ua e tamaiti aoga le mafaufau loloto filemu, mafaufau i faaiuga, ma faalogo i o tatou lotofuatiaifo po o le leo i totonu. O le isi manatu o le mafaufau i mea o le a aumaia faalatalata atili ai i tatou ia Iesu Keriso. Afai e aoga, mafaufau e fai atu nisi o fesili nei:

• E mafai faapefea ona avea le faataitaiga ma aoaoga a le Faaola e pei o se malamalama e fesoasoani ia i tatou e faamasino sa’o ai i le va o le sa’o ma le sese i aso nei?

• O a nisi o auala e mafai ona tatou faalogo ai i Ana afioga ma lagona ai Lana faatosinaga o taialaina i tatou?

Atonu foi e aoga le fesili, “O anafea na mafai ai ona e iloa se mea e lelei pe leaga ona o le malamalama o Keriso i lou olaga?”

Faaaogaina o mea ua e aoaoina

Toe mafaufau i le tulaga na e mafaufau muamua i ai ina ua talosagaina oe e mafaufau i se mea e te manao e iloa atili pe lelei pe leai. Faaalu ni nai minute e mafaufau ai ma le agaga tatalo pe ono faapefea ona e faaaogaina mataupu faavae sa e aoaoina i le asō e filimaoti ai pe sa’o pe sese. Taumafai e saili ma le filiga i le Malamalama o Keriso a o e mafaufau loloto i le tulaga. Tusifaamaumau ou manatu i lau api faamaumau mo suesuega.

O fesili nei e mafai ona faaaoga e faauma ai le vasega i se talanoaga e uiga i mea na aoaoina e tamaiti aoga.

• O le a se mea ua e aoaoina i le asō e mafai ona fesoasoani e faaleleia ai lou tomai e filifili ai i le va o le sa’o ma le sese?

• O a ni vaega se lua pe tolu o le olaga o e vaaia ai le manaomia ona iloa lelei o le lelei mai le leaga? Aisea?

Manatu ma Talaaga o Faamatalaga

O le a le mea e faia e le Malamalama o Keriso?

Na aoao mai Elder Timothy J. Dyches o le Fitugafulu:

I Lona alofa e atoatoa, ua ofo mai ai e le Atua le malamalama o Keriso i tagata uma “e o mai i le lalolagi” [Mataupu Faavae ma Feagaiga 93:2] ia o latou “iloa le lelei mai le leaga” [Moronae 7:16] ma ia uunaia ai “e faia pea le lelei” [Moronae 7:13]. O lena malamalama, e faaalia mai o ia lava e ala i mea e masani ona tatou ta’ua o lo tatou manatu fuatiaifo, e valaaulia i tatou ia galulue ma ia sili atu, ia avea ma tagata sili e mafai ona tatou avea ai. (Timothy J. Dyches, “O Le Malamalama e Pipii i le Malamalama,” Liahona, Me 2021, 113)

E faapefea ona fesoasoani le Malamalama o Keriso ia i tatou ma isi?

Na aoao mai Elder Mark A. Bragg o le Fitugafulu:

O le Malamalama o Keriso o le a fesoasoani tatou te vaai atu ai i isi e ala i fofoga o le Faaola. O le a atili atu ona tatou alolofa ma malamalama i tauiviga a isi. O le a fesoasoani tatou te onosai atili ai ia i latou o e atonu e le tapuai e pei o i tatou pe auauna atu e pei ona tatou faia. O le a fesoasoani tatou te malamalama atili ai i le fuafuaga sili o le fiafia ma iloa ai le ala tatou te i ai uma i totonu o lena fuafuaga sili o le alofa. E aumaia ai le ola, uiga, ma le faamoemoega i mea uma tatou te faia. (Mark A. Bragg “Susulu Pea Lava Pea Seia oo i le Aso Atoatoa,” Liahona, Me 2017, 38)

Gaoioiga Faaopoopo e Aoao Ai

O se isi amataga

Mafaufau e faaali atu se ata o se aai po o se fale ona faaū lea i lalo.

Ta’u atu i tamaiti aoga, na ta’ua e Elder Richard J. Maynes o le Fitugafulu lo tatou lalolagi i ona po nei o le “faaū i lalo” (“ O Se Sootaga Faaselesitila i Ou Tausaga Talavou,” Liahona, Nov. 1997, 30). Valaaulia tamaiti aoga e faitau le Isaia 5:20–21 ma faasoa mai ni auala o ono faaū ai i lalo lo tatou lalolagi.

Faasoa atu le faamatalaga lea a Elder Maynes:

“A o tuputupu a’e tagata talavou i lenei lalolagi faaū i lalo, ua ia te outou se luitau tele i le feagai ai ma uunaiga eseese o le olaga i ona po nei” (Richard J. Maynes, “O Se Sootaga Faaselesitila i Ou Tausaga Talavou,” Liahona, Nov. 1997, 30).

Moronae 7:5–12. Ma le loto faamaoni

Valaaulia tamaiti aoga e tali fesili nei: “O le a le taua o lo tatou loto pe a tatou taumafai e fai galuega lelei? Aisea?” E mafai e tamaiti aoga ona faitau le Moronae 7:5–12 ma vaavaai mo tali i nei fesili. Fesoasoani i tamaiti aoga ia malamalama i upu ma fasifuaitau e pei o le “loto faamaoni” ma le “fai toa’i” lea e mafai ona faamatalaina ai la tatou tautinoga e mulimuli ia Iesu Keriso pe leai foi. Valaaulia i latou e faamatala mai ni auala e mafai ai e se tasi ona faia mea nei ma le loto faamaoni: tatalo, auai i le lotu, ma auauna atu i isi. Valaaulia foi i latou e faasoa mai mea e mafai e se tasi ona fai e saili ai le loto sa’o pe afai e le o ia i latou i le taimi nei.

Fesoasoani i se tasi ia iloa le lelei mai le leaga

Valaaulia tamaiti aoga e mafaufau faapea o le mekasini o le Mo le Malosi o le Autalavou o loo i ai le fesili lenei i le latou vaega o “Fesili ma Tali”:

“Ou te iloa e tatau ona faigofie ona iloa le mea lelei ma le mea leaga, ma o le tele lava o taimi e mafai ona ou iloa. Peitai, o nisi taimi e i ai i a’u uo ni mafuaaga lelei mo le faia ma le talitonu i mea latou te faia. E mafai faapefea ona ou iloa le mea lelei ma le mea leaga pe a foliga mai e le manino i taimi uma le laina o le lelei ma le leaga?”

Valaaulia tamaiti aoga e tusi se tali i le fesili lenei. Tuu atu i tamaiti aoga se taimi e suesue ai le Moronae 7:12–19 ma mau faaopoopo po o aoaoga faaperofeta e uiga i le autu.