Môrônia 10:1–7

Mandray ny fijoroana ho vavolombelonao manokana momba ny Bokin’i Môrmôna

zatovo mamaky ny Bokin’i Môrmôna

Nahatsapa fahatsapana na fihetseham-po avy amin’ny Fanahy ve ianao fa marina ny Bokin’i Môrmôna? Raha toa ka izany, inona no zavatra niainana na asa natao nanampy anao hahazo izany? Ao amin’ny sasany amin’ny zavatra nosoratany farany, i Môrônia dia nanantitrantitra fa Andriamanitra no loharanon’ny fahamarinana rehetra. Amin’ny alalan’ Andriamanitra, isika dia afaka mandray fijoroana ho vavolombelona manokana momba ny fahamarinan’ny Bokin’i Môrmôna, sy ny fisian’i Jesoa Kristy marina ary “ny fahamarinan’ny zavatra rehetra” “amin’ny alalan’ny herin’ny Fanahy Masina” (Môrônia 10:5). Ity lesona ity dia afaka manampy anao hahalala amin’ny tenanao manokana fa marina ny Bokin’i Môrmôna.

Mifantoha amin’ireo fitsipika mitondra fiovam-po. Ampio hahita fotopampianarana sy fitsipika izay afaka manamafy orina ny fifandraisan’izy ireo amin’ny Ray any An-danitra sy i Jesoa Kristy ny mpianatra. Amporisiho izy ireo handinika ny fomba ahafahan’ireo fahamarinana ireo mampitombo ny fiovam-pony sy manampy azy ireo hiasa amim-pinoana.

Fanomanana ny mpianatra: Asao hamaky ny Môrônia 10:1–7 ny mpianatra, hitadiavana ny teny na andian-teny rehetra izay manampy azy ireo hahatakatra ny zavatra ilaina mba hahafantarana ny fahamarinana momba ny Bokin’i Môrmôna.

Sahanasa fianarana azo atao

Fijoroana ho vavolombelona momba ny Bokin’i Môrmôna

Eritrereto hoe iza amin’ireto fanambarana ireto no takatrao indrindra tamin’ny fotoana nanombohanao nandalina ny Bokin’i Môrmôna:

• Tsy azoko antoka hoe fantatro fa marina ny Bokin’i Môrmôna.

• Atokisako ny hafa izay nilaza tamiko fa marina ny Bokin’i Môrmôna.

• Nahatsapa fahatsapana avy amin’ny Fanahy Masina aho fa marina ny Bokin’i Môrmôna.

Diniho ny fijoroana ho vavolombelona anananao momba ny Bokin’i Môrmôna amin’izao fotoana izao. Rehefa mandalina ianao, dia eritrereto ny dingana manaraka hampanaovin’ny Tompo anao mba hahazoana, sy hampitomboana ary hijanonana ho mafy amin’ny fijoroana ho vavolombelona anananao.

Ny famporisihan’i Môrônia

Rehefa avy nirakitra an-tsoratra ireo fampianaran-drainy i Môrônia, dia nampianatra ny fomba ahafahan’ny olona rehetra mahafantatra amin’ny tenany manokana fa marina ny Bokin’i Môrmôna.

Vakio ny Môrônia 10:3–5 ary hevero ny hanisy marika ny zavatra nolazain’i Môrônia momba ny fomba ahafahantsika mahafantatra ny fahamarinan’ny Bokin’i Môrmôna. Mety ho azonao heverina ihany koa ny hijery ilay horonantsary hoe “Manasa ny rehetra hanatona an’i Kristy i Môrônia” manomboka eo amin’ny kaodim-potoana 4:39 hatramin’ny 5:32, hita ao amin’ny ChurchofJesusChrist.org.

Ny Môrônia 10:4–5 dia andinin-tsoratra masina fifehezana fotopampianarana. Hevero ny hanisy marika ireo andalan-tsoratra masina fifehezana fotopampianarana amin’ny fomba miavaka mba hahafahanao mahita azy ireny mora foana. Ao amin’ny lesona manaraka ianao dia hanana fahafahana hanazatra tena hampihatra ny fotopampianarana nampianarina tao amin’io andininy io amina fanontaniana na toe-java-misy iray.

Hevero ny hanoratra ity fanambarana tsy feno manaraka ity eny amin’ny solaitrabe sy hanasa ny mpianatra handika izany ao amin’ny diary fandalinan’izy ireo. Avy eo dia asao izy ireo iray kilasy hameno azy eny amin’ny solaitrabe.

• Afaka mahafantatra amin’ny alalan’ny herin’ny Fanahy Masina aho fa marina ny Bokin’i Môrmôna rehefa …

Ny sahanasa manaraka dia voarindra araka ny andian-teny telo amin’ny torohevitr’i Môrônia. Hevero ny fomba mety hahafahanao manampy ny mpianatra hampitombo ny fahatakaran’izy ireo ireo andian-teny telo ireo. Azonao atao ny mizara ny mpianatra ho vondrona kely sy hanendry ny vondrona tsirairay amin’ny iray amin’ireto sahanasa fandalinana manaraka ireto. Fantaro raha tsara kokoa ny hampisehoana ny toromarika amin’ireo sahanasa ireo na ny hanomezana tahadika ny vondrona tsirairay. Rehefa avy mifanakalo hevitra amin’ny valintenin’izy ireo ny vondrona, dia azon’izy ireo atao ny mizara amin’ny kilasy. Azon’ny mpianatra atao ihany koa ny mamintina ny hevitr’izy ireo eo akaikin’ny fanambarana eny amin’ny solaitrabe.

Vakio ny Bokin’ i Môrmôna

Ny Filoha Russell M. Nelson dia nilazalaza ny sasany amin’ireo fitahiana azontsika raisina amin’ny alalan’ny fandalinana ny Bokin’i Môrmôna. Eritrereto ny mety ho niainanao ireo fitahiana ireo rehefa nandalina azy io ianao.

Filoha Russell M. Nelson

Mampanantena anareo aho fa rehefa mandalina ombam-bavaka ny Bokin’i Môrmôna isan’andro ianareo dia handray fanapahan-kevitra tsara kokoa ianareo, isan’andro. Mampanantena aho fa rehefa misaintsaina ny zavatra halalininareo ianareo dia hisokatra ny varavaran’ny lanitra, ka handray ny valin’ny fanontanianareo sy torolalana ho an’ny fiainanareo ianareo. (Russell M. Nelson, “Ny Bokin’i Môrmôna: hanao ahoana re ny fiainanao raha tsy nisy azy?,” Liahona, nôv. 2017, 62–63)

• Efa nisy niainanao ve ireo fitahiana izay nampanantenain’ny Filoha Nelson an’ireo izay mandalina ny Bokin’i Môrmôna?

Asao hizara ny sasany amin’ireo fomba niainany ireo fitahiana ireo ny mpianatra izay maniry hanao izany. Ataovy azo antoka fa tsy misy mpianatra ataonao mahatsapa ho sadaikatra raha tsy misy zavatra niainana tonga ao an-tsainy. Omeo toky izy ireo fa mbola afaka miaina ireo fitahiana ireo izy ireo rehefa manohy mandalina ny Bokin’i Môrmôna.

Ny fahafantarana ireo fitahiana izay tonga avy amin’ny famakiana ny Bokin’i Môrmôna dia afaka manamafy fa marina izy io ary avy amin’ Andriamanitra.

Saintsaino ny famindrampon’ny Tompo

• Inona no ohatra ara-tsoratra masina sasantsasany amin’ny olona nandray ny famindram-pon’ny Tompo? Mety ho afaka mijery vitsivitsy ianao, tahaka an’i Nefia (2 Nefia 4:20–25), i Almà Zanany (Almà 36:17–21), na ny Nefita nositranin’ny Mpamonjy nandritra ny fitsidihany (3 Nefia 17:6–9).

• Inona avy no ohatra sasantsasany amin’ny famindrampon’ny Tompo eo amin’ny fiainanao na ny fiainan’ny olona iray fantatrao?

• Nahoana araka ny eritreritrao no afaka manampy anao handray fijoroana ho vavolombelona momba ny Bokin’i Môrmôna amin’ny alalan’ny Fanahy Masina ny fisaintsainana ny famindram-pon’ny Tompo?

Manontany an’Andriamanitra amim-kitsimpo sy amin’ny tena finiavana ary finoana an’i Kristy

• Inona araka ny eritreritrao no dikan’ny hoe manontany an’ Andriamanitra amin-kitsimpo? Amin’ny tena finiavana? Miaraka amin’ny finoana an’i Jesoa Kristy (Môrônia 10:4)? Raha mila fanampiana ianao amin’ny famaliana izany, dia vakio ny Joseph Smith—Tantara 1:10–17, hitadiavana ny fomba niantomoran’i Joseph Smith tanora ny vavaka nataony tamin-kitsimpo, sy tena finiavana, ary finoana an’i Kristy. (Fanamarihana: Ny andian-teny hoe tena finiavana dia midika fa raha vao maharay valiny iray amin’ireo vavakao ianao, dia hanao asa amin-kitsimpo amin’ilay fanambarana noraisinao.)

• Ahoana no ahafahan’ny fanaovana izany manampy antsika handray fijoroana ho vavolombelona momba ny Bokin’i Môrmôna amin’ny alalan’ny Fanahy Masina?

Ny fijoroana ho vavolombelona ananako manokana momba ny Bokin’i Môrmôna

Ny Filoha Henry B. Eyring ao amin’ny Fiadidiana Voalohany dia nizara ny zavatra niainany tamin’ny fampiharana ny tanjon’i Môrônia. Vakio ity fanambarana manaraka ity na jereo ilay horonatsary “Vavolombelona velona” manomboka eo amin’ny kaodim-potoana 13:51 hatramin’ny 14:31, hita ao amin’ny ChurchofJesusChrist.org.

Filoha Henry B. Eyring

Manantena aho fa efa nanandrana izany fampanantenana izany ho an’ny tenanareo manokana daholo ianareo na hanao izany ato ho ato. Mety tsy ho amin’ny alalan’ny zavatra iainana ara-panahy izay miseho indray mandeha sy mahery vaika ny valin’izany. Ho ahy dia tamin’ny fomba mangingina no nahatongavan’izany tamin’ny voalohany. Kanefa nihanahery ny fahatongavan’izany isaky ny namaky sy nivavaka mikasika ny Bokin’i Môrmôna aho.

Tsy miantehitra fotsiny amin’ny zavatra nitranga tamin’ny fotoana lasa aho. Mba hiarovako ny fitomboan’ny fijoroana ho vavolombelona ananako momba ny Bokin’i Môrmôna, dia mandray matetika ilay fampanantenan’i Môrônia aho. Tsy raisiko ho fitahiana mandeha ho azy toy ny fanomezana voaray mandrakizay izany hoe fahazoana fijoroana ho vavolombelona izany. (Henry B. Eyring, “Fijoroana ho vavolombelona Mitombo,” Liahona, mey 2011, 127)

• Ahoana no ahafahan’ny tenin’ny Filoha Eyring mihatra amintsika na impiry na impiry amakiantsika ny Bokin’i Môrmôna?

• Amin’ny fomba ahoana no mety hijoroan’ny Fanahy Masina ho vavolombelona amintsika ny amin’ny fahamarinan’ny Bokin’i Môrmôna?

• Ahoana no ahafahan’ny fijoroana ho vavolombelona momba ny Bokin’i Môrmôna manamafy orina ny fifandraisanao amin’ny Ray any An-danitra sy ny fijoroanao ho vavolombelona momba Azy Ireo?

Asao ny mpianatra hizara ny fijoroan’izy ireo ho vavolombelona momba ny Bokin’i Môrmôna sy ny fomba nahatongavan’izy ireo tamin’ny fahalalana fa marina izy io. Azonao atao ihany koa ny mizara ny fijoroana ho vavolombelona anananao manokana.

Ireto manaraka ireto dia afaka manampy ny mpianatra hampihatra ny Môrônia 10:3–5.

Soraty ao amin’ny diary fandalinanao ny zavatra azonao atao hampiharana ireo fitsipika ampianarina ao amin’ny Môrônia 10:3–5. Eritrereto ny fomba ahafahanao manohy mandalina ny Bokin’i Môrmôna, misaintsaina ny famindrampon’ny Tompo, ary mangataka fijoroana ho vavolombelona amin’ Andriamanitra amin’ny alalan’ny Fanahy Masina. Aiza ary rahoviana no hanaovanao ireo zavatra ireo? Ahoana no mety hamalian’ny Tompo ny vavakao?

Fanamarihana sy fampahalalana voarakitra

Ahoana no nahatongavan’ny hafa tamin’ny fahalalana fa marina ny Bokin’i Môrmôna?

Ireto loharano manaraka ireto dia afaka manampy anao hahatakatra sy hianatra avy amin’ny zavatra niainan’ny hafa. Ireo rehetra ireo dia hita ao amin’ny ChurchofJesusChrist.org.

• “Mandray fijoroana ho vavolombelona momba ny Bokin’i Môrmôna” (1:30), nataon’ny Filoha Boyd K. Packer

• “Ahoana no ahafantarako fa marina ny Bokin’i Môrmôna” (1:11)

• “Hita amin’ny alalan’ny herin’ny Bokin’i Môrmôna,” nataon’ny Loholona Rubén V. Alliaud, manomboka eo amin’ny kaodim-potoana 1:21 hatramin’ny 4:39

• “Mitodiha Aminy dia ho avy ny valiny” manomboka eo amin’ny kaodim-potoana 0:00 hatramin’ny 1:06, nataon’ny Loholona James B. Martino

• “Raha tena te hahafantatra ianao, dia hahafantatra ianao,” nataon’ny Loholona Walter F. González

Ny Rahavavy Zina Young sy ny Rahavavy Eliza R. Snow, olona niova fo tany am-boalohany sy mpitarika tao amin’ny Fiangonana naverina tamin’ny laoniny, dia nandray fijoroana ho vavolombelona tamina fomba samy hafa.

Rahavavy Zina D. H. Young

Rahavavy Eliza R. Snow

Nilaza i Zina hoe “nipetraka teo amin’ny fitehenan’ny varavarankelin’ny efitrano fandraisam-bahininay aho no nahita voalohany ny Bokin’i Môrmôna, ilay boky vaovao hafahafa” fony izy 14 taona. Rehefa noraisiny ilay boky, dia nisy “fitaomana mahafinaritra avy amin’ny Fanahy Masina niaraka tamin’izany ka tonga hatramin’ny hoe nofihiniko teny an-tratrako tamim-pahatsapana fifaliana lehibe ilay izy, ka teo am-panaovana izany dia sady nibitsibitsika hoe ‘Ity no fahamarinana, fahamarinana, fahamariana!’”

Tsy tonga mora foana toy zany ny faharesen-dahatra ho an’i Eliza. Ny reniny sy ny rahavaviny no niditra tao amin’ny Fiangonana voalohany. Nifankahita tamin’i Joseph Smith i Eliza ary nieritreritra hoe manana “endrika marin-toetra” izy. Izy dia naheno ny roa tamin’ireo Vavolombelona Telo—lehilahy izay nahita sy nisahana ireo takelaka volamena—niresaka momba ilay boky, ary “fijoroana ho vavolombelona mahavariana” tsy mbola henony hatramin’izay mihitsy. Na izany aza, tsy te hihetsika haingana loatra izy ka ho voafitaka. Nieritreritra izy fa mety ho “zavatra mandalo fotsiny” izany rehetra izany ka nila efa-taona nandalinana ny soratra masina izy vao “azony antoka ny fahamarinan’izany” ary nanapa-kevitra hatao batisa izy. (Janiece Johnson, “A Witness of One’s Own,” Ensign, des. 2020, 37)

Ahoana no ahafahan’ny fananako fijoroana ho vavolombelona manokana mitahy ahy?

Nampianatra toy izao ny Filoha Dieter F. Uchtdorf, izay Mpanolotsaina Faharoa tao amin’ny Fiadidiana Voalohany tamin’izany:

Filoha Dieter F. Uchtdorf

Mety misy hilaza hoe sarotra loatra ireo dingana ireo na koa hoe tsy ahitam-bokatsoa ny fanaovana azy. Kanefa izaho dia milaza fa io fijoroana ho vavolombelon’ny tena manokana momba ny filazantsara sy ny Fiangonana io no zavatra manan-danja indrindra tokony ho azonao amin’ity fiainana ity. Tsy vitan’ny hoe hitahy sy hitarika anao amin’ity fiainana ity izany, fa hisy fiantraikany mivantana amin’ny fiainanao ho amin’ny mandrakizay ihany koa. (Dieter F. Uchtdorf, “Mandray Fijoroana ho Vavolombelona momba ny Fahazavana sy ny Fahamarinana,” Liahona, nôv. 2014, 22)

Nizara toy izao ny Filoha Russell M. Nelson:

Filoha Russell M. Nelson

Tsy mila manontany tena mikasika izay marina ianareo (Môrônia 10:5). Tsy mila manontany tena ianareo hoe iza no azonareo itokiana. Amin’ny alalan’ny fanambarana ho an’ny tena manokana, no ahafahanareo mahazo fijoroana ho vavolombelona anareo manokana fa tenin’ Andriamanitra ny Bokin’i Môrmôna fa mpaminany i Joseph Smith ary ity no Fiangonan’ny Tompo. Na inona na inona mety holazain’ny hafa na hataony, dia tsy misy olona afaka hanaisotra ny fijoroana ho vavolombelona napetraka tao am-ponareo sy ao an-tsainareo momba izay marina. (Russell M. Nelson, “Fanambarana ho an’ny Fiangonana, fanambarana ho an’ny fiainantsika,” Liahona, mey 2018, 95)

Sahanasa fianarana fanampiny

Mizara ny fijoroana ho vavolombelona ananan’izy ireo momba ny Bokin’i Môrmôna

Hamaranana ity lesona ity dia hevero ny hanome ny mpianatra tsirairay ny tahadikan’ny Bokin’i Môrmôna, izay hanoratana ny fijoroana ho vavolombelon’izy ireo. Azon’ny mpianatra omena olona iray fantatr’izy ireo izay tsapan’izy ireo fa vonona handray izany ireo tahadikan’ny bokin’i Môrmôna ireo. Raha tsy izany dia azon’ny mpianatra omena ireo misiônera eo an--toerana ireo tah.adikan’ny Bokin’i Môrmôna ireo mba hozarainy rehefa mitory

Mamoròna zavatra hojerena hahatakarana ny Môrônia 10:3–5

Mba hanampiana azy ireo hahatakatra ny teny ao amin’ny Môrônia 10:3–5, dia azon’ny mpianatra atao ny mamorona zavatra hojerena mitovitovy amin’ireo hita ao amin’ny fizaràna hoe “andalan-tsoratra anampy andalan-tsoratra” ao amin’ny gazetiboky Ho zatovo mahery!. Jereo ny febroary 2021, febroary 2022, na edisiôna vao haingana kokoa ohatra.

Môrônia 10. “Mamporisika”

Ampahatsiahivo ny mpianatra fa ny teny hoe mamporisika dia midika hoe manentana mafy na miangavy. Hevero ny hanasa ny mpianatra hitady ao amin’ny Môrônia 10 ny fotoana maro ampiasan’i Môrônia io teny io. Inona no anasan’i Morônia hataontsika? Inona avy no fomba sasantsasany ahafahantsika manaraka ireo fanasana ireo?

Afaka manampy antsika hahafantatra ny fahamarinan’ny zava-drehetra ny Fanahy Masina

Azon’ny mpianatra vakina ny Môrônia 10:5–7 hitadiavana ny fomba ahafahan’ny Fanahy Masina manampy azy ireo amin’ny fianaran’izy ireo rehetra. Ifanakalozy hevitra ny fomba ahafahan’ny fahafantarana izany miantraika amin’ny fianarana ara-pilazantsara sy tsy ara-pivavahana ataon’ny mpianatra. Azonareo ifanakalozan-kevitra ihany koa ny fomba ahafahan’ny Fanahy Masina manampy antsika hanavaka ny fahamarinana amin’ny fahadisoana.