« ថ្ងៃទី ២៨ ខែ មីនា ។ ហេតុអ្វីខ្ញុំត្រូវការដង្វាយធួនរបស់ព្រះយេស៊ូវគ្រីស្ទ ? គោលលទ្ធិ និង សេចក្តីសញ្ញា ២៩ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១ ( ឆ្នាំ ២០២០ )

« ថ្ងៃទី ២៨ ខែ មីនា ។ ហេតុអ្វីខ្ញុំត្រូវការដង្វាយធួនរបស់ព្រះយេស៊ូវគ្រីស្ទ ? »ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១

ព្រះគ្រីស្ទនៅសួនគេតសេម៉ានី ដោយ ហែនរិច ហូហ្វម៉ាន់

ថ្ងៃទី ២៨ ខែ មីនា

ហេតុអ្វីខ្ញុំត្រូវការដង្វាយធួនរបស់ព្រះយេស៊ូវគ្រីស្ទ ?

គោលលទ្ធិ និង សេចក្តីសញ្ញា ២៩

ប្រឹក្សាជាមួយគ្នា

ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬថ្នាក់ រយៈពេលប្រហែល ១០–២០ នាទី

នៅដើមការប្រជុំ សូមសូត្ររួមគ្នានូវ បាវចនាកូរ៉ុមបព្វជិតភាពអើរ៉ុន ឬ បាវចនាក្រុមយុវនារី ។ រួចហើយ សូមដឹកនាំការពិភាក្សាអំពីចំណុចដូចខាងក្រោមនេះ ហើយដាក់ផែនការពីរបៀបដើម្បីអនុវត្តតាមអ្វីដែលបងប្អូនពិភាក្សា ( បងប្អូនអាចសម្រេចចិត្តនៅក្នុងការប្រជុំគណៈប្រធានថា ចំណុចមួយណាដែលត្រូវពិភាក្សា ) ៖

កូរ៉ុម ឬថ្នាក់របស់យើង ។ តើយើងអាចធ្វើអ្វីខ្លះដើម្បីបង្កើនសាមគ្គីភាពក្នុងចំណោមសមាជិកកូរ៉ុម ឬថ្នាក់ ? តើគោលដៅអ្វីដែលយើងចង់ធ្វើការរួមគ្នា ?
កាតព្វកិច្ច ឬទំនួលខុសត្រូវរបស់យើង ។ តើយើងកំពុងធ្វើអ្វីខ្លះ ដើម្បីចែកចាយដំណឹងល្អ ? តើយើងបានមានបទពិសោធន៍អ្វីខ្លះមកពីការធ្វើកិច្ចការព្រះវិហារបរិសុទ្ធ និងពង្សប្រវត្តិ ?
ជីវិតរបស់យើង ។ តើយើងបានឃើញព្រះហស្ដរបស់ព្រះអម្ចាស់នៅក្នុងជីវិតរបស់យើងតាមរបៀបណា ? តើអ្វីទៅដែលបានបំផុសគំនិតយើងនៅក្នុងការសិក្សាព្រះគម្ពីរនាសប្ដាហ៍នេះ ?

នៅចុងបញ្ចប់នៃមេរៀននេះ សូមធ្វើដូចខាងក្រោមនេះតាមការគួរ ៖

ថ្លែងទីបន្ទាល់អំពីគោលការណ៍ដែលបានបង្រៀន ។
រំឭកសមាជិកកូរ៉ុម ឬថ្នាក់អំពីផែនការ និងការអញ្ជើញទាំងឡាយដែលបានដាក់អំឡុងពេលនៃការប្រជុំ ។

បង្រៀនគោលលទ្ធិ

ដឹកនាំដោយអ្នកដឹកនាំយុវវ័យ ឬយុវវ័យម្នាក់ រយៈពេលប្រហែល ២៥–៣៥ នាទី

រៀបចំខ្លួនខាងវិញ្ញាណ

ប្រធាន អ៊ែសរ៉ា ថាហ្វ ប៊ែនសឹន បានបង្រៀន ៖ « គឺដូចជាបុរសម្នាក់ដែលមិនសូវចង់បរិភោគអាហារ រហូតទាល់តែគាត់ឃ្លានដែរ នោះគាត់មិនចង់បានសេចក្ដីសង្គ្រោះរបស់ព្រះគ្រីស្ទទេ រហូតដល់គាត់ដឹងពីមូលហេតុដែលគាត់ត្រូវការព្រះគ្រីស្ទសិន ។ គ្មាននរណាម្នាក់ដឹងបានគ្រប់គ្រាន់ និងត្រឹមត្រូវពីមូលហេតុដែលគាត់ត្រូវការព្រះគ្រីស្ទនោះទេ រហូតដល់គាត់យល់ និងទទួលយកគោលលទ្ធិនៃការធ្លាក់ និងឥទ្ធិពលរបស់វាមកលើមនុស្សជាតិទាំងអស់ » ( « The Book of Mormon and the Doctrine and Covenants » Ensign ខែ ឧសភា ឆ្នាំ ១៩៨៧ ទំព័រ ៨៥ ) ។ កាលបងប្អូនសិក្សា គោលលទ្ធិ និង សេចក្តីសញ្ញា ២៩ នៅសប្ដាហ៍នេះ បងប្អូនអាចកត់សម្គាល់ពីការពិពណ៌នារបស់ព្រះអង្គសង្គ្រោះអំពីការធ្លាក់ និងរបៀបដែលយើងត្រូវបានប្រោសលោះចេញពីវា ។ តើបងប្អូនទទួលបានទីបន្ទាល់អំពីព្រះយេស៊ូវគ្រីស្ទ និងតួនាទីរបស់ទ្រង់ក្នុងនាមជាព្រះអង្គសង្គ្រោះ និងជាព្រះប្រោសលោះរបស់បងប្អូនដោយរបៀបណា ? សូមគិតថា តើការពង្រឹងទីបន្ទាល់របស់សមាជិកកូរ៉ុម ឬថ្នាក់អំពីទ្រង់ នឹងផ្លាស់ប្ដូរពួកគេយ៉ាងណាទៅ ។ កាលបងប្អូនរៀបចំខ្លួន សូមពិចារណាសិក្សា « សេរីភាព និងការធ្លាក់របស់អ័ដាម និងអេវ៉ា » « ដង្វាយធួនរបស់ព្រះយេស៊ូវគ្រីស្ទ » និង « បេសកកម្មដ៏ទេវភាពរបស់ព្រះយេស៊ូវគ្រីស្ទ » នៅក្នុងជំពូកទី ៣ នៃសៀវភៅប្រកាសដំណឹងល្អរបស់យើង ( [ ឆ្នាំ ២០១៩ ] ទំព័រ ៤៩–៥២, ៦១–៦២ ) ។

យុវនារីនៅក្នុងថ្នាក់រៀន — ដោយសារព្រះអង្គសង្គ្រោះបានប្រោសលោះយើងចេញពីការធ្លាក់ នោះយើងអាចរកឃើញសេចក្ដីអំណរ ។

រៀនជាមួយគ្នា

ដើម្បីណែនាំការពិភាក្សានៅថ្ងៃនេះ បងប្អូនអាចអញ្ជើញអស់អ្នកដែលបងប្អូនបង្រៀនឲ្យសរសេរនៅលើក្ដារខៀនអំពីអ្វីៗ ដែលពួកគេដឹងអំពីការធ្លាក់របស់អ័ដាម និងអេវ៉ា ។ ឧទាហរណ៍ តើពួកគេរៀនបានអ្វីខ្លះអំពីការធ្លាក់ចេញមកពី គោលលទ្ធិ និង សេចក្ដីសញ្ញា ២៩:៣៦–៥០ ? តើយើងឃើញមានភស្ដុតាងអ្វីខ្លះអំពីការធ្លាក់នៅជុំវិញខ្លួនយើង ? សកម្មភាពខាងក្រោមនេះនឹងជួយកូរ៉ុម ឬថ្នាក់របស់បងប្អូនឲ្យរកឃើញពីរបៀបដែលដង្វាយធួននៃព្រះយេស៊ូវគ្រីស្ទជួយយើងឲ្យយកឈ្នះលើឥទ្ធិពលនៃការធ្លាក់ ។

ដើម្បីយល់ពីការធ្លាក់របស់អ័ដាម និងអេវ៉ាកាន់តែច្បាស់ នោះសមាជិកកូរ៉ុម ឬថ្នាក់អាចអាន « ការធ្លាក់ » នៅក្នុងសៀវភៅ ពិតចំពោះសេចក្ដីជំនឿ ( ទំព័រ ១៨–២០ ) ឬ « សេរីភាព និងការធ្លាក់របស់អ័ដាម និងអេវ៉ា » នៅក្នុងជំពូកទី ៣ នៃសៀវភៅ ប្រកាសដំណឹងល្អរបស់យើង ( ទំព័រ ៤៩–៥០ ) ។ សូមអញ្ជើញពួកគេឲ្យនឹកស្រមៃថា មានមិត្តម្នាក់បានសួរថា « ហេតុអ្វីខ្ញុំត្រូវការព្រះយេស៊ូវគ្រីស្ទ ? » សូមអញ្ជើញពួកគេឲ្យបង្រៀនគ្នាជាដៃគូ ពីរបៀបដែលពួកគេនឹងឆ្លើយសំណួរនោះ ដោយផ្អែកទៅលើអ្វីដែលពួកគេបានរៀនពីការអានរបស់ពួកគេ ។
តើបងប្អូនអាចជួយសមាជិកកូរ៉ុម ឬថ្នាក់ឲ្យរៀនមកពីបទគម្ពីរ នូវមូលហេតុដែលពួកគេត្រូវការដង្វាយធួនរបស់ព្រះយេស៊ូវគ្រីស្ទដោយរបៀបណា ? របៀបមួយគឺត្រូវសរសេរសេចក្ដីយោងបទគម្ពីរមួយចំនួនមកពី « ធនធានគាំទ្រ » ដាក់លើក្ដារខៀន រួចហើយសរសេរប្រយោគសង្ខេបសម្រាប់សេចក្ដីយោងទាំងនោះនៅលើចម្រៀកក្រដាស ។ សូមចែកចម្រៀកក្រដាសមួយឲ្យសមាជិកកូរ៉ុម ឬថ្នាក់ម្នាក់ៗ ។ សូមឲ្យពួកគេអានសេចក្ដីយោងបទគម្ពីរដែលសរសេរនៅលើក្ដារខៀន ហើយរកមើលសេចក្ដីយោងមួយដែលត្រូវនឹងប្រយោគសង្ខេបរបស់ពួកគេ ។ ( ប្រយោគមួយចំនួនអាចសំដៅទៅបទគម្ពីរលើសពីមួយ ) ។ សូមអញ្ជើញសមាជិកកូរ៉ុម ឬថ្នាក់ម្នាក់ៗឲ្យអានវគ្គបទគម្ពីរ ដែលត្រូវនឹងប្រយោគរបស់ពួកគេឲ្យឮៗ ហើយចែកចាយអ្វីដែលពួកគេបានរៀនអំពីមូលហេតុដែលយើងត្រូវការដង្វាយធួនរបស់ព្រះអង្គសង្គ្រោះ ។
សូមអញ្ជើញសមាជិកកូរ៉ុម ឬថ្នាក់ឲ្យឆ្លើយនឹងសំណួរដូចតទៅនេះរៀងៗខ្លួន ៖ តើខ្ញុំមានពរជ័យតាមរយៈដង្វាយធួនរបស់ព្រះយេស៊ូវគ្រីស្ទដោយរបៀបណា ? តើព្រះអង្គសង្គ្រោះចង់ឲ្យខ្ញុំផ្លាស់ប្ដូរអ្វីខ្លះ ដើម្បីខ្ញុំអាចទទួលបានពរជ័យនៃដង្វាយធួនរបស់ទ្រង់កាន់តែពេញលេញ ? រួចហើយ សូមឲ្យពួកគេពិភាក្សាសំណួរទីមួយរួមគ្នា ។ ពួកគេអាចរំឭក « ដង្វាយធួនរបស់ព្រះយេស៊ូវគ្រីស្ទ » និង « បេសកកម្មដ៏ទេវភាពរបស់ព្រះយេស៊ូវគ្រីស្ទ » នៅក្នុងជំពូកទី ៣ នៃសៀវភៅប្រកាសដំណឹងល្អរបស់យើង ( ទំព័រ ៥១–៥២, ៦១–៦២ ) និងវីដេអូមួយ ឬច្រើននៅក្នុងវគ្គ « ធនធានគាំទ្រ » ។ សូមឲ្យពួកគេចែកចាយអ្វីដែលពួកគេបានរៀន ។

ធ្វើសកម្មភាពដោយសេចក្ដីជំនឿ

សូមលើកទឹកចិត្តសមាជិកកូរ៉ុម ឬថ្នាក់ឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីប្រព្រឹត្តតាមការបំផុសគំនិត ដែលពួកគេបានទទួលនៅថ្ងៃនេះ ។ តើមេរៀនថ្ងៃនេះទាក់ទងនឹងគោលដៅផ្ទាល់ខ្លួន ដែលពួកគេបានដាក់យ៉ាងដូចម្ដេច ? ប្រសិនបើពួកគេចង់ សមាជិកកូរ៉ុម ឬថ្នាក់អាចចែកចាយគំនិតរបស់ពួកគេបាន ។

ធនធានគាំទ្រ

គោលលទ្ធិ និង សេចក្តីសញ្ញា ១៩:១៦–១៩ ( ព្រះយេស៊ូវគ្រីស្ទបានបង់ថ្លៃសម្រាប់អំពើបាបរបស់យើង ដើម្បីកុំឲ្យយើងរងទុក្ខ ប្រសិនបើយើងប្រែចិត្ត )
នីហ្វៃទី២ ៩:៦–១៦; អាលម៉ា ៤២:៦–៩ ( ព្រះយេស៊ូវគ្រីស្ទសង្គ្រោះយើងចេញពីសេចក្ដីស្លាប់ និងស្ថាននរក )
នីហ្វៃទី២ ២:៥–១០; ហេលេមិន ១៤:១៥–១៧ ( មានតែតាមរយៈព្រះយេស៊ូវគ្រីស្ទប៉ុណ្ណោះ ទើបយើងអាចត្រឡប់ទៅកាន់ព្រះវិញបាន )
ម៉ូសាយ ៣:៧; អាលម៉ា ៧:១១–១៣ ( ដោយសារព្រះគ្រីស្ទបានលើកដាក់មកលើព្រះអង្គទ្រង់នូវទុក្ខលំបាក និងអំពើបាបរបស់យើង នោះទ្រង់ជ្រាបពីរបៀបជួយយើង )
ម៉ូសេ ៥:១០–១២ ( ដោយសារព្រះអង្គសង្គ្រោះបានប្រោសលោះយើងចេញពីការធ្លាក់ នោះយើងអាចរកឃើញសេចក្ដីអំណរ )
Walter F. González « The Savior’s Touch » Liahona ខែ វិច្ឆិកា ឆ្នាំ ២០១៩ ទំព័រ ៩០–៩២
« Where Justice, Love, and Mercy Meet » « Why We Need a Savior » « The Atonement Enables Us » ( វីដេអូ ) នៅលើគេហទំព័រ ChurchofJesusChrist.org

ការបង្រៀនតាមរបៀបរបស់ព្រះអង្គសង្គ្រោះ

ព្រះអង្គសង្គ្រោះបានអធិស្ឋានសម្រាប់ពួកសិស្សរបស់ទ្រង់ ហើយបានបន្ដបម្រើពួកគេ ។ ទ្រង់បានស្វែងរកឱកាសដើម្បីគង់នៅជាមួយពួកគេ ហើយបង្ហាញសេចក្ដីស្រឡាញ់របស់ទ្រង់ ។ តើបងប្អូនមានឱកាសអ្វីខ្លះ ដើម្បីធ្វើការណ៍ដូចគ្នានេះជាមួយអ្នកដែលបងប្អូនបង្រៀន ? ( សូមមើល ការបង្រៀនតាមរបៀបរបស់ព្រះអង្គសង្គ្រោះ [ ឆ្នាំ ២០១៦ ] ទំព័រ ៦ ) ៕