“Long dispela Buk Momon,” Ol Buk Momon Stori (2023)
Long dispela Buk Momon.
Jisas Krais na ol pipol bilong Em long ol Amerika
Buk Momon em i skripsa. Em i tisim yumi long Bikpela Jisas Krais na visit bilong Em i go long ol Amerika bipo tru. Long Buk Momon, yumi ken lainim long gospel bilong Jisas. Em i tisim yumi hau long gat bel isi na hau yumi ken stap wantaim God na Jisas gen sampela de.
Taitol pes bilong Buk Momon; tok i go pas long Buk Momon; 3 Nifai 11
Buk Momon profet bilong God i raitim. Ol i bin rait long ol metol ol i kolim ol plet. Ol stori na testimoni bilong ol i helpim yumi gat feit long Jisas. Ol i raitim ol stori bilong ol planti lain husat bin stap long Amerika bipo tru.
Taitol pes bilong Buk Momon; tok i go pas long Buk Momon
Wanpela grup i kam long Amerika olsem 600 yias pastaim long Jisas i bon. Ol i kamap tupela nesen ol i kolim olsem ol lain bilong Leman na ol lain bilong Nifai.
Tok i go pas long Buk Momon; 1 Nifai 1:4
Pastaim tru, wanpela grup i kam long Tawa bilong Babel i go long Amerika. Ol i kolim ol olsem ol lain bilong Jaret.
Tok i go pas long Buk Momon; Ita 1:33–43
Ol profet bilong God i tisim ol pipol. Taim ol pipol i harim na kipim ol komanmen bilong God, Em bai helpim ol. Ol profet i tis long Jisas na tok Em bai bon long Jerusalem. Ol lain bilong Nifai na ol lain bilong Leman i lainim olsem Jisas bai visitim ol bihain long dai bilong Em.
2 Nifai 1:20; 25:12–14; 26:1, 3, 9; Mosaia 3:5–11; Alma 7:9–13; Hilaman 3
Jisas i kam wankain olsem ol profet i bin tok. Bihain long Jisas i dai na i kirap bek, Em i visitim ol pipol. Em i larim wanwan man i pilim ol hap nil i sutim long han na lek bilong Em. Ol i save Jisas em i pikinini bilong God. Em i tisim ol gospel bilong Em, na ol pipol i raitim go daun. Ol i toktok long em i kam planti yias bihain.
3 Nifai 11:7–15, 31–41; 16:4; 4 Nifai 1:1–6, 13–22
Momon em bin wanpela profet husat i stap sampela handret yias bihain long Jisas i bin kam. Long taim bilong Momon, ol pipol i stop long bihainim Bikpela. Momon i bin gat ol dispela raiting bilong ol profet husat i stap pas long em. Em i putim planti ol raiting bilong ol long wanpela set ol plet. Ol dispela raiting i kamap Buk Momon.
Tok i go pas long Buk Momon; Ol Toktok bilong Momon 1:2–9; Momon 1:2–4, 13–17
Pastaim long Momon i dai, em i givim ol plet long pikinini man bilong em Moronai. Long taim bilong Moronai, ol pipol i mekim ol nogut pasin tru. Ol i laik kilim ol lain i bilip long Jisas. Moronai i laik helpim ol pipol long bihain taim, olsem na em i raitim planti moa ol plet na planim ol long stap seif.
Tok i go pas long Buk Momon; Ol Toktok blong Momon 1:1–2; Momon 8:1–4, 14–16; Moronai 1
Planti yias bihain, long 1823, Moronai i kam olsem wanpela ensel long Profet Joseph Smith. Moronai tokim Joseph we em bai painim ol plet. Wantaim helpim bilong God, Joseph i tanim tok long ol raiting i stap long ol dispela plet.
Tok i go pas long Buk Momon; Joseph Smith—History 1
God bai salim Holi Gos long helpim yu save taim samting i tru. Taim yu ritim dispela Buk Momon, yu ken pre na askim God sapos em i tru. Long wankain we, yu ken save olsem Jisas Krais em i Seivia bilong yu na Em i lavim yu.